خبراردو:

نیشنل کانفرنس کے صدر اور رکن پارلیمان ڈاکٹر فاروق عبداللہ نے مسئلہ کشمیر کے بامعنی حل کے لیے حریت کانفرنس کے ساتھ مذاکرات کی وکالت کرتے ہوئے کہا کہ اگر فوجی سربراہ جنرل بپن راوت طالبان جنگجوؤں کے ساتھ افہام و تفہیم کی وکالت کرسکتے ہیں تو نئی دہلی کو بلاتاخیر حریت کانفرنس کو اعتماد میں لے کر بات چیت کا سلسلہ شروع کرنا چاہیے۔انہوں نے صاف کردیا کہ کشمیر مسئلے کو کسی بھی صورت میں فوجی ذرائع، دھونس دباؤ یا طاقت سے حل نہیں کیا جاسکتا بلکہ اس کے لیے بات چیت ہی واحد راستہ ہے۔

نیشنل کانفرنس صدر ڈاکٹر فاروق عبداللہ نے کولکتہ میں کشمیر سے متعلق ایک مباحثے بعنوان ’جموں وکشمیر: آگے کا راستہ‘ میں تبادلہ خیال کرتے ہوئے مسئلہ کشمیر کے پرامن تصفیہ اور بامعنی حل کے لیے نئی دہلی پر زور دیتے ہوئے کہا کہ وہ حریت کانفرنس کے ساتھ مذاکرات شروع کرے۔ ڈاکٹر فاروق نے دیرپا امن کے لیے مسئلہ کشمیر کے حل کو ناگزیر قرار دیتے ہوئے نئی دہلی پر زور دیا کہ وہ مسئلہ کشمیر کے بامعنی حل کے لئے کشمیری حریت رہنماؤں کے ساتھ بات چیت کا سلسلہ شروع کرے۔فوجی سربراہ جنرل بپن راوت کے حالیہ بیان جس میں انہوں نے طالبان جنگجوؤں کے ساتھ مذاکرات کی وکالت کی تھی پر ردعمل ظاہر کرتے ہوئے کہا کہ اگر افغانستان میں مسائل کے حل کی خاطر فوجی سربراہ افہام و تفہیم کے راستے کی وکالت کرتے ہیں تو ایسے میں نئی دہلی کو بھی ٹھو س اور مؤثر اقدامات اُٹھاکر کشمیری حریت رہنماؤں کے ساتھ بات چیت شروع کرکے مسئلہ کشمیر کو حل کرنا چاہیے۔’سنٹر فار پیس اینڈ پراگریس‘ کی طرف سے منعقدہ مباحثے میں ڈاکٹر فاروق عبداللہ کا کہنا تھا کہ نئی دہلی کو اپنی انا ترک کرکے حریت کانفرنس کے ساتھ تاخیر کے بغیر مذاکرات شروع کرنے چاہیے۔

انہوں نے بتایا کہ حریت کانفرنس سے وابستہ لیڈران اور کارکنان بھارتی پاسپورٹ رکھتے ہیں اور اس طرح وزیر اعظم آنجہانی اٹل بہاری واجپائی نے کشمیر ی حریت رہنماؤں کے ساتھ ماضی قریب میں مذاکرات کئے۔این سی صدر ڈاکٹر فاروق نے مباحثے میں واضح کیا کہ مسئلہ کشمیر کو فوجی ذرائع اور طاقت سے حل نہیں کیا جاسکتا۔ ’کشمیر معاملے کو کسی بھی صورت میں فوجی ذرائع یا طاقت کے ساتھ حل نہیں کیا جاسکتا اور اگر خطے میں امن کو یقینی بنایا ہے تو اس کے لیے مذاکرات کا سلسلہ انتہائی ناگزیر ہے۔انہوں نے دبے الفاظ میں ملک میں براجمان بھارتیہ جنتا پارٹی پر تنقید کرتے ہوئے کہا کہ میں پراُمید ہوں کہ ملک میں ہونے والے پارلیمانی انتخابات کے اختتام تک بات چیت کے حوالے سے کوئی مثبت قدم نہیں اُٹھایا جائے گا کیوں کہ بدقسمتی سے فی الوقت ملک کا عوام یک جٹ ہونے کے بجائے مختلف سطحوں پر بٹ چکا ہے۔’ملک میں آنے والے مہینوں میں لوک سبھا انتخابات تک مسئلہ کشمیر سے متعلق کوئی بریک تھرو ملنے کی کوئی اُمید دکھائی نہیں دیتی کیوں کہ ملک کی سیاسی جماعتوں نے لوگوں کو متحد کرنے کے بجائے انہیں منتشر کردیا ہے۔ میں اُمید کرتا ہوں کہ لوک سبھا انتخابات ختم ہونے کے بعد ہی مسئلہ کشمیر پر کوئی سیاسی پہل ہوگی اور حریت کانفرنس کے ساتھ بات چیت کا سلسلہ شروع ہوگا‘۔ڈاکٹر فاروق عبداللہ کا کہنا تھا کہ موجودہ سیاسی صورتحال میں نئی دہلی اور کشمیری عوام کے درمیان بداعتمادی کی فضا پائی جارہی ہے اور ملک کے کونے کونے میں نفرت اور عداوت کا ماحول پیدا کیا گیا ہے۔ انہوں نے کہا کہ ہندوستان اورپاکستان کے درمیان دشمنی اور عداوت کی جو دیوار کھڑی کی گئی تھی اس کی قیمت جموں و کشمیر کے عوام کو برداشت کرنا پڑا۔

انہوں نے کہا کہ کچھ طاقتیں ہیں جو دوونوں ممالک کو قریب نہیں آنے دیتے ہیں کیوں کہ اگر کشمیر میں امن و امان قائم ہوگیا تھا توان کی دوکانداری ختم ہوجائے گی۔ ڈاکٹر فاروق عبد اللہ نے کشمیر کے موجودہ حالات کیلئے مودی حکومت کو براہ راست ذمہ دار ٹھہراتے ہوئے کہا کہ حکومت عوامی پلیٹ فارم پر کشمیریوں کا دل جیتنے کی بات ضرورکرتی ہے مگر کشمیری عوام کو برابری کا درجہ دینے کو تیار نہیں ہے۔کشمیریوں کے ملک بھر میں بدسلوکی کے واقعات ہورہے ہیں،کشمیریوں کی حب الوطنی پر مسلسل سوالیہ نشان لگایا جاتاہے،کشمیریوں کوا پنا نہیں سمجھا جاتا ہے۔ ڈاکٹرفاروق عبد اللہ نے آرٹیکل370کو ختم کرنے کی وکالت کرنے والوں کی سخت تنقید کرتے ہوئے کہا ہے کہ ہندوستان اور کشمیر کے الحاق کی تاریخ اور اسباب کو نہیں جاننے والے ہی اس طرح کی باتیں کرتے ہیں۔انہوں نے کہا کہ دفعہ 370اور 35اے کو ہندوستان کے آئین کا حصہ کشمیری مسلمانوں کی وجہ سے نہیں بلکہ حکومت ہند اور جموں و کشمیر کے مہاراجہ کے درمیان معاہدہ کے وقت ہی شامل کیا گیا تھا۔خیال رہے فوجی سربراہ جنرل بپن راوت نے گزشتہ دنوں افغانستان اور کشمیر کے حوالے سے سیاسی پہل پر تبصرہ کرتے ہوئے کہا کہ افغانستان کا طریق کار اور پالیسی کشمیر میں عملائی نہیں جاسکتی۔ انہوں نے دوٹوک الفاظ میں مسئلہ کشمیر کے حل میں کسی تیسری فریق کی مداخلت کو ناقابل قبول قرار دیتے ہوئے کہا کہ مسئلہ کشمیر کے حوالے سے مذاکرات بھارت کی طرف سے پیش کی جانے والے شرائط پر مبنی ہوں گے۔

فوجی سربراہ نے بتایا کہ جب تک نہ حریت کانفرنس تشدد کا راستہ ترک کرنے اور پاکستان کا راگ الاپنا بند نہیں کرتے تب تک بات چیت کا کوئی امکان نہیں ہے۔ادھر مباحثے میں حصہ لیتے ہوئے سابق آرمی چیف شنکر رائے چودھری نے اپنی گفتگو میں سابق بیوروکریٹ شاہ فیصل کے استعفیٰ پر افسوس کا اظہار کیا۔ انہوں نے بتایا کہ شاہ فیصل کا بیوروکریسی سے مستعفی ہونا ہمارے لیے صدمے سے کم نہیں ہے۔ انہیں بیوروکریسی کو خیرباد نہیں کہنا چاہیے تھا تاہم انہوں نے اس بات اطمینان کا اظہار کرتے ہوئے کہا کہ گزشتہ برسوں سے وادی کشمیر کی نوجوان نسل آرمی میں بھرتی ہورہے ہیں جو کہ ایک خوش آئندہ بات ہے۔