خبراردو ڈیسک:

نیشنل کانفرنس کے سینئر لیڈر اور جنرل سیکٹری مصطفی کمال نے کہا ہے کہ ”این سی تب تک کسی بھی سیاسی سرگرمی میں حصہ نہیںلے گی جب تک جموں کشمیر کی خصوصی پوزیشن (دفعہ ۳۷۰) کو بحال نہیںکیا جاتا“ ۔ان باتوں اظہار کمال نے ایک نیوز ایجنسی کو دئے گئے ایک انٹرویو میں کیا ہے ۔

این سی سینئر لیڈر مصطفی کمال نے مزید کہا کہ ”این سی وفد نے ۵ اگست سے قبل وزیر اعظم مودی اور سابقہ ریاست کے آخری گورنر ستیہ پال ملک سے اس حوالے سے بات بھی کی تھی اور دونوں نے وفد کو یقین دہائی کرائی تھی خصوصی پوزیشن کو ختم نہیں کیا جائے گا ، لیکن اب اس کو ختم کر کے ہمیں دھوکہ دیا گیا“ ۔
آپ کو بتادیں ۵ اگست سے قبل نائب صدر عمر عبداللہ اور جسٹس حسنین مسعودی کے علاوہ این سی صدر ڈاکٹر فاروق عبداللہ کی سربراہی والے وفدنے وزیر اعظم مودی سے دلی میں ملاقات کی تھی ، لیکن اس میٹنگ میں مودی سے کیا بات چیت ہوئی این سی لیڈران نے میڈیا سے اس حوالے سے خاموشی ہی برتی ۔

دوسری جانب سے مصطفی کمال پہلے ایسے این سی لیڈر نہیں ہیں جنہوں نے انتخابات سے دور رہنے کی بات کی ہو ۔۴۱ ستمبر کو دو نوں نظربند باپ بیٹے سے ملاقات کے بعد این سی رکن پارلیمان محمد اکبر لون نے اپنی رہائش گاہ پر میڈیا کو بتایا تھا کہ” این سی تب تک کسی چناﺅ کا حصہ نہیں بنے گی جب تک جموں کشمیر کا ریاستی درجہ واپس نہیں دیا جاتا“۔
یہ بیان انہوں نے این صدر فاروق عبداللہ جو کہ پبلک سیفٹی ایکٹ کے تحت اپنے گھر میں ہی نظر بند ہیں اور عمر عبداللہ جو ہری نواس میں قید ہیں سے ملاقات کے بعد دیا تھا ۔
ایک طرف جہاں این صدر اور ممبر پارلیمان فاروق عبداللہ پر پی ایس اے لگایا گیا لیکن دوسری جانب سے این سی کے کسی بھی ممبر پارلیمان نے بطور احتجاج لوک سبھا کرسی سے استعفی نہیں دیا ۔

ادھر اسکے بعد بھی ایک مشترکہ بیان میں ایم پی جسٹس حسنین مسعودی اور اکبر لون نے ایک اور قدم آگے بڑھتے ہوئے وہی بیان دیا تھا جو آج مصطفی کمال دے رہے ہیں ۔ ان بیانات سے اگرچہ ابھی تک واضح نہیں ہو پایا ہے کہ آیا یہ ان لیڈران کے نجی بیانات ہیں یا پارٹی کے لیکن ان سینئر لیڈران کے یہ اگر نجی بیانات بھی مان کر دیکھا جائے تو کہا جا سکتا ہے کہ یہ لیڈرا ن اب انتخابی سرگرمی میں حصہ نہیں لینا چاہتے ہیں ۔

مذکورہ مشترکہ بیان کے بعد این سی جموں یونٹ کے صدر دویندر سنگھ رانا نے ان لیڈران کے یہ بیانات نجی قرار دئے تھے ۔یہ بھی واضح ہے کہ این سی انتخابات میں حصہ لینے کے علاوہ باقی تمام فیصلے پارٹی لیڈرشپ کی رہائی کے بعد ہی سامنے آئیں گے ۔ اکتوبر میں ہوئے بلاک ترقیاتی انتخابات کو منعقد کرانے سے قبل مقامی انتظامیہ کی جانب سے جموں کے کہیں لیڈران جہاں رہا کئے گئے تھے وہیں کشمیر میں بھی ان لیڈران کو اپنی لیڈراشپ سے ان انتخابات کے حوالے سے ملاقات کا موقع دیا گیا تھا ۔ تب این سی پی ڈی پی اور دیگر جماعتوں نے ان انتخابات کو بے سود قرار دے کر بائیکاٹ کا اعلان کر دیا تھا ۔

لیکن اب جموں کشمیر کی جہاں خصوصی پوزیشن ختم کر دی گئی ہے وہیں اسکا درجہ کم کر کے اسے اب وفاقی علاقہ قرار دیا گیا ہے ۔ اور اب خبریں یہ بھی آ رہی ہیں کہ جموں اور کشمیر کے تین ، تین صوبوں کا ایک اور الگ صوبہ بنایا جا سکتا ہے ۔اس تمام صورتحال کو دیکھتے ہوئے کیا این سی واقع چنا و میں حصہ نہیں لینا چاہے گی؟ ۔

۵ اگست سے قبل تمام سیاسی جماعتیں خصوصی پوزیشن کا دفاع کرنے کی باتیں کر رہی تھیں جن میں ایک این سی بھی تھی ۔لیکن اب خصوصی پوزیشن ختم کی گئی ہے اور اب لوگوں کے پاس ووٹ مانگنے کےلئے ان کے پاس کچھ بھی شائد بچا نہیں ہے ۔وہیں اگر یہ سیاسی جماعتیں بائیکاٹ کریں گی تو مرکز ان کے پیچھے پڑ کر ان کے تمام کرپشن سکیمز کو سامنے لا کر جیل بھیج سکتی ہے۔
ان سیاسی جماعتوں کے پاس دو یا اس بھی زیادہ راستے ضرور موجو د ہیں لیکن ان راستوں پر چل کر ان کا اپنا وجود باقی رہنا ناممکن لگ رہا ہے ۔

ادھر اب افواہیں یہ بھی گرم ہیں مرکز کی جانب سے وادی میں مین سٹریم کو بحال کرنے کےلئے تھرڈ فرنٹ کی تشکیل دی جا رہی ہے ۔محبوبہ مفتی کی بیٹی التجا مفتی نے ایک ٹوئٹ میں کہا تھا کہ جو جیل سے چھوٹنا چاہتا ہے اسے صرف تھرڈ فرنٹ میں شمولیت کےلئے حامی بھرنی ہو گی ۔

ا ان افواہوں کو تب تقویت ملی جب ۹ ستمبر کو صحافیوں کےلئے اطلاعاتی مرکز میں قائم کئے گئے میڈٰیا سنٹر میں شاہد خان نامی شخص کی سربراہی میں کچھ افراد داخل ہوئے جنہوں نے جموں کشمیر پولیٹیکل پارٹی نامی نئی سیاسی جماعت کی تشکیل کی جانکاری دی ۔ لیکن ان کے ایجنڈے کے بارے میں کسی کو خبر نہیں ۔

دوسری جانب سے خبریں یہ بھی گرم ہیں کہ اسی سال اپنی نئی پارٹی تشکیل دینے والے ۲۰۰۹ بیچ کے آئی اے ایس ٹاپر شاہ فیصل سیاست کو خیر باد کہنے کے بارے میں سوچ رہے ہیں ۔جبکہ ان کی ساتھی لیڈر شہلا رشید نے پہلے ہی سیاست سے کنارہ کشی کا اعلان کر دیا تھا ۔