جموں وکشمیر میں کورونا وائرس کی قہر سامانیاں
وادی کشمیر میں تازہ اموات،کٹھوعہ جموں میں پہلی موت درج،کشمیر میں اموات کی تعداد89ہوگئی

سرینگر:جموں وکشمیر میں منگلوار کو کورونا وائر س میں مبتلاء ہو کر مزید24سالہ نوجوان سمیت5افراد جاں بحق ہوئے جن میں سے4کا تعلق کشمیر اور ایک کا تعلق کٹھوعہ جموں سے ہے۔تازہ5ہلاکتوں کیساتھ ہی مرکزی زیر انتظام جموں وکشمیر میں اموات کی تعداد101تجاوز کرگئی۔

کشمیر نیوز سروس کے مطابق چین کے شہر ووہان سے گزشتہ برس دسمبر کے وسط سے نمودار ہوئی وبا ”کورونا وائرس“ دنیا کیساتھ ساتھ جموں وکشمیر میں بھی تیزی سے پھیل رہی ہے جبکہ اموات اور متاثرین کی تعداد میں بھی بدستور اضافہ ہورہا ہے۔منگلوار کے روز جموں وکشمیر میں مزید 4افراد کورونا وائرس میں مبتلاء ہو کر زندگی کی جنگ ہار گئے۔

تازہ ہلاکتوں میں تین اموات کشمیر جبکہ ایک صوبہ جموں میں رپورٹ کی گئی۔معلوم ہوا ہے کہ24سالہ نوجوان جس کا تعلق شوپیان ضلعے سے ہے،کا سنیچر کے روز دلخراش سڑک حادثے میں شدید زخمی ہوا تھا۔زخمی نوجوان کو علاج معا لجہ کی خاطرصدر اسپتال سرینگر میں داخل کیا گیا،جہاں سے اُسے سی ڈی اسپتال منتقل کیا گیا،جہاں وہ منگلوار کو زخموں کی تاب نہ لاکر دم توڑ بیٹھا۔سی ڈی اسپتال ڈلگیٹ سرینگرکے میڈیکل سپر انٹنڈنٹ نے بتایا کہ سوموار کے روز 24سالہ نوجوان کوصدر اسپتال سے یہاں منتقل کیا گیا۔

انہوں نے کہا ’مذکورہ نوجوان کے سر میں شدید چوٹ لگی تھی اور اسکی حالت نازک تھی‘۔ان کا کہناتھا کہ مذکورہ نوجوان کا کورونا ٹیسٹ مثبت آیا ہے۔ادھر باغات برزلہ سرینگر کی65سالہ خاتون جو کہ وینٹی لیٹر پر تھی کا بھی انتقال ہوگیا۔مذکورہ خاتون ہائپر ٹینسیو،ذیابطیس اور دیگر امراض میں مبتلا ء تھی۔مذکورہ خاتون کا کورونا ٹیسٹ بھی مثبت آیا ہے۔

اس سے قبل شمالی کشمیر کے بارہمولہ کا ایک55سالہ تاجر منگل کے روزکورونا وائرس کی وجہ سے جاں بحق ہوگیا۔محکمہ صحت ذرائع نے بتایا کہ جے وی سی اسپتال سرینگر میں دیوان باغ بارہمولہ کا شہری کورونا سے فوت ہوگیا۔ انہوں نے بتایا کہ مریض وینٹی لیٹر پر تھا اور سینے کی تکلیف میں مبتلا تھا۔ گورنمنٹ میڈیکل کالج بارہمولہ کے میڈیکل سپرانٹنڈنٹ ڈاکٹر سید مسعود نے بھی اس کی تصدیق کی۔

مذکورہ مریض کو سکمز بمنہ سرینگر میں 27جون کو داخل کیا گیا تھا۔مریض نمونیا کے مرض میں مبتلاء تھا اور منگلوار کو زندگی کی جنگ ہار گیا۔اس دوران سرینگر کے قمر واری علاقے سے تعلق رکھنے والے65سالہ شہری کی موت ہوئی، جسکی کورونا رپورٹ موت کے چند گھنٹوں بعد پازیٹیو آئی۔مقامی خبر رساں ادارے نے ذرائع کا حوالہ دیتے ہوئے بتا یا کہ منگلوار کی صبح ساڑھے9بجے کورونا ٹیسٹ کے لئے نمو نہ لیا گیا جسکی رپورٹ سی ڈی اسپتال سے بعد دوپہر مثبت آئی۔معلوم ہوا ہے کہ مہلوک شہری کو سوموار کے روز صدر اسپتال کے آئسو لیشن وارڈ میں داخل کیا گیا تھا۔

اُسے سینے میں درد کی شکایت تھی جبکہ اُسے سانس لینے میں دشواریوں کا سامنا تھا۔سوموار بعد دوپہر اُسے صدر اسپتال میں داخل کیا گیا اور ساڑھے نو بچے صبح اُسکی منگلوار کو موت ہوئی۔ادھر صوبہ جموں کے ضلع کٹھوعہ سے تعلق رکھنے والی کورونا متاثرہ ایک معمر خاتون کی منگل کی صبح موت ہوئی۔یہ کٹھوعہ ضلعے میں کورونا سے ہونے والی پہلی موت ہے۔

گورنمنٹ میڈیکل کالج جموں کے پرنسپل ڈاکٹر نصیب چند ڈیگرا نے بتایا ہے کہ بسولی کٹھوعہ سے تعلق رکھنے والی عمر رسیدہ خاتون کو یہاں 25 جون کو لایا گیا تھا اور وہ مسلسل وینٹی لیٹر پر تھی۔انہوں نے کہا کہ پھیپھڑوں کے عارضے میں مبتلا یہ خاتون منگل کی صبح قریب ساڑھے 7 بجے انتقال کر گئیں۔مذکورہ خاتون کا بھی کورونا ٹیسٹ کرایا گیا تھا،جسکی رپورٹ مثبت آئی تھی۔جموں وکشمیر میں منگلوار کے روز کورونا سے مبتلاء ہوکر5افراد کی موت کیساتھ ہی یہاں کورونا وائر س سے ہلاکتوں کی تعداد101تجاوز کرگئی۔101ہلاکتوں میں سے وادی کشمیر میں 89ہلاکتیں ہوئیں جبکہ صوبہ جموں میں یہ تعداد بڑھ کر اب12ہوگئی ہے۔

وادی کشمیر میں ضلع سرینگر میں اب تک کورونا سے متعلق سب سے زیادہ24 اموات رپورٹ کی گئیں جبکہ دوسرے نمبر پر ضلع بارہمولہ ہے جہاں اب تک16 افراد کی اس وائرس میں مبتلا ہو کر موت واقع ہوئی ہے۔ضلع کولگام میں 13، شوپیاں میں 12، بڈگام میں 7، اننت ناگ میں 7، کپوارہ میں 5، پلوامہ میں 4 اور بانڈی پورہ میں ایک مریض کورونا میں مبتلا ہوکر زندگی کی جنگ ہار گیا۔