عدالت عظمیٰ میں زیر سماعت قانون کا استعمال کرنا حتمی نتاءج پر اثر انداز ہونے کے مترادف:حسنین مسعودی

حد بندی کمیشن کے ممبر کے طور منتخب کئے جانے پر اپنا رد عمل ظاہر کرتے ہوئے نیشنل کانفرنس کے ممبر پارلیمان حسنین مسعودی نے جمعہ کے روز کہا کہ وہ اْس عمل کا حصہ نہیں بنیں گے جس کو اْنہوں نے چیلنج کیاہے ۔

انہوں نے کہا ہے کہ انتظامیہ کی طرف سے ’سریع الرفتار بھرتیوں ‘ کے اعلان کا مقصد بے روزگار نوجوانوں کو راحت دینا نہیں بلکہ یہاں ڈومیسائل نظام کو عملی جامہ پہنانے کا ایک منصوبہ ہے ۔

کشمیر نیوز سروس کے مطابق لوک سبھا کے سپیکر اْوم برلا نے گذشتہ روز نیشنل کانفرنس کے ارکان پارلیمان ڈاکٹر فاروق عبد اللہ، محمداکبر لون اور مسعودی کو اْس حد بندی کمیشن کے ارکان کے طور نامزد کیا تھا جس کو جموں کشمیر کی اسمبلی و پارلیمانی نشستوں کی نئی حد بندی عمل میں لانے کا کام سونپا گیا ہے ۔

پارٹی صدر ڈاکٹر فاروق عبداللہ نے تاہم ابھی اس سلسلے میں کوئی رد عمل ظاہر نہیں کیا ہے ۔ ایک میڈیا رپورٹ کے مطابق نیشنل کانفرنس کے ممبر پارلیمان حسنین مسعودی نے بھی اس بات کی وضاحت کی ہے کہ اْن کی پارٹی نے ابھی تک اس سلسلے میں کوئی حتمی فیصلہ نہیں لیا ہے ۔

رپورٹ کے مطابق انہوں نے کہا کہ کمیشن کے ارکان کی نامزدگی سے پہلے اْنہیں اعتماد میں نہیں لیا گیا ہے ۔ نیشنل کانفرنس کے ممبر پارلیمان حسنین مسعودی نے کہا ’ اْن کی پارٹی اس ضمن میں صلاح مشورہ کررہی ہے تاہم وہ ذاتی طور اس کمیشن میں شامل نہیں ہونگے‘ ۔ رپورٹ کے مطابق نیشنل کانفرنس کے ایک اور رکن پارلیمان اکبر لون نے بھی کہا ہے کہ نامزدگی سے قبل اْنہیں اعتماد میں نہیں لیا گیا ۔

لون کہنا تھا کہ اْن کی پارٹی کا یہی موقف ہے کہ وہ سیاسی قیدیوں کی رہائی سے قبل کسی سیاسی عمل کا حصہ نہیں بنے گی ۔ ادھر کے این ایس کو موصولہ تحریری بیان کے مطابق نیشنل کانفرنس کے رکن پارلیمان جسٹس (ر) حسنین مسعودی نے کہا ہے کہ انتظامیہ کی طرف سے ’سریع الرفتار بھرتیوں ‘ کے اعلان کا مقصد بے روزگار نوجوانوں کو راحت دینا نہیں بلکہ یہاں ڈومیسائل نظام کو عملی جامہ پہنانے کا ایک منصوبہ ہے ۔

انہوں نے کہا کہ تنظیم نوایکٹ2019، جس کے تحت ریاست کا اپنا آئین ہونے کے باوجود جموں وکشمیر کا درجہ کم کرنے کے ساتھ ساتھ اسے منقسم کیا گیا،غیر آئینی ہے ۔ یہی وجہ ہے کہ اس معاملے کیخلاف ہر سطح پر احتجاج ہو ا اور معاملہ عدالت عظمیٰ کے روبرو زیر سماعت ہے ۔

جموں و کشمیر تنظیم نوپر مشتمل ڈومیسائل نظام کے تحت (ریاستی قوانین کی اصلاح) آرڈر2020 ،جموں و کشمیر سول سروس2020اورجموں وکشمیر گرانٹ آف ڈومیسائل سرٹیفکیٹ (طریقہ کار) قواعد 2020،کا فریم ورک اور اس نظام کے تحت اٹھائے گئے تمام اقدامات غیر آئینی ہیں ۔

انہوں نے کہا کہ مرکزی حکومت اور ریاستی انتظامیہ آئینی سکیم سے جڑے ہوئے ہیں اور جس تنظیم نو ایکٹ کے تحت یہ اقدامات اٹھائے جارہے ہیں ، وہ ابھی عدالت عظمیٰ میں زیر سماعت ہے اور سب سے اعلیٰ آئینی عدالت کے احترام میں اس کے اطلاق سے باز رہنا چاہئے ۔ ایساقانون، جس کی آئینی حیثیت عدالت عظمیٰ میں زیر بحث ہو، کے اختیارات کا استعمال کرنا حتمی نتاءج پر اثر انداز ہونے کے مترادف ہے ۔

حسنین مسعودی نے کہا کہ آئینی چیلنج ایک طرف، جموں وکشمیر کے باشندوں کیلئے10ہزار سریع الرفتار بھرتی عمل کو خوش آمد کرنے کی کوئی بھی وجہ موجود نہیں ہے کیونکہ جموں وکشمیر کے پشتینی باشندوں کے مخصوص ان 10ہزار اسامیوں کیلئے اب وہ ہزاروں غیر ریاستی اُمیدوار بھی شریک ہونگے جو یہاں ڈومیسائل سرٹیفکیٹ حاصل کرنے کے اہل ہونگے ۔

انہوں نے کہا کہ ڈومیسائل نظام سے نہ صرف جموں وکشمیر کے نوجوانوں کے حقوق پر شب خون کے مترادف ہوگا بلکہ اس سے یہاں بے روزگاری کے گراف میں مزید اضافہ ہوگا ۔

انہوں نے انتظامیہ پر زور دیا کہ جموں وکشمیر کے 60ہزار سے زائد ڈیلی ویجروں ، کیجول لیبروں اور کنٹریکچول ملازمین کو مستقبل کیا جائے جو سالہاسال سے اپنی مستقلی کا انتظار کررہے ہیں ۔ حسنین مسعودی نے مرکزی حکومت سے بھی اپیل کی کہ وہ زمینی صورتحال کو تسلیم کرکے5اگست2019کو لئے گئے فیصلے کو فوری طور پر واپس لیں ۔