خبر اردو
15اگست سے 3روز قبل سرینگر کے ہائی سیکورٹی زون بتہ مالو علاقے میں سیکورٹی فورسز اور جنگجوؤں کے مابین مسلح تصادم میں سیکورٹی فورسز کے 5اہلکار زخمی ہوئے جن میں سے ایک ایس او جی اہلکار زخموں کی تاب نہ لاکر دم توڑ بیٹھا۔ اس دوران محاصرے میں پھنسے جنگجو سیکورٹی فورسز کو چکمہ دے کر فرار ہونے میں کامیاب ہوئے جبکہ جھڑپ کے دوران مالک مکان بھی زخمی ہوگیا۔ پولیس نے جائے واردات سے غیر قانونی مواد اورچند دستاویز برآمد کرنے کے علاوہ جنگجوؤں کے 2معاونین کو بھی حراست میں لے لیا۔ اس دوران انتظامیہ نے شہرسرینگر میں کسی بھی امکانی گڑ بھڑسے نمٹنے اور افواہ بازی پر روک لگانے کے لیے موبائل انٹرنیٹ سروس خدمات کو کئی گھنٹوں تک معطل رکھا۔

15اگست سے 3روز قبل شہرسرینگر کے ہائی سیکورٹی زون بتہ مالو علاقے میں جنگجوؤں نے اپنی موجودگی کا پھر ایک باراُس وقت احساس دلایا جب یہاں سیکورٹی فورسز اور جنگجوؤں کے درمیان گھماسان کی لڑائی شروع ہوئی۔ اطلاعات کے مطابق فورسز کی مشترکہ جمعیت نے مصدقہ اطلاع کی بنیاد پر بتہ مالو علاقے کا علی الصبح محاصرہ عمل میں لایا جس دوران یونانی ہسپتال کی نزدیکی بستی میں فورسز اہلکاروں نے گھر گھر تلاشی آپریشن کا باضابطہ آغاز کیا۔ اس دوران جونہی فورسز مشتبہ مکان کے نزدیک پہنچے تو یہاں چھپے بیٹھے جنگجوؤں نے سیکورٹی اہلکاروں پر خودکار ہتھیاروں سے شدید فائرنگ شروع کی جس کے ساتھ ہی علاقہ گولیوں کی گن گرج سے لرز اُٹھا۔ اس دوران فورسز اہلکاروں نے علاقے کا محاصرہ تنگ کرتے ہوئے جنگجوؤں کے خلاف بڑے پیمانے پر آپریشن شروع کردیا۔ انہوں نے بتایا کہ فورسز اہلکارنے جونہی مکان کے اندر چھپے بیٹھے جنگجوؤں کو ہلاک کرنے کی غرض سے تو طرفین کی شدید فائرنگ کے نتیجے میں 5فورسز اہلکار زخمی ہوئے جنہیں فوری طور پر ہسپتال منتقل کیا گیا۔ انہوں نے بتایا کہ جنگجوؤں کی ابتدائی فائرنگ کے نتیجے میں ایک پولیس اہلکار، ایک ایس اوجی اور سی آر پی ایف کے 3اہلکار شدید زخمی ہوگئے جنہیں شدید فائرنگ کے دوران انتہائی سیکورٹی حصار کے بیچ یہاں سے ہسپتال منتقل کیا گیا ۔ انہوں نے بتایا کہ اس دوران زخمی اہلکاروں میں ایس او جی سے وابستہ سلیکشن گریڈ کانسٹیبل پرویز احمد ساکن ڈنڈوٹ تحصیل بدھل ضلع راجوری زخموں کی تاب نہ لاکر دم توڑ بیٹھا۔

انہوں نے بتایا ابھی جھڑپ جارہی ہی تھی کہ بتہ مالو اور ملحقہ علاقوں سے نوجوانوں کی مختلف ٹولیوں نے جنگجو مخالف آپریشن میں خلل ڈالنے کے لیے سیکورٹی فورسز پر سنگ باری کی جس دوران یہاں افرا تفری کا ماحول پیدا ہوا۔ بتہ مالو کے اندرونی علاقوں سے نوجوانوں نے مختلف ٹولیوں میں بٹ کر فورسز پر چہار سو پتھراؤ کیا تاہم فورسز نے احتجاجی مظاہرین کو منتشر کرنے کے لیے لاٹھی چارج کیا لیکن علاقے میں وقفے وقفے سے نوجونواں نے فورسز پر سنگ باری کی۔ اس دوران طرفین کے فائرنگ کے نتیجے میں مالک مکان نیاز احمد بٹ بھی زخمی ہوگیا جنہیں علاج و معالجے کی خاطر ایس ایم ایچ ایس ہسپتال داخل کرایا گیا جہاں ان کی حالت خطرے سے باہر بتائی جارہی ہے۔اس دوران کئی گھنٹوں تک جاری رہنے والی جھڑپ میں کمین گاہ سے جنگجوؤں نے فورسز کو چکمہ دے کر فرار اختیار کی۔ سیکورٹی فورسز نے اگر چہ جائے جھڑپ کو کڑے حصار میں لیا تھا تاہم گھماسان کی فائرنگ کے دوران جنگجوؤں یہاں سے بچ نکلنے میں کامیاب ہوئے۔ اس سلسلے میں پولیس نے بتایا کہ سیکورٹی فورسز کی مشترکہ جما عت نے مصدقہ اطلاع کی بنیاد پر بتہ مالو علاقے کو گھیرے میں لیتے ہوئے جنگجوؤں مخالف آپریشن کا آغاز کرتے ہوئے یونانی ہسپتال کے قریب گھر گھر تلاشی شروع کی جس دوران یہاں ایک مکان میں چھپے بیٹھے جنگجوؤں نے فورسز اہلکاروں پر جدید اور خودکار ہتھیاروں سے فائرنگ کی جس کے نتیجے میں ابتدائی فائرنگ کے دوران 3فورسز اہلکار زخمی ہوگئے جنہیں علاج و معالجے کی غرض سے ہسپتال منتقل کیا گیا تاہم یہاں پرویز احمد ساکن راجوری جو کہ ایس او جی سے وابستہ تھے زخموں کی تاب نہ لاکر دم توڑ بیٹھے۔ پولیس نے بتایا کہ سیکورٹی اہلکاروں نے یہاں رہائشی مکانات اور سرکاری دفاتر کو مدنظر رکھتے ہوئے بڑی احتیاط کا مظاہرہ کیا۔ انہوں نے بتایا کہ جھڑپ کے دوران شدید گولیوں کے تبادلے کے نتیجے میں فورسز کو قومی امکان ہے کہ جنگجو بھی اس دوران زخمی ہوئے ہوں گے جنہیں ڈھونڈ نکالنے کے لیے یہاں بڑے پیمانے پر تلاشی آپریشن جاری ہے۔انہوں نے بتایا کہ اس دوران جنگجوؤں کی کمین گاہ سے کچھ غیر قانونی مواد اور دستاویزات برآمدکرنے کے علاوہ جنگجوؤں کے کام کرنے والے 2معاونین بھی گرفتار کئے گئے جن سے پوچھ تاچھ جاری ہے۔

پولیس نے بتایا کہ اس سلسلے میں ایک کیس درج کیا گیا ہے جبکہ تحقیقات بھی شروع کی گئی ہیں۔پولیس کے مطابق اس موقعہ پر مالک مکان نیاز احمد بھی زخمی ہوگئے جنہیں ایس ایم ایچ ایس ہسپتال میں داخل کرایا گیا جہاں اُن کی حالت خطرے سے باہر ہے۔ ادھر انتظامیہ نے شہر سرینگر میں کسی بھی امکانی گڑ بڑ سے نمٹنے اور افواہ بازی پر روک لگانے کے لیے اتوار صبح کو ہی موبائل انٹرنیٹ سروس خدمات کو معطل رکھا تاہم اتوار دوپہر کو انٹرنیٹ سروس کو بحال کیا گیا۔ ادھر جھڑپ میں مارے گئے پولیس اہلکار کی آخری رسومات ڈسٹرکٹ پولیس لائنز سرینگر میں ادا کی گئی جس دوران یہاں فوج، پولیس، سی آر پی ایف اور سول انتظامیہ کے اعلیٰ افسران نے شرکت کرتے ہوئے مہلوک اہلکار کو شاندار خراج عقیدت پیش کیا۔

اطلاعات کے مطابق اس موقعہ پر ڈائریکٹر جنرل جیل خانہ جات، ایڈیشنل ڈائریکٹر جنرل آرمڈ (جے اینڈ کے) ڈائریکٹر ویجی لینس (جے اینڈ کے)، ایڈیشنل ڈائریکٹر جنرل آف پولیس (سی آئی ڈی)، اے ڈی جی پی (سیکورٹی، لاء اینڈ آرڈر، ہوم گارڈس)، آئی جی سی آر پی ایف (آپریشنز)، جوائنٹ ڈائریکٹر آئی بی (جے اینڈ کے)، آئی جی بی ایس ایف، ڈیوژنل کمشنر کشمیر، آئی جی پی آرمڈ کشمیر، آئی جی پی کشمیر، ایڈیشنل کمشنر، آئی جی سی آر پی ایف، ڈی آئی جی وسطی کشمیر، ڈی آئی جی ایس ایس بی، ڈپٹی کمشنر سرینگر، ایس ایس پی سرینگر، کمانڈنٹ آئی آر پی 6بٹالین کے علاوہ دیگر افسران اور اہلکار شامل تھے ۔ KNS