نئی دہلی، کانگریس نے حکومت کی ای-20 پالیسی کو عوام دشمن اور دور اندیشی کے خلاف قرار دیتے ہوئے کہا ہے کہ پیٹرول میں 20 فیصد ایتھنول ملانے کی وجہ سے چینی اور غذائی اجناس مہنگے ہو رہے ہیں، نیز گاڑیوں کے مالکان کو کم مائلیج اور گاڑیوں کی مطابقت سے جڑے مسائل کا سامنا کرنا پڑ رہا ہے کانگریس کمیونیکیشن ڈپارٹمنٹ کے انچارج جے رام رمیش نے جمعہ کے روز سوشل میڈیا پلیٹ فارم ‘ایکس’ پر لکھا کہ مودی حکومت کی ای-20 پالیسی کے باعث عوام کو سڑک اور باورچی خانے، دونوں جگہ اس کی قیمت چکانی پڑ رہی ہے۔ گنے اور اناج سے ایتھنول بنانے کی وجہ سے غذائی اشیاء کی دستیابی متاثر ہو رہی ہے۔

انہوں نے کہا کہ 25 لاکھ ٹن چینی کے قابل گنا ایتھنول بنانے میں چلا گیا، جس کی وجہ سے گزشتہ تین مہینوں میں چینی کی قیمت 48 روپے سے بڑھ کر 67 روپے فی کلو اور گڑ کی قیمت 50 روپے سے بڑھ کر 65 روپے فی کلو ہو گئی ہے۔ چاول اور مکئی کا آٹا بھی بالترتیب 16 اور 11 فیصد مہنگا ہوا ہے، جبکہ مویشیوں کی خوراک کی قیمت میں 10.34 فیصد اضافہ ہوا ہے۔

مسٹر رمیش نے کہا کہ ای-20 کے لیے تیار نہ کی گئی گاڑیوں میں کم مائلیج اور خرابی کا خطرہ بنا ہوا ہے۔ انہوں نے الزام لگایا کہ ایتھنول تیار کرنے والوں کو فائدہ پہنچانے کے لیے گاڑی مالکان کے پاس پیٹرول کے متبادل محدود کر دیے گئے ہیں۔

انہوں نے کہا کہ بین الاقوامی سطح پر خام تیل کی قیمتوں میں کمی اور 20 فیصد ایتھنول ملانے سے لاگت کم ہونے کے باوجود پیٹرول کی قیمتوں میں کوئی کمی نہیں کی گئی ہے۔ لوک سبھا میں قائد حزب اختلاف راہل گاندھی مسلسل ای-20 کے نام پر ہونے والی بدعنوانی اور اس سے جڑے صارفین کے مفادات کے سوال اٹھا رہے ہیں۔ کانگریس ورکنگ کمیٹی نے بھی 19 اگست کو ای-20 کے باعث کم مائلیج، گاڑیوں کی مطابقت، صارفین کے محدود متبادلات اور ماحولیاتی نقصان کو لے کر شدید تشویش کا اظہار کیا تھا۔

کانگریس نے مطالبہ کیا ہے کہ حکومت ای-20 پالیسی کا فوری جائزہ لے اور عوام کو بغیر ایتھنول والے پیٹرول کا متبادل فراہم کرے۔

یواین آئی۔الف الف

نئی دہلی، کانگریس کے سابق صدر اور لوک سبھا میں اپوزیشن کے لیڈر راہل گاندھی پیلیٹ گن متاثرہ کے معاملے میں ایف آئی آر درج کرانے کے مطالبے کے حق میں دہلی کے وسطی ضلع کے ڈپٹی کمشنر آف پولیس (ڈی سی پی) دفتر کے باہر جمعہ کو دھرنے پر بیٹھ گئے کانگریس ذرائع کے مطابق، متاثرہ ساحل لوچو نے 14 اگست کو اپنے وکلاء کے ساتھ دہلی پولیس کو تحریری شکایت دی تھی لیکن پولیس نے شکایت کا آئی او نمبر دینے سے انکار کر دیا۔ اس کے بعد 17 اگست کو ای میل اور فون کے ذریعے بھی شکایت پر کارروائی کا مطالبہ کیا گیا لیکن شکایت کی رسید تک نہیں دی گئی۔ راہل گاندھی کا الزام ہے کہ معاملہ قابل دست اندازی جرم سے جڑا ہونے کے باوجود پولیس نے اب تک ایف آئی آر درج نہیں کی ہے۔ اسی معاملے میں متاثرہ کے ساتھ راہل پہلے مندر مارگ پولیس اسٹیشن پہنچے اور بعد میں ڈی سی پی دفتر پہنچے۔

کانگریس ذرائع نے کہا ہے کہ پولیس کی جانب سے ایف آئی آر درج نہ کیے جانے کے احتجاج میں راہل ڈی سی پی دفتر کے باہر دھرنے پر بیٹھ گئے ہیں اور معاملے میں ایف آئی آر درج ہونے تک وہاں سے نہ جانے پر اڑے ہیں۔

یو این آئی ایف اے

سری نگر، جموں و کشمیر کرائم برانچ کے اسپیشل کرائم وِنگ (ایس سی ڈبلیو) کشمیر نے جمعہ کو سری نگر کے صفا کدل علاقے میں ایک رہائشی مکان کی تلاشی لی۔ یہ کارروائی مبینہ جعل سازی کے ایک معاملے کی تحقیقات کے سلسلے میں کی گئی، جس میں مبینہ طور پر جعلی دستاویزات کی بنیاد پر جموں و کشمیر پولیس میں تقرری حاصل کرنے کا الزام ہے۔

حکام نے بتایا کہ یہ تلاشی جموں و کشمیر پولیس کے سلیکشن گریڈ کانسٹیبل منظور احمد نجر کی صفا کدل، سری نگر میں واقع رہائش گاہ پر لی گئی۔ یہ کارروائی سری نگر کے اسپیشل موبائل مجسٹریٹ (پی ٹی اینڈ ای) کی جانب سے جاری کیے گئے سرچ وارنٹ کے تحت کی گئی۔ اس سلسلے میں رواں سال آر پی سی کی دفعات 420، 468 اور 471 کے تحت ایف آئی آر درج کی گئی ہے۔

انہوں نے بتایا کہ یہ معاملہ جموں و کشمیر پولیس محکمہ میں تقرری کے لیے تاریخ پیدائش اور تعلیمی قابلیت سے متعلق جعلی دستاویزات جمع کرانے کے الزامات سے متعلق ہے۔ جاری تحقیقات کے تحت اسپیشل کرائم وِنگ نے نجر کی رہائش گاہ کی تلاشی لی۔

یو این آئی۔ الف الف۔ م الف