خبراردو:

آپریشن آل آوٹ کے تحت شمال و جنوب میں جنگجوؤں اور فورسز کے در میان پے در پے معرکہ آرائیوں کے دوران 5جنگجو نوجوانوں کو پولیس نے جاں بحق کرنے کا دعویٰ کرتے ہوئے کہا کہ شمالی کشمیر کے آتھورہ گاؤں میں 2لشکر جنگجوؤں جبکہ آرونی بجبہاڑہ میں جھڑپ کے دوران 3جنگجوؤں کو جاں بحق کیا گیا۔

جنوبی کشمیر کے آرونی علاقے میں فوج اور فورسز نے ایک مصدقہ اطلاع کی بناء پر محاصرہ عمل میں لایا جس دوران تلاشی پارٹی نے آ ر ونی نامی گاؤں میں موجود جنگجوؤں کو ڈھونڈ نکالنے کے لئے بڑے پیمانے پر کاروائی شروع کی ۔تفصیلات کے مطابق جوں ہی فورسز اہلکار نے مشتبہ مکان کی جانب پیش قدمی کی تو یہاں مو جود جنگجوؤں نے فورسز پر شدید فائرنگ کی جس کے ساتھ ہی علاقے میں جھڑپ کا با ضا بطہ آغا ز ہو گیا ۔انہوں نے بتایا کہ فورسز اہلکاروں نے جنگجو ؤں کے تمام فرار ہو نے کے ممکنہ راستوں کی سخت ناکہ بندی کرتے ہو ئے علاقے میں جگہ جگہ مو بائیل بنکرس کی تعیناتی عمل میں لائی ۔انہوں نے بتایا کہ فورسز اہلکاروں نے جنگجوؤں کے خلاف فیصلہ کن کاروائی عمل میں لاتے ہو ئے مکان پر شدید فائرنگ کر نے کے علاوہ مارٹر شلنگ بھی کی جس کے نتیجے میں مکان میں چھپے بیٹھے 3جنگجوؤں کو جاں بحق کیا گیا۔ پولیس ذرائع نے بتایا کہ جائے جھڑپ سے ابھی تک تینوں جنگجوؤں کی لاشوں کو برآمد کیا گیا۔ ذرائع نے بتایا کہ آخری اطلاعات مو صول ہو نے تک یہاں تلاشی آپریشن جاری تھا ۔اس دوران کے این ایس نے آرونی جھڑپ سے متعلق پولیس افسران سے رابطہ کر نے کی کو شش کی تو انہوں نے جھڑپ کی تصدیق کرتے ہو ئے بتایا کہ ابھی تلاشی آپریشن جاری ہے اور ممکنہ طور پر رہاشی مکان میں مو جود تینوں جنگجو جاں بحق ہو گئے ۔انہوں نے بتایا کہ فورسز اہلکار مکان کے ملبے کو ہٹانے میں مصروف ہیں اور جوں ہی تلاشی آپریشن اختتام پذیر ہو گا تو صحیح صورتحال واضح ہو جائے گی ۔انہوں نے کہا کہ جھڑپ کے مقام سے جنگجووءں کی دو لاشیں برآمد کی گئی ہیں جبکہ بھاری مقدار میں ہتھیار اور گولہ بارود کو بھی ضبط کیا گیا۔انہوں نے بتایا کہ علاقے میں تلاشی آپریشن جاری ہے۔ اس دوران کھار پور پورہ آرونی میں جاری جھڑپ کی خبر جوں ہی ملحقہ علاقوں تک پہنچ گئی تو یہاں نو جوانی کی بڑی تعداد نے سڑکوں پر نکل کر فورسز اہلکاروں پر شدید سنگ باری کی ۔نمائندے نے بتایا کہ نئی بستی اننت ناگ سمیت کھار پورہ آرونی اور دیگر کچھ علاقوں میں مشتعل نو جوانوں نے فورسز اہلکاروں پر سنگ باری کی جس کے جواب میں فورسز اہلکاروں نے نو جوانوں کو منتشر کر نے کے لئے آنسوں گیس کا استعمال کیا ۔تادم تحریر علاقے میں پُر تشدد مظاہرے جاری تھے ۔

اس دوران جمعرات کو آتھورہ کریری نامی گاؤں کا فوج اور فورسز نے دوران شب محاصرہ عمل میں لایا جس کے دوران یہاں جنگجوؤں اور فورسز کے مابین خونین معرکہ آرائی شروع ہو ئی جو کئی گھنٹوں سے جاری رہیں۔ ایک پولیس افسر نے نام ظاہر نہ کرنے کی شرط پر بتایا کہ کریری جھڑپ کے دوران 2جنگجوؤں کو مارگرایا گیا تاہم دونوں جنگجووءں کی شناخت ابھی جاری ہے۔ معلوم ہوا ہے کہ فوج، ایس او جی اور سی آر پی ایف کی مشترکہ جمعیت نے کریری کے آتھورہ گاؤں میں دوران شب ہی محاصرہ عمل میں لاتے ہوئے گاؤں میں چھپے بیٹھے جنگجوؤں کو ڈھونڈ نکالنے کے لیے وسیع پیمانے پر تلاشی آپریشن شروع کردیا جس کے بعد طرفین کی گولہ باری سے آتھورہ سمیت ملحقہ علاقے گولوں اور گولیوں سے دہل اُٹھا۔ اس دوران انتظامیہ نے کسی بھی امکانی گڑ بڑ سے نمٹنے کے لیے شمالی ضلع بارہمولہ کے حدود میں موبائل انٹرنیٹ کی کم اور تیز رفتار سروس کو معطل کردیا ۔ تفصیلات کے مطابق فوج کی 29اور 52آر آر ، ایس او جی اور سی آر پی ایف کی مشترکہ جمعیت نے بارہمولہ کے آتھورہ کریری گاؤں میں بدھوار اور جمعرات کی درمیانی شب ایک مصدقہ اطلاع کی بنیاد پر محاصرے میں لے لیا جس دوران فورسز نے گاؤں کے ارد گرد سخت پہرہ بٹھاتے ہوئے ممکنہ فرار راستوں کو سیل کردیا۔ فورسز نے علاقے میں اضافی کمک کو طلب کرتے ہوئے یہاں لوگوں کی نقل و حمل کو مکمل طور پر مسدود بنادیا۔

محاصرے کے دوران فورسز پارٹی نے جونہی مشتبہ مکان کے نزدیک جانے کی کوشش کی تو یہاں چھپے بیٹھے جنگجوؤں نے تلاشی پارٹی پر شدید فائرنگ کرتے ہوئے فورسز کو پیش قدمی کرنے سے پیچھے رکھا۔ اس دوران فورسز پارٹی نے بھی مورچہ سنبھالتے ہوئے جنگجوؤں کے خلاف کارروائی شروع کی جس کے ساتھ ہی طرفین کے درمیان جھڑپ کا باضابطہ آغاز ہوگیا۔ فورسز پارٹی نے اس دوران مشتبہ مکان کا گھیراؤ تنگ کرتے ہوئے گاؤں میں کیسپر گاڑیوں کی کمک طلب کی جس دوران شب وقفے وقفے سے گاؤں میں گولیوں کا تبادلہ ہوتا رہا۔ اس دوران کچھ وقفے کی خاموشی کے بعد صبح کی روشنی ظاہر ہوتے ہی علاقے میں جھڑپ دوبارہ شروع ہوئی جس دوران علاقہ گولیوں کی گن گرج سے دہل اُٹھا۔ نمائندے کے مطابق جونہی فورسز اہلکاروں نے جمعرات کی صبح مکان کے نزدیک جانے کی کوشش کی تو یہاں موجود جنگجوؤں نے زبردست فائرنگ کی جس کے ساتھ ہی یہاں گولیوں کی گن گڑا ہٹ سے آتھورہ سمیت ملحقہ علاقہ جات دہل اُٹھے۔ ادھر انتظامیہ نے امن و قانون کی صورتحال کو برقرار رکھنے کے لیے شمالی ضلع بارہمولہ میں انٹرنیٹ سروس کو مکمل طور پر مفلوج کرکے رکھ دیا۔

معلوم ہوا ہے کہ بے لگام افواہ بازی پر فوری قابو پانے اور کسی بھی ممکنہ عوامی احتجاجی مظاہروں کے پیش نظر انتظامیہ نے ضلع بارہمولہ کے حدود میں موبائل انٹرنیٹ کی کم اور تیز رفتارسروس کو مکمل طور پر بند رکھا گیا ۔ نمائندے کے مطابق فورسز اہلکاروں نے میڈیا نمائندوں کو بھی پیشہ ورانہ ذمہ داریاں انجام دینے کے لیے آگے جانے کی اجازت نہیں دی۔ انہوں نے بتایا کہ مقامی اور بیرونی میڈیا نمائندوں کی ایک بڑی تعداد کو دن بھرجائے جھڑپ سے قریباً ایک کلومیٹر کی دوری پر روکا گیا جس کے نتیجے میں میڈیا سے وابستہ نمائندوں کو بھی صحیح اطلاعات جمع کرنے میں کافی دشواریوں کا سامنا کرنا پڑا۔

ادھر پولیس نے کریری جھڑپ سے اپنے بیان میں کہا کہ یہاں چھپے بیٹھے جنگجوؤں کو فورسز نے ہتھیار ڈالنے کی کئی بار اپیلیں کیں تاہم مکان میں چھپے بیٹھے جنگجووءں نے فورسز کی اپیلوں کو رد کرتے ہوئے شدید فائرنگ کی جس کے جواب میں فورسز نے بھی جوابی کارروائی کرتے ہوئے دونوں جنگجوؤں کو جاں بحق کردیا۔پولیس نے بتایا کہ کریری جھڑپ میں مارئے گئے جنگجوؤں کی تحویل میں بھاری تعداد میں اسلحہ و گولہ بارود ضبط کیا جن میں 5اے کے سنتالیس رائفلیں، سینکڑوں گولیوں کے علاوہ دیگر غیر قانونی مواد بھی برآمد کیا۔