خبراردو: مغل روڑ پر پیر کی گلی کے مقام پر سڑک کے ایک المناک حادثے میں ایکسکرشن پر آرہی گاڑی لعل غلام روڑ پر سڑک سے لڑھک کر گہری کھائی میں جاگری جس کے نتیجے میں گاڑی میں سوار 9طالبات سمیت 11افراد جاں بحق ہوگئیں جبکہ حادثے میں ایک درجن کے قریب اسکولی طالبات زخمی ہوگئیں جنہیں علاج و معالجے کی خاطر شوپیان اور سرینگر منتقل کیا گیا۔

مغل روڑ پر جمعرات کو اُس وقت چیخ و پکار اور فضا شکن سسکیاں سنی گئیں جب پونچھ سے شوپیان کی طرف آرہی ٹیمو ٹراولر لعل غلام روڑ کے نزدیک سڑک سے لڑھکنے کے بعد گہری کھائی میں جاگری۔اطلاعات کے مطابق مغل روڑ پر واقع پیر کی گلی پر سرنکوٹ پونچھ سے تعلق رکھنے والے نجی کمپوٹر انسٹی چوٹ میں زیر تعلیم طالبات ایکسکرشن کی غرض سے دھوبجن شوپیان جارہے تھے کہ اسی اثنا میں بدھوار دوپہر کے قریب گاڑی ڈرائیور کے قابو سے باہر کر سڑک سے لڑھکنے کے بعد گہری کھائی میں جاگری۔ ذرائع سے معلوم ہوا کہ گاڑی میں سوار11طالبات موقعے پر ہی جاں بحق ہوگئیں جبکہ اس کے علاوہ دیگر ایک درجن طالبات شدید طور پر زخمی ہوگئیں جنہیں نازک حالت میں شوپیان اور سرینگر کے ہسپتالوں میں منتقل کیا گیا۔ہسپتال ذرائع نے جاں بحق ہوئے افراد کی شناخت تبسم دختر محمد رفیق، شاہین فاطمہ دختر زمان احمد، سہیل احمدولد زبیر احمد، عرفانہ کوثر، حمیرہ قاظمی، رحمت بی، جمیل احمد، نجمہ جان، شبنم اور رابعہ جان کے طور پر کی ہے۔پولیس ذرائع نے حادثے سے متعلق تفصیلات فراہم کرتے ہوئے بتایا کہ بدھوار کو پونچھ کے سرنکوٹ میں قائم نجی کمپوٹر انسٹی چوٹ سے وابستہ طالبات سیر و تفریح کی غرض سے شوپیان آرہے تھے جس دوران ان کی گاڑی پیر کی گلی کے مقام پر سڑک سے لڑھکنے کے بعد 100میٹر گہری کھائی میں جاگری۔ انہوں نے بتایا کہ حادثے کی شکار گاڑی کھائی میں گرجانے کے بعد مکمل طور پر تباہ ہوگئیں جس کے نتیجے میں گاڑی میں سوار 11افراد موقعے پر ہی دم توڑ بیٹھے۔ انہوں نے بتایا کہ ابتدائی طور پر حادثے میں مرنے والوں میں 9طالبات شامل ہیں جبکہ دیگر زخمیوں میں سے مزید کئی طالبات کی حالت نازک بنی ہوئی ہے۔

پولیس نے مزید بتایا کہ حادثے کے فوراً بعد یہاں پولیس اور انتظامیہ کے اعلیٰ افسران سمیت مقامی لوگوں نے پہنچ کر بچاؤ کارروائیاں شروع کی اور گاڑی میں پھنسے دیگر زخمیوں کو مختلف ہسپتالوں میں علاج و معالجے کی خاطرمنتقل کیا۔ پولیس کے مطابق گاڑی میں سوار 22افراد میں سے ابتدائی طور پر 11افراد از جان ہوئے جبکہ دیگر زخمیوں کو شوپیان کے ہسپتالوں میں منتقل کیا گیا تاہم یہاں سے 7طالبات کو نازک حالت میں سرینگر کے ایس ایم ایچ ایس ہسپتال منتقل کیا گیا۔ادھرہسپتال ذرائع نے بتایا کہ پیر کی گلی پر پیش آچکے حادثے کے متاثرین کو پہلے شوپیان کے ڈسٹرکٹ ہسپتال منتقل کیا گیا جہاں اُن کا ابتدائی علاج و معالجہ عمل میں لایا گیا تاہم 7طالبات کو نازک حالت میں سرینگر کے ہسپتالوں کو منتقل کیا گیا۔عینی شاہدین کا کہنا تھا کہ حادثے کے فوراً بعد انتظامیہ، پولیس اور لوگوں نے مشترکہ طور پر بچاؤ کارروائیاں شروع کیں جس کے بعدزخمی افراد کو مختلف طبی مراکز کو منتقل کیا گیا۔

انہوں نے کہا کہ جونہی حادثہ پیش آیا تو یہاں کہرام مچ گیا جس دوران گاڑی میں سوار زخمی طالبات کی چیخ و پکار سے ماحول آبدیدہ ہوگیا۔ادھر ڈپٹی کمشنر شوپیان ڈاکٹر اُویس احمد کے مطابق حادثے میں ابتدائی طور پر 4طالبات موقعے پر ہی لقمہ اجل بن گئیں جبکہ گاڑی میں سوار دیگر زخمی طالبات کو نازک حالت میں نزدیکی ہسپتالوں کو منتقل کیا گیا۔ انہوں نے بتایا کہ حادثے میں زخمی ہوچکی دیگر طالبات کی حالت ہنوز تشویشناک بنی ہوئی ہے۔ انہوں نے کہا کہ 7طالبات کو نازک حالت میں شوپیان کے طبی مراکز سے سرینگر کے ہسپتالوں کو منتقل کیا گیا جبکہ دیگر زخمیوں کا علاج و معالجہ جاری ہے۔ادھر پولیس نے واقعے کے حوالے سے ایک کیس درج کرتے ہوئے حادثے کے محرکات کو جاننے کیلئے انکوائری شروع کردی ہے۔ پولیس نے بتایا کہ مغل روڑ پر پیش آچکے سڑک کے المناک حادثے سے متعلق مقدمہ درج کرنے کے ساتھ ساتھ تحقیقات شروع کی گئی ہیں۔

گورنر ستیہ پال ملک نے بدھوار کو سڑک حادثے میں انسانی جانیں تلف ہونے پر اپنے گہرے دکھ اور صدمے کا اظہار کیا ہے۔

گورنر ستیہ پال ملک نے اپنے تعزیتی پیغام میں جاں بحق افراد کے ابدی سکون کیلئے دعائیں کرنے کے علاوہ لواحقین کیساتھ دلی تعزیت کا اظہار کیا ہے۔ گورنر نے حادثے میں مرنے والے کے حق میں فی کس 5لاکھ روپے بطور ایکس گریشیا ریلیف کا اعلان کیا ہے۔اس موقعے پر گورنر ستیہ پال ملک نے انتظامیہ کو ہدایت کرتے ہوئے کہا کہ وہ حادثے میں زخمی افراد کو بہتر علاج و معالجہ فراہم کریں۔ انہوں نے زخمی ہوئے افراد کی جلد اور فوری صحتیابی کیلئے بھی دعا کی۔

اس دوران حادثے پر متعدد سیاسی، سماجی اور مذہبی لیڈران جن میں ڈاکٹر فاروق عبد اللہ، عمر عبداللہ، محبوبہ مفتی، ڈاکٹر شاہ فیصل، غلام احمد میر، عمران رضا انصاری، سجاد غنی لون، محمد یوسف تاریگامی، حکیم محمد یاسین، بیگم خالدہ شاہ، ایڈوکیٹ مظفر شاہ، علی محمد ساگر، ناصر اسلم وانی، محمد رفیع میر، نعیم اختر، انعام النبی، اشتیاق بیگ شامل ہیں،نے اپنے رنج و غم کا اظہار کرتے ہوئے جاں بحق افراد کے ابدی سکون کی دعا کرنے کیساتھ ساتھ لواحقین کے ساتھ دلی تعزیت کا اظہار کیا ہے۔