ہیرا نگر میں بین الاقوامی سرحد پر بی ایس ایف نے کیا پاکستانی ڈرون مارگرانے کا دعویٰ

سرینگر:ہند۔چین سرحدی کشیدگی کیساتھ ساتھ حد متارکہ پر ہند۔پاک سرحدی کشیدگی اور تنا ؤ میں مسلسل اضافہ دیکھنے کو مل رہا ہے،جس دوران برصغیر کی دو ایٹمی طاقتیں کی افواج کے درمیان متواتر بنیادوں پر آتشی گولہ باری کا تبادلہ ہورہاہے۔

تازہ آتشی گولہ باری کا لائن آف کنٹرول کے اوڑی سیکٹر ہوئی جسکے نتیجے میں خاتون سمیت 5افراد زخمی ہوئے جنہیں اسپتال منتقل کیا گیا جبکہ اس واقعہ میں مویشی بھی ہلاک ہوئے۔اس دوران ہیرا نگر میں بین الاقوامی سرحد پر بی ایس ایف نے پاکستانی ڈرون مارگرانے کا دعویٰ کیا ہے۔

کشمیر نیوز سروس کے مطابق برصغیر کی دو ایٹمی طاقتوں کے درمیان لائن آف کنٹرول پر آتشی گولہ باری کے تبادلے کا سلسلہ بدستور جاری ہے۔تفصیلات کے مطابق شمالی کشمیر کے بارہمولہ ضلع کے حاجی پیر اوڑی سیکٹر میں سنیچر کوکنٹرول لائن پر ہند۔پاک افواج کی آر پار گولہ باری کے نتیجے میں ایک خاتون سمیت 5عام شہری زخمی ہوگئے جن میں دو معصوم بچے بھی شامل ہیں۔

ذرائع کے مطابق شدید نوعیت کی آر پار گولی باری کے دوران کئی شیل راجہ محلہ اور میر محلہ نابلہ میں بھی آگرے۔ مقامی ذرائع نے بتایا کہ تین عام شہری اس گولہ باری کی وجہ سے زخمی ہوگئے جن کی شناخت60 سالہ احمد شیخ،20 سالہ مقبول منگلال اور سکینہ بیگم کے طور ہوئی ہے جبکہ شام دیر گئے مزید دو معصوم بچوں کے زخمی ہونے کی اطلاع ہے۔مذکورہ پانچوں زخمی شہریوں کوعلاج کے لئے نزدیکی اسپتال پہنچایا کیا گیا۔

ذرائع نے بتایا کہ گولہ باری سے ایل او سی کے متصل دیہات میں خوف ودہشت پھیل گیا ہے۔ انہوں نے بتایا کہ گولہ باری ہفتہ کی صبح شروع ہوئی اور وہاں تعینات بھارتی فوج نے اس کا بھر پور جواب دیا۔ ایس ایس پی بارہمولہ عبد القیوم نے اس واقعہ کی تصدیق کی ہے۔ یاد رہے کہ گذشتہ ہفتے اوڑی کے حاجی پیر سیکٹر میں سرحد پار سے ہونے والی گولہ باری سے ایک خاتون ہلاک اور 2 عام شہری زخمی ہوگئے تھے۔

اس دوران گولہ باری سے کئی مویشیوں کے ہلاک ہونے کی بھی اطلاعات ہیں۔قابل ذکر ہے کہ طرفین کے درمیان بین الاقوامی سرحد اور ایل او سی پر سال رواں کے دوران اب تک گولہ باری کے تبادلے کے زائد از 2 ہزار واقعات پیش آئے ہیں۔طرفین کے گزشتہ5اگست کو جموں وکشمیر ک ی خصوصی پوزیشن ختم کرنے اور سابق ریاست کو دو مرکزی انتظام خطوں میں تقسیم کئے جانے کے فیصلہ جات کے بعد کافی شدت آئی ہے۔سال2003 میں دونوں ممالک کے درمیان طے پائے جانے والے جنگ بندی معاہدے کے با وجود بھی طرفین کی فوج کے درمیان گولہ باری کے تبادلے کا سلسلہ تھمنے کا نام ہی نہیں لے رہا ہے۔

بارڈر سیکورٹی فورسز(بی ایس ایف) کے اہلکاروں نے سنیچر کی صبح بین الاقوامی سرحد کے نزدیک ہیرا نگر سیکٹر میں ایک ڈرون کو مار گرانے کا دعویٰ کیا ہے۔جموں و کشمیر پولیس کا کہنا ہے کہ بارڈر سیکورٹی فورس (بی ایس ایف) کے اہلکاروں نے سنیچرکی صبح کٹھوعہ میں بین الاقوامی سرحد کے متصل ایکپاکستانی ڈورن کو مار گرایا ہے جو’میڈ ان چائنا‘ تھا۔ نیز اس سے کچھ اسلحہ و گولہ بارود بشمول امریکی ساخت کی ایم 4 رائفل برآمد کرنے کا دعویٰ کیا گیا ہے۔

ایک میڈیا رپورٹ کے مطابق ضلع کٹھوعہ میں ایل او سی کے ہیرا نگر سیکٹر پر بی ایس ایف نے ہفتہ کی صبح قریب پانچ بجکر دس منٹ پر ایک ڈرون کو اڑتے ہوئے دیکھا۔ انہوں نے کہا کہ بی ایس ایف اہلکاروں نے اس پر آٹھ سے نو گولیاں چلائیں اور اس کو زمین بوس کردیا۔

رپورٹ کے مطابق گرائے جانے والے ڈرون کی تلاشی کے دوران ایک امریکی ساخت کی ایم 4 رائفل، اس کی دو میگزینیں اور گولیوں کے60 راؤنڈس، سات ایم 67 گرینیڈز برآمد کئے گئے نیز ڈرون، جو ’میڈ ان چائنا‘تھا، کے ساتھ چار بیٹریاں نصب دیکھی گئیں۔جموں وکشمیر پولیس کے سربراہ دلباغ سنگھ نے ایک مقامی خبر رساں ایجنسی کو بتایا کہ پاکستان کی طرف سے ڈورن کے ذریعے کٹھوعہ میں سرحد پر سامان چھوڑنے کی ایک اور کوشش کو ناکام بنا دیا گیا ہے۔

انہوں نے کہا کہ ڈرون کے پے لوڈ کی تلاشی کے دوران ایک امریکی ساخت کی ایم 4 رائفل، دو میگزین اور گولیوں کے ساٹھ راؤنڈس برآمد کئے گئے ہیں۔پولیس سربراہ نے کہا کہ یہ سامان کسی علی بھائی کے لئے تھے کیونکہ پے لوڈ پر اس کا نام لکھا ہوا تھا۔انہوں نے کہا کہ ڈرون8 فٹ چوڑا تھا اور لگتا ہے کہ یہ کٹھوعہ سیکٹر میں بی ایس ایف کے پنسار پوسٹ کے مقابل سر حد پار کی پاکستانی چوکی کے کنٹرول میں تھا۔دلباغ سنگھ نے کہا کہ کچھ ماہ قبل نگروٹہ ٹول پلازہ کے نزدیک ہلاک ہونے والے جیش محمد سے وابستہ جنگجوؤں کی تحویل سے اسی نوعیت کا اسلحہ برآمد کیا گیا تھا۔