سری نگر، جموں و کشمیر کے وزیر اعلیٰ عمر عبداللہ اور جموں و کشمیر کانگریس کے صدر طارق قرہ نے ’وندے ماترم‘ کی مبینہ بے حرمتی کے خلاف بی جے پی کے احتجاج کو مسترد کرتے ہوئے کہا ہے کہ کانگریس اس معاملے پر پہلے ہی اپنی پوزیشن واضح کر چکی ہے۔

عمر عبداللہ نے کہا کہ یومِ آزادی کی تقریب کی ویڈیوز سے واضح ہے کہ ’وندے ماترم‘ کے تینوں بند گائے گئے تھے۔ انہوں نے کہا کہ ممکن ہے تقریب کی ترتیب میں تبدیلی کی وجہ سے کچھ لوگوں کو غلط فہمی ہوئی ہو۔ دوسری جانب طارق قرہ نے الزام لگایا کہ بی جے پی ’وندے ماترم‘ کے معاملے کو ملک کو درپیش اہم مسائل، جن میں نیٹ امتحان کے پرچے کے افشا ہونے کا معاملہ اور دیگر تنازعات شامل ہیں، سے عوام کی توجہ ہٹانے کے لیے استعمال کر رہی ہے۔

بی جے پی نے نئی دہلی میں یومِ آزادی کی تقریبات کے دوران قومی گیت ’وندے ماترم‘ کی مبینہ بے حرمتی کے خلاف کانگریس کے سینئر رہنماؤں، بشمول سونیا گاندھی، راہل گاندھی اور ملکارجن کھڑگے کے خلاف ملک گیر احتجاج شروع کیا ہے۔

عمر عبداللہ نے کہا کہ کانگریس کی تقریب کی ویڈیوز سے واضح ہوتا ہے کہ ’وندے ماترم‘ کے تینوں بند گائے گئے تھے۔

بی جے پی کے احتجاج کے بارے میں پوچھے جانے پر عمر عبداللہ نے سری نگر میں صحافیوں سے کہا، کانگریس نے خود بھی اس کی وضاحت کر دی ہے۔ انہوں نے کہا کہ ویڈیو دیکھیں، وہاں وندے ماترم کے تینوں بند گائے گئے تھے۔ تو پھر یہ تنازع کیا ہے؟

انہوں نے کہا کہ ممکن ہے کچھ غلط فہمی اس لیے پیدا ہوئی ہو کیونکہ یومِ آزادی کی تقریب میں پہلی مرتبہ ’وندے ماترم‘ کو شامل کیا گیا تھا۔

انہوں نے کہاکہ 15 اگست کو یہ میری آٹھویں پریڈ تھی، لیکن پہلی بار وندے ماترم کو اس میں شامل کیا گیا۔ اسے سمجھنے میں مجھے بھی کچھ وقت لگا…”

عمر عبداللہ نے مزید کہا کہ کانگریس کے رہنماؤں کو بھی شاید پروگرام کی نئی ترتیب کے مطابق خود کو ڈھالنے میں کچھ وقت لگا ہو۔

انہوں نے کہا، “شاید کانگریس کو بھی خود کو اس کے مطابق ڈھالنے میں کچھ وقت لگا۔ ایسا ہوتا ہے۔”

جموں و کشمیر کانگریس کے صدر طارق قرہ نے بی جے پی پر الزام لگایا کہ وہ ’وندے ماترم‘ کے تنازع کو ایک حربے کے طور پر استعمال کرکے ملک کے اہم مسائل سے عوام کی توجہ ہٹانے کی کوشش کر رہی ہے۔

قرہ نے کہا کہ بی جے پی ’چندہ چوری‘ اور نیٹ امتحان کے پرچے کے افشا ہونے جیسے معاملات سے عوام کی توجہ ہٹانا چاہتی ہے۔

قرہ نے سری نگر میں صحافیوں سے کہا،”اس احتجاج کے پیچھے دو یا تین وجوہات ہیں۔ پہلی وجہ ملک میں بی جے پی کے خلاف بڑھتی ہوئی ناراضی ہے۔ چاہے یہ ’چندہ چوری‘ کا معاملہ ہو یا نیٹ کے پرچے افشا ہونے کا، ملک بھر کے نوجوانوں اور طلبہ میں غصہ پایا جاتا ہے۔”

کانگریس رہنماؤں کی جانب سے ’وندے ماترم‘ کی بے حرمتی کے الزامات کو مسترد کرتے ہوئے انہوں نے کہا کہ “بے حرمتی کی کوئی بات ہی نہیں ہے” اور الزام لگایا کہ ویڈیو کا ایک غلط ورژن گردش کرایا جا رہا ہے۔ مسٹر قرہ نے کہا کہ کانگریس اس معاملے پر پہلے ہی اپنی پوزیشن واضح کر چکی ہے اور بی جے پی جس ویڈیو کو بنیاد بنا رہی ہے، وہ “توڑ مروڑ کر پیش کیا گیا” ورژن ہے، جسے پارٹی تسلیم نہیں کرتی۔

قرہ نے مزید کہا، “اس وقت یہ توجہ ہٹانے کی حکمت عملی صرف بی جے پی کی مایوسی کو ظاہر کرتی ہے۔

یو این آئی۔ ظ ا۔ م الف

سری نگر، کشمیر کے مذہبی رہنما میر واعظ عمر فاروق کو پیر کے روز مبینہ طور پر ان کے گھر میں نظر بند کر دیا گیا، جس کے باعث وہ سری نگر کے قدیم شہر میں واقع تاریخی حضرت خواجہ نقشبند صاحب کی درگاہ پر منعقد ہونے والی سالانہ ’خواجہ دگر‘ اجتماع سے خطاب نہیں کر سکے۔

میر واعظ نے کہا کہ ایک بار پھر انہیں وہاں روحانی طور پر پُرسکون کرنے والے مذہبی اجتماع میں شرکت کے لیے بے صبری سے انتظار کر رہے دسیوں ہزار لوگوں سے خطاب کرنے کی اجازت نہیں دی گئی اور انہیں گھر میں نظر بند کر دیا گیا۔ اس الزام پر لیفٹیننٹ گورنر انتظامیہ کی جانب سے فوری طور پر کوئی ردعمل سامنے نہیں آیا۔ جموں و کشمیر میں امن و قانون کی ذمہ داری لیفٹیننٹ گورنر کے پاس ہے۔

میر واعظ نے کہا کہ پابندیوں کے باعث وہ صدیوں پرانے مذہبی اجتماع میں روایتی خطبہ دینے اور نماز ادا کرنے سے محروم رہے۔

میر واعظ نے ایکس پر کہا، “میر واعظ کی حیثیت سے مجھے مذہبی اجتماعات سے خطاب کرنے سے روکنا، میرے سیاسی نظریات اور عوام کے سماجی و مذہبی مسائل اٹھانے کی سزا دینا، حکمرانوں کی اب معروف جابرانہ ذہنیت کی عکاسی تو کرتا ہی ہے، لیکن کم از کم اتنا ضرور ہے کہ یہ بدقسمتی اور شرمناک ہے۔”

انہوں نے مزید کہا،”اس سے بھی زیادہ افسوسناک بات یہ ہے کہ حکام مسلمانوں کے مذہبی حقوق اور مذہبی رسومات کے تئیں مسلسل بے حسی اور بے احترامی کا مظاہرہ کر رہے ہیں۔ انہیں خطبہ سننے اور روحانی تجربے میں شرکت کے حق سے محروم کیا جا رہا ہے۔ اس معاملے پر مسلسل خاموشی مسلمانوں کے مذہبی حقوق کو دبانے کے عمل کو معمول بنانے کا باعث بنے گی۔”

میر واعظ نے منتخب حکومت سے اپیل کی کہ وہ کشمیر اور جموں میں مسلمانوں کے مذہبی حقوق کا تحفظ کرے اور اس معاملے میں حکام سے مداخلت کرے۔

میر واعظ نے کہا،”سب کی، بالخصوص منتخب حکومت کی ذمہ داری ہے کہ وادی کے ساتھ ساتھ جموں میں بھی مسلمانوں کے مذہبی حقوق کا تحفظ کرے اور بااثر قوتوں کے سامنے کھڑے ہو کر انہیں اپنا فیصلہ واپس لینے پر مجبور کرے۔”

گزشتہ چند دنوں میں یہ دوسری مرتبہ ہے جب میر واعظ کو مبینہ طور پر گھر میں نظر بند کیا گیا ہے۔ 14 اگست کو میر واعظ نے کہا تھا کہ انہیں گھر میں نظر بند کر دیا گیا تھا، جس کی وجہ سے وہ سری نگر کی تاریخی جامع مسجد میں جمعہ کی نماز ادا نہیں کر سکے تھے۔ دریں اثنا، سینکڑوں عقیدت مند نقشبند صاحب کی درگاہ پر جمع ہوئے اور نماز ادا کی۔

یو این آئی۔ ظ ا۔ م الف

سری نگر، جموں و کشمیر میں مالی سال 2025-26 کے دوران غیر قانونی کان کنی کے خلاف کارروائی میں 9417 گاڑیاں اور مشینیں ضبط کی گئی ہیں۔ اس مدت کے دوران 20.009 کروڑ روپے جرمانہ وصول کیا گیا اور 285 ایف آئی آر درج کی گئیں۔

ان اعداد و شمار نے نفاذ کی کارروائی اور فوجداری مقدمات کے درمیان واضح فرق پر تشویش پیدا کردی ہے، کیونکہ کئی اضلاع میں ضبطی کے سیکڑوں واقعات کے باوجود ایف آئی آر بہت کم درج کی گئیں۔

کٹھوعہ ضلع میں سب سے زیادہ 1019 ضبطی کے واقعات درج کیے گئے، لیکن ضلع میں صرف ایک ایف آئی آر درج ہوئی۔

سرکاری اعداد و شمار کے مطابق کپواڑہ میں 972 ضبطیاں اور 48 ایف آئی آر درج ہوئیں، جبکہ بارہمولہ میں 845 ضبطیاں اور 41 ایف آئی آر درج کی گئیں۔ سانبہ میں ضبطی کے 800 واقعات ہوئے، لیکن کوئی ایف آئی آر درج نہیں کی گئی۔

اعداد و شمار سے اضلاع کے درمیان نفاذ کے طریقوں میں کافی فرق کا پتہ چلا۔ فوجداری مقدمات کے معاملے میں جموں و کشمیر میں بڈگام سب سے آگے رہا، جہاں غیر قانونی کان کنی کرنے والوں کے خلاف 671 ضبطیوں کے باوجود 62 ایف آئی آر درج کی گئیں۔ اس کے بعد کپواڑہ (48 ایف آئی آر)، بارہمولہ (41)، گاندربل (30) اور سری نگر (29) کا مقام رہا۔

جرمانہ وصولی کے معاملے میں بھی کٹھوعہ فہرست میں سب سے اوپر رہا، جہاں انتظامیہ نے 3.308 کروڑ روپے وصول کیے۔ اس کے بعد جموں (2.248 کروڑ روپے)، پلوامہ (2.008 کروڑ روپے)، بارہمولہ (1.618 کروڑ روپے) اور کپواڑہ (1.499 کروڑ روپے) کا مقام رہا۔ دیگر اضلاع میں اننت ناگ میں ضبطی کے 530 واقعات ہوئے، جس سے 1.01 کروڑ روپے کی وصولی ہوئی، جبکہ کولگام میں 391 ضبطیاں اور 0.949 کروڑ روپے جرمانہ وصول کیا گیا۔

جموں ڈویژن میں جموں ضلع میں 679 ضبطیاں اور 15 ایف آئی آر درج کی گئیں اور 2.248 کروڑ روپے وصول کیے گئے۔

ریاسی میں ضبطی کے 356 معاملات درج کیے گئے، جبکہ راجوری اور ادھم پور میں بالترتیب 317 اور 277 معاملات سامنے آئے۔

مسٹرایم وائی تاریگامی کی صدارت میں ماحولیات کمیٹی کی حالیہ میٹنگ میں غیر قانونی کان کنی سے متعلق ضبطگیوں اور ایف آئی آر کے اعداد و شمار میں فرق کا جائزہ لیا گیا۔ اس فرق پر تشویش ظاہر کرتے ہوئے کمیٹی کے ارکان نے کان کنی محکمے سے تفصیلی وضاحت طلب کی۔

مسٹر تاریگامی نے میٹنگ کے دوران محکمے کو ہدایت دی کہ وہ گاڑیوں، مشینری یا معدنیات کی ضبطی سے پہلے خلاف ورزی کرنے والوں پر عائد پہلے اور دوسرے جرمانے کی مکمل تفصیلات فراہم کرے۔ انہوں نے کہا کہ موجودہ نفاذ کے نظام کی مؤثریت کا جائزہ لینے کے لیے یہ معلومات ضروری ہیں۔

یو این آئی۔ این یو۔