خبراردو:
نومبر 21:
جموں وکشمیر کی خصوصی پوزیشن کے خاتمے اور ریاست کو2حصوں میں منقسم کرکے’دویونین ٹریٹریز ‘قرار دئے جانے کے فیصلے کے بعد وادی کشمیر میں پیدا شدہ غیر یقینی صورتحال نے جمعرات کو اُس وقت اچانک کروٹ بدلی ،جب شہر سرینگرکے سبھی بازاروں میں تذبذب کیساتھ خاموشی چھا گئی ۔دفعہ370کی تنسیخ کے109ویں روز ،21نومبر کو شہر سرینگر کے سبھی بازاروں میں محدود کاروباری سرگرمیاں متاثر رہیں ۔تجارتی مرکز لالچوک کے کم و بیش سبھی بازاروں میں جمعرات کو ہر طرح کے دکان بندرہے ۔سرینگر کے نامہ نگارکے مطابق جمعرات کو شہر خاص کیساتھ ساتھ سیول لائنز بشمول لالچوک میں حسب معمول محدود کاروباری سرگرمیاں بحال ہونے ہی والی تھیں کہ اچانک دکانات کے شٹر نیچے گرنے شروع ہوگئے ۔ مختلف علاقوں سے جب دکاندار صبح8بجے کے قریب محدود کاروباری سرگرمیاں بحال کرنے کےلئے لالچوک پہنچنے ،تو یہاں انہوں نے عجب صورتحال پائی ۔بیشتر دکاندار وں نے حسب ِ سابقہ صبح 8بجے دکان کھولے ،تو 9بجنے سے قبل ہی تجارتی مرکز لالچوک میں افراتفری اور سراسیمگی کا ماحول قائم ہوا ،جسکے ساتھ ہی دکانات کے شٹر نیچے گرنے شروع ہوگئے ۔

ساڑھے 9بجے تک لالچوک اور اسکے گرد ونواح بازاروں میں آناً فاناً بند ہوگیا اور تاخیر سے پہنچنے والے دکاندار اچانک بدلی صورتحال کو دیکھ کرششدر ہوکر رہ گئے ۔لالچوک کے سبھی مرکزی بازاروں کے دکاندار وں اور تاجروں نے چمہ گوئیوں کے ماحول میں گھروں کی طرف واپسی کی راہ اختیار کی ۔تاہم سیول لائنز کے چند ایک بازاروں میں اکا دکا دکان آدھی شٹر اوپر کیساتھ کھلے رہے ،لیکن دوپہر سے قبل ہی یہ دکان بھی بند ہوگئے ۔بعض دکانداروں نے نام ظاہر کرنے کی شرط پر بتایا کہ اُنہیں آج بند کرنے کےلئے کہا گیا ،تاہم انہوں نے اس کی وضاحت نہیں کی کہ بند کرنے کےلئے کس نے کہا ۔ایک دکاندار نے بتایا ’ کشمیر میں کب کیا ہوگا ؟اللہ ہی رحم کرنے والا ہے‘ ۔افراتفری اور سرا سیمگی و چمہ گوئیوں کے ماحول میں جمعرات کو لالچوک کے علاوہ سیول لائنز کے دیگر علاقوں میں بازار بند رہے ۔جمعرات کو شہر سرینگر میں مجموعی طور پر محدود کاروباری سرگرمیاں مکمل طور دن بھر کےلئے ٹھپ رہیں ۔بعض بازاروں میں دکانات کے شٹر اوپر اور نیچے کرنے کا عمل دوپہر تک جاری رہا ۔یاد رہے کہ 6نومبر کو موسم کی پہلی برفباری کے بعد واد ی میںآہستہ آہستہ معمولات زندگی بحالی کی طرف گامزن ہونے لگے تھے ۔صبح8سے لیکردوپہر2بجے یا اڑھائی بجے تک محدود کاروباری سرگرمیاں جاری رہتی تھیں جسکے نتیجے میں بازاروں میں غیر معمولی چہل پہل اور رونق نظر آرہی تھی جبکہ پبلک اور نجی ٹرانسپورٹ کی آوا جاہی سے جگہ جگہ ٹریفک جام بھی دیکھنے کو ملتے تھے ۔تاہم جمعرات کو معمولات ِ زندگی کی تیز گام ہونے والی رفتار تھم گئی جبکہ دیگر سرگرمیوں کی نبض بھی رُخ گئی ۔نامہ نگار کے مطابق شہر خاص کے انتہائی مصروف ترین بازار ’گاڑھ کوچہ زینہ کدل ‘میں بدھ کی شام ساڑھے 7بجے کے قریب آگ کی ایک واردات میں 3دکان خاکستر ہوئے ۔پولیس نے اس واقعہ کی نسبت کیس درج کرکے مزید تحقیقات شروع کردی ۔

اس واقعہ کو لیکر بھی شہر خاص میں طرح طرح کی چمہ گوئیاں کی جارہی ہیں ۔ نامہ نگار کے مطابق شہر خاص میں بھی جمعرات کو سیول لائنز کی طرح کی صورتحال نظر آئی ۔ ادھر سیول لائنز کے مگرمل باغ میں سی آر پی ایف کی گاڑی پر پتھراﺅ کیا گیا جس دوران فورسز کی بھاری جمعیت نے پتھراﺅ کرنے والے نوجوانوں کا تعاقب کیا ۔ اس تعاقب کے دوران سی آر پی ایف نے ایک کمسن لڑکے کو اپنے ساتھ لیا ۔ اس دوران یہاں کچھ دیر کیلئے افرا تفری کا ماحول بھی پیدا ہوا ۔ ادھر شہرخاص میں بدھ کو اچانک بند ہوا تھا اور جمعرات کو مسلسل دوسرے روز بھی یہاں بند کے نتیجے میں معمولات ِ زندگی بحال نہ ہوسکے ۔ جامع مسجد مار کیٹ اورقدیم بازار مہاراج گنج کے ساتھ ساتھ شہر خاص میں جمعرات کو سبھی بازار بند رہے ۔بند کے نتیجے میں پورے شہر میں جمعرات کو محدود کاروباری و دیگر سر گرمیاں ٹھپ رہیں ۔شہر خاص کے بعض بازاروں میں صبح کے وقت دکان کھلے تھے ،تاہم دس بجنے سے قبل ہی یہاں بھی دکانات کے شٹر نیچے آئے ۔ایک دکاندار نے بتایا کہ نامعلوم افراد نے اُنہیں بند کرنے کےلئے کہا ۔اس دوران پولیس حکام کا کہنا ہے کہ معمولات زندگی میں رخنہ ڈالنے کےلئے خوف کا ماحول قائم کیا جارہا ہے جسکی ہر گز اجازت نہیں دی جائیگی ۔

ان کاتھا کہ خوف کا ماحول قائم کرنے والے شرپسند عناصر کے خلاف سخت سے سخت کارروائی کی جائیگی ۔ادھر شہر میں نجی اور پبلک ٹرانسپورٹ کی آوا جاہی جاری رہی ،تاہم بعد دوپہر اس میں بھی کمی دیکھنے کو ملی ۔اس دوران جنوبی کشمیر کے نامہ نگار نے اطلاع دی ہے کہ اننت ناگ اور کولگام میں دن بھر کاروباری و دیگر سرگرمیاں جاری رہیں ۔نامہ نگار کے مطابق شوپیان اور پلوامہ میں محدود کاروباری سرگرمیاں دیکھنے کو ملی ۔شمالی کشمیر کے نامہ نگار نے بتایا کہ شمالی کشمیر کے تینوں اضلاع کپوارہ ،بارہمولہ اور بانڈی پورہ میں معمول کی سرگرمیاں جاری رہیں ۔شمال وجنوب نامہ نگاروں کے مطابق نجی اور پبلک ٹرانسپورٹ کی سرگرمیاں بھی جمعرات کو معمول کے مطابق جاری رہیں ۔بڈگام اور گاندر بل سے ملنے والی اطلاعات کے مطابق یہاں بھی کہیں جزوی تو کہیں مکمل طور کاروباری ودیگر سرگرمیاں جا ری رہیں ۔کشمیر چیمبر اینڈ کامرس کا کہنا ہے کہ کشمیر کی معیشت پر غیر یقینی صورتحال کے نتیجے میں منفی اثرارت مرتب ہورہے ہیں ۔

مذکورہ ادارے کے نمائندے کے مطابق کشمیر کو روزانہ بند کی وجہ سے125کروڑ روپے خسارے کا سامنا کرنا پڑ رہا ہے اور اب تک کشمیر کو 13ہزار625کروڑ روپے خسارے کا سامنا کرنا پڑا۔دریں اثناءکشمیر میں 109ویں روز بھی انٹر نیٹ کی بند ش ،ایس ایس یم پر پابندی اور پری ۔پیڈ موبائیل فون سروس منقطع رہنے کی روایت برقرار رہی ۔ادھر 3سابق وزرائے اعلیٰ سمیت50سے زیادہ مین اسٹریم لیڈران نظر بند ہیں ۔واضح رہے کہ وزیر داخلہ امیت شاہ نے بدھ کو ایوان بالا (راجیہ سبھا ) میں کشمیر کی صورتحال پر بحث کے دوران کہا تھا کہ کشمیر میں حالات مکمل طور نار مل ہیں ۔