خبراردو:

پی ڈی پی نے مرکزی حکومت کی جانب سے جماعت اسلامی جموں وکشمیر پر پابندی عائد کئے جانے کی کارروائی کو جابرانہ اقدام سے تعبیر کیا ہے۔ پارٹی صدراور سابق وزیر اعلیٰ محبوبہ نے بتایا کہ نئی دہلی نے جماعت اسلامی پر پابندی عائد کرکے ریاست جموں وکشمیر میں سیاسی سطح پر مفاہمت کے تمام دروازے بند کردئے۔انہوں نے مرکزی حکومت کی طرف سے جماعت پر پابندی عائد کئے جانے کی مذمت کرتے ہوئے کہا کہ اس طرح کے اقدام سے ریاست میں سیاسی طریق کار کے لیے زمین تنگ ہوگی اور مفاہمت کے تمام دروازے بند ہونے کے امکانات ہے۔

ریاست کی موجودہ صورتحال پر بلائی گئی ہنگامی مجلس سے خطاب کے دوران پی ڈی پی صدر نے بتایا کہ بھارت نے کشمیر کے تئیں شتر مرخ کا وطیرہ اپنا یا ہے اور یہاں جاری دھماکہ خیز صورتحال کے لیے مرکزی حکومت انتہائی غیر سنجیدگی کا مظاہرہ کررہی ہے۔انہوں نے جماعت کا دفاع کرتے ہوئے بتایا کہ جماعت اسلامی ریاست کی ایک معروف سماجی اور مذہبی جماعت ہے جو پرامن ذرائع کے ذریعے اہم خدمات انجام دے رہی ہے۔ انہوں نے بتایا کہ جماعت تعلیمی میدان میں ریاست کے کونے کونے میں اپنا رول ادا کررہی ہے اور فی الوقت اس کے ساتھ بڑی تعداد میں تعلیمی ادارے وابستہ ہیں جہاں نئی نسل کو اخلاقیات کے حدود میں تربیت کی جارہی ہے۔انہوں نے بتایا کہ جماعت پرامن ذرائع کو استعمال میں لاکر سماج کے مختلف طبقوں کی خدمت انجام دے رہی تھی اور متعدد اوقات میں انہوں نے متشددانہ طریق کار سے خود کو علیحدہ ہونے کا اعلان بھی کردیا،لہٰذا اس طرح سے پرامن ذرائع سے کام کرنے والی جماعت پر پابندی عائد کرنے سے ریاست میں مفاہمت اور سیاسی سپیس متاثر ہوگی۔

انہوں نے بتایا کہ ایسا لگ رہا ہے کہ مرکزی حکومت نے صرف جابرانہ اقدامات کے ذریعے ہی آگے بڑھنے کا فیصلہ کیا ہے اور اس طرح ریاستی عوام کو طاقت اور جبر کے ذریعے خاموش کرنے کا من بنالیا ہے۔انہوں نے نئی دہلی کو خبردار کرتے ہوئے کہا کہ مسکولر پالیسی کے ذریعے کوئی بھی نتیجہ برآمد ہونے والا نہیں اور اس طرح کی جابرانہ پالیسی ماضی میں کامیاب رہی اور نہ مستقبل میں کامیاب رہنے کے امکانات ہیں۔پارٹی صدر محبوبہ مفتی نے مرکزی کابینہ کی طرف سے حالیہ فیصلوں پر انتہائی برہمی کا اظہار کرتے ہوئے کہا کہ نئی دہلی ریاست میں سیاسی انارکی کو ہوا دینے کی خاطر ریاستی آئین کے ساتھ چھیڑ چھاڑ کررہی ہے۔

انہوں نے بتایا کہ پی ڈی پی کبھی بھی ریزویشنز اور ترقیوں کے خلاف نہیں رہی ہے۔ ہماری پارٹی نے مرحوم مفتی محمد سعید کی زیر قیادت حکومت کے دوران سال2004تا 2005میں اس حوالے سے کئی اہم فیصلہ جات لئے تاہم اُس کے لیے ایک طریق کار واضح ہے لیکن جس طرح سے مرکزی کابینہ آئے روز فیصلے لے رہی ہے اُس سے ریاست کے آئین کی انتہائی پامالی ہورہی ہے۔انہوں نے بتایا کہ پی ڈی پی ریزرویشن معاملے کی مخالفت نہیں کرتی تاہم جس طرح گورنر کی قیادت والی انتظامیہ معاملات سے نپٹ رہی وہ قانون کے ساتھ خطرناک کھلواڑ ہے۔ریاست فی الوقت صدر راج کے دائرے میں آتی ہے اور گورنر صدر کا نمائندہ کہلاتا ہے اور یوں وہ ریاست کے انتظامی اُمور کی دیکھ ریکھ پر مامو ر ہے تاہم گورنر بذات خود ریاستی آئین کو بالائے طاق رکھ کر فیصلے نہیں لے سکتے ہیں۔ گورنر کی طرف سے اس طرح کا قدم آئینی بے ضابطگی کے سوا کچھ بھی نہیں ہے۔محبوبہ مفتی کا کہنا تھا کہ نئی دہلی ریاست کو مزید اختیارات دینے کے بجائے بچے کچے اختیارات سے بھی ریاست کو محروم کرنے پر تلی ہوئی ہے۔