جموں، جموں کے ڈویژنل کمشنر رمیش کمار نے جمعہ کو کہا کہ عدم تشدد کا اصول دنیا کو درپیش کئی تنازعات کے حل کی راہ دکھا سکتا ہے۔

گاندھی جینتی کے موقع پر گاندھی گلوبل فیملی کی جانب سے منعقدہ ایک تقریب میں مہاتما گاندھی کو خراج عقیدت پیش کرنے کے بعد خطاب کرتے ہوئے ڈویژنل کمشنر نے کہا کہ 2 اکتوبر ہندوستان کی دو عظیم شخصیات، مہاتما گاندھی اور سابق وزیر اعظم لال بہادر شاستری، کی یوم پیدائش کے طور پر منایا جاتا ہے۔

مہاتما گاندھی کے تحریک آزادی میں اہم کردار کو یاد کرتے ہوئے انہوں نے کہا کہ ان کے نظریات آج کی دنیا میں بھی اپنی معنویت برقرار رکھے ہوئے ہیں۔

انہوں نے کہا کہ گاندھی کی سودیشی کی اپیل، ’آتم نربھر بھارت‘ کے تصور میں بھی نظر آتی ہے۔
لال بہادر شاستری کو خراج عقیدت پیش کرتے ہوئے ڈویژنل کمشنر نے کہا کہ ان کا لازوال نعرہ ’’جے جوان، جے کسان‘‘ آج بھی ملک کو تحریک اور قوت فراہم کرتا ہے۔

انہوں نے کہا کہ ’’جے جوان‘‘ کا جذبہ آج کے نوجوانوں کو منشیات کے بڑھتے ہوئے خطرے کے خلاف متحد ہونے اور اپنی توانائی ملک کی تعمیر و ترقی کے لیے صرف کرنے کی ترغیب دینا چاہیے۔

انہوں نے مزید کہا کہ شاستری کی سادگی، دیانت داری اور عوامی خدمت کے لیے ان کی وابستگی قیادت کے لیے آج بھی ایک مستقل مثال پیش کرتی ہے۔

مختلف سرکاری اور نجی اسکولوں کے طلبہ نے ثقافتی پروگرام پیش کیے، جن میں گیت اور تقریریں شامل تھیں۔

ان پروگراموں کے ذریعے دونوں قومی رہنماؤں کی زندگی، نظریات اور خدمات کو اجاگر کیا گیا۔ محکمہ اطلاعات کے فنکاروں نے بھی مہاتما گاندھی کو خراج عقیدت پیش کرتے ہوئے موسیقی کا پروگرام پیش کیا۔
اس موقع پر خراج عقیدت پیش کرنے والوں میں چیف کنزرویٹر آف فاریسٹ ڈاکٹر وی ایس سینتھل کمار، جوائنٹ ڈائریکٹر اسکول ایجوکیشن (جموں، سانبا، کٹھوعہ) انیل سالگوترا، ڈی پی ای او جموں بی ڈی شرما اور لارنس پبلک اسکول کی پرنسپل شوانی جوشی بھی شامل تھے۔

گاندھی گلوبل فیملی کی جانب سے چیئرمین اور بانی رکن ونگ کمانڈر (ریٹائرڈ) ایم ایم جوشی، ویمن ونگ کی صدر ڈاکٹر الکا شرما، نائب صدور ڈاکٹر سمی سیٹھ اور ڈاکٹر رابن گل، جنرل سکریٹری نریش مینی، مشیران وید ورما اور گوپال شرما، کوآرڈینیٹر امیت ورما سمیت دیگر افراد بھی تقریب میں موجود تھے۔

یواین آئی۔ ظ ا

سری نگر، حکام نے جمعرات کو بتایا کہ سری نگر پولیس نے ممنوعہ فارماسیوٹیکل ادویات کی خرید و فروخت، منتقلی، ذخیرہ اندوزی، تقسیم اور مالی اعانت میں ملوث ایک منظم منشیات نیٹ ورک کا پردہ فاش کرتے ہوئے آٹھ افراد کو گرفتار کیا ہے اور 2.19 لاکھ سے زائد ٹیبلٹس اور کیپسول ضبط کیے ہیں۔

یہ کارروائی پولیس اسٹیشن صفاکدل میں درج ایف آئی آر نمبر 135/2026 کی تحقیقات کے دوران کی گئی۔ پولیس کا کہنا ہے کہ اس نیٹ ورک کے تار جموں و کشمیر سے باہر بھی جڑے ہوئے تھے۔

پولیس نے بتایا کہ اب تک آٹھ ملزمان کو گرفتار کیا جا چکا ہے، جن میں محمد وسیم زرگر، انعام احمد زرگر، صاحب احمد گنائی، انصار حسین بٹ، پیر شکور، ہارون طارق پنڈت، عاقب سلیم اور حارث حمید ملا شامل ہیں۔ تمام ملزمان کا تعلق سری نگر سے ہے، سوائے انصار بٹ کے جو بڈگام کا رہائشی ہے۔

پولیس نے بتایا کہ حارث حمید ملا کو تکنیکی نگرانی کے ذریعے ٹریس کر کے کرناٹک کے شہر بنگلورو سے گرفتار کیا گیا۔

بڑی برآمدگیوں میں 2,19,425 فارماسیوٹیکل ٹیبلٹس اور کیپسول، 3.830 کلوگرام کوڈین پر مشتمل مائع، تقریباً 40 گرام ہیروئن جیسا مادہ اور تقریباً 85.75 لاکھ روپے نقد رقم شامل ہیں۔

پولیس نے کروڑوں روپے مالیت کے 108 سونے کے سکے، سونے کے بسکٹ اور سونے کی دیگر اشیاء کے علاوہ رولیکس کی دو گھڑیاں، ایک ڈی اور (Dior) بیگ، ایک ڈی ایس ایل آر کیمرہ، ایک آئی فون 16 پرو میکس، دو خالی میگزین کے ساتھ .32 کیلیبر کا ایک پسٹل اور ایک خنجر بھی برآمد کیا۔ قانون کے تحت دو گاڑیاں بھی ضبط کر لی گئی ہیں۔

مالیاتی تحقیقات کے حصے کے طور پر، عدالت کے احکامات کے بعد ایکسس بینک بمیانہ میں وسیم زرگر کے دو بینک لاکرز کی تلاشی لی گئی، جس کے نتیجے میں تقریباً 65 لاکھ روپے نقد اور تقریباً 2.20 کروڑ روپے مالیت کے سونے کے سامان برآمد ہوئے۔

پولیس نے بتایا کہ ملزمان سے منسلک متعدد بینک کھاتوں کو منجمد کر دیا گیا ہے، جن میں اب تک تقریباً 1.07 کروڑ روپے کی نشاندہی ہوئی ہے۔ این ڈی پی ایس ایکٹ کے تحت ایک رہائشی مکان اور دو گاڑیاں بھی برآمد/منسلک کی گئی ہیں۔

سپلائی چین کی تحقیقات کے دوران پولیس ٹیمیں چنڈی گڑھ، پنچکولہ اور انبالہ پہنچیں، جہاں فارماسیوٹیکل اداروں اور ٹرانسپورٹ ایجنسیوں کا معائنہ کیا گیا اور ریکارڈ اکٹھا کیا گیا۔

دو دیگر مشتبہ افراد، فیضان فردوس عرف فرزان کھانڈے اور محمد شہوار گور فرار ہیں۔ پولیس نے بتایا کہ ڈیجیٹل ڈیوائسز کا تجزیہ کیا جا رہا ہے اور مزید گرفتاریاں و برآمدگیاں متوقع ہیں۔

یواین آئی۔ ظا

سرینگر، لیفٹیننٹ گورنر منوج سنہا نے بدھ کے روز کہا کہ ‘کشمیر میراتھن’ نے اتحاد کا ایک مضبوط پیغام دیا ہے اور ایک پرامن، خود کفیل اور ترقی یافتہ مرکز کے زیر انتظام علاقے کے لیے جموں و کشمیر کے نوجوانوں کے عزم اور ان کی امنگوں کا اعادہ کیا ہے۔

‘کشمیر میراتھن – رن فار یونیٹی’ کی اختتامی تقریب سے خطاب کرتے ہوئے، سنہا نے شرکاء کے جوش و خروش کی تعریف کی اور رنرز کو مبارکباد دی۔ انہوں نے اس تقریب کے انعقاد پر جموں و کشمیر پولیس کی ستائش کی، جس کے بارے میں انہوں نے کہا کہ یہ امن، اتحاد اور پیش رفت کی علامت بن کر ابھری ہے۔

لیفٹیننٹ گورنر نے اس بات پر زور دیا کہ ‘رن فار یونیٹی’ صرف رفتار یا برداشت کے بارے میں نہیں تھی، بلکہ یہ اجتماعی عزم اور اعتماد کی طاقت کے بارے میں تھی۔ انہوں نے کہا کہ جب لوگ مل کر چلتے ہیں تو کوئی بھی منزل ناممکن نہیں رہتی اور چیلنجز سے نمٹنے کے لیے عزم اور اتحاد کی اہمیت کو اجاگر کیا۔

انہوں نے کہاکہ “رن فار یونیٹی ریس محض ہمارے قدموں کی رفتار کا نام نہیں ہے۔ یہ ہمارے عزم کی رفتار ہے اور اس اعتماد کی رفتار ہے جو ہمیں بتاتی ہے کہ جب لوگ مل کر چلتے ہیں تو کوئی بھی منزل ناممکن نہیں رہتی۔”

ہندوستان کے تنوع کو اس کی سب سے بڑی پہچان قرار دیتے ہوئے، لیفٹیننٹ گورنر نے نوٹ کیا کہ زبان، روایت، کھانے اور لباس کے فرق کے باوجود، ہندوستان کا دل ایک ہی دھڑکتا ہے۔ انہوں نے اس بات پر زور دیا کہ اتحاد ہندوستان کی طاقت ہے، اور جب لاکھوں قدم ایک ہی سمت میں اٹھتے ہیں تو اونچے سے اونچے پہاڑ بھی پار کیے جا سکتے ہیں۔

انہوں نے کہاکہ “کشمیر میراتھن – رن فار یونیٹی کے ذریعے، نوجوانوں نے یہ پیغام دیا ہے کہ متحد ہندوستان کے لیے کوئی بھی ہدف زیادہ دور نہیں ہے۔ تمام رنرز نے یہ پیغام دیا ہے کہ ان کی شرکت ایک مشترکہ مستقبل میں سرمایہ کاری تھی، اور ان کی یہ دوڑ صرف ان کے اپنے لیے نہیں تھی بلکہ جموں و کشمیر کی نئی نسل کے لیے تھی جو ایک بہتر ہندوستان کا خواب دیکھتی ہے اور ان نوجوانوں کے لیے جو جموں و کشمیر کو ایک خود کفیل اور ترقی یافتہ علاقہ بنانے کے لیے دن رات کام کر رہے ہیں۔”

لیفٹیننٹ گورنر نے جموں و کشمیر کے نوجوانوں پر زور دیا کہ وہ نظم و ضبط، فٹنس اور بھائی چارے کو اپنائیں اور منشیات سے دور رہیں۔ انہوں نے 100 روزہ ‘نشہ مکت جموں کشمیر مہم’ کی کامیابی کو یاد کیا، جس نے پاد یاتراؤں اور شہری کارروائی کے پروگراموں کے ذریعے ہزاروں نوجوانوں کو بااختیار بنایا۔ انہوں نے نوجوانوں پر زور دیا کہ وہ ‘فٹ انڈیا موومنٹ’ کے برانڈ ایمبیسڈر بنیں اور قوم کی تعمیر میں اپنا تعاون دیں۔

یواین آئی۔ طا