کھیل

فٹ روہت اور کوہلی 2027 ورلڈ کپ کھیل سکتے ہیں: گمبھیر

Published

2 years ago

July 22, 2024

نئی دہلی، ہندوستانی کرکٹ ٹیم کے نئے کوچ گوتم گمبھیر نے کہا کہ اگر فٹنس برقرار رہی تو روہت شرما اور وراٹ کوہلی سال 2027 میں ہونے والے ون ڈے ورلڈ کپ میں کھیل سکتے ہیں سری لنکا کے لیے روانہ ہونے سے پہلے ایک پریس کانفرنس سے خطاب کرتے ہوئے گمبھیر نے کہا، ‘انہوں نے دکھایا ہے کہ وہ بڑے اسٹیج پر اور بڑے ٹورنامنٹس میں کیا کر سکتے ہیں، چاہے وہ ٹی 20 ورلڈ کپ ہو یا ون ڈے ورلڈ کپ۔ میں یہ ضرور کہہ سکتا ہوں کہ ان دونوں میں کافی کرکٹ باقی ہے۔ چیمپئنز ٹرافی اور آسٹریلیا کا بڑا دورہ آنے والا ہے اور یہ دونوں یقیناً وہاں پرفارم کرنے کے لیے پرجوش ہوں گے۔ اگر ان کی فٹنس برقرار رہی تو وہ 2027 کے ون ڈے ورلڈ کپ کا بھی حصہ بن سکتے ہیں۔

انہوں نے کہا، “میں ان کا فیصلہ نہیں کر سکتا، یہ فیصلہ انہیں کرنا ہے۔ یہ کھلاڑیوں پر منحصر ہے کہ وہ ٹیم کی کامیابی میں کب تک اور کتنا حصہ ڈال سکتے ہیں۔ آخر میں ٹیم سب سے اہم ہے۔ روہت اور وراٹ ورلڈ کلاس کھلاڑی ہیں اور اب بھی ہندوستانی کرکٹ کو بہت کچھ دے سکتے ہیں۔ کوئی بھی ٹیم انہیں طویل عرصے تک اپنے ساتھ رکھنا چاہے گی۔

ایک سوال کے جواب میں ہندوستانی ٹیم کے کوچ نے کہا، “یہ ٹی آر پی کے لئے صحیح سوال ہے، لیکن کسی بھی شخص کے ساتھ میرے تعلقات کو عوامی بحث کا موضوع نہیں ہونا چاہئے. ہمارا وہی رشتہ ہے جو دو بالغ افراد کے درمیان ہونا چاہیے۔ میدان میں ہر کسی کو اپنی ٹیم اور اپنی جرسی کے لیے لڑنے کا حق ہوتا ہے۔ لیکن ابھی ہم ہندوستان اور 140 کروڑ ہندوستانیوں کی نمائندگی کرنے جارہے ہیں۔ ہم یقینی طور پر متحد رہیں گے اور ہندوستان کو فخر محسوس کرانے کی کوشش کریں گے۔ ہم دونوں کے درمیان میدان سے باہر اچھے تعلقات ہیں اور اسی طرح جاری رہیں گے۔‘‘

انہوں نے کہا، “میرے کوچ بننے کے اعلان سے پہلے یا بعد میں نے وراٹ سے بات ہوئی یا نہیں، کیا بات ہوئی، کتنی بات ہوئی، یہ سب سرخی کے لیے صحیح ہے لیکن میرے لیے یہ ضروری نہیں ہے۔ میرے لیے یہ اہم ہے کہ ہم دونوں ہندوستان کو فخریہ محسوس کرانے کے لیے سخت محنت کر رہے ہیں اور یہی ہمارا کام ہے۔ وہ ایک پیشہ ور اور عالمی معیار کے کھلاڑی ہیں اور میں نے ہمیشہ یہ بات کہی ہے۔ ایک کھلاڑی کے طور پر میرے دل میں ان کے لیے بہت احترام ہے اور ایسا ہی ہوتا رہے گا۔ امید ہے کہ ہم مل کر اچھا کام کریں گے۔

یو این آئی۔ م ع۔ 1545

کھیل

سروچی سنگھ اور کمل جیت سنگھ نے ہندوستان کو ایشیائی کھیلوں میں دوسرا طلائی تمغہ دلایا

Published

2 days ago

September 25, 2026

Online Desk

آئیچی-ناگویا (جاپان)، ہندوستان کی سروچی سنگھ اور کمل جیت سنگھ کی جوڑی نے جمعہ کو ایشیائی کھیلوں کے نشانہ بازی مقابلے میں 10 میٹر ایئر پسٹل مکسڈ مقابلے میں جنوبی کوریا کو پیچھے چھوڑتے ہوئے طلائی تمغہ حاصل کیا۔ یہ ایشیائی کھیلوں میں ہندوستان کا دوسرا تمغہ ہے۔

آج یہاں ہوئے مقابلے میں ہندوستانی جوڑی نے مجموعی طور پر 484.6 اسکور کے ساتھ سرفہرست مقام حاصل کیا۔ کمل جیت اور سروچی نے شروعات سے ہی اچھی برتری بنا لی تھی، لیکن جنوبی کوریا مسلسل ہندوستانی نشانہ بازوں پر دباؤ بنائے ہوئے تھا۔ تاہم ہندوستانی جوڑی نے دباؤ میں کوئی غلطی نہیں کی اور جنوبی کوریا کو 6.6 پوائنٹس کے فرق سے شکست دے کر طلائی تمغہ اپنے نام کرلیا۔ جنوبی کوریا 478 اسکور کے ساتھ دوسرے جبکہ ایران 415.8 اسکور کے ساتھ تیسرے مقام پر رہا۔

یو این آئی۔ ایم جے

کھیل

سلطان واریئرز بارہمولہ نے افتتاحی چنار پریمیئر لیگ کا خطاب جیت لیا

Published

2 weeks ago

September 15, 2026

Online Desk

سری نگر، سلطان واریئرز بارہمولہ نے افتتاحی چنار پریمیئر لیگ (سی پی ایل) کرکٹ ٹورنامنٹ 2026 کا خطاب جیت لیا۔ اس نے بارہمولہ کے جنرل بپن راوت اسٹیڈیم میں کھیلے گئے شاندار فائنل میں رمزی اسپورٹس سری نگر کو شکست دی۔

پہلے بلے بازی کرتے ہوئے سلطان واریئرز نے مقررہ اوورز میں 9 وکٹوں کے نقصان پر 182 رنز بنائے، جس کے جواب میں رمزی اسپورٹس سری نگر کی پوری ٹیم 142 رنز پر آؤٹ ہوگئی۔ اس طرح سلطان واریئرز نے شاندار کامیابی کے ساتھ خطاب اپنے نام کر لیا۔

سلطان واریئرز کے عاقب کھانڈے کو میچ جیتنے والی کارکردگی پر ’مین آف دی میچ‘ قرار دیا گیا، جبکہ ان کے ساتھی کھلاڑی عاصم بشیر کو پورے ٹورنامنٹ میں مسلسل عمدہ کارکردگی پر ’مین آف دی سیریز‘ کا اعزاز دیا گیا۔

فوج کی سری نگر چنار کور کی جانب سے منعقد کیے گئے اس ٹورنامنٹ میں ریکارڈ تعداد میں ٹیموں نے شرکت کی۔ مقابلے کے لیے 130 ٹیموں نے رجسٹریشن کرائی تھی، جن میں سے کشمیر وادی کے مختلف علاقوں سے 79 ٹیموں کا انتخاب کیا گیا۔

تقریب میں جموں و کشمیر کے چیف سیکریٹری اتل ڈلو کے علاوہ بارہمولہ میں تعینات ڈیگر ڈویژن کے جنرل آفیسر کمانڈنگ اور مقامی برادری کی ممتاز شخصیات نے شرکت کی۔

منتظمین نے کہا کہ سی پی ایل 2026 نے پوری کشمیر وادی کے کرکٹ ٹیلنٹ کو اپنی صلاحیتوں کے اظہار کا موقع فراہم کیا اور خاص طور پر نوجوانوں کے درمیان ہندوستانی فوج اور مقامی برادری کے تعلقات کو مضبوط بنانے کے لیے ایک پلیٹ فارم کے طور پر کام کیا۔

دفاعی ترجمان نے کہا کہ سی پی ایل 2026 کا کامیاب انعقاد خطے کے کھیلوں کے کیلنڈر میں ایک اہم سنگِ میل ہے۔ اس کے ذریعے وادی کے مختلف علاقوں سے تعلق رکھنے والے باصلاحیت نوجوان کرکٹرز کو اپنی صلاحیتیں دکھانے کا موقع ملا۔

یواین آئی۔ ظ ا

کھیل

بابر اعظم کی سات سال بعد ڈومیسٹک فرسٹ کلاس کرکٹ میں واپسی

Published

2 weeks ago

September 15, 2026

Online Desk

اسلام آباد، پاکستان کے ٹیسٹ کپتان بابر اعظم موجودہ پریذیڈنٹس ٹرافی گریڈ ون فرسٹ کلاس ٹورنامنٹ میں آئل اینڈ گیس ڈیولپمنٹ کمپنی لمیٹڈ (او جی ڈی سی ایل) کی نمائندگی کریں گے۔ انہیں ٹیم نے بطور گیسٹ کھلاڑی شامل کیا ہے۔

ذرائع کے مطابق بابر نے پاکستان کرکٹ بورڈ (پی سی بی) سے درخواست کی تھی کہ انہیں کسی ٹیم میں شامل کیا جائے تاکہ وہ طویل فارمیٹ میں اپنی فارم بہتر کرسکیں۔ اس کے بعد بورڈ نے انہیں او جی ڈی سی ایل کے ساتھ جوڑ دیا۔ بابر نے دسمبر 2022 کے بعد سے ٹیسٹ کرکٹ میں کوئی سنچری نہیں بنائی۔ اس کے بعد سے 39 اننگز میں وہ صرف آٹھ نصف سنچریاں بناسکے ہیں، جبکہ 2023 کے آغاز سے ٹیسٹ میں ان کی اوسط 30.43 رہی ہے۔

ان کی خراب فارم پاکستان کرکٹ میں مسلسل بحث کا موضوع بنی ہوئی ہے۔ حالیہ انگلینڈ دورے میں پاکستان کو تین ٹیسٹ کی سیریز میں 0-3 سے شکست ہوئی، جبکہ لارڈز اور ایجبسٹن ٹیسٹ میں انگلینڈ کے تیز گیندبازوں نے شارٹ گیند کے خلاف بابر کی کمزوری کا فائدہ اٹھایا۔ تاہم گزشتہ پانچ ٹیسٹ میں وہ چار نصف سنچریاں بناچکے ہیں اور گزشتہ ماہ ویسٹ انڈیز کے خلاف دوسرے ٹیسٹ میں ان کا اسکور 88 رنز رہا، جس سے پاکستان نے جولائی 2023 کے بعد پہلی بار بیرون ملک ٹیسٹ جیتا۔

بابر نے آخری بار 2019 میں ڈومیسٹک فرسٹ کلاس ٹورنامنٹ کھیلا تھا، جب انہوں نے سینٹرل پنجاب کی کپتانی کرتے ہوئے فائنل میں ناردرن کو شکست دے کر قائداعظم ٹرافی جیتی تھی۔ حالیہ برسوں میں ٹیسٹ اور آئی سی سی ٹورنامنٹس میں پاکستان کی خراب کارکردگی کے بعد پاکستانی کھلاڑیوں کے ڈومیسٹک فرسٹ کلاس کرکٹ میں زیادہ حصہ لینے کا مطالبہ کیا جاتا رہا ہے۔ اس سیزن میں شاہین شاہ آفریدی اور سلمان آغا سمیت کئی دیگر بین الاقوامی کھلاڑی بھی پریذیڈنٹس ٹرافی میں حصہ لے رہے ہیں۔

پی سی بی کے سینٹرل کنٹریکٹ کے تحت اے کیٹیگری کے ٹیسٹ ماہر کھلاڑیوں کے لیے سالانہ کم از کم چھ، اے بی کیٹیگری کے ٹیسٹ اور ون ڈے ماہر کھلاڑیوں کے لیے چار، جبکہ بی سی کیٹیگری کے وائٹ بال ماہر کھلاڑیوں کے لیے کم از کم دو فرسٹ کلاس میچ کھیلنا ضروری ہے۔ پاکستان اس وقت آئی سی سی ٹیسٹ رینکنگ میں نویں نمبر پر ہے اور ورلڈ ٹیسٹ چیمپئن شپ کی نو ٹیموں کی جدول میں آخری مقام پر ہے۔ وہ گزشتہ چار آئی سی سی ٹورنامنٹس میں ناک آؤٹ مرحلے تک بھی نہیں پہنچ سکا ہے۔

یو این آئی۔ م س