دنیا بھر میں کورونا وائرس کی تباہ کاریاں جاری ہیں اور197 ممالک تک پھیلنے والی وبا سے اب تک19 ہزار سے زائد افراد لقمہ اجل بن چکے ہیں۔گزشتہ برس دسمبر میں چین کے صوبے ہوبئی کے شہر ووہان سے منظر عام پر آنے والا کورونا وائرس197 تک پھیل چکا ہے اور دنیا بھر میں پھیلنے والی وبا سے ہلاک افراد کی تعداد19 ہزار152 ہو گئی ہے جب کہ متاثر افراد کی تعداد4 لاکھ28 ہزار سے زائد ہو گئی ہے۔
کشمیر نیوز سروس مانیٹر نگ ڈیسک کے مطابق دنیا بھر میں کورونا وائرس سے صحت یاب افراد کی تعداد1لاکھ 8 ہزار سے زائد ہو گئی ہے۔چین میں گزشتہ24 گھنٹوں کے دوران مزید 4 اموات رپورٹ ہوئی ہیں جس کے بعد وہاں ہلاکتوں کی مجموعی تعداد3 ہزار 281 ہو گئی ہے جب کہ کورونا سے متاثرہ مریضوں کی تعداد81 ہزار218 ہو گئی ہے۔اٹلی میں ایک اور تباہ کن دن:اٹلی میں ایک ہی روز میں 743 مزید افراد ہلاک ہو گئے جس کے بعد یورپی ملک میں کل اموات کی تعداد6 ہزار820 ہو گئی ہے۔ اس کے علاوہ اٹلی میں کورونا وائرس کے5 ہزار سے زائد نئے کیسز رپورٹ ہوئے ہیں جس کے بعد مجموعی مریضوں کی تعداد 70 ہزار تک پہنچ گئی ہے۔
اطالوی حکومت نے ملک میں بڑھتے ہوئے کیسز کے باعث لاک ڈاؤن کی خلاف ورزی کرنے والوں پر ایک ہزار یورو جرمانے کا اعلان کیا ہے۔اسپین میں بھی اموات2800 سے تجاوز کر گئیں:اسپین میں بھی کورونا وائرس سے مزید 500 افراد کی ہلاکت کے بعد اموات کی تعداد 2 ہزار800 سے تجاوز کر گئی ہے جب کہ متاثرین کی تعداد40 ہزار تک پہنچ گئی ہے۔فرانس میں متاثرہ افراد کی تعداد 22 ہزار سے زائد ہو گئی:کورونا وائرس نے فرانس میں بھی مزید 250 زندگیاں نگل لی ہیں جس کے بعد وہاں وبا سے ہلاک افراد کی تعداد 1100ایک ہزار 100ہو گئی ہے، متاثرافراد بھی 22 ہزار 300سے زائد ہو گئے ہیں۔جرمنی میں مزید 36 ہلاک:جرمنی میں مزید 36ہلاکتوں کے بعد مجموعی تعداد 159 ہوگئی ہے جب کہ متاثرہ افراد کی تعداد32 ہزار 781 ہو گئی ہے۔ہالینڈ، سویڈن اور بیلجیم میں بھی مزید ہلاکتیں:اس کے علاوہ کورونا وائرس سے ہالینڈ میں 63 اور بیلجیم میں 34افراد ہلاک ہو گئے ہیں جب کہ سویڈن میں کورونا وائرس کے باعث مرنے والوں کی تعداد 40 ہو گئی ہے اور 240نئے کیسزر پورٹ ہونے کے بعد وہاں مجموعی تعداد 2 ہزار299 ہو گئی ہے۔امریکا میں ایک ہی روز میں 222 اموات:امریکا میں ایک ہی روز میں 222 افراد کی ہلاکت کے بعد مجموعی اموات کی تعداد 775 تک پہنچ گئی ہے جب کہ 9 ہزار سے زائد نئے کیسز رپورٹ ہونے کے بعد مریضوں کی تعداد 54 ہزار 808 ہو گئی ہے۔ امریکا میں کورونا میں مبتلا نصف سے بھی زائد افراد کا تعلق نیویارک سے ہے جب کہ لاس اینجلس میں کورونا کے6 سو سے زائدکیسز ہیں اور80 فیصدافراد کی عمریں 18 سے 35 برس کے درمیان ہیں۔
امریکا کی ریاست نیویارک میں کورونا سے بیمار افراد کی تعداد تعداد 25 ہزار سے زائد ہے جس کے باعث نیویارک کا حال ہی میں دورہ کرنے والے اور واپس جانے والوں کو قرنطینہ کی ہدایت کی گئی ہے۔اس کے علاوہ امریکی صدر ڈونلڈ ٹرمپ کے کیلی فورنیا گالف کورس میں آنے والے افراد بھی کورونا وبا کا شکار ہو گئے ہیں۔عالمی ادارہ صحت کی امریکا کو تنبیہ:عالمی ادارہ صحت (ڈبلیو ایچ او) نے امریکا کو خبردار کیا ہے کہ اگر اس نے وبا پر قابو پانے کے لیے فوری طور پر اقدامات نہ کیے تو آنے والے دنوں میں امریکا دنیا میں وبا کا مرکز ہو گا۔ایران میں بھی کورونا سے ہلاکتوں کا سلسلہ جاری:ایران میں عالمگیروبا سے مزید 122 افراد کی ہلاکت کے بعد وہاں اموات کی مجموعی تعداد ایک ہزار934 ہو گئی ہے جب کہ مریضوں کی تعداد 24 ہزار811 ہو گئی ہے۔
نیوزی لینڈ میں ایمرجنسی نافذ:نیوزی لینڈ نے کورونا کے50 نئے کیسز سامنے آنے کے بعد ملک میں ایمرجنسی نافذ کردی ہے۔ایمرجنسی نافذ کرنے کا اعلان نیوزی لینڈ کی وزیراعظم جیسنڈا آرڈرن نے کیا۔یو اے ای میں 4 افراد صحتیاب:متحدہ عرب امارات کی وزارت صحت نے مزید 50 افراد میں کورونا وائرس کی تصدیق کی ہے جس کے بعد عرب ملک میں متاثرہ افراد کی تعداد 248 ہوگئی ہے جب کہ 4 افراد صحت یاب بھی ہو چکے ہیں جس میں ایک پاکستانی بھی شامل ہے۔بھارت میں 21 روز کیلئے لاک ڈاؤن:بھارتی وزیراعظم نریندر مودی نے 22 مارچ کو جنتا کرفیو کے بعد کورونا وائرس پر قابو پانے کے لیے ایک ارب30 کروڑ آبادی والے ملک کو 21 روز کے لیے لاک ڈاؤن کرنے کا اعلان کیا ہے۔پاکستان:پاکستان میں کورونا وائرس کیسز کی تعداد ایک ہزار سے تجاوز کرگئی۔بدھ کو اب تک خیبرپختونخوا میں 39، سندھ میں 3، بلوچستان میں 5، گلگت بلتستان اور اسلام آباد میں ایک ایک کیس سامنے آیا ہے۔ملائیشیا میں لاک ڈاؤن میں 2ہفتوں کی توسیع:ملائیشین وزیراعظم محی الدین یاسین نے ملک میں کورونا وائرس سے 17 ویں ہلاکت اور مزید172 کیسز سامنے آنے کے بعد18 مارچ سے شروع ہونے والے لاک ڈاؤن میں مزید 2 ہفتوں کی توسیع کر دی ہے۔