کورونا وائرس لاک ڈاؤن 53ویں روز اتوار کو سختی کیساتھ لاگو رہا جس دوران’مؤمنٹ پاس‘حاصل کرنے والے افراد کو ہی آنے جانے کی اجازت دی جارہی ہے۔ادھر جملہ عوامی،تجارتی اور ٹرانسپورٹ سرگرمیوں کا پہیہ جا م ہے جبکہ گھروں میں مقید لوگوں کی پریشانیوں میں روز افزوں اضافہ ہی ہورہا ہے۔ادھر حزب کمانڈر ریاض نائیکو کی ہلاکت کے بعد وادی کشمیر میں جاری موبائیل انٹر نیٹ بندش مسلسل5ویں روز بھی جاری رہی جبکہ جنوبی کشمیر کے پلوامہ اور شوپیان میں فون کالز کی سروس بھی ہنوز بند ہے۔کشمیر نیوز سروس کے مطابق وادی کشمیر میں کورونا لاک ڈاؤن اتوار کو مسلسل 53 ویں روز بھی جاری رہا جس کے باعث معمولات زندگی کا پہیہ مکمل طور پر جام رہا۔ جاری لاک ڈاؤن کے بیچ جہاں کورونا وائرس کے مثبت کیسز کے اضافے سے لوگوں میں پریشانی بڑھ رہی ہے، وہیں مزدور پیشہ لوگوں کے مشکلات میں ہر گذرتے دن کے ساتھ اضافہ ہورہا ہے۔سرینگر میں اتوار کو بندشیں اور پابندیاں سخت رہیں۔پولیس وفورسز کی جانب سے جگہ جگہ پر قائم کئے گئے سیکیورٹی ناکے سے گزر نے والے افراد سے پوچھ تاچھ کی جارہی ہے جبکہ ’مؤمنٹ پاس‘ حاصل کرنے والے افراد کو ہی آنے جانے کی اجازت دی جارہی ہے۔

سرینگر میں تجارتی مرکز لالچوک سمیت سبھی چھوٹے بڑے بازار مسلسل بند ہیں جسکی وجہ سے لوگوں کے مسائل میں مسلسل اضافہ ہورہا ہے۔وادی میں اس وقت مجموعی طور پر100سے زائد علاقوں کو ریڈ زونز ہیں،جسکی وجہ سے بھی پابندیاں اور بندشیں سخت کردی گئیں،تاکہ کورونا وائرس کے مزید بے قابو نہ ہو،تاہم مسلسل لاک ڈاؤن کے باوجود بھی کورونا کیسز میں ہوش ربا اضافہ دیکھنے کو مل رہا ہے۔وادی میں اس وقت800سے زیادہ مثبت معا ملات ہیں۔ دوسری جانب ریڈ زونز میں بھی اضافہ ہورہا ہے۔

ادھروادی کے دیگر شمال وجنوب کے ضلع صدر مقامات و قصبہ جات میں بھی مکمل لاک ڈاؤن جاری رہنے کی اطلاعات موصول ہوئی ہیں۔طویل ترین لاک ڈاؤن کی وجہ سے شہر ودیہات میں ہر طرح کے دکان،کاروباری مراکز اور تجارتی ادارے بند ہیں جسکی وجہ سے کشمیر کی معیشت پر منفی اثرات مرتب ہورہے ہیں۔طویل ترین لاک ڈاؤن سے بے روزگاری میں اضافہ ہورہا ہے جسکی وجہ سے نفسیاتی مریضوں کی فوج تیار ہورہی ہے۔ایک اقتصادی رپورٹ کے مطابق جموں وکشمیر میں کورونا لاک ڈاؤن کی وجہ سے روزانہ 270کروڑ روپے خسارے کا سامنا کرنا پڑ رہا ہے جبکہ گزشتہ9ماہ سے صورتحال جوں کی توں ہے۔سیکیورٹی لاک داؤن کے بعد کورونا ڈاؤن نے کشمیر کی معیشت کو تباہ کردیا جبکہ کشمیر کی اقتصادیات میں کلیدی اہمیت کے حامل شعبے جن میں سیاحت،زراعت،باغبانی،صنعت وحرفت شامل ہے،مکمل طور پر مفلوج ہو کر رہ گئے ہیں۔ ادھرعالمی وبا کورونا وائرس کے متاثرین اور مہلوکین کی تعداد میں اضافے کے ساتھ وادی کشمیر میں جہاں انتظامیہ کی طرف سے نافذ لاک ڈاون ہر گذرتے دنکے ساتھ سنگین سے سنگین تر ہورہا ہے وہیں لوگوں میں پھیل رہے تشویش و خوف کی لہر انہیں گھروں سے باہر قدم رکھنے نہیں دے رہی ہے۔

وادی میں اتوارکو مسلسل53 ویں روز بھی مکمل لاک ڈاؤن جاری رہتے ہوئے ہر سو خوف وخاموشی کا ماحول طاری رہا۔ لاک ڈاؤن کو ممکن بنانے کے لئے سڑکوں اور گلی کوچوں میں لگائی گئی پابندیاں سخت ترین کرفیو کا منظر پیش کررہی ہیں تاہم لوگ بھی وائرس سے محفوظ رہنے کے لئے خود بھی گھروں تک ہی محدود ہیں اور دوسروں کو بھی گھروں میں ہی بیٹھنے کی تاکید کررہے ہیں۔وادی میں اب تک کورونا وائرس سے متاثرہ 8 افراد کی موت واقع ہوئی ہے۔ وادی میں ہر سو خوف وخاموشی کا ماحول چھایا ہوا ہے، کرفیو جیسی پابندیاں برابر نافذ ہیں، سیکورٹی فورسز اہلکاروں نے جگہ جگہ ناکے بٹھائے ہیں جہاں پر آنے جانے والوں خواہ ہوں یا موٹر سائیکل پر سوار ہوں یا گاڑی میں ہوں، کو روکا جارہا اور ان سے پوچھ گچھ کی جارہی ہے۔

کورونا لاک ڈاؤن بدھ سے اور زیادہ سخت ہوگیا ہے،کیونکہ اس روز بیگ پورہ اونتی پورہ پلوامہ میں حزب المجاہدین کے اعلیٰ ترین کمانڈر ریاض نائیکو کو ساتھی سمیت ایک جھڑپ کے دوران جاں بحق کردیا گیا تھا۔اس کے بعد پلوامہ اور بڈگام کے کئی علاقوں میں پرتشدد جھڑپیں ہوئی جن میں ایک نوجوان جاں بحق جبکہ پولیس کے افسر سمیت کئی اہلکاروں اور درجنوں مظاہرین بھی زخمی ہوئے جسکی وجہ سے پیدا شدہ تشویشناک صورتحال کو کنٹرول میں کرنے اور امن وقانون کی صورتحال برقرار رکھنے کیلئے بندشوں اور پابندیوں میں مزید شدت لائی گئی۔ادھرجنوبی ضلع پلوامہ اور شوپیان کو چھوڑ کر وادی کشمیر کے دیگر9اضلاع میں موبائیل سروس 3دن تک بند رہنے کے بعد اگرچہ بحال کردی گئی ہے،تاہم موبائیل ایس ایم ایس اور انٹر نیٹ خدمات ہنوز منقطع ہیں جسکی وجہ سے جہاں کورونا لاک ڈاؤن میں آن لائن ادائیگی مکمل طور پر ٹھپ ہوگئی، وہیں قرنطینہ کا وقت گزار نے والے افراد،طلبہ،صحافیوں اور دیگر افراد کو شدید ترین ذہنی کوفت کا سامنا ہے۔

وادی کشمیر میں اتوار کو مسلسل5ویں روز بھی ایس ایم ایس اور موبائیل انٹر نیٹ سروس بند رہی۔ موبائل انٹرنیٹ خدمات پر گذشتہ 5 دنوں سے ایک بار پھر عائد پابندی سے جہاں قرنطینہ مرکز میں زیر نگرانی سینکڑوں افراد کا جینا مزید دو بھر ہوا ہے وہیں پیشہ ور افراد اور طلبا کے مشکلات بھی مزید بڑھ گئے ہیں۔ وادی میں پہلے موبائل انٹرنیٹ خدمات اور اس کے فوراً بعد فون خدمات بند کردی تھیں تاہم سرکاری مواصلاتی کمپنی بھارت سنچار نگم لمیٹڈ (بی ایس این ایل) کی فون اور لینڈ لائن خدمات منقطع نہیں کی گئی تھیں۔

ادھرصارفین کا کہنا ہے کہ اگرچہ فون خدمات بحال ہوئی ہیں لیکن ایس ایم ایس سہولیت کی لگاتار معطلی کی وجہ سے وہ مختلف مشکلات کا سامنا کررہے ہیں۔ ایس ایم ایس سہولیت بند رہنے کی وجہ سے لوگ آن لائن ادائیگی نہیں کر پا رہے ہیں کیونکہ موبائل فون پر او ٹی پی نمبر نہیں آتا ہے۔قرنطینہ مراکز میں زیر نگرانی لوگوں کا کہنا ہے کہ موبائل انٹرنیٹ خدمات پر پابندی سے کورنٹائن سینٹر ہمارے لئے قید خانے بن گئے ہیں۔2۔جی انٹرنیٹ کو بند کرنے کے بعد طلبا بھی آن لائن پڑھائی سے محروم ہوگئے ہیں۔لاک ڈاون کے دوران انتظامیہ نے تدریسی عملے کو طلبا کیلئے آن لائن کلاسز کے احکامات صادر کیے تھے تاکہ طلبا کی تعلیم زیادہ متاثر نہ ہو۔