واشنگٹن، یکم ستمبر (یو این آئی) امریکی سیکریٹری خارجہ کے سینئر مشیر ڈیرک شول نے کہا ہے کہ امریکہ پاکستان سے یہ نہیں چاہتا کہ وہ امریکہ اور چین میں سے کسی ایک کا انتخاب کرے بلکہ یہ اُمید کرتا ہے کہ تمام ممالک خود اس بات کا فیصلہ کریں گے۔
ڈان میں شائع ایک رپورٹ کے مطابق ڈیرک شول نے کہا کہ امریکہ کو تشویش ہے کہ جو ممالک چین کے ساتھ تعلقات استوار کرتے ہیں ان کا انجام اچھا نہیں ہوتا۔ڈان کو انٹرویو دیتے ہوئے انہوں نے کہا کہ امریکہ، چین کے ساتھ کسی قسم کی مسابقت سے نہیں ڈرتا اور ہم چین کے ساتھ منصفانہ اور شفاف مسابقت کے خواہشمند ہیں۔انہوں نے کہاکہ امریکہ کے ہندوستان اور پاکستان کے ساتھ اصولی اختلافات ہیں لیکن ہم پاکستان کے ساتھ اپنے مضبوط تعلقات برقرار اور وسیع تر رکھنا چاہتے ہیں۔
مسٹر ڈیرک شول نے سابق وزیر اعظم عمران خان کے امریکہ پر اقتدار میں تبدیلی کے حوالے سے لگائے گئے الزامات کے بارے میں بھی بات کرتے ہوئے کہا کہ ’عمران خان کے تمام دعوے بے بنیاد ہیں۔‘
ڈان نے جب سوال پوچھا کہ کیا امریکہ کے سابق وزیراعظم عمران خان کے ساتھ تعلقات بہتر نہیں تھے اور ان الزامات کی وجہ سے کیا عمران خان عالمی ریاستوں میں سب سے کم پسند کیے جانے والے سیاستدان ہیں؟ تو ڈیرک شول نے جواب میں کہا کہ ’میں صرف اتنا کہنا چاہتا ہوں کہ ان تمام الزامات کی کوئی صداقت نہیں‘۔انہوں نے مزید کہا کہ ’ہماری توجہ اس بات پر مرکوز ہونی چاہیے کہ امریکہ۔ پاکستان تعلقات کس سمت میں گامزن ہیں، جو ناصرف اس بات کی عکاسی کرتے ہوں کہ جو کچھ ہم نے گزشتہ 75 برسوں میں حاصل کیا ہے بلکہ اس بات کی بھی عکاسی کریں جو ہم اگلے 75 برسوں میں حاصل کریں گے۔
امریکی عہدیدار نے پاکستان میں تباہ کن سیلابی صورتحال کے حوالے سے نشاندہی کرتے ہوئے کہا کہ امریکہ کی جانب سے 3 کروڑ ڈالر کی امداد کا اعلان کردیا گیا ہے اور ہم مزید امداد دینے کو تیار ہیں۔انہوں نے کہا کہ ’2010 کے بعد سے اس طرح کا خطرناک سیلاب پہلے کبھی نہیں دیکھا، یہ سیلاب 2010 کے سیلاب سے بھی بدتر ہے، موسمیاتی تبدیلی کے باعث پاکستان میں خوفناک سیلاب آیا ہے، جس کی وجہ سے شدید المناک صورتحال پیدا ہوئی‘۔انہوں نے کہا کہ امریکہ اس خوفناک قدرتی آفت سے نمٹنے کے لیے پاکستان کی مدد کرنے کو تیار ہے، امریکہ بین الاقوامی برادری اور اپنے شراکت داروں سے مدد کی اپیل کرے گا۔ڈیرک شول نے کہا کہ امریکہ سیلاب زدگان کے لیے ایک کروڑ 60 لاکھ ڈالر امداد جمع کرنے کے لیے اقوام متحدہ کے ساتھ تعاون کرے گا۔
امریکا کے چین کے ساتھ بڑھتے ہوئے تنازعات کے حوالے سے انہوں نے کہاکہ ’پاکستان کے چین کے ساتھ بہت پرانے تعلقات ہیں، ہم عالمی دنیا کو امریکہ اور چین میں سے کسی ایک کا انتخات کرنے کو نہیں کہہ رہے بلکہ ہم چاہتے ہیں کہ تمام ممالک اس قابل ہوں کہ وہ خود فیصلہ کر سکیں۔انہوں نے کہا کہ ہم چین سے مزید وسیع تر تعلقات کے خواہاں ہیں، ہمارے چین کے ساتھ معاشی تعلقات بہت مضبوط ہیں اور ہم سمجھتے ہیں کہ ہم اسے مزید بہتر بنا سکتے ہیں۔
ڈان نے جب سوال پوچھا کہ کیا پاکستان، امریکہ کے لیے اسٹریٹجک اہمیت رکھتا ہے؟ تو امریکی مشیر نے کہا کہ ’جی بالکل، پاکستان دنیا کے بڑے مسلمان ممالک میں سے ایک ہے جبکہ دنیا میں پاکستان کی آبادی پانچویں یا چھٹے نمبر پر ہے، اسی وجہ سے پاکستان امریکا کے لیے انتہائی اہم ملک ہے۔‘انہوں نے مزید کہا کہ ’دونوں ممالک کے تعلقات اگلے 75 سالوں میں مزید مستحکم اور گہرے ہوں گے، تاکہ آنے والے دنوں میں دونوں ممالک مشترکہ مفادات اور اہداف حاصل کر سکیں‘۔
ڈان نے جب سوال کیا کہ پاکستان کے عوام ایسا کیوں محسوس کرتے ہیں کہ امریکہ، پاکستان کے مقابلے ہندوستان کو زیادہ ترجیح دیتا ہے، مثال کے طور پر امریکہ ہندوستان کو روس سے سستا تیل خریدنے کی اجازت دے سکتا ہے لیکن پاکستان کو ایسا کرنے سے روکتا ہے، کیا اس کی کوئی خاص وجہ ہے؟ ڈیرک شول نے جواب دیا کہ ہمارے ہر ملک کے ساتھ تعلقات مختلف نوعیت کے ہیں، امریکہ کے پاکستان اور ہندوستان کے ساتھ یقیناً اصولی اختلافات ہیں، سب سے اہم بات یہ ہے کہ ہم ان اختلافات کے باوجود کس طرح کام کرتے ہیں۔
انہوں نے کہا کہ پاکستان کے ساتھ کام کرنے کے حوالے سے ہمارا نقطہ نظر یہ ہے کہ ہم شراکت داری اور تعاون کے جذبے کے ساتھ ان اختلافات کو دور کرنے جارہے ہیں اور ان تمام چیزوں پر نظر رکھنے کی کوشش کر رہے ہیں جو ہم آپس میں بانٹتے ہیں، ہم اپنے مفادات اور اقدار پر قائم ہیں لیکن ہم اس سے کہیں زیادہ مشترکہ طور پر بانٹ سکتے ہیں۔
جب ان سے سوال کیا گیا کہ اگر چین، ہندوستان کو اپنا اہم اتحادی بناتا ہے تو کیا امریکہ کو اس پر تحفظات ہوں گے، اس پر شول نے جواب دیا کہ ہم چین کے ساتھ تعلقات کو ہندوستان کے ساتھ منسلک نہیں کررہے، دونوں ممالک کی اہمیت اپنی جگہ ہے اور دونوں ممالک کے حوالے سے ہمارے مختلف اہداف، عزائم اور چیلنجز ہیں‘۔تاہم انہوں نے اس بات پر اتفاق کیا کہ امریکہ کو عالمی سطح پر چین کے حوالے سے تشویش لاحق ہے، چین پوری دنیا میں جو کردار ادا کر رہا ہے وہ امریکہ کے مفادات میں نہیں ہے۔انہوں نے کہا کہ امریکہ، چین کے ساتھ مشترکہ اہداف مثلاً موسمیاتی تبدیلی پر کام کرنے کو ترجیح دیتا ہے لیکن چین نے اس موضوع پر بات کرنے سے انکار کردیا ہے۔
جب ان سے سوال کیا گیا کہ چین کے قرضوں کے بوجھ کی وجہ سے کیا پاکستان کو بھی سری لنکا جیسے معاشی حالات کا سامنا کرنا پڑسکتا ہے؟ تو ڈیرک شول نے جواب دیا کہ ’ہمیں اس بات کی فکر ہے کہ چین کے ساتھ معاہدے کرنے والے ممالک چاہے وہ جنوبی ایشیا سے ہوں یا کہیں اور سے، اُن کا انجام اچھا نہیں ہوتا، ہم عالمی دنیا کو واضح طور پر پیغام دینا چاہتے ہیں کہ آپ کے پاس فیصلہ کرنے کے پورے اختیارات ہیں۔