خبراردو:

سرینگر بارہمولہ شاہراہ پر جمعہ کو اُس وقت ایک مختصر تصادم آرائی کے دوران 2جنگجوؤں کو فورسز نے ہلاک کردیا جب گاڑی میں سوار جنگجوؤں نے فورسز پارٹی پر فائرنگ کردی۔ اطلاعات کے مطابق فوج، پولیس اور سی آر پی ایف کی مشترکہ پارٹی نے شمالی کشمیر بارہمولہ کے کرالہ ہار پر ایک ناکہ بٹھایا گیا جہاں شاہراہ پر گزرنے والی چھوٹی بڑی گاڑیوں کی باریک بینی سے تلاشی عمل میں لائی جارہی تھی۔ اسی دوران سرینگرسے آرہی ایس یو وی گاڑی کاجونہی یہاں سے گزر ہوا تو ناکے پر موجود فورسز اہلکاروں نے گاڑی کو رکنے کا اشارہ کیا اور جونہی فورسز اہلکار وں نے گاڑی کے تلاشی لینے کے لیے پیش قدمی شروع کی تو اس میں موجود 2جنگجوؤں نے فورسز پارٹی پر خودکار ہتھیاروں سے فائرنگ شروع کردی۔

اطلاعات کے مطابق اس موقعے پر شاہراہ پر کچھ دیر کے لیے افرا تفری کا ماحول پیدا ہوا جبکہ سیکورٹی فورسز نے گاڑی کو چاروں اطراف سے اپنے گھیرے میں لیتے ہوئے فرار ہونے کے تمام راستوں کو مکمل طور پر سیل کردیا۔ اس دوران فورسز کی طرف سے جوابی کارروائی کے نتیجے میں 2جنگجوجاں بحق ہوگئے جن کی تحویل میں بھاری مقدار میں ہتھیار و گولہ بارود بھی ضبط کیا گیا۔ جھڑپ سے متعلق پولیس نے تفصیلات فراہم کرتے ہوئے کہا کہ کرالہ ہار بارہمولہ کے مقام پر ایک مختصر جھڑپ کے دوران 2جنگجوؤں کو ہلاک کردیا گیا۔

پولیس ترجمان نے بتایا کہ جمعہ دوپہر 1:30بجے سرینگر سے آرہی ایک سکارپیو گاڑی زیر نمبر JK01L-5792جونہی کرالہ موڑ پر پہنچ گئی تو یہاں بٹھائے گئے ناکے پر موجود فورسز پارٹی نے گاڑی کو رکنے کا اشارہ کیا۔ترجمان نے بتایا کہ جونہی تلاشی پارٹی نے سکارپیو گاڑی کی تلاشی شروع کی تو گاڑی میں موجود 2جنگجوؤں نے تلاشی پارٹی پر فائرنگ شروع کردی ۔ انہوں نے بتایا کہ گولیوں کے مختصر تبادلے میں 2جنگجوؤں کو جاں بحق کردیا گیاجبکہ طرفین کی فائرنگ کے نتیجے میں ایک پولیس اہلکار کو معمولی چوٹیں آئیں جسے علاج و معالجے کی خاطر ہسپتال منتقل کردیا گیا۔
پولیس ترجمان کے مطابق مارے گئے جنگجوؤں کی تحویل سے بھاری مقدار میں اسلحہ و گولہ بارود ضبط کیا گیا جن میں ایک عدد اے کے رائفل، ایک میگزین، ایک عدد یوبی جی ایل، چینی ساخت کے 2پستول، پستول میگزین 6عدد، 19راؤنڈس گولیاں، 52پستول گولیاں، گرینیڈ 3عدد، یو بی جی ایل گرینیڈ 2عدد شامل ہیں۔

انہوں نے بتایا کہ جھڑپ سے متعلق پولیس نے ایک مقدمہ زیرایف آئی آر نمبرآ76/2008درج کرتے ہوئے تحقیقات کا آغاز کردیا ہے۔ پولیس نے بتایا کہ اسکارپیو گاڑی کے ڈرائیور کو حراست میں لینے کے ساتھ ساتھ گاڑی کو بھی ضبط کیا گیا ہے۔واضح رہے 2روز قبل شمالی قصبہ پٹن میں ایک گرینیڈ حملے کے فوراً بعد تحریک المجاہدین نامی عسکری تنظیم سے وابستہ ایک جنگجو کو جائے واردات سے گرفتار کرلیا ۔ ادھر ایس ایس پی بارہمولہ امتیاز حسین نے فورسز کی مشترکہ کارروائی کو سراہتے ہوئے کہا کہ جنگجوؤں کا بظاہر جیش محمدنامی تنظیم سے تعلق معلوم ہوتا ہے تاہم پولیس مہلوک جنگجوؤں کی شناخت کو دریافت کررہی ہے۔انہوں نے بتایا کہ عمومی طور پر سیکورٹی ایجنسیوں کو جنگجوؤں سے متعلق اطلاعات موصول ہوتی رہتی ہے تاہم آج کے ناکے کے دوران اتفاقاً فورسز کا جنگجوؤں کے ساتھ آمنا سامنا ہوا جس کے بعد ایک مختصر جھڑپ ہوئی جس میں 2جنگجوؤں کو ہلاک کیا گیا۔ انہوں نے کہا کہ عین ممکن ہے کہ مہلوک جنگجوؤں کسی بڑی کارروائی کو انجام دینے کے لیے شاہراہ پر سفر کررہے تھے تاہم پولیس واقعے کی تحقیقات میں جٹی ہوئی ہے۔