رومانیا میں گرفتار لبنان کی شیعہ ملیشیاحزب اللہ کے ایک مبیّنہ اہم مالی اعانت کارکواسی ہفتے کامیابی کے ساتھ امریکا حوالگی کے بعد نیویارک منتقل کردیا گیا ہے۔امریکی محکمہ انصاف اب اس کے خلاف مقدمہ چلا رہا ہے۔

محمد بزی کورومانیا کے حکام نے فروری میں گرفتارکیا تھا۔انھیں واشنگٹن نے 2018 میں خصوصی طورپرنامزدعالمی دہشت گردقراردیا تھا۔ان پر ایران کی حمایت یافتہ حزب اللہ کو مالی، مادی اور تکنیکی مدد اور مالی خدمات مہیا کرنے کا الزام ہے۔

بروکلین میں امریکی اٹارنی کے دفتر کے ترجمان کے مطابق بزی کو منگل کے روزرومانیا سے نیویارک منتقل کیا گیاتھا۔ان کے خلاف بروکلین کی وفاقی عدالت میں فردِجُرم عاید کی گئی تھی اورانھوں نے بدھ کے روز الزامات کی صحت سے انکارکی درخواست دائر کی تھی۔

ترجمان نے العربیہ کو بتایا کہ مجسٹریٹ جج پیگی کیو نے بزی کومقدمے کی سماعت تک حراست میں رکھنے کا حکم دیا ہے۔

واضح رہے کہ حزب اللہ کوامریکا نے سنہ1997 میں ایک دہشت گرد گروپ قراردیا تھا اور کہا تھا کہ یہ تنظیم بیرون ملک امریکی فوجیوں، سرکاری ملازمین اور شہریوں کے خلاف دہشت گردی کے متعدد حملوں کی ذمہ دار ہے۔

امریکی محکمہ انصاف کے مطابق بزی نے مبیّنہ طور پر بیلجیئم، لبنان، عراق اور مغربی افریقا میں اپنے کاروبار سے حزب اللہ کو لاکھوں ڈالر فائدہ پہنچایا تھا۔فروری میں محکمہ انصاف نے بزی کے ساتھ ایک اور لبنانی شہری طلال شاہین کے خلاف فردِجُرم عاید کی تھی۔

بزی اورشاہین نے محکمہ خزانہ اور امریکی قانون نافذ کرنے والے حکام سے منی لانڈرنگ کوچھپانے کے لیے متعدد طریقے اختیار کیے تھے۔ان میں چین میں کسی تیسرے فریق کی تلاش کے ساتھ ساتھ امریکا بھرمیں لبنان میں قائم ریستوراں چین چلانے کے حقوق کے لیے ایک فرضی فرنچائزنگ معاہدہ بھی شامل تھا۔

بزی کی حوالگی سے ایک ہفتہ قبل امریکی استغاثہ نے حزب اللہ کے ایک اورمبیّنہ مالی معاون ناظم احمد پر امریکی پابندیوں سے بچنے اور کروڑوں ڈالر مالیت کے ہیرے اور آرٹ ورک فروخت کرنے کا الزام عاید کیا تھا۔

تاہم احمد کو ابھی تک گرفتار نہیں کیاجاسکاہے، لیکن اس کے ساتھ کام کرنے والے مبیّنہ افراد میں سے ایک سندرناگ ارجن کو پچھلے ہفتے برطانیہ میں گرفتار کیاگیا تھا۔برطانوی میڈیا نے بتایا کہ امریکا ناگ ارجن کی حوالگی کا بھی مطالبہ کررہا ہے۔

امریکا کی ایک تاریخ رہی ہے کہ وہ مطلوب افراد کی ان کے میزبان ممالک سے حوالگی کا مطالبہ کرتا رہتا ہے۔ان میں دہشت گرد گروہوں سےوابستہ افراد، خاص طورپرحزب اللہ کی مالی معاونت کے الزام میں گرفتار افراد شامل ہیں۔

لبنانی شہری غسان دیاب پرسنہ2016 میں حزب اللہ کے ساتھی کے طورپرفردِجُرم عاید کی گئی تھی۔ اسے 2019 میں قبرص میں گرفتارکیا گیا تھا اور ایک سال بعد اسے امریکا کے حوالے کر دیا گیا تھا۔

حزب اللہ کے ایک اورمبیّنہ لبنانی مالی اعانت کار قاسم تاج الدین کو 2017ء میں مراکش میں گرفتارکیا گیا تھا اوربعد میں امریکا کے حوالے کردیا گیا تھا۔ 2019 میں انھیں پابندیوں سے بچنے سے متعلق الزامات کا اعتراف کرنے پر پانچ سال قید کی سزا سنائی گئی تھی لیکن ٹرمپ انتظامیہ نے انھیں رہا کر دیا اورواپس بیروت بھیج دیا تھا،حالانکہ حکومت نے ایک عدالتی حکم کی مخالفت کی تھی جس میں انسانی ہمدردی کی بنیاد پر رہائی کے لیے ہنگامی درخواست دی گئی تھی۔