واشنگٹن، امریکی وزیر جنگ پیٹ ہیگستھ نے امریکی فوج کو جدید تقاضوں سے ہم آہنگ کرنے کے لیے چھ بڑے تزویراتی اقدامات کا اعلان کیا ہے، جن میں خودکار جنگی صلاحیتوں، فوجی تیاری، دفاعی تنصیبات، سپلائی چین اور نئی ٹیکنالوجی پر خصوصی توجہ دی جائے گی۔

میرین کور بیس کوانٹیکو میں خطاب کرتے ہوئے ہیگستھ نے کہا کہ محکمہ جنگ یکم اکتوبر 2027 تک چار ستارہ سطح کی ’’آٹونومس وارفیئر کمانڈ‘‘ قائم کرے گا، جو مشترکہ فوج میں خودکار جنگی نظام کی توسیع کی نگرانی کرے گی۔ اس منصوبے کے تحت ’’پروجیکٹ ایجنکورٹ‘‘ اور ڈرون صلاحیتوں کو بھی فروغ دیا جائے گا۔

’’امریکاز کور آف کیڈٹس‘‘ پروگرام کے ذریعے مزید یونیورسٹیوں میں کل وقتی کور آف کیڈٹس پروگرام شروع کرکے فوج میں نئے افسران کی بھرتی کا دائرہ وسیع کیا جائے گا۔ لوزیانا اسٹیٹ یونیورسٹی، لبرٹی یونیورسٹی، ٹسکیگی یونیورسٹی، مسیسیپی اسٹیٹ یونیورسٹی اور ہلزدیل کالج نئے شراکت دار ہوں گے۔

ہیگستھ نے ’’فورٹریس امریکہ‘‘ پروگرام کا بھی اعلان کیا، جس کا مقصد فوجی اڈوں کو بجلی کے شہری گرڈ سے زیادہ خودمختار بنانا، نایاب معدنیات، سیمی کنڈکٹرز اور خصوصی دھاتوں کی ملکی پیداوار بڑھانا اور گولہ بارود، ایندھن، ادویات و دیگر اہم ذخائر مضبوط کرنا ہے۔ پروگرام میں سائبر حملوں، تخریب کاری اور ڈرون خطرات سے فوجی تنصیبات کے تحفظ پر بھی توجہ دی جائے گی

’’نیکسٹ گریٹ امریکن بیس‘‘ منصوبے کے تحت ایک نیا بڑا فوجی اڈہ قائم کیا جائے گا، جس میں آزاد توانائی، خودکار نظام اور جدید فضائی دفاعی صلاحیتیں شامل ہوں گی۔ ریاستی حکومتوں کو اس کی میزبانی کے لیے مسابقت میں حصہ لینے کی دعوت دی جائے گی۔

اس کے علاوہ ’’آفس آف ریلیجس افیئرز‘‘ قائم کیا جائے گا، جو فوجی اہلکاروں کے لیے مذہبی آزادی اور رضاکارانہ مذہبی معاونت سے متعلق امور دیکھے گا۔

چھٹے اقدام ’’پروجیکٹ میریڈیئن‘‘ کے تحت مستقبل کی جنگی ٹیکنالوجی اور صلاحیتوں کا جائزہ لیا جائے گا، جس میں زیر زمین کارروائیوں سے لے کر زمین اور چاند کے درمیان خلائی ماحول تک مختلف شعبے شامل ہوں گے۔ محکمہ کے مطابق ایلون مسک، پالمر لکی اور نیوٹ گنگرچ منصوبے کی مشترکہ قیادت کریں گے اور 120 دن میں سفارشات پیش کریں گے۔

ہیگستھ نے کہا کہ ان اقدامات کا مقصد ’’جنگجو جذبے‘‘ کی بحالی، امریکی فوج کی تعمیر نو اور ملک کی بازداریت مضبوط کرنا ہے۔

یو این آئی۔ ع ا۔

واشنگٹن، امریکی صدر ڈونلڈ ٹرمپ نے بدھ کے روز اعلان کیا ہے کہ جنوبی کوریا امریکی توانائی اور اسٹریٹجک منصوبوں بشمول جوہری توانائی، مائع قدرتی گیس اور قدرتی گیس کے انفراسٹرکچر میں 200 بلین ڈالر کی سرمایہ کاری کرے گا۔

ٹرمپ نے اپنے سوشل میڈیا پلیٹ فارم ‘ٹروتھ سوشل’ پر ایک پوسٹ میں کہا کہ ان سرمایہ کاریوں پر اقوام متحدہ کی جنرل اسمبلی کے سائیڈ لائنز پر نیویارک میں جنوبی کوریا کے صدر لی جے میانگ کے ساتھ ان کی حالیہ ملاقات کے دوران اتفاق ہوا تھا۔

انہوں نے کہا کہ یہ سرمایہ کاریاں، بشمول امریکہ میں آٹھ بڑے پیمانے کے جوہری ری ایکٹرز کی تعمیر کے لیے 120 بلین ڈالر کا جوہری توانائی کا پروگرام، اس 350 بلین ڈالر کے ‘کوریا اسٹریٹجک ٹریڈ اینڈ انویسٹمنٹ ڈیل’ کے تحت آتی ہیں جو انہوں نے گزشتہ سال صدر لی کے ساتھ طے کی تھی۔

ٹرمپ نے کہا کہ واشنگٹن اور سیول نے 50 بلین ڈالر کے الاسکا ایل این جی منصوبے پر بھی تعاون کرنے پر اتفاق کیا ہے، اور مزید کہا کہ یہ “الاسکا کے لوگوں کے لیے ایک انقلابی تبدیلی لائے گا۔”

انہوں نے بتایا کہ اس پیکیج میں ٹیکساس کے شہر اینسینل میں 22 بلین ڈالر کا 6.4 گیگا واٹ کا قدرتی گیس سے چلنے والا پاور پروجیکٹ بھی شامل ہے۔

انہوں نے کہا، “یہ سودے ہمارے تجارتی معاہدوں کے مرہونِ منت ہیں۔ ہم کوریا کے سرمایہ کاری کے وعدوں کو تعمیرات کے بڑے منصوبوں اور لاکھوں امریکی ملازمتوں میں تبدیل کر رہے ہیں۔

یو این آئی۔ ع ا۔

سری نگر، حکام نے جمعرات کو بتایا کہ سری نگر پولیس نے ممنوعہ فارماسیوٹیکل ادویات کی خرید و فروخت، منتقلی، ذخیرہ اندوزی، تقسیم اور مالی اعانت میں ملوث ایک منظم منشیات نیٹ ورک کا پردہ فاش کرتے ہوئے آٹھ افراد کو گرفتار کیا ہے اور 2.19 لاکھ سے زائد ٹیبلٹس اور کیپسول ضبط کیے ہیں۔

یہ کارروائی پولیس اسٹیشن صفاکدل میں درج ایف آئی آر نمبر 135/2026 کی تحقیقات کے دوران کی گئی۔ پولیس کا کہنا ہے کہ اس نیٹ ورک کے تار جموں و کشمیر سے باہر بھی جڑے ہوئے تھے۔

پولیس نے بتایا کہ اب تک آٹھ ملزمان کو گرفتار کیا جا چکا ہے، جن میں محمد وسیم زرگر، انعام احمد زرگر، صاحب احمد گنائی، انصار حسین بٹ، پیر شکور، ہارون طارق پنڈت، عاقب سلیم اور حارث حمید ملا شامل ہیں۔ تمام ملزمان کا تعلق سری نگر سے ہے، سوائے انصار بٹ کے جو بڈگام کا رہائشی ہے۔

پولیس نے بتایا کہ حارث حمید ملا کو تکنیکی نگرانی کے ذریعے ٹریس کر کے کرناٹک کے شہر بنگلورو سے گرفتار کیا گیا۔

بڑی برآمدگیوں میں 2,19,425 فارماسیوٹیکل ٹیبلٹس اور کیپسول، 3.830 کلوگرام کوڈین پر مشتمل مائع، تقریباً 40 گرام ہیروئن جیسا مادہ اور تقریباً 85.75 لاکھ روپے نقد رقم شامل ہیں۔

پولیس نے کروڑوں روپے مالیت کے 108 سونے کے سکے، سونے کے بسکٹ اور سونے کی دیگر اشیاء کے علاوہ رولیکس کی دو گھڑیاں، ایک ڈی اور (Dior) بیگ، ایک ڈی ایس ایل آر کیمرہ، ایک آئی فون 16 پرو میکس، دو خالی میگزین کے ساتھ .32 کیلیبر کا ایک پسٹل اور ایک خنجر بھی برآمد کیا۔ قانون کے تحت دو گاڑیاں بھی ضبط کر لی گئی ہیں۔

مالیاتی تحقیقات کے حصے کے طور پر، عدالت کے احکامات کے بعد ایکسس بینک بمیانہ میں وسیم زرگر کے دو بینک لاکرز کی تلاشی لی گئی، جس کے نتیجے میں تقریباً 65 لاکھ روپے نقد اور تقریباً 2.20 کروڑ روپے مالیت کے سونے کے سامان برآمد ہوئے۔

پولیس نے بتایا کہ ملزمان سے منسلک متعدد بینک کھاتوں کو منجمد کر دیا گیا ہے، جن میں اب تک تقریباً 1.07 کروڑ روپے کی نشاندہی ہوئی ہے۔ این ڈی پی ایس ایکٹ کے تحت ایک رہائشی مکان اور دو گاڑیاں بھی برآمد/منسلک کی گئی ہیں۔

سپلائی چین کی تحقیقات کے دوران پولیس ٹیمیں چنڈی گڑھ، پنچکولہ اور انبالہ پہنچیں، جہاں فارماسیوٹیکل اداروں اور ٹرانسپورٹ ایجنسیوں کا معائنہ کیا گیا اور ریکارڈ اکٹھا کیا گیا۔

دو دیگر مشتبہ افراد، فیضان فردوس عرف فرزان کھانڈے اور محمد شہوار گور فرار ہیں۔ پولیس نے بتایا کہ ڈیجیٹل ڈیوائسز کا تجزیہ کیا جا رہا ہے اور مزید گرفتاریاں و برآمدگیاں متوقع ہیں۔

یواین آئی۔ ظا