جموں، جموں و کشمیر کے ریاسی ضلع میں منگل کی رات ایک گاڑی کے گہری کھائی میں گر جانے سے میاں بیوی سمیت تین افراد کی موت ہو گئی، جبکہ دو دیگر زخمی ہو گئے۔

پولیس نے بدھ کو بتایا کہ تھانول سے تھوب گاؤں جا رہی مسافر گاڑی کا ڈرائیور پناسا گاؤں کے قریب موڑ پر گاڑی پر قابو کھو بیٹھا، جس کے بعد گاڑی گہری کھائی میں جا گری۔

حادثے میں ایک ہی خاندان کے تین افراد کی موت ہو گئی اور دو دیگر زخمی ہوئے ہیں۔ مہلوکین کی شناخت پریم سنگھ (50)، ان کی اہلیہ توری دیوی (45) اور درگی دیوی (72) کے طور پر ہوئی ہے۔

پولیس نے مقامی لوگوں کی مدد سے حادثے کی شکار گاڑی سے لاشوں کو باہر نکالا۔ پولیس کے مطابق، گاڑی سے کود کر باہر نکلنے میں کامیاب ہونے والے دو مسافروں کو چوٹیں آئی ہیں، جنہیں علاج کے لیے اسپتال میں داخل کرایا گیا ہے۔

پولیس نے مقدمہ درج کر لیا ہے اور تحقیقات جاری ہیں۔

یو این آئی۔ این یو۔

سری نگر، ہندوستان میں امریکی سفیر سرجیو گور کے جموں و کشمیر دورے سے قبل وزیر اعلیٰ عمر عبداللہ نے بدھ کے روز کہا کہ جموں و کشمیر کے مسائل واشنگٹن نہیں بلکہ نئی دہلی کو حل کرنے ہوں گے۔ انہوں نے واضح کیا کہ وہ مرکز کے زیرانتظام خطے کے مسائل کے بارے میں کسی غیر ملکی سفارت کار سے شکایت نہیں کریں گے۔

سفیر گور، جو جنوبی اور وسطی ایشیا کے لیے خصوصی نمائندے بھی ہیں، بدھ کی دوپہر سری نگر پہنچنے والے ہیں۔ وہ سری نگر میں رات کا قیام کرنے کے بعد جمعرات کے روز لداخ روانہ ہوں گے۔

شہر میں ترقیاتی منصوبوں کا معائنہ کرنے اور اہم شہری کاموں کی پیش رفت کا جائزہ لینے کے بعد صحافیوں سے گفتگو کرتے ہوئے عمر عبداللہ نے کہا کہ وہ امریکی سفیر سے ملاقات کے منتظر ہیں۔ تاہم انہوں نے واضح کیا کہ وہ جموں و کشمیر سے متعلق معاملات میں کسی بیرونی مداخلت کا مطالبہ نہیں کریں گے۔

وزیر اعلیٰ نے کہا کہ ایک طویل عرصے بعد کسی امریکی سفیر کا جموں و کشمیر کا دورہ ہورہا ہے اور وہ بھی طویل وقفے کے بعد کسی امریکی سفیر سے ملاقات کر رہے ہیں۔ انہوں نے کہا کہ “انہیں آنے دیں، ہم ان سے بات کریں گے۔” عمر عبداللہ نے مزید کہا کہ وہ سفیر کے خیالات سننے کے خواہاں ہیں اور یہ دیکھنا دلچسپ ہوگا کہ دونوں کے درمیان کس نوعیت کی گفتگو ہوتی ہے۔

انہوں نے کہا کہ ملاقات کے دوران بنیادی طور پر جموں و کشمیر اور مرکز کے زیر انتظام خطے کی موجودہ صورتحال پر بات چیت ہوگی۔ عمر عبداللہ نے واضح کیا کہ جموں و کشمیر کے مسائل کا امریکی سفیر سے کوئی تعلق نہیں ہے اور کسی دوسرے ملک کے سفیر سے شکایت کرنا ان کی عادت نہیں ہے۔

مرکز کو خطے کے مسائل حل کرنے کی ذمہ داری یاد دلاتے ہوئے عمر عبداللہ نے کہا کہ “واشنگٹن ہمارے مسائل حل نہیں کرے گا۔ ہماری مرکزی حکومت کو ہی ہمارے مسائل حل کرنے ہوں گے۔ کسی دوسرے ملک کے سفیر سے شکایت کرنا غلط ہوگا۔” انہوں نے مزید کہا کہ وہ امریکی سفیر سے جموں و کشمیر کے حالات پر بات ضرور کریں گے، لیکن اپنے مسائل کا حل ان سے تلاش کرنے کی کوشش نہیں کریں گے۔

یہ گزشتہ 15 سال سے زائد عرصے میں کسی امریکی سفیر اور جموں و کشمیر کے موجودہ وزیر اعلیٰ کے درمیان پہلی ملاقات ہوگی۔ دلچسپ بات یہ ہے کہ سرجیو گور اس سے قبل کیرالہ، کرناٹک اور مہاراشٹر سمیت ہندوستان کی متعدد ریاستوں کا دورہ کر چکے ہیں، جہاں انہوں نے سیاسی رہنماؤں سے ملاقاتیں کی تھیں۔

یو این آئی۔ م ع

سری نگر، ہندوستان میں امریکہ کے سفیر اور جنوبی و وسطی ایشیا کے لیے خصوصی ایلچی سرجیو گور بدھ کو کشمیر پہنچیں گے۔ یہ رواں سال کے اوائل میں عہدہ سنبھالنے کے بعد مرکز کے زیر انتظام علاقے جموں و کشمیر کا ان کا پہلا دورہ ہوگا۔

سرکاری ذرائع نے بتایا کہ سفیر بدھ کی دوپہر سری نگر پہنچیں گے اور قیام کے دوران جموں و کشمیر کے لیفٹیننٹ گورنر منوج سنہا اور وزیر اعلیٰ عمر عبداللہ سے ملاقات کرنے کی توقع ہے۔

ذرائع نے بتایا کہ مسٹر گور سری نگر میں رات گزارنے کے بعد جمعرات کو لداخ روانہ ہوں گے۔

یہ دورہ جموں و کشمیر کا ان کا پہلا دورہ ہے، جب انہوں نے رواں سال 14 جنوری کو بھارت میں امریکہ کے 27ویں سفیر کی حیثیت سے باضابطہ طور پر ذمہ داری سنبھالی تھی۔

اگرچہ سفیر کے سرکاری دورۂ پروگرام میں مرکز کے زیر انتظام علاقے کی اعلیٰ قیادت کے ساتھ ملاقاتیں شامل ہیں، تاہم یہ واضح نہیں ہے کہ آیا وہ اپنے دورے کے دوران سیاسی رہنماؤں، کاروباری نمائندوں، سول سوسائٹی اور سکیورٹی اداروں کے نمائندوں سے بھی ملاقات کریں گے یا نہیں۔

یہ دورہ اس لیے بھی اہمیت رکھتا ہے کہ 2019 میں آئینی تبدیلیوں اور اس کے بعد مرکز کے زیر انتظام علاقے میں منتخب حکومت کی بحالی کے بعد جموں و کشمیر کا سیاسی منظرنامہ تبدیل ہو چکا ہے۔

کشمیر میں امریکی سفیر کی مخصوص مصروفیات کے حوالے سے ابھی تک کوئی سرکاری اطلاع سامنے نہیں آئی ہے۔

یواین آئی۔ ظ ا