سری نگر، قومی تحقیقاتی ایجنسی (این آئی اے) نے ہفتہ کی صبح دہشت گردی سے متعلق ایک معاملے کی تحقیقات کے سلسلے میں وادی کشمیر کے کئی اضلاع میں متعدد مقامات پر بیک وقت تلاشی لی۔

سرکاری ذرائع کے مطابق کارروائی کے دوران جموں و کشمیر پولیس اور مرکزی مسلح پولیس دستے (سی اے پی ایف) این آئی اے کی ٹیموں کو تعاون فراہم کررہے ہیں۔

یہ تلاشی کارروائی دہشت گردی کے ایک معاملے کی جاری تحقیقات کا حصہ ہے۔ معاملے سے متعلق مزید تفصیلات کا انتظار ہے۔

یو این آئی۔ م س

سری نگر، جموں و کشمیر کے وزیر اعلیٰ عمر عبداللہ نے جمعہ کو اپوزیشن لیڈر اور کانگریس کے سینئر رہنما راہل گاندھی کے دہلی میں احتجاج کی حمایت کرتے ہوئے کہا کہ وہ حکومت کو جواب دہ بنا رہے ہیں۔ انہوں نے کہا کہ حکومت سے سوال کرنا اپوزیشن کی ذمہ داری ہے۔ دہلی کے ایک پولیس اسٹیشن کے باہر گاندھی کے دھرنے پر بیٹھنے سے متعلق سوال کے جواب میں عمر عبداللہ نے کہا کہ اپوزیشن لیڈر وہی کر رہے ہیں، جو ان سے توقع کی جاتی ہے۔ عمر نے سری نگر میں نامہ نگاروں سے کہا، ’’اگر اپوزیشن لیڈر اپوزیشن کا کردار ادا نہیں کریں گے تو پھر اس کا کیا فائدہ ہے‘‘

انہوں نے کہا کہ اپوزیشن رہنماؤں کو اس بنیاد پر مختلف پیمانوں سے نہیں پرکھا جانا چاہیے کہ مسئلہ کون اٹھا رہا ہے۔ انہوں نے کہا، ’’میں نے آپ کو جموں و کشمیر کے اپوزیشن لیڈر سے یہ پوچھتے ہوئے نہیں سنا کہ آپ بار بار بے فائدہ سوالات کیوں اٹھاتے ہیں۔ جب وہ ایسا کرتے ہیں تو آپ لطف لیتے ہیں، لیکن جب راہل گاندھی ایسا کرتے ہیں تو آپ پوچھتے ہیں کہ وہ ایسا کیوں کر رہے ہیں؟ آپ اپوزیشن رہنماؤں کو الگ الگ پیمانوں سے نہیں پرکھ سکتے۔‘‘ عمر نے کہا کہ گاندھی کے اقدامات اپوزیشن لیڈر کو سونپی گئی ذمہ داریوں کے عین مطابق ہیں۔

انہوں نے کہا، ’’راہل گاندھی وہی کر رہے ہیں جو ملک ان سے توقع کرتا ہے۔ اپوزیشن لیڈر کا کام حکومت سے جواب طلب کرنا ہے۔ اپوزیشن لیڈر کا کام حکومت کو جواب دہ بنانا ہے۔ راہل گاندھی بھی یہی کر رہے ہیں۔ میں چاہوں گا کہ وہ اسی طرح اپنا کام جاری رکھیں۔ یہی اپوزیشن کا کام ہے۔‘‘

عمر عبداللہ نے جموں و کشمیر اسمبلی میں اپوزیشن لیڈر سنیل شرما کو جموں و کشمیر میں اسلام کے پھیلاؤ سے متعلق مبینہ بیان پر تنقید کا نشانہ بناتے ہوئے کہا کہ انہیں مذہبی معاملات پر تبصرہ کرنے سے گریز کرنا چاہیے۔ شرما کے مبینہ بیان سے متعلق سوال کے جواب میں عمر نے کہا کہ حکومت کی کارکردگی کے بجائے جموں و کشمیر میں اسلام کی تاریخ پر اپوزیشن لیڈر کی توجہ ان کی حکومت کے لیے ایک مثبت علامت ہے۔

عمر نے کہا، ’’پھر میں کہوں گا کہ ہماری حکومت کی کارکردگی بہت اچھی ہوگی۔ اپوزیشن لیڈر کو اس حکومت کے بارے میں کہنے کے لیے کچھ نہیں ملا۔ اب وہ اس بات پر روشنی ڈال رہے ہیں کہ جموں و کشمیر میں اسلام کیسے آیا۔ میں اسے اپنی کامیابی سمجھوں گا۔‘‘ تاہم، انہوں نے سیاسی رہنماؤں کو مذہبی معاملات پر بیانات دینے سے خبردار کرتے ہوئے کہا کہ اس طرح کے بیانات لوگوں کے جذبات کو متاثر کرسکتے ہیں۔

انہوں نے کہا، ’’میں صرف یہ کہنا چاہوں گا کہ انہیں مذہبی معاملات پر زیادہ تبصرہ نہیں کرنا چاہیے۔ ہم تشدد بھی دیکھ چکے ہیں۔‘‘ بابری مسجد کے انہدام کا حوالہ دیتے ہوئے عمر نے سوال کیا کہ کیا اس واقعے کو تشدد کا عمل نہیں سمجھا جاسکتا۔

وزیر اعلیٰ نے کہا، ’’بابری مسجد میں کیا ہوا تھا؟ کیا وہ تشدد نہیں تھا؟ کیا وہ زبردستی نہیں کی گئی تھی؟ آج ملک بھر کے مسلمان جن حالات کا سامنا کر رہے ہیں، وہ کیا ہے؟ لہٰذا حالات چاہے جیسے بھی ہوں، انہیں لوگوں کے مذہبی جذبات سے نہیں کھیلنا چاہیے۔ وہ اپوزیشن کے لیڈر ہیں، مذہبی رہنما نہیں۔ انہیں مذہبی معاملات مذہبی رہنماؤں پر چھوڑ دینے چاہئیں اور اپنے بیانات کو سیاست تک محدود رکھنا چاہیے۔‘‘

وزیر اعلیٰ نے کشتواڑ میں ایک کمسن قبائلی لڑکی کے مبینہ عصمت دری اور موت کے واقعے پر بھی تشویش کا اظہار کیا اور اسے شرمناک قرار دیتے ہوئے انتظامیہ سے فوری کارروائی کرنے کی اپیل کی۔ عمر نے کہا، ’’یہ شرمناک ہے۔ ہمیں امید ہے کہ انتظامیہ، خاص طور پر امن و قانون برقرار رکھنے والے ادارے، جلد از جلد کارروائی کریں گے۔‘‘ انہوں نے معاملے کی فوری تحقیقات کی ضرورت پر زور دیا۔

یو این آئی۔ م س۔ م الف

سری نگر، کشمیر کے مذہبی رہنما اور حریت چیئرمین میرواعظ عمر فاروق نے جمعہ کو دعویٰ کیا کہ تاریخی جامع مسجد سری نگر کے منبر پر پابندیاں عائد کرنا اور اسے خاموش کرانے کی کوششیں موجودہ ریاستی پالیسی کا حصہ معلوم ہوتی ہیں۔

انہوں نے کہا کہ تاریخی منبر ہمیشہ عوام کے حقوق، فرائض، پُرامن بقائے باہمی اور تصادم کی بجائے مذاکرات کی حمایت کرتا رہا ہے۔

تقریباً دو ہفتوں کے بعد جامع مسجد سری نگر میں جمعہ کے اجتماع سے خطاب کرتے ہوئے میرواعظ نے کہا کہ انہیں تاریخی مسجد میں جمعہ کا خطبہ دینے سے روکا گیا تھا اور نقشبند صاحب کی زیارت گاہ پر بھی اجتماع سے خطاب کرنے کا موقع نہیں دیا گیا۔

انہوں نے کہا کہ عوام کے درمیان واپس آکر ان سے خطاب کرنے کا موقع ملنا وہ اللہ کی طرف سے ایک نعمت سمجھتے ہیں۔

میرواعظ نے کہا، ”بدقسمتی سے منبر پر پابندیاں عائد کرنا اور اسے خاموش کرانے کی کوششیں اس وقت ریاستی پالیسی کا حصہ معلوم ہوتی ہیں۔” انہوں نے کہا کہ یہ صبر کا مظاہرہ کرنے اور ہر ممکن طریقے سے نیک کام جاری رکھنے کا وقت ہے۔

پابندیاں عائد کرنے والوں سے مخاطب ہوتے ہوئے میرواعظ نے کہا کہ شاید وہ کشمیری معاشرے میں جامع مسجد کے منبر کے تاریخی کردار سے واقف نہیں ہیں۔

انہوں نے کہا کہ نسلوں سے اس منبر نے لوگوں کی تعلیم و تربیت اور مذہبی و اخلاقی بنیادوں پر معاشرے کی تشکیل میں اہم کردار ادا کیا ہے۔ اس کے ساتھ ہی اس نے لوگوں کو ان کے حقوق اور فرائض کے بارے میں بھی بیدار کیا ہے۔

انہوں نے کہا، ”جب بھی ضرورت پیش آئی، یہ منبر لوگوں کی مؤثر آواز بنا، ان کے خدشات کو اجاگر کیا اور ان کی خواہشات کی وکالت کی۔”

میرواعظ نے کہا کہ اس منبر نے مختلف برادریوں کے درمیان پُرامن بقائے باہمی کو بھی فروغ دیا اور اقلیتوں کے حقوق کے لیے بھرپور آواز اٹھائی۔

انہوں نے زور دے کر کہا کہ اس کا طرزِ عمل ہمیشہ اسلامی تعلیمات پر مبنی رہا ہے اور یہ پُرامن، اصول پسند اور باوقار رہا ہے، جہاں تصادم کے مقابلے میں مذاکرات کو ترجیح دی گئی اور شخصیات کے بجائے مسائل کو اہمیت دی گئی۔

میرواعظ نے مزید کہا، ”ان شاء اللہ، جب بھی موقع ملا، یہ سلسلہ جاری رہے گا۔ یہ میرے بزرگوں کی میراث اور جموں و کشمیر کے عوام کی مشترکہ وراثت ہے۔”

میرواعظ کو اکثر نظر بند رکھا جاتا ہے یا ان کی نقل و حرکت پر پابندیاں عائد کی جاتی ہیں، خاص طور پر جمعہ کے روز۔

یو این آئی۔ م س۔ م الف