تہران/تل ابیب، امریکہ اور اسرائیل کی جانب سے ایران کی تیل کی ریفائنریوں اور ڈپوؤں پر کیے گئے شدید فضائی حملوں کے نتیجے میں اتوار کی صبح دارالحکومت تہران کا آسمان سیاہ دھوئیں کی موٹی چادر سے ڈھک گیا۔ جواباً ایران نے اسرائیل کے علاوہ کویت، سعودی عرب، بحرین اور متحدہ عرب امارات پر بھی میزائل داغے۔ امریکی صدر ڈونلڈ ٹرمپ نے ایک بار پھر دہرایا کہ ایران کو ہتھیار ڈال دینے چاہئیں، جس کا کرارا جواب دیتے ہوئے ایران نے کہا کہ وہ اپنی ایک انچ زمین بھی نہیں دے گا۔

تہران کے مقامی باشندوں کے مطابق تیل کے ڈپوؤں کے جلنے سے اٹھنے والا دھواں اتنا گھنا تھا کہ ایسا لگ رہا تھا جیسے ‘سورج مکمل طور پر غائب ہو گیا ہو’۔ آگ پر قابو پانے کے لیے عملے کو سخت جدوجہد کرنی پڑی۔ ایران نے ان حملوں کا جواب دیتے ہوئے کویت میں ‘پبلک انسٹی ٹیوشن فار سوشل سیکیورٹی’ کی کثیر المنزلہ سرکاری عمارت کو ڈرون سے نشانہ بنایا، جس سے عمارت میں شدید آگ لگ گئی۔

گزشتہ 28 فروری سے ایران پر شروع ہونے والے حملوں میں صرف ایک ہفتے کے دوران تقریباً 1200 شہریوں کی ہلاکت کی اطلاعات ہیں۔

ایران نے اتوار کے روز بھی اپنے پڑوسی ممالک کو نشانہ بنایا۔ کویتی فوجی حکام کے مطابق ایرانی ڈرونز نے کویت انٹرنیشنل ایئرپورٹ کے ایندھن کے ٹینکوں کو نشانہ بنانے کی کوشش کی۔ کویتی فضائی دفاعی نظام نے کئی ڈرون مار گرائے تاہم ملبہ گرنے سے ہوائی اڈے کے ٹرمینل کو جزوی نقصان پہنچا۔ کویتی فوج کے مطابق گزشتہ 48 گھنٹوں کے دوران 12 ڈرون اور 14 میزائل تباہ کیے گئے۔

دوسری جانب لبنان میں بھی اسرائیلی حملے مسلسل جاری ہیں۔ لبنان کے وزیر صحت کے مطابق آغاز کے بعد سے اب تک ہلاکتوں کی تعداد بڑھ کر 394 تک پہنچ گئی ہے۔ جنگ کے پھیلتے دائرے اور شہری علاقوں کو نشانہ بنائے جانے سے انسانی بحران مزید سنگین ہوتا جا رہا ہے۔

بحرین کی وزارت داخلہ نے الزام لگایا کہ ایران نے سمندری پانی صاف کرنے والے ایک پلانٹ کو نقصان پہنچایا ہے۔ دبئی کے جبل علی بندرگاہ اور ایک ڈیٹا سینٹر میں بھی آگ لگنے کی اطلاعات ہیں۔ اس کے علاوہ ابوظہبی کے ہوائی اڈوں کے قریب بھی حملے کی خبریں ہیں۔

سعودی وزارت دفاع نے دعویٰ کیا ہے کہ ریاض کے سفارتی علاقے کی جانب آنے والے ایک ایرانی ڈرون کو مار گرایا گیا۔ اسی دوران عمان اور قطر نے بھی اپنے فضائی حدود میں ایرانی میزائلوں کی نقل و حرکت کی تصدیق کرتے ہوئے احتیاطاً اپنی فضائی حدود بند کر دی ہیں۔

ایران کی ‘اسمبلی آف ایکسپرٹس’ نے شہید سپریم لیڈر آیت اللہ علی خامنہ ای کے جانشین کے نام پر اتفاقِ رائے کر لیا ہے۔ تاہم، کونسل کا کہنا ہے کہ نام کے باضابطہ اعلان سے قبل کچھ ‘رکاوٹیں’ ابھی باقی ہیں۔ دوسری جانب، اسرائیلی فوج نے جارحانہ رخ اپناتے ہوئے خبردار کیا ہے کہ وہ خامنہ ای کے ہر ممکنہ جانشین کا پیچھا کرے گی اور انہیں نشانہ بنائے گی۔

ناروے کے دارالحکومت اوسلو میں واقع امریکی سفارت خانے کے باہر اتوار کی علی الصبح ایک دھماکہ ہوا، جس سے عمارت کو معمولی نقصان پہنچا۔ واقعے میں کسی جانی نقصان کی اطلاع نہیں ہے۔ ناروے پولیس کے مطابق مقامی وقت کے مطابق رات ایک بجے واقعے کی اطلاع ملتے ہی پولیس اور ہنگامی خدمات کو موقع پر روانہ کر دیا گیا۔ دھماکے کی وجوہات اور اس میں ملوث افراد کے بارے میں تحقیقات جاری ہیں۔

امریکی صدر ڈونلڈ ٹرمپ نے ایئر فورس ون طیارے میں صحافیوں سے گفتگو کرتے ہوئے کہا کہ امریکہ اس وقت برتری کی پوزیشن میں ہے، تاہم اب امریکہ کسی سمجھوتے کا خواہاں نہیں۔ ٹرمپ نے دعویٰ کیا کہ جنگ کے ابتدائی دو دنوں میں ایران نے جتنے میزائل اور ڈرون حملے کیے تھے، اب وہ صرف 9 فیصد حملے ہی کر پا رہا ہے۔ انہوں نے کہا کہ ”ہم نے ان کے 70 فیصد راکٹ لانچرز تباہ کر دیے ہیں۔’‘‘

ایران کے آئندہ رہنما کے انتخاب سے متعلق سوال پر ٹرمپ نے کہا کہ امریکہ ہر پانچ یا دس سال بعد ایسی صورتحال کا سامنا نہیں کرنا چاہتا۔ ان کا کہنا تھا کہ ’’ہم ایران میں ایسا صدر دیکھنا چاہتے ہیں جو اپنے ملک کو جنگ کی طرف نہ لے جائے۔‘‘

جب ٹرمپ سے پوچھا گیا کہ وہ ایران سے کیا چاہتے ہیں تو انہوں نے کہا کہ وہ بلا شرط ہتھیار ڈالنے کا مطالبہ کرتے ہیں۔ انہوں نے کہا کہ ’’یا تو وہ ہار مان لیں یا پھر وہاں ہتھیار ڈالنے کے لیے کوئی باقی نہ رہے۔‘‘

صدر ٹرمپ نے برطانیہ کا شکریہ ادا کرتے ہوئے کہا کہ امریکہ۔اسرائیل اور ایران کے درمیان جاری جنگ کے تناظر میں برطانیہ نے دو طیارہ بردار بحری جہاز بھیجنے پر غور کیا تھا، تاہم اب اس کی ضرورت نہیں رہی۔

ادھر ایران کے صدر مسعود پزشکیان نے کہا ہے کہ ایران پر حملہ کرنے والوں کے خلاف ملک پوری قوت کے ساتھ کھڑا ہے اور کسی بھی جارحیت کا بھرپور جواب دیا جائے گا۔ انہوں نے واضح کیا کہ ایران اپنے پڑوسی ممالک کے ساتھ اچھے اور برادرانہ تعلقات کا خواہاں ہے، تاہم اگر کسی دوسرے ملک کی سرزمین سے ایران پر حملہ کیا گیا تو ایران جواب دینے پر مجبور ہوگا۔

یو این آئی۔ م ع