انتظامیہ تذبذب کا شکار،لاک ڈاؤن میں سختی ہوگی یا نرمی
سرینگر کو چھوڑ کر وادی کے9اضلاع میں سخت ترین بندشوں اور پابندیوں میں عارضی نرمی
خبراردو:-

سرینگر:کشمیر میں کورونا وائرس (کووڈ۔19) کے پھیلاؤ کو روکنے کے لئے از سر نو نافذ کئے گئے لاک ڈاؤن کے 16دن مکمل ہوگئے جبکہ سخت ترین پابندیوں اور بندشوں کے6روز بھی مکمل ہوگئے ہیں،لیکن انتظامیہ تذبذب کا شکار ہوگئی ہے کہ کاروبار کھولیں یا بند رکھیں نہ تو انتظامیہ کی سمجھ میں کچھ آرہا ہے اور نہ ہی لوگ سمجھ پارہے ہیں کہ لاک ڈاؤن کا یہ سلسلہ کب تک جاری رہے گا۔

یہاں یہ بات قابل ذکر ہے کہ ملک گیر اَن لاک۔3کا سلسلہ شروع ہوگیا ہے اور کشمیر اب بھی لاک ڈاؤن کا سلسلہ برقرار ہے۔اگرچہ وادی میں از سر نو دوبارہ نافذ کئے گئے سخت ترین لاک ڈاؤن میں وادی کے9اضلاع میں نرمی لائی گئی ہے،تاہم دارالحکومت سرینگر میں مسلسل چھٹے روز اور مجموعی طور پر16ویں روز بھی جاری رہا۔سرینگر کے کئی علاقوں میں علی الصبح پولیس کی جپسیوں کے ذریعے پابندیاں برقرار رہنے کا اعلان کرتے ہوئے لوگوں کو گھروں میں رہنے کی تلقین کی گئی۔دارالحکومت سرینگر میں عید الاضحی کے تین روز قبل بھی پابندیاں اور بندشیں عائد رہیں۔

دارالحکومت سرینگر کے تجارتی مرکز لالچوک کے درجنوں اہم ترین بازاروں جن میں گھنٹہ گھر،کوکر بازار،بڈشاہ چوک،گونی کھن،مہاراجہ بازار،ہری سنگھ ہائی اسٹریٹ،جہانگیر چوک وغیرہ شامل ہے،کو پولیس نے چاروں اطراف سے سیل کرکے لوگوں کی نقل وحرکت کو مسدود کرکے رکھ دیا جبکہ بازاروں میں دکانداروں کو دکانیں کھولنے کی اجازت نہیں دی گئی۔

اس دوران سڑکوں اور فٹ پاتھوں پر اپنا ذریعہ معاش تلاش کرنے والے چھاپڑی فروشوں کو بھی منگلوار کے روز اپنا کارو بار کرنے کی اجازت نہیں دی گئی۔کئی علاقوں میں پولیس نے چھاپڑی فروشوں کو بھی سڑکوں اور فٹ پاتھوں سے ہٹایا جبکہ بازاروں کی ناکہ بندی،تار بندی بھی کی گئی تھی۔شہر میں پبلک ٹرانسپورٹ سڑکوں سے غائب رہا البتہ نجی گاڑیوں کی آوا جاہی معمول کے مطابق رہی۔

ادھر شہر خاص کے مرکزی بازار جن میں جامع مسجد مار کیٹ،قدیم تجارتی بازار مہاراج بازار سمیت سبھی چھوٹے بڑے بازار بند رہے اور یہاں پولیس و فورسز کی بھاری نفری بھی تعینات کی گئی تھی۔شہرخاص میں پولیس نے صبح سویرے کرفیو جیسی پابندیوں اور بندشوں کا اعلان کیا گیا۔

اس دوران شہر میں جن علاقہ جات کو لوہے کی سلاخوں سے سیل کیا گیا،وہاں ناکہ بندی برقرار ہے،تاہم ان علاقوں سے لوگ آزاد نقل وحرکت بہ آسانی کررہے ہیں،جسکی وجہ سے انتظامیہ کو لاک ڈاؤن ناکام ثابت ہورہا ہے۔انتظامیہ کہیں کاروبار شروع کرنے کی اجازت دے رہی تو کہیں بند کرنے کے آرڈر جاری کررہی ہے۔محمد اشرف نامہ شہری نے بتایا کہ ایسا لگتا ہے کہ انتظامیہ تذبذب کا شکار ہے،اُسے معلوم ہی نہیں کورونا سے پیدا شدہ صورتحال سے کیسے نمٹنا ہے،بس وہ اندھیر میں تیر چلا رہی ہے۔

اس بیچ سرینگر میں عید الاضحی کے سلسلے میں ’آج اور کل‘ یعنی (29اور30جولائی) کو اشیائے ضروریہ بیچنے والی دکانیں ہی کھلی رہیں گی۔مذکورہ دکانوں کو کورونا پھیلاؤ کو روکنے کیلئے ہر احتیاطی تدبیر کرنی ہوگی۔ضلع انتظامیہ کے مطابق کورونا پھیلاؤ کو روکنے کیلئے جاری لاک ڈاؤن میں 2 روزہ نرمی کا فیصلہ منگل کو عید الاضحی کے پیش نظر لیا گیا ہے۔ضروری اشیاء بیچنے والی دکانوں کو صبح9بجے سے شام5بجے تک کھلا رہنے کی اجازت ہوگی جبکہ غیر ضروری چیزوں کا کاروبار کرنے والے سبھی تجارتی مراکز اور دکان اگلے احکامات تک بند رہیں گے۔انتظامیہ کے مطابق کورونا کے پیش نظر لوگوں کو ماسک وغیرہ کا استعمال سختی سے کرنا چاہئے۔

اس سلسلے میں انتظامیہ نے کئی ٹیمیں تشکیل دی ہیں جو احتیاطی تدابیر پر عمل کو یقینی بنائیں گی اور اس سلسلے میں دکانداروں اور خریداروں پر قریبی نظر رکھی جائے گی اور خلاف ورزی کرنے والوں کیخلاف قانونی کارروائی عمل میں لائی جائے گی۔ادھر وادی کشمیر کے دیگر9اضلاع میں عائد پابندیوں اور بندشوں میں نرمی دی گئی۔اطلاعات کے مطابق کپوارہ،بارہمولہ،بانڈی پورہ،پلوامہ،کولگام،اننت ناگ،بڈگام،گاندر بل اور شوپیان میں کہیں دوپہر تک تو کہیں دن بھر بازار بند رہے۔

پلوامہ کے ایک شہری بلال احمد نے بتایا ’حکومت لاک ڈاؤن کھولنے کے حوالے سے مذاق کررہی ہے،صبح کے وقت دکانیں کھولنے کی اجازت دی گئی اور بعد دوپہر اچانک سبھی بازاروں کو بند کرایا گیا،سمجھ میں نہیں آتا انتظامیہ کیا منصوبہ رکھتی ہے‘۔دریں اثناء پونچھ میں بھی دوبارہ لاک داؤن نافذ کیا گیا۔

معلوم ہوا ہے کہ قصبہ پونچھ کے متعدد علاقوں جن میں نکھا والی سے حاجی مارکیٹ میں سخت ترین بندشیں عائد کی گئیں۔معلوم ہوا ہے کہ پونچھ میں نئے کووڈ۔19کیسز سامنے آنے کے بعد بعض علا قوں میں منگلوار کی صبح دوبارہ بندشیں عائد کی گئیں۔ایک میڈ یا رپورٹ کے مطابق کسی بھی شخص پابندی زدہ علاقوں میں گھروں سے باہر آنے کی اجازت نہیں دی گئی اور لوگوں کی نقل حرکت گھروں تک محدود رکھی گئی۔یہاں بھی دکانیں نہ کھولنے اور گاڑیاں نہ چلانے کا اعلان کیا گیا۔