خبراردو: مرکزی سرکار نے دہشت گردانہ کارروائیوں کی گہرائی سے تحقیقات عمل میں لانے کیلئے قومی تحقیقاتی ایجنسی (ترمیمی) بل 2019کو قومی مفاد کیلئے ناگزیر قرار دیا ہے۔

مرکزی سرکار نے دہشت گردانہ کارروائی کی گہرائی سے چھان بین عمل میں لانے کیلئے قومی تحقیقاتی ایجنسی (ترمیمی) بل 2019کو قومی مفاد کیلئے ناگزیر قرار دیا ہے۔مرکزی سرکار کا دعویٰ ہے کہ قومی تحقیقاتی ایجنسی (ترمیمی) بل 2019کے دائرہ کار میں توسیع کرنا دہشت گردی کیخلاف زیرو ٹالرنس کی پالیسی کا حصہ ہے اور بل کو قانونی شکل فراہم کرنا ملکی مفاد کیلئے ناگزیر ہے۔مذکورہ بل کو قانونی شکل فراہم کرنے سے قبل بحث و مباحثہ کے دوران وزیر مملکت برائے محکمہ دفاع جی کرشن ریڈی نے پارلیمنٹ میں موجود تمام ممبران سے اس سلسلے میں حمایت طلب کی تاہم ہاؤس میں موجود کانگریس کے سینئر لیڈر منیش تیواری نے الزام عائد کیا بل کو قانونی شکل دینے کے نتیجے میں ہندوستان ”پولیس اسٹیٹ“ میں تبدیل ہوگا۔منیش تیواری کا کہنا تھا کہ بی جے پی کی قیادت والی مرکزی سرکار سخت قوانین کونفاذ کرتے ہوئے ملک کو ”پولیس اسٹیٹ“میں تبدیل کرنا چاہتی ہے۔

اس دوران وزیر مملکت جی کرشن ریڈی نے ہاؤس میں موجود ممبران کو آگاہ کیا کہ مذکورہ بل کو قانونی شکل فراہم ہونے کے بعد قومی تحقیقاتی ایجنسی کا تحقیقاتی دائرہ کار بیرون ملک تک بڑھ جائیگا۔انہوں نے کہا کہ مذکورہ قانون کے بعد این آئی اے اُن تمام دہشت گردانہ مقدمات کی تحقیقات عمل میں لاسکتا ہے جس کا مقصد بھارتی شہریوں چاہے وہ بھارت کے اندر رہائش پذیر ہوں یا دیگر ممالک میں موجود ہوں۔اس کے علاوہ مذکورہ قانون کے تحت این آئی اے کو یہ اختیار حاصل ہوگا کہ وہ اسلحہ و گولہ بارود، ہیومن ٹریفکنگ اور سائبر ٹیرورزم جیسے معاملات کی بھی تحقیقات عمل میں لائیگا۔جی کرشن ریڈی نے پارلیمنٹ میں موجود ممبران کو بتایا کہ مرکزی سرکار دہشت گردی کیخلاف زیرو ٹالرنس کی پالیسی پر قائم ہے اور ہم نہیں چاہتے کہ اس حوالے سے کسی بھی سطح پر کمپرومائز کیا جائے۔ انہوں نے کہا کہ دہشت گردی کا سختی کیساتھ مقابلہ کرنے کی خاطر ہی مذکورہ بل کو قومی مفاد کے پیش نظر سامنے لایا گیا ہے۔

انہوں نے ہاؤس میں موجود تماممبران کو مخاطب ہوکر بتایا کہ میں دعا گو ہوں کہ آپ سبھی قومی مفاد کو مدنظر رکھ کر بل کو قانونی شکل فراہم کرنے میں اپنا کردار ادا کریں گے۔خیال رہے دہشت گردانہ کارروائیوں کی گہرائی سے چھان بین عمل میں لانے کی خاطر مرکزی سرکار نے سال2009میں ممبئی حملوں کے مابعد قومی تحقیقاتی ایجنسی کو تشکیل دیا گیا۔ ادھر کانگریس کے سینئر لیڈر منیش تیواری نے مرکزی سرکار پر الزام عائد کیا کہ وہ سخت قوانین کی آڑ میں پورے ملک کو ”پولیس اسٹیٹ“ میں تبدیل کرنا چاہتی ہے۔تیواری کا کہنا تھا کہ این آئی اے کی آئینی ویلڈیٹی ہنوز مختلف عدالتوں میں زیر سماعت ہے لہٰذا اس کا دائرہ کار بڑھانے کا کوئی جواز نہیں ہے۔کشمیرنیوز سروس کے مطابق وزیر مملکت برائے محکمہ دفاع جی کرشن ریڈی کا کہنا تھا کہ جب سے قومی تحقیقاتی ایجنسی کو تشکیل دیا گیا ہے تب سے تا ایں دم ایجنسی نے 90فیصد مقدمات میں مجرموں کو سزائیں دی۔انہوں نے کہا کہ آج تک ایجنسی نے مختلف معاملات سے جڑے272مقدمات درج کئے ہیں جن میں عدالتوں نے 52کیسوں میں فیصلہ صادر کیا۔

انہوں نے کہا کہ ہیومن ٹریفکنگ سے جڑے مقدمات میں عدالتوں کی جانب سے مجرموں کو معقول سزائیں نہیں مل پارہی ہیں لہٰذا این آئی اے اس میں بھی اپنا اہم کردار ادا کریگی۔ریڈی نے بتایا کہ موجودہ دور میں دہتگردی کے مختلف زاویے ہیں لہٰذا یہ ناگزیر ہے کہ ایجنسی کویہ اختیار دیا جائے کہ وہ بھارتی شہریوں چاہے وہ دنیا کے کسی بھی حصے میں رہائش پذیر ہوں، کو نشانے بنائے جانے پر اپنی تحقیقات شروع کریں۔انہوں نے کہا کہ اس کے علاوہ این آئی اے مذکورہ قانون کو پاس ہونے کے بعد ملک کیساتھ ساتھ بیرون ملک میں موجود دبھارتی جائیداد کو نشانہ بنانے کا بھی سنجیدہ نوٹس لے کر تحقیقات عمل میں لاسکتی ہے۔