رخبراردو: گورنر ستیہ پال ملک نے بتایا ہے کہ ریاستی انتظامیہ قطعی طور پرجموں وکشمیر میں دیرپا صدر راج کے حق میں نہیں ہے بلکہ اس بات کی خواہش مند ہے کہ یہاں فوراً سے پیشتر عوامی حکومت کو منصہ شہود پر لانے کی خاطر اسمبلی الیکشن کا انعقاد ہو۔

گورنر ستیہ پال ملک نے بدھوار کو جہانگیر چوک رام باغ فلائی آور کے دوسرے کاریڈور کا افتتاح کرنے کے موقعے پر ذرائع ابلاغ کے نمائندوں کے سوالات کا جواب دیتے ہوئے کہا کہ ریاستی انتظامیہ جموں وکشمیر میں دیرپا صدر راج کے حق میں نہیں ہے۔ گورنر کے بقول ریاستی انتظامیہ چاہتی ہے کہ یہاں فوراً سے پیشتر اسمبلی انتخابات منعقد ہوں تاکہ ایک عوامی حکومت منصہ شہود پر آجائے۔ گورنر ستیہ پال ملک نے واضح کردیا کہ ہم بھی چاہتے ہیں کہ یہاں اسمبلی الیکشن منعقد ہوں لیکن اس کا حتمی فیصلہ الیکشن کمیشن آف انڈیا کو ہی لینا ہوگا۔جب ان سے پوچھا گیا کہ ان کی انتظامیہ منتخب حکومت کو اقتدار سونپنے کے حق میں نہیں ہے تو انہوں نے صاف انکار کیا۔ انہوں نے کہاکہ ایسا کچھ انکی نوٹس میں نہیں آیا ہے۔گورنر ملک کاکہناتھاکہ اُنکی سربراہی والی موجودہ ریاستی انتظامیہ جموں وکشمیرمیں جاری صدر راج کا جلد خاتمہ چاہتی ہے تاہم انہوں نے اپنے اس موقف کااعادہ کیاکہ اسمبلی انتخابات کے انعقاد کا فیصلہ الیکشن کمیشن آف انڈیا کو ہی لینا ہے۔

واضح رہے کہ مرکزی وزیر داخلہ راجناتھ سنگھ نے بھی حال ہی میں ایک بیان میں کہا تھا کہ جموں کشمیر میں اسمبلی انتخابات کے انعقاد کا فیصلہ الیکشن کمیشن کو ہی لینا ہے تاہم انہوں نے اشارہ دیاتھا کہ اس ضمن میں لوک سبھا انتخابات کے بعد کوئی حتمی فیصلہ لیا جائے گا۔ اس دوران گورنر نے وسطی ضلع بڈگام میںچند مہینے قبل حادثے کا شکار ہوچکے فوجی ہیلی کاپٹر سے متعلق سوال کا جواب دینے سے انکار کیا۔انہوں نے بتایا کہ ریاستی حکومت کی جانب سے سرینگر جموں شاہراہ پر جو ہفتے میں دو روز تک عام شہریوں کی نقل و وحرکت سے متعلق عارضی پابندی عائد کی گئی تھی جس کے نتیجے میں وادی کشمیر سے تعلق رکھنے والے لوگوں کو سخت تکلیف دہ مراحل کا سامنا کرنا پڑا، اس کےلئے میں اُن سے معافی چاہتا ہوں۔ گورنر نے بتایا کہ میں لوگوں کا بے حد شکر گزار ہوں جنہوں نے شاہراہ پر پابندی کے دوران صبر و تحمل کا مظاہرہ کیا۔

اس دوران انہیں جن سخت مراحل سے گزرنا پرا اس کےلئے میں اُن سے معافی چاہتا ہوں۔گورنر نے بتایا کہ بارہمولہ سے اُدھم پورہ تک جو پابندی ہفتے میں دو روز تک عائد کی گئی تھی، وہ قومی مفاد کے پیش نظر لیا گیا فیصلہ تھا۔ انہوں نے صاف کردیا کہ شاہراہ پر 27مئی 2019سے کوئی بھی پابندی عائد نہیں ہوگی اور لوگوں کو مستقبل میں کسی بھی تکلیف دہ صورتحال کا سامنا نہیں کرنا پرے گا۔خیال رہے گورنر ستیہ پال ملک جہانگیر چوک رام باغ فلائی آور کے دوسرے کاریڈور کا افتتاح کررہے تھے ۔ رام باغ چوک سے آلوچی باغ تک اس کاریڈور کو بدھوار کو پبلک ٹرانسپورٹ کےلئے کھلا چھوڑدیا گیا۔

ماہرین کا ماننا ہے کہ اس نئے کاریڈور کے شروع ہونے سے رام باغ سے جہانگیر چوک تک متوار ٹریفک جام میں کمی آئی گی اور مسافروں کا کافی سارا وقت ضائع ہونے سے بچ جائےگا۔اس سے قبل مذکورہ فلائی آور کے پہلے حصے(بخشی اسٹیڈیم سے برزلہ پل تک) کو سال 2018میں اُس وقت محبوبہ مفتی کی قیادت والی مخلوط حکومت نے ٹریفک کی آوا جاہی کے لیے کھول دیا تھا ۔ سرکاری ذرائع کے مطابق فلائی آور کے آخری مرحلے یعنی تیسرے کاریڈور کو رواں سال کے جون میں مکمل کیا جائےگا۔گورنر ستیہ پال ملک نے خورشید احمد گنائی (مشیر)، کے کے شرما (مشیر)، کے سکھ نندن(مشیر)، چیف سیکرٹری بی وی آر سبھرامنیم، پرنسپل سیکرٹری اُمنگ نرولا، پرنسپل سیکرٹری منصوبہ بندی روہت کنسل، صوبائی کمشنر بصیر احمد خان، سرینگر میونسپل کارپوریشن کے میئر جنید متو، ڈپٹی کمشنر سرینگر ڈاکٹر شاہد اقبال چودھری، چیف ایکزکیوٹیو افسر ایرا راگو لنگر کے علاوہ کئی افسران موجود تھے، کی موجودگی میں فلائی آور کے دوسرے کاریڈور کا افتتاح کیا۔