خبراردو:

سرحدی قصبہ ہندوارہ کے باباگنڈ علاقے میں یکم مارچ کی شام دیر گئے فوج، سی آر پی ایف اور ایس اوجی اہلکاروں نے گاؤں میں بڑے پیمانے پر تلاشی آپریشن کا آغاز کرتے ہوئے یہاں چھپے بیٹھے جنگجوؤں کے خلاف کارروائی شروع کی۔ فورسز کو جمعہ کی شام دیر گئے مصدقہ اطلاع موصول ہوئی تھی کہ باباگنڈ کھانو علاقے میں جنگجوؤں کسی مکان میں پناہ لئے ہوئے ہیں جس کے بعد علاقے کو فورسز نے چاروں اطراف سے اپنی تحویل میں لیتے ہوئے گھر گھر تلاشیوں کا باضابطہ آغاز کیا۔پولیس ذرائع نے بتایا کہ جمعہ اور سنیچر کی درمیانی شب کو قریباًڈیڑھ بجے جونہی تلاشی پارٹی مشتبہ مکان کے نزدیک پہنچ گئی تو یہاں موجود جنگجوؤں نے جدید ہھتیاروں سے فورسز پر شدید فائرنگ کی۔

ذرائع کا کہنا تھا کہ طرفین کے شدید گولہ باری کے نتیجے میں ابتدائی طور پر سی آر پی ایف انسپکٹر اور ایس او جی اہلکار ہلاک ہوئے جبکہ فورسز کارروائی کے نتیجے میں ایک نوجوان جو مظاہرے میں شامل تھا کو بھی گولی لگی جس کے نتیجے میں وہ سب ڈسٹرکٹ ہسپتال ہندوارہ میں زخموں کی تاب نہ لاکر دم توڑ بیٹھا۔ انہوں نے بتایا کہ جنگجوؤں کے ابتدائی حملے میں مزید 2فورسز اہلکار مارے گئے جس کے بعد علاقے میں مزید فورسز دستوں کو طلب کیا گیا تاہم دو دن کا وقفہ گزرنے کے باجوود جنگجوؤں فورسز پر وقفے وقفے سے فائرنگ جاری رکھے ہوئے تھے۔ انہوں نے بتایا کہ جائے جھڑپ تک پہنچنے کا راستہ انتہائی سخت اور دشوار گزار تھا اس لیے مکان میں پھنسے جنگجوؤں کو مار گرانے کے لیے فورسز کو پیشہ ورانہ بنیادوں پر ڈیل کرنا پڑا۔

ادھر اتوار کی صبح جائے جھڑپ پر مزید فائرنگ کا سلسلہ شروع ہوا جس کے بعد فورسز نے یہاں حتمی کارروائی کی جس کے نتیجے میں اتوار کی صبح دونوں جنگجوؤں کو جاں بحق کیا گیا۔پولیس ذرائع کا کہنا تھا کہ جائے جھڑپ پر فورسز نے دونوں جنگجوؤں کو جاں بحق کیا تاہم اتوار کی صبح جھڑپ میں زخمی ہوئے سی آر پی ایف اہلکار شام نارائن نے بھی دم توڑ دیا اور اس طرح جھڑپ میں کل ملاکر 5فورسز اہلکار ہلاک ہوئے۔ انہوں نے بتایا کہ پولیس نے جائے جھڑپ پر 2عدم شناخت جنگجوؤں کی لاشوں کو اسلحہ و گولہ بارود سمیت برآمد کرلیا ہے۔ انہوں نے بتایا کہ مارے گئے جنگجوؤں سے متعلق شناخت اور تنظیمی وابستگی کی تفصیلات جمع کی جارہی ہے۔ادھر علاقے میں گزشتہ دنوں سے جاری جھڑپ کے نتیجے میں وقفے وقفے سے نوجوانوں کی مختلف ٹولیوں نے فورسز کارروائی کے خلاف احتجاجی مظاہرے کرتے ہوئے جھڑپ کے مقام کی جانب پیش قدمی کرنی چاہی تاہم فورسز اہلکاروں نے مظاہرین کو ایسا کرنے کی اجازت نہ دیتے ہوئے انہیں منتشر کرنے کے لیے آنسو گیس کے درجنوں گولے داغے۔ اس دوران جھڑپ کے شروع ہوتے ہی تاایں دم علاقے میں مکمل ہڑتال رہی جس دوران یہاں معمولات زندگی ٹھپ ہوکر رہ گئے۔ نمائندے کے مطابق سنیچر اور اتوار کو علاقے میں مکمل ہڑتال کی گئی جس کے نتیجے میں یہاں عوامی، کاروباری اور تجارتی سرگرمیاں بالکل معطل ہوکر رہ گئیں جبکہ پرتناؤ صورتحال کے نتیجے میں باباگنڈ اور اطراف و و اکناف کے علاقوں میں سڑکوں سے ٹرانسپورٹ مکمل طور پر غائب رہا۔ضلع انتظامیہ نے اس دوران جمعہ کی شام کو تلاشی آپریشن شروع ہوتے ہی موبائل انٹرنیٹ خدمات معطل رکھی تھی جو ہنوز نافذ العمل ہے۔ادھر پولیس نے جھڑپ سے متعلق بیان میں بتایا کہ جھڑپ میں کئی ساری مشکلات تھیں جن میں علاقے کی جغرافیائی پوزیشن بھی شامل ہے۔انہوں نے بتایا کہ باباگنڈ جھڑپ میں فورسز کو انتہائی مشکلات کا سامنا کرنا پڑا کیوں کہ علاقے کی جغرافیائی صورتحال کو مدنظر رکھ کر جنگجوؤں کو مارگرانے میں فورسز کو بہت ساری مشکلات درپیش رہی۔انہوں نے بتایا کہ جہاں علاقے میں جہاں جنگجوؤں نے پناہ لے رکھی تھی وہ کافی بھیڑ بھاڑ والا علاقہ تھا اور ساتھ ہی یہاں سیولین آبادی واقع تھی۔

انہوں نے بتایا کہ فورسز نے آپریشن کے دوران عام شہریوں کو تحفظ فراہم کرتے ہوئے بیشتر شہریوں کو محفوظ مقامات کی طرف منتقل کیا۔انہوں نے بتایا کہ پولیس نے جائے جھڑپ پر 2جنگجوؤں کی لاشیں برآمد کیں جن کی شناخت اور تنظیمی وبستگی سے متعلق جانکاری حاصل کی جارہی ہے۔پولیس کے مطابق مارے گئے جنگجوؤں کی تحویل سے اسلحہ و گولہ بارود اور قابل اعتراض مواد بھی برآمد کیا گیا۔انہوں نے بتایا کہ برآمد کئے گئے قابل اعتراض مواد کو پولیس نے قانونی جانچ کے لیے روانہ کردیا ہے۔اس موقعے پر پولیس نے عام شہریوں سے جائے جھڑپ کی جانب پیش قدمی کرنے سے مکمل طور پر گریز کرنے کی اپیل کی ہے۔ پولیس کا کہنا تھا کہ ممکن ہے کہ جائے جھڑپ کے ارد گرد طرفین کی فائرنگ اور گولہ باری کے نتیجے میں کوئی بارودی شل یا مواد پھٹنے سے رہ گیا ہو لہٰذا عام شہریوں کی ہلاکتوں سے بچنے کے لیے جب تک نہ جائے جھڑپ کو بارودی مواد سے پاک و صاف کیا جائیگا تب تک عام لوگ یہاں آنے سے اجتناب کریں۔