نئی دہلی، لوک سبھا میں اپوزیشن کے لیڈر راہل گاندھی نے وزیر اعظم نریندر مودی پر براہ راست حملہ کرتے ہوئے کہا ہے کہ انہوں نے ’ووٹ چوری‘ کرکے ملک کو ہائی جیک کر لیا ہے اور وزیر داخلہ امت شاہ، آر ایس ایس کے سربراہ موہن بھاگوت اور چیف الیکشن کمشنر گیانیش کمار نے اس کام میں ان کی مدد کی ہے۔

مسٹر گاندھی نے اپوزیشن جماعتوں کے ارکان پارلیمنٹ کے پارلیمنٹ سے نرواچن سدن تک مارچ کے دوران منگل کو یہاں آکاشوانی بھون کے سامنے تقریباً 5 گھنٹے تک روکے جانے کے بعد میڈیا سے بات چیت میں کہا کہ چند گھنٹے پہلے تقریباً 300 لوک سبھا اور راجیہ سبھا کے ارکان ان کے ساتھ آئے تھے۔ تمام ارکان پارلیمنٹ چیف الیکشن کمشنر گیانیش کمار اور ان کے 2 ساتھیوں سے ملنا چاہتے تھے، لیکن پولیس نے انہیں روک دیا۔

ان کا کہنا تھا کہ ارکان پارلیمنٹ ملک کے نمائندے ہیں اور ملک کے عوام کی آواز کی نمائندگی کرتے ہیں۔

ان کے ساتھ آئے تمام ارکان پارلیمنٹ الیکشن کمیشن سے ملنا چاہتے تھے، لیکن انہیں ملنے نہیں دیا گیا، جبکہ الیکشن کمیشن کا دفتر وہاں سے تقریباً 50 گز دور ہے، اس کے باوجود انہیں وہاں جانے کی اجازت نہیں دی گئی۔

اپوزیشن جماعتوں کے انڈیا اتحاد کے ارکان پارلیمنٹ کے پارلیمنٹ سے نرواچن سدن تک ’جمہوریت بچاؤ‘ مارچ کے دوران تمام ارکان کو آکاشوانی بھون کے سامنے روک دیا گیا۔ مسٹر گاندھی، پرینکا گاندھی واڈرا اور کچھ دیگر ارکان پارلیمنٹ دھرنے پر بیٹھ گئے تو پولیس نے سمجھا بجھا کر انہیں آکاشوانی بھون کے اندر لے گئی۔

تقریباً ساڑھے 5 گھنٹے تک آکاشوانی بھون کے اندر رکھنے کے بعد انہیں باہر لایا گیا اور جب وہ نہیں مانے تو انہیں حراست میں لے لیا گیا۔

مسٹر گاندھی نے حراست میں لیے جانے سے پہلے صحافیوں سے کہا کہ ملک میں جمہوریت کو ختم کر دیا گیا ہے۔ ایس آئی آر کے نام پر ملک کے ساتھ جو کچھ کیا گیا ہے، وہ غداری ہے۔ غداری کرنے والوں میں سے کوئی بھی بچ نہیں پائے گا اور سب کے خلاف کارروائی ہوگی۔

انہوں نے کہا کہ تقریباً 300 ارکان پارلیمنٹ گیانیش کمار سے ملنا چاہتے ہیں، لیکن ’گیانیش کمار جی ڈرے ہوئے ہیں۔‘ انہوں نے کہا کہ اگر ملک کے نمائندوں سے الیکشن کمیشن نہیں ملے گا تو جمہوریت کا کیا مطلب ہے۔ ایک سوال کے جواب میں انہوں نے کہا، ’’ہم صرف ان کا مقابلہ نہیں کرنے جا رہے ہیں، ہم انہیں ختم کرنے جا رہے ہیں۔‘‘ انہوں نے کہا کہ بی جے پی کیا کہتی ہے، اس میں انہیں کوئی دلچسپی نہیں ہے اور وہ ہندوستان کی جمہوریت کو بچانے کے لیے یہاں کھڑے ہیں۔ انہوں نے کہا کہ ان کے ساتھ آئے 300 ارکان پارلیمنٹ بھی ملک میں جمہوریت کو بچانے کی کوشش کر رہے ہیں۔

مسٹر گاندھی نے کہا، ’’امت شاہ، نریندر مودی، موہن بھاگوت اور گیانیش کمار، ان لوگوں نے ملک کی جمہوریت کو ختم کر دیا ہے۔ پورا ملک اور ملک کے نوجوان اس بات کو مانتے اور سمجھتے ہیں۔ ہمیں روکنے والے پولیس اہلکار بھی یہی کہہ رہے ہیں کہ ہم جانتے ہیں۔ اصل میں ملک کو نریندر مودی نے ووٹ چوری کرکے ہائی جیک کیا ہے، امت شاہ جی نے ہائی جیک کیا ہے، موہن بھاگوت جی نے ہائی جیک کیا ہے اور گیانیش کمار نے ان کی مدد کی ہے۔‘‘

کانگریس لیڈر نے کہا، ’’میں سوچ سمجھ کر کہہ رہا ہوں کہ ان تمام لوگوں کے خلاف کارروائی ہوگی اور ان میں سے ایک شخص بھی بچ کر نہیں جائے گا، چاہے وہ نریندر مودی ہوں، امت شاہ ہوں، گیانیش کمار ہوں یا موہن بھاگوت۔ ہمارے ملک کے ساتھ جو کچھ کیا گیا ہے، وہ غداری ہے۔ کوئی بھی بچ کر نہیں بھاگ پائے گا۔‘‘

یو این آئی۔ الف الف ۔ م الف

سری نگر، حکام نے منگل کو جموں و کشمیر کے بارہمولہ قصبے میں پارلیمنٹ حملہ کیس کے مجرم محمد افضل گورو کے رشتہ داروں کی جانب سے مبینہ طور پر سرکاری زمین پر تعمیر کیے گئے ڈیری فارم کے شیڈ کو منہدم کر دیا۔

حکام نے بتایا کہ بارہمولہ قصبے کے گلنار پارک کے قریب سیلابی بیسن میں واقع اس ڈھانچے کو محکمہ مال کی جانب سے تجاوزات کے خلاف چلائی گئی مہم کے دوران منہدم کیا گیا۔ کارروائی کے وقت موقع پر پولیس اور مرکزی مسلح پولیس فورسز کی بڑی تعداد تعینات کی گئی تھی۔

حکام کے مطابق یہ ڈھانچہ سرکاری زمین پر تعمیر کرکے اس پر قبضہ کیا گیا تھا۔

تاہم، خاندان کا دعویٰ ہے کہ انہدام سے قبل انہیں کوئی نوٹس نہیں دیا گیا تھا۔

خاندان کے ایک رکن نے کہاکہ ’’حکام آئے اور دو مرلہ زمین پر پھیلے اس ڈھانچے کو منہدم کر دیا۔ انہدام کی کارروائی دوپہر کے قریب کی گئی۔‘‘

حکام نے بتایا کہ یہ شیڈ مبینہ طور پر گورو کی اہلیہ سے وابستہ تھا اور تقریباً ایک دہائی سے گائے کے باڑے کے طور پر استعمال کیا جا رہا تھا۔

گورو کو 2001 کے پارلیمنٹ حملہ کیس میں قصوروار قرار دیا گیا تھا اور فروری 2013 میں اسے پھانسی دی گئی تھی۔

بارہمولہ کے ایک افسر نے بتایا کہ منگل کو ضلع بارہمولہ میں غیر قانونی قبضے میں موجود کئی کنال قیمتی سرکاری زمین کو واگزار کرایا گیا۔

کروڑوں روپے مالیت کی اس زمین کو حکام کی جانب سے وہاں موجود ڈھانچوں اور غیر قانونی قبضے کو ہٹانے کے بعد دوبارہ حکومت کے کنٹرول میں دے دیا گیا۔

حکام نے مبینہ تجاوزات کرنے والوں میں سے ایک کی شناخت پارلیمنٹ حملہ کیس کے مجرم محمد افضل گورو کی اہلیہ تبسم گورو کے طور پر کی ہے۔ انتظامیہ نے کہا کہ ضلع بھر میں تجاوزات کے خلاف مزید کارروائیاں کی جائیں گی اور سرکاری زمین پر غیر قانونی قبضہ کرنے والوں کے خلاف کارروائی کی جائے گی۔

دریں اثنا، پی ڈی پی لیڈر زہیب یوسف میر نے تجاوزات کے خلاف مہم پر حکام کو تنقید کا نشانہ بنایا اور الزام عائد کیا کہ یہ کارروائی کشمیر سے متعلق ایک ’’بیانیہ‘‘ درآمد کرنے کی کوشش کا حصہ ہے۔

یواین آئی۔ ظ ا

جموں، چیف پرنسپل مردم شماری افسر (سی پی سی او) اور جموں و کشمیر و لداخ کے ڈائریکٹر مردم شماری آپریشنز (ڈی سی او) امیت شرما نے منگل کو کہا کہ دونوں مرکز کے زیر انتظام علاقوں کے مقررہ برف پوش علاقوں میں آبادی کی گنتی کا عمل کامیابی سے مکمل ہونا مردم شماری 2027 کے لیے ایک اہم عملی سنگ میل ہے۔

انہوں نے بتایا کہ اس مہم کے تحت مجموعی طور پر 5,292 مردم شماری بلاکس (ای بی) کا احاطہ کیا گیا، جن میں 4,597 جموں و کشمیر اور 695 لداخ میں ہیں۔ اس کے لیے وسیع پیمانے پر تیاری، خصوصی میدانی انتظامات اور ضلعی انتظامیہ و خصوصی چارجز کے ساتھ قریبی تال میل ضروری تھا۔

برف پوش علاقوں میں آبادی کی گنتی سے قبل 17 سے 31 اگست 2026 تک سیلف اینیومریشن (خود شماری) کا مرحلہ مکمل کیا گیا، جس کے بعد یکم سے 30 ستمبر 2026 تک میدانی کارروائی انجام دی گئی۔

یہاں ایک پریس کانفرنس سے خطاب کرتے ہوئے شرما نے کہا کہ لداخ میں ستمبر کی مہم کے دوران پورے مرکز کے زیر انتظام علاقے کا احاطہ کیا گیا اور مجموعی طور پر 695 مردم شماری بلاکس مکمل کیے گئے، جن میں 367 لیہ اور 328 کرگل میں تھے۔ لداخ میں آبادی کی گنتی مکمل ہونے کے ساتھ ہی یہ مردم شماری 2027 کے لیے آبادی کی گنتی مکمل کرنے والا ملک کا پہلا مرکز کے زیر انتظام علاقہ بن گیا ہے۔

انہوں نے کہا کہ جموں و کشمیر میں برف پوش علاقوں کے لیے چلائی گئی مہم کے تحت 16 اضلاع اور 95 چارجز کا احاطہ کیا گیا۔ ڈوڈہ میں سب سے زیادہ 798 مردم شماری بلاکس مکمل کیے گئے، اس کے بعد کشتواڑ میں 602، رام بن میں 418، اننت ناگ میں 377 اور بارہمولہ میں 359 بلاکس مکمل ہوئے۔

شرما نے بتایا کہ ریاسی میں 345 اور ادھم پور میں 313 مردم شماری بلاکس مکمل کیے گئے، جبکہ کشتواڑ ضلع کو مکمل طور پر برف پوش قرار دیا گیا ہے۔ اس طرح کشتواڑ مردم شماری 2027 کے لیے آبادی کی گنتی مکمل کرنے والا ملک کا پہلا ضلع بھی بن گیا ہے۔

سی پی سی او شرما نے ضلعی انتظامیہ، مردم شماری عملے، خصوصی چارجز، شمار کنندگان اور سپروائزرز کی مشترکہ کوششوں اور مقامی باشندوں کی جانب سے فراہم کیے گئے تعاون کی ستائش کی۔

یواین آئی۔ ط ا