کشمیر میں سینٹرل ریزوپولیس فورس (سی آر پی ایف) کے سب انسپکٹر سمیت2افسران نے الگ الگ واقعات میں سرکاری رائفلوں سے خود کو گولی مار کر اپنی زندگیوں کا خاتمہ کیا۔ مہلوک افسر نے خودکشی سے متعلق نوٹ بھی لکھا جس میں اس نے لکھا تھا ’مجھے ڈر ہے،میں کورونا وائرس میں مبتلاء ہوں‘۔سی آر پی ایف کے ترجمان نے بتایا کہ حتمی رپورٹ آنے تک کچھ نہیں کہا جاسکتا ہے۔ادھر سی آر پی ایف کے سپیشل ڈائریکٹر جنرل نے خود کشی کے واقعات کو بد قسمتی سے تعبیر کیا اور کہا ’اس کی تحقیقات کی جائے گی کہ جوان انتہائی سنگین قدم کیوں اٹھاتے ہیں؟‘۔

کشمیر نیوز سروس کے مطابق سی آر پی ایف اہلکاروں کے خود کشی کے واقعات سرینگر اور اننت ناگ اضلاع میں پیش آئے جہاں 2افسروں نے انتہائی سنگین قدم اٹھاتے ہوئے اپنی زند گیوں کا خاتمہ کیا۔خود کشی کا پہلا واقعہ منگلوار کی علی الصبح جنوبی ضلع اننت ناگ میں پیش آیا،جہاں 96بٹالین سی آر پی ایف سے وابستہ سب انسپکٹر فتح سنگھ ولد عیدان سنگھ ساکنہ جیسلمیر راجستھان نے خود کو گولی مار کر خود کشی کی۔مذکورہ فوت شدہ افسر نے خود کشی سے قبل خود کشی نوٹ لکھا جس میں انہوں نے کہا تھا ’مجھے ڈر ہے،مجھے کورونا ہے‘۔مہلوک سی آر پی ایف افسر آکورہ مٹن اننت ناگ میں واقع کیمپ میں تعینات تھا۔سنگھ نے جونہی اپنے آپ گولی چلائی جسکی آواز اُسکے ساتھیوں نے سنی وہ فوراً جائے حادثہ پر پہنچ گئے۔

جہاں انہوں نے اپنے ساتھی کو خون میں لت پت پایا۔بتایا جاتا کہ اُسے زندیکی اسپتال منتقل کیا گیا،جہاں ڈاکٹر وں نے اُسے مردہ قرار دیا۔پولیس کے ایک افسر نے بتایا کہ سنگھ نے مرنے سے قبل ایک خود کشی نوٹ لکھا ہے،جس میں اس نے لکھا تھا ’میرے جسم کو کوئی نہ چھوئے،مجھے ڈر ہے،میں کورونا میں مبتلاء ہوں‘۔ان کا کہناتھا کہ مزید تحقیقات کیلئے مقدمہ درج کیا گیا۔اسٹیشن ہاؤس افسر (ایس ایچ او) آکورہ مٹن پولیس اسٹیشن جاذب احمد نے بتایا کہ کووڈ۔19پروٹوکول کو اس واقعہ کے حوالے سے اپنایا جارہا ہے۔کورونا جانچ کیلئے نمونے حاصل کئے گئے جبکہ پوسٹ مارٹم بھی کیا گیا۔ادھر سی آر پی ایف ترجمان،پنکج سنگھ نے بتایا کہ رپورٹ سے معلوم ہوگا کہ آیا مہلوک افسر کورونا پازیٹیو تھا یا نہیں۔انہوں نے کہا کہ دن بھر کی ناکہ پارٹی کیساتھ ڈیوٹی انجام دینے کے بعد وہ واپس یونٹ میں آیا تھا۔

ابھی تک اُس کے کووڈ وائرس میں مبتلاء ہونے کے شواہد نہیں ملے،حتمی رپورٹ کا انتظار کر نا ہوگا،تفصیلات میڈیا سے شیئر کی جائیں گی۔خود کشی کے دوسرے واقعے میں سرینگر میں ایک سی آر پی ایف اہلکار نے اپنی زندگی کا خاتمہ کیا۔معلوم ہوا ہے کہ کرن نگر سرینگر میں سی آر پی ایف کے ہی ایک اسسٹنٹ سب انسپکٹر نے بھی منگل کی صبح اپنی ہی بندوق سے اپنی زندگی خاتمہ کردیا۔سری نگرمیں مقیم سی آر پی ایف کے ترجمان پنکج سنگھ نے بتایا کہ سی آر پی ایف کی49 ویں بٹالین سے وابستہ سب انسپکٹر نے اپنی ہی بندوق سے اپنی زندگی تمام کردی۔

انہوں نے مہلوک افسر کی شناخت بنگالی بابو ساکن گوالیار مدھیہ پردیش کے بطور کی۔سی آر پی ایف کے سپیشل ڈائریکٹر جنرل ذولفقار حسن نے بتایا کہ2جوانوں کی جانب سے منگلوار کو اٹھائے گئے انتہائی سنگین قدم قابل افسوس اور بدقسمتی ہے۔انہوں نے کہا ’ہم سنگین قدم اٹھانے کی وجوہات کے حقائق کو جاننے کی کوشش کریں گی‘۔یہاں یہ بات قابل ذکر ہے کہ و ادی کشمیر میں تعینات فوج،نیم فوجی اور پیرا ملٹری فورس کے اہلکار وں میں خود کشی کے واقعات میں کافی اضافہ دیکھنے کو مل رہا ہے۔