سرینگر، جموں و کشمیر کے ضلع کولگام میں منگل کو ایک سڑک حادثے میں سینٹرل ریزرو پولیس فورس (سی آر پی ایف) کے چار جوان اور ایک عام شہری ٹرک ڈرائیور زخمی ہو گئے۔

حکام نے بتایا کہ یہ حادثہ سرینگر-جموں نیشنل ہائی وے پر لیووڈورا کے قریب ایک ٹرک اور سی آر پی ایف کی گاڑی کے درمیان ٹکر کے بعد پیش آیا۔ انہوں نے بتایا کہ تیز رفتار ٹرک نے سی آر پی ایف کی گاڑی کو ٹکر ماری، جس سے وہ الٹ گئی۔ اس واقعے میں دونوں گاڑیوں کو نقصان پہنچا۔

حادثے میں سی آر پی ایف کے چار جوان (جن میں ایک سب انسپکٹر بھی شامل ہے) اور ٹرک ڈرائیور زخمی ہو گئے۔ زخمیوں کو فوری علاج کے لیے قاضی گنڈ کے سب ڈسٹرکٹ ہسپتال (ایس ڈی ایچ) لے جایا گیا۔ تاہم بعد میں ڈاکٹروں نے انہیں بہتر علاج کے لیے اننت ناگ کے گورنمنٹ میڈیکل کالج (جی ایم سی) ریفر کر دیا۔

قاضی گنڈ پولیس اسٹیشن نے معاملہ درج کر لیا ہے اور واقعے کی مزید تحقیقات شروع کر دی گئی ہیں۔

یواین آئی۔الف الف

سرینگر، جموں و کشمیر کے وزیر اعلیٰ عمر عبداللہ نے پیر کے روز کہا کہ تعلیم اور صحت کے شعبوں میں ریاستوں کے اختیارات کو کمزور کرنے کی ذمہ دار صرف بی جے پی نہیں ہے بلکہ ان کا کہنا تھا کہ مرکز میں یو پی اے سمیت سابقہ حکومتوں نے بھی اختیارات کی تدریجی مرکزیت میں اپنا کردار ادا کیا ہے۔

عمر عبداللہ جھارکھنڈ میں طالب علموں کے جاری احتجاج اور حکومت کی جانب سے مذاکرات کے دوسرے دور کے انعقاد کے فیصلے سے متعلق ایک سوال کا جواب دے رہے تھے۔

عمر عبداللہ نے کہا کہ اگر طالب علموں کے مطالبات جائز پائے جائیں تو بات چیت جاری رہنی چاہیے۔

انہوں نے سرینگر میں صحافیوں سے بات کرتے ہوئے کہا کہ اگر طالب علموں کے مطالبات درست ہیں تو ان کے ساتھ بات چیت ہونی چاہیے۔ اگر وہ جائز نہیں ہیں تو یہ بات واضح طور پر کہہ دینی چاہیے۔ لیکن اگر مذاکرات کا ایک دور پہلے ہی ہو چکا ہے اور دوسرے دور کی منصوبہ بندی کی جا رہی ہے، تو اس کا مطلب ہے کہ ان کے مطالبات میں کچھ سچائی ضرور ہے۔

عمر عبداللہ نے کہا کہ یہ مسئلہ صرف جھارکھنڈ تک محدود نہیں ہے اور انہوں نے وفاقی ڈھانچے کو مضبوط بنانے سے متعلق اپنے دیرینہ موقف کا اعادہ کرنے کے لیے اس موقع کا استعمال کیا۔

انہوں نے کہا کہ تعلیم اور صحت کی دیکھ بھال وہ موضوعات ہیں جو ریاستوں کے زمرے میں آتے ہیں اور انہوں نے ریاستوں کے اختیارات کو تدریجی طور پر کم کرنے پر مسلسل مرکزی حکومتوں کو تنقید کا نشانہ بنایا۔

انہوں نے کہا کہ یہ صرف بی جے پی کا قصور نہیں ہے۔ سابقہ کانگریس اور یو پی اے حکومتوں نے بھی ریاستوں کو کمزور کرنے میں کردار ادا کیا ہے۔

نیٹ تنازع کا حوالہ دیتے ہوئے وزیر اعلیٰ نے دلیل دی کہ اداروں اور امتحانات کی بڑھتی ہوئی مرکزیت نے مرکز اور ریاستوں کے درمیان ذمہ داریوں کی تقسیم کو دھندلا دیا ہے۔

انہوں نے کہا کہ اگر امتحانات ریاستوں کے دائرہ اختیار میں رہتے تو جواب دہی مرکزی حکومت کے بجائے متعلقہ ریاستی حکومتوں کی ہوتی۔

اختیارات کی واضح تقسیم کا مطالبہ کرتے ہوئے عمر عبداللہ نے کہا کہ ریاستوں کو ریاستی موضوعات کا انتظام سنبھالنے کی اجازت ہونی چاہیے، جب کہ مرکز کو اپنے دائرہ اختیار کے معاملا ت پر توجہ دینی چاہیے۔

سرینگر میں اپنے یوم آزادی کے خطاب میں عمر عبداللہ نے نیٹ اور جے ای ای جیسے اہم امتحانات کا کنٹرول ریاستوں کو واپس دینے کا مطالبہ کیا تھا-

یو این آئی۔ ظ ا۔ م الف

سری نگر، جموں و کشمیر کے وزیر اعلیٰ عمر عبداللہ اور جموں و کشمیر کانگریس کے صدر طارق قرہ نے ’وندے ماترم‘ کی مبینہ بے حرمتی کے خلاف بی جے پی کے احتجاج کو مسترد کرتے ہوئے کہا ہے کہ کانگریس اس معاملے پر پہلے ہی اپنی پوزیشن واضح کر چکی ہے۔

عمر عبداللہ نے کہا کہ یومِ آزادی کی تقریب کی ویڈیوز سے واضح ہے کہ ’وندے ماترم‘ کے تینوں بند گائے گئے تھے۔ انہوں نے کہا کہ ممکن ہے تقریب کی ترتیب میں تبدیلی کی وجہ سے کچھ لوگوں کو غلط فہمی ہوئی ہو۔ دوسری جانب طارق قرہ نے الزام لگایا کہ بی جے پی ’وندے ماترم‘ کے معاملے کو ملک کو درپیش اہم مسائل، جن میں نیٹ امتحان کے پرچے کے افشا ہونے کا معاملہ اور دیگر تنازعات شامل ہیں، سے عوام کی توجہ ہٹانے کے لیے استعمال کر رہی ہے۔

بی جے پی نے نئی دہلی میں یومِ آزادی کی تقریبات کے دوران قومی گیت ’وندے ماترم‘ کی مبینہ بے حرمتی کے خلاف کانگریس کے سینئر رہنماؤں، بشمول سونیا گاندھی، راہل گاندھی اور ملکارجن کھڑگے کے خلاف ملک گیر احتجاج شروع کیا ہے۔

عمر عبداللہ نے کہا کہ کانگریس کی تقریب کی ویڈیوز سے واضح ہوتا ہے کہ ’وندے ماترم‘ کے تینوں بند گائے گئے تھے۔

بی جے پی کے احتجاج کے بارے میں پوچھے جانے پر عمر عبداللہ نے سری نگر میں صحافیوں سے کہا، کانگریس نے خود بھی اس کی وضاحت کر دی ہے۔ انہوں نے کہا کہ ویڈیو دیکھیں، وہاں وندے ماترم کے تینوں بند گائے گئے تھے۔ تو پھر یہ تنازع کیا ہے؟

انہوں نے کہا کہ ممکن ہے کچھ غلط فہمی اس لیے پیدا ہوئی ہو کیونکہ یومِ آزادی کی تقریب میں پہلی مرتبہ ’وندے ماترم‘ کو شامل کیا گیا تھا۔

انہوں نے کہاکہ 15 اگست کو یہ میری آٹھویں پریڈ تھی، لیکن پہلی بار وندے ماترم کو اس میں شامل کیا گیا۔ اسے سمجھنے میں مجھے بھی کچھ وقت لگا…”

عمر عبداللہ نے مزید کہا کہ کانگریس کے رہنماؤں کو بھی شاید پروگرام کی نئی ترتیب کے مطابق خود کو ڈھالنے میں کچھ وقت لگا ہو۔

انہوں نے کہا، “شاید کانگریس کو بھی خود کو اس کے مطابق ڈھالنے میں کچھ وقت لگا۔ ایسا ہوتا ہے۔”

جموں و کشمیر کانگریس کے صدر طارق قرہ نے بی جے پی پر الزام لگایا کہ وہ ’وندے ماترم‘ کے تنازع کو ایک حربے کے طور پر استعمال کرکے ملک کے اہم مسائل سے عوام کی توجہ ہٹانے کی کوشش کر رہی ہے۔

قرہ نے کہا کہ بی جے پی ’چندہ چوری‘ اور نیٹ امتحان کے پرچے کے افشا ہونے جیسے معاملات سے عوام کی توجہ ہٹانا چاہتی ہے۔

قرہ نے سری نگر میں صحافیوں سے کہا،”اس احتجاج کے پیچھے دو یا تین وجوہات ہیں۔ پہلی وجہ ملک میں بی جے پی کے خلاف بڑھتی ہوئی ناراضی ہے۔ چاہے یہ ’چندہ چوری‘ کا معاملہ ہو یا نیٹ کے پرچے افشا ہونے کا، ملک بھر کے نوجوانوں اور طلبہ میں غصہ پایا جاتا ہے۔”

کانگریس رہنماؤں کی جانب سے ’وندے ماترم‘ کی بے حرمتی کے الزامات کو مسترد کرتے ہوئے انہوں نے کہا کہ “بے حرمتی کی کوئی بات ہی نہیں ہے” اور الزام لگایا کہ ویڈیو کا ایک غلط ورژن گردش کرایا جا رہا ہے۔ مسٹر قرہ نے کہا کہ کانگریس اس معاملے پر پہلے ہی اپنی پوزیشن واضح کر چکی ہے اور بی جے پی جس ویڈیو کو بنیاد بنا رہی ہے، وہ “توڑ مروڑ کر پیش کیا گیا” ورژن ہے، جسے پارٹی تسلیم نہیں کرتی۔

قرہ نے مزید کہا، “اس وقت یہ توجہ ہٹانے کی حکمت عملی صرف بی جے پی کی مایوسی کو ظاہر کرتی ہے۔

یو این آئی۔ ظ ا۔ م الف