سری نگر،(یو این آئی): نیشنل کانفرنس کے نائب صدر اور سابق وزیر اعلیٰ عمر عبداللہ ’کشمیر فائلز‘ نامی فلم کوسچائی کے ساتھ کھلواڑ قرار دیتے ہوئے کہا کہ اس فلم میں طرح طرح کے جھوٹ دکھائے گئے ہیں۔

انہوں نے کہا کہ جس وقت پنڈتوں نے کشمیر سے ہجرت کی اس وقت یہاں نیشنل کانفرنس کی حکومت نہیں تھی بلکہ گورنر راج تھا اور مرکز میں بی جے پی کی حمایت والی وی پی سنگھ سرکار تھی۔

ان کا کہنا تھا کہ پنڈتوں کے ساتھ جو ہوا ہمیں اس پر افسوس ہے لیکن یہاں مسلمانوں اور سکھ برادری کے لوگوں نے بھی قربانیاں دی ہیں۔موصوف سابق وزیر اعلیٰ نے ان باتوں کا اظہار جمعے کے روز جنوبی کشمیر کے ضلع کولگام میں ایک پارٹی ریلی کے حاشئیے پر نامہ نگاروں کے سوالوں کے جواب دینے کے دوران کیا۔

انہوں نے کہا: ’پہلے میں یہ فلم (کشمیر فائلز) بنانے والے سے جاننا چاہتا ہوں کہ یہ ڈاکومنٹری ہے یا کمر شل فلم ہے اگر یہ ڈاکومنٹری ہے تو جو دکھا گیا ہے وہ صحیح ہے لیکن فلم بنانے والے خود بھی کہتے ہیں کہ یہ حقیقت پر مبنی فلم ہے‘۔

ان کا کہنا تھا: ’اس فلم میں طرح طرح کے جھوٹ دکھائے گئے ہیں بالخصوص اس وقت کی حکومت کے متعلق‘۔عمر عبداللہ نے کہا کہ جس وقت پنڈتوں نے کشمیر سے ہجرت کی، جس پر ہمیں افسوس ہے، اس وقت یہاں ڈاکٹر فاروق عبداللہ کی حکومت نہیں تھی۔انہوں نے کہا: ’اس وقت یہاں گورنر راج تھا اور جگموہن گورنر تھے جبکہ مرکزی میں وی پی سنگھ کی سرکار تھی جس کے پیچھے بی جے پی تھی‘۔ان کا کہنا تھا: ’فلم میں ڈاکٹر فاروق عبداللہ کو دکھایا گیا ہے لیکن وی پی سنگھ کو نہیں دکھایا گیا ہے‘۔

موصوف نائب صدر نے کہا کہ یہ فلم سچائی کے ساتھ کھلواڑ ہے جو ٹھیک نہیں ہے۔انہوں نے کہا کہ یہاں صرف ایک قوم نے قربانیاں نہیں دی ہیں بلکہ مسلمانوں اور سکھ برادری نے بھی قربانیاں دی ہیں۔ان کا کہنا تھا: ’یہاں سے مسلمانوں کو بھی گھر چھڑ کے بھاگنا پڑا ہے اور سکھ برادری کے لوگوں کو بھی‘۔عمر عبداللہ نے کہا کہ یہ فلم بنانے والے یہاں سے ہجرت کرنے والوں کی واپسی نہیں چاہتے ہیں۔

انہوں نے کہا کہ نیشنل کانفرنس شیر کشمیر کے اس نعرے کہ شیر کشمیر کا کیا ارشاد ہندو مسلم سکھ اتحاد پربرابر قائم و دائم ہے۔حدبندی کمیشن کی تجاویز کو عقل سے بعید اور جموں وکشمیر کو مذہبی بنیادوں پر تقسیم کرنے کی مذموم کوشش قرار دیتے ہوئے عمر عبداللہ نے کہا کہ ”جس طرح سے حدبندی کمیشن میں سیٹوں کا بٹوارا ہوا، جس طرح توڑ پھوڑ کی گئی،جس طرح علاقے کاٹے گئے، ایسا محسوس ہوتا ہے کہ عقل کا استعمال ہی نہیں کیا گیا ہو۔

یہ بات سن کر لوگ حیران ہوجاتے ہیں جب وہ سنتے ہیں کہ پونچھ اور راجوری کا ممبر پارلیمنٹ اننت ناگ کا ممبرپارلیمنٹ بھی ہوگا۔کچھ علاقے تو مکمل طور پر غائب ہی کردیئے گئے ہیں۔اور جب ہم ان سے پوچھے ہیں کہ آپ نے کیا دیکھ کر حدبندی کی؟کیا آپ نے پٹواری حلقے دیکھے؟ کیا آپ نے تحصیلیں دکھیں؟ لیکن کوئی جواب نہیں۔

بس یہ کہتے ہیں کہ ہم نہ بہت ساری چیزیں دیکھیں صرف آبادی پر حدبندی نہیں ہوئی۔جی ہاں! بالکل کیونکہ پہاڑ کے اُس طرف آپ نے صرف مذہب دیکھ کر فیصلے لئے،مقصد یہی کہ بی جے پی کم سے کم سیٹیں جموں سے ہاریں اور یہاں نیشنل کانفرنس کو زیادہ سے زیادہ نقصان پہنچایا جاسکے۔کیونکہ ان کا مقصد کا یہ ہے کہ اکثریت حاصل کرکے اسمبلی سے ایک قرارداد پاس کرائیں اور اس میں کہیں کہ 5اگست2019کے فیصلے جموں وکشمیر کے عوام کو قابل قبول ہیں اور اسی مقصدر کیلئے تمام حربے استعمال کئے جارہے ہیں۔

لیکن انشاء اللہ ہم بھی کوئی گئی گزتی کمزورجماعت نہیں،جب تک ہمارے جانثار میدان میں ثابت قدم ہیں ہم ان تمام طاقتوں کا ڈٹ کر مقابلہ کریں اور جس طرح سے انہیں پنجاب میں شکست کا سامنا ہوا اُسی طرح انہیں یہاں بھی شکست ملے گی کیونکہ وہ ہماری ہمسایہ ریاست ہے۔عمر عبداللہ نے کہا کہ انشاء اللہ سب کچھ ٹھیک ہوگا، وہ دن دور نہیں جب اس سب کا اعلاج آپ (لوگوں) کے ہاتھوں میں ہوگا۔انشاء اللہ یہاں کے لوگ بی جے پی، اُن کی اے ٹیم،بی ٹیم،،سی ٹیم اور اور دیگر درپردہ حامی کو مسترد کریں گے۔