لیفٹنٹ گورنر کے دعوے بے بنیاد، زمینی حقائق سے میل نہیں کھاتے
خبراردو:-

سرینگر:نیشنل کانفرنس نے کہا ہے کہ جموں و کشمیر میں گذشتہ 70برسوں کے دوران ترقیاتی منظرنامے سے متعلق لیفٹیننٹ گورنر کی لن ترانیوں کی کوئی بنیاد نہیں اور تاریخی حقائق موصوف کے دعوؤں سے میل نہیں کھاتے۔

ان باتوں کا اظہار پارٹی کے رکن پارلیمان ایڈوکیٹ محمد اکبر لون نے اپنے ایک بیان میں لیفٹنٹ گورنر کے اُس بیان پر زبردست برہمی کا اظہار کرتے ہوئے کیا جس میں موصوف نے کہا ہے کہ ”گذشتہ70برسوں میں جموں وکشمیر کو کیا ملا اس کا محاسبہ کیا جانا چاہئے“۔

انہوں نے کہا کہ جموں وکشمیر نے گذشتہ70سال سے بہت کچھ حاصل کیا تھا لیکن بھاجپا نے جمہوریت اور آئین کا گھلاگھنوٹ کو اس تاریخی ریاست کو اندھیروں میں دھکیلنے میں کوئی کثر باقی نہیں رکھی۔ اگر لیفٹنٹ گورنر موصوف نے آزادی کے بعد کی جموں وکشمیر کی تھوڑی سی بھی تاریخ کا مطالعہ کیا ہوتا تو وہ اس طرح کے لاعملی پر مبنی دعوے نہیں کرتے۔ اُن کا کہنا تھا کہ ان دعوؤں کو ہلکے میں نہیں لیا جانا چاہئے، یہ افسانہ نگاری اور جھوٹا پروپیگنڈا گذشتہ سال 5اگست کو کئے گئے غیر آئینی اور غیر جمہوری اور سرے سے ہی ناکام اقدامات کو جواز بخشنے اور صحیح جتلانے کے بڑے منصوبہ کا ایک حصہ ہے۔

زمینی سطح پر جمہوریت کو مستحکم کرنے اور اداروں کو بااختیار بنانے سے متعلق موصوف کے دعوے بھی جموں و کشمیر میں موجودہ زمینی صورتحال سے میل نہیں کھاتے۔پتہ نہیں گورنر صاحب کسی جمہوریت کی نشاندہی کررہے ہیں۔ گذشتہ سال سے ہم نے عوامی نمائندوں، اراکین پارلیمان، سابق ممبرانِ اسمبلی، سابق وزرائے اعلیٰ اور دیگر سیاسی کارکنوں کی نقل و حرکت پابندی اور نظربندہی دیکھا ہے۔

لوگوں کو یہ بھی یاد ہے کہ کس طرح سے گذشتہ سال سیاسی جماعتوں کو ایک منتخبہ حکومت بنانے سے روکا گیا اور اس کیلئے جمہوریت کو تار تار کرکے اسمبلی کو تحلیل کیا گیا۔ جموں وکشمیر میں محض دکھاوے کیلئے پنچایتی انتخابات کرائے گئے اور اس میں بھی آج تک 12000پنچایتی نشستیں خالی پڑی ہیں اور حکومت اب دکھاوے کے انتخابات کرانے سے بھی قاصر ہے۔

گورنر صاحب گذشتہ2سال کے دوران مضبوط کی گئی کس جمہوریت کے بارے میں بات کررہے ہیں؟ہم نے گذشتہ دو سال کے دوران وہ جمہوریت بھی دیکھی جب ایک عہدے پر انتخابات ہونے سے پہلے ہی منتخب ہونے والے شخص کے نام کا اعلان کیا گیا۔

لون نے کہا کہ یہ ایک نہ مٹنے والی حقیقت ہے کہ کس طرح زرعی اصلاحات غربت کے خاتمے کا سبب بنا اور ریاست کے تینوں خطوں کی ایک بہت بڑی آبادی کو راحت پہنچائی اور ناانصافی کا خاتمہ کیا گیا۔ ہماری ریاست پہلی تھی جس نے اصلاحات متعارف کیاگیا، چکداری، سودخوری اور جاگیرداری کا خاتمہ کیا گیا اور سنگل لائن انتظامیہ جیسے اقدامات نے جموں وکشمیر میں غربت کے خاتمے کے سلسلے کو بہت آگے بڑھایا۔

پورے برصغیر میں پنچایتی راج کا تصور جموں و کشمیر سے شروع ہوا۔ شیر کشمیر شیخ محمد عبداللہ نے بہت ہی قلیل وقت میں تاریخ ساز اقدامات سے جموں وکشمیر میں جمہوریت کو زمینی سطح تک پہنچایا، عوام میں خود اعتمادی اور خدا اعتمادی کا جذبہ پیدا کیا، غربت اور افلاس کا خاتمہ کیا اور ریاست کو تعمیر و ترقی کی پٹری پر لاکھڑا کیا۔ شیر کشمیر شیخ محمد عبداللہ کے انقلابی اقدامات کو دنیا بھر کے لیڈران نے مشعل راہ قرار دیا ہے۔

محمد اکبر لون نے کہا کہ لیفٹنٹ گورنر کی طرف یہ کہنا ہے کہ جموں وکشمیر نے گذشتہ70سال میں کیا حاصل کیا، انتہائی مضحکہ خیز ہے۔ 30سالہ پُرآشوب دور سے گزرنے کے باوجود بھی جموں وکشمیر میں ملک کی بیشتر ریاستوں سے ترقی یافتہ شامل ہوتی ہے۔

1990سے قبل جموں وکشمیر مہاراشٹرا، دلی، کولکتہ اور دیگر بڑی ریاستوں کیساتھ مقابلے کی جانب گامزن تھی۔ محمد اکبر لون نے کہا کہ جموں وکشمیر میں بیشتر ریاستوں کے مقابلے بہت ہی اچھا تعلیمی شعبہ، طبی شعبہ اور بنیادی ڈھانچہ موجود ہے اور اس میں سے بیشتر کام نیشنل کانفرنس کی حکومتوں کے دوران ہوا۔ انہوں نے کہا کہ 1996تک پُرآشوب دور کے دوران یہاں بنیادی ڈھانچہ ختم ہوگیا تھا۔

اس کے بعد ڈاکٹر فاروق عبداللہ کی سربراہی والی حکومت نے یہاں نیا ڈھانچہ قائم کیا اور ریاست کو دوبارہ تعمیر و ترقی کی راہ پر گامزن کیا اورپھر 2009سے 2014تک عمر عبداللہ کی سربراہی والی حکومت نے ہر شعبہ میں جتنا کام کیا اُتنا 60سالہ تاریخ میں نہیں ہوا تھا۔ محمد اکبر لون نے کہا کہ گورنر صاحب کا یہ کہنا کہ،ہم نے گذشتہ70سال میں کیا حاصل کیا ہے، زمینی حقائق کے عین برعکس اور محض ہوا میں تیر مارنے کے مترادف ہے۔