وقف ترمیمی ایکٹ 2025کے آئینی جوازکوچیلنج کرنے والی عرضیاں
معاملے میں آج بھی نہیں آیا عدالت عظمیٰ کا فیصلہ
سری نگری:جے کے این ایس : وقف ترمیمی ایکٹ2025 کی آئینی حیثیت کو چیلنج کرنے والی عرضیوں پر سپریم کورٹ نے پیرکوتقریباً 2ہفتے بعد سماعت کی۔جے کے این ایس مانٹرینگ ڈیسک کے مطابق چیف جسٹس آف انڈیا سنجیو کھنہ، جسٹس پی وی سنجے کمار اور جسٹس کے وی وشواناتھن کی بنچ نے پیرکو بعددوپہر2بجے اس کیس کی سماعت کی۔

عدالت کے بیٹھتے ہی سالیسٹر جنرل تشار مہتا نے بنچ سے درخواست کی کہ سماعت اگلے ہفتے تک ملتوی کر دی جائے۔چیف جسٹس آف انڈیا سنجیو کھنہ کی سربراہی والی تین رکنی بنچ نے ان کا مطالبہ مان لیا۔ اس طرح اب اس معاملے کی سماعت اگلے جمعرات یعنی 15 مئی کو ہوگی۔آج کی سماعت کے دوران چیف جسٹس آف انڈیا سنجیو کھنہ نے ریکارڈ کیا کہ انہوں نے حکومت کی طرف سے دائر تمام دلائل اور جواب پڑھ لیا ہے۔ عدالت نے کہا کہ رجسٹریشن اور بعض اعداد و شمار کی بنیاد پر مسائل اٹھائے گئے ہیں، جن پر درخواست گزاروں نے سوال اٹھایا ہے۔ عدالت نے کہا کہ چونکہچیف جسٹس آف انڈیا سنجیو کھنہ کی ریٹائرمنٹ قریب ہے، وہ آخری مرحلے پر بھی کوئی فیصلہ یا حکم محفوظ نہیں رکھنا چاہتی۔ ایسے میں اب اس معاملے کی سماعت جسٹس بی آر گوائی کی سربراہی والی بنچ اگلے جمعرات 15 مئی کو کرے گی، جو ملک کے چیف جسٹس بننے جا رہے ہیں۔وقف قانون کے بارے میں کچھ باتیں۔وقف املاک کو ریگولیٹ کرنے اور ان کا انتظام کرنے کے لیے حکومت نے1995 کے وقف ایکٹ میں کچھ ترامیم کی تھیں۔ اپوزیشن جماعتوں اور مسلم تنظیموں نے سپریم کورٹ میں عرضی دائر کی ہے، جس میں اسے مذہبی اور بنیادی حقوق کی خلاف ورزی قرار دیا گیا ہے۔ اس قانون کو لوک سبھا نے3 اپریل کو اور راجیہ سبھا نے 4 اپریل کو پاس کیا تھا۔ یہ ترمیم5 اپریل کو صدر کی منظوری کے بعد عمل میں آئی۔مرکزی حکومت اور بی جے پی کے زیر اقتدار کئی ریاستی حکومتیں عدالت میں اس قانون کا دفاع کر رہی ہیں۔ جبکہ چیلنج کرنے والوں میں کانگریس ممبرپارلیمنٹ محمد جاوید اور آل انڈیا مجلس اتحاد المسلمین کے رکن پارلیمنٹ اسد الدین اویسی کے نام سرفہرست ہیں۔

پچھلی سماعت کے دوران حکومت نے عدالت کو یقین دلایا تھا کہ وہ قانون کی متنازعہ دفعات پر فی الحال کوئی پہل نہیں کرے گی، جس میں استعمال کی بنیاد پر وقف سمجھی جانے والی جائیدادیں، عدالت کی طرف سے اعلان کردہ وقف جائیداد اور وقف بورڈ یا کونسل میں غیر مسلموں کا داخلہ شامل ہے۔ سپریم کورٹ نے 17 اپریل کو ان درخواستوں کی سماعت کرتے ہوئے وقف املاک کی ڈی نوٹیفکیشن اور سنٹرل وقف کونسل سمیت بورڈز میں نئی تقرریوں پر پابندی لگا دی تھی۔ سپریم کورٹ نے ان درخواستوں پر حکومت سے جواب طلب کیا تھا اور درخواست گزار کو اس جواب پر جواب داخل کرنے کا وقت بھی دیا تھا۔میڈیارپورٹس کے مطابق وقف ترمیمی ایکٹ سے متعلق مرکزی حکومت کی طرف سے داخل کردہ حلف نامہ میں صارف کے ذریعہ وقف کو حق قرار دیا گیا تھا۔ سپریم کورٹ میں اقلیتی امور کی وزارت کی طرف سے دائر 1332 صفحات پر مشتمل حلف نامہ میں پرانے وقف ایکٹ کی دفعات کا حوالہ دیتے ہوئے کہا گیا ہے کہ وقف املاک کی رجسٹریشن بشمول صارفین کے ذریعہ وقف سال 1923 سے لازمی ہے۔ مسلمانوں کے مذہبی رسومات کا احترام کرتے ہیں۔مرکزی حکومت کی طرف سے داخل کردہ حلف نامہ کے جواب میں آل انڈیا مسلم پرسنل لا بورڈ نے بھی حلف نامہ داخل کیا ہے۔ جوابی حلف نامے میں مرکزی حکومت کی طرف سے داخل کردہ حلف نامہ میں دیے گئے ڈیٹا پر سوالات اٹھائے گئے ہیں۔

مسلم پرسنل لاءبورڈ نے اپنے جوابی حلف نامے میں کہا ہے کہ حکومت سپریم کورٹ کو گمراہ کر رہی ہے۔اے آئی ایم پی ایل بی نے یہ بھی کہا ہے کہ وقف املاک میں اضافے کا حکومت کا دعویٰ غلط ہے۔ جس افسر نے یہ حلف نامہ داخل کیا ہے اس کے خلاف کارروائی کی جائے۔ اپنے جوابی حلف نامے میں بورڈ نے حکومت کے اس دعوے پر بھی اعتراض کیا ہے کہ سنٹرل پورٹل پر 2013 کے بعد رجسٹرڈ وقف املاک میں زبردست اضافہ ہوا ہے۔