پورے جموں وکشمیرمیں ماتمی اور احتجاجی ہڑتال،ماحول سوگوار
جموں شہر میں کئی مقامات پر احتجاجی مظاہرے ، پاکستان مخالف نعرے ،حملہ آوروں کیخلاف فوری اور موثر کارروائی کامطالبہ
سری نگر، جے کے این ایس : جنوبی کشمیرمیں واقع مشہورسیاحتی مقام پہلگام کی مضافاتی وادی بایسران (بیتاب ویلی)میں منگل کومشتبہ ملی ٹنٹوں کے ہاتھوں 26معصوم اور نہتے سیاحوں اور دیگر عام شہریوں کی بہیمانہ ہلاکت نیز سبزہ زار کو لہولہان کرنے کیخلاف بدھ کے روز پورے جموں وکشمیر میں مختلف مذہبی تنظیموں ،تاجر ودیگر انجمنوں کی کال پرمکمل ہڑتال رہی ۔ہڑتال کال کی حمایت حکمران جماعت نیشنل کانفرنس اورپی ڈی پی سمیت تمام سیاسی پارٹیوںنے کی تھی اور لوگوںسے اپیل کی گئی کہ وہ اس ہڑتال کو کامیاب بناکر مہلوکین کے لواحقین کیساتھ مکمل یکجہتی کااظہار کریں ۔

یادرہے دہشت گردوں نے منگل کو جنوبی کشمیر کے پہلگام میں ایک اہم سیاحتی مقام وادی بایسران (بیتاب ویلی) پر اچانک حملہ کیا، جس میں کم از کم 26 افراد ہلاک ہوئے، جن میں زیادہ تر سیاح تھے، اور کئی دیگر زخمی ہوئے۔جے کے این ایس کے مطابق بدھ کو صبح سے ہی پوری کشمیر وادی بشمول گرمائی راجدھانی سری نگرمیں معمول کی زندگی مفلوج رہی ،سڑکیں اور بازار سنسان دکھائی دے رہے تھے ،نجی اسکول بندتھے جبکہ سرکاری تعلیمی اداروںمیںحاضری بہت کم تھی ۔شہر سری نگر میں زیادہ تر دکانیں، فیول اسٹیشن اور دیگر کاروباری ادارے بند رہے۔ شہر بھر میں صرف اشیائے ضروریہ کی دکانیں کھلی نظرآئیں۔لوگوںنے بتایاکہ اہم شاہراہوں اور سڑکوں پر پبلک ٹرانسپورٹ بھی کم تھی، لیکن نجی گاڑیاں معمول کے مطابق چل رہی تھیں۔سرکاری عہدیداروں نے بتایا کہ وادی بھر میں پرائیویٹ اسکول بھی بند تھے، لیکن سرکاری اسکول کھلے تھے۔انہوں نے بتایا کہ کشمیر وادی کے دیگر ضلع ہیڈکوارٹروں میں بھی بند کا مکمل اثر دیکھا گیا۔وادی میں کئی مقامات پر پرامن احتجاج بھی کیا گیا، مظاہرین نے حملے کی مذمت کی۔ انہوں نے معصوم لوگوں کے قتل کو روکنے کا مطالبہ کیا۔کئی سیاسی جماعتوں، سماجی مذہبی تنظیموں، تجارتی اداروں اور سول سوسائٹی کے گروپوں نے جنوبی کشمیر کے ضلع اننت ناگ میں سیاحتی مقامی پہلگام کی وادی بایسران دہشت گردانہ حملے کے خلاف احتجاج کرنے کے لئے کشمیر میں بند کی کال دی تھی۔حکمران نیشنل کانفرنس، پیپلز ڈیموکریٹک پارٹی ، پیپلز کانفرنس، اور اپنی پارٹی ان سیاسی تنظیموں میں شامل تھیں جنہوں نے حملے کے خلاف احتجاج کے لیے بند کی حمایت کی۔متحدہ مجلس علماء( متعدد مذہبی اداروں کا مشترکہ پلیٹ فارم) جس کی سربراہی حریت کانفرنس کے چیئرمین میر واعظ عمر فاروق کررہے ہیں،نے جموں کشمیر کے لوگوں سے بدھ کو بند کرکے اس گھناو ¿نے جرم کے خلاف احتجاج کرنے کی اپیل کی۔میرواعظ نے منگل کی شام کو کہاکہ متحدہ مجلس علما کے ذریعے جموں و کشمیرکی اسلامی برادری ہلاک ہونے والوں کے غمزدہ خاندانوں کی حمایت اور یکجہتی کے طور پر جموں و کشمیر کے لوگوں سے اپیل کرتی ہے کہ وہ کل بند کے ذریعے اس گھناو ¿نے جرم کے خلاف پرامن احتجاج کریں۔کشمیر کے تجارتی اور سیاحتی اداروں بشمول کشمیر چیمبر آف کامرس اینڈ انڈسٹریز اور کشمیر ٹریڈرز اینڈ مینوفیکچررز فیڈریشن نے بھی بند کی کال دی تھی۔متاثرین اور ان کے اہل خانہ کے ساتھ احترام اور یکجہتی کے طور پر، پرائیویٹ سکولز ایسوسی ایشن آف جموں و کشمیر نے بدھ کو جموں و کشمیر میں تمام نجی سکولوں کو بند رکھنے کا اعلان کیا۔کشمیر یونیورسٹی نے بدھ کو ہونے والے تمام امتحانات ملتوی کر دئیے۔ادھر پہلگام میں دہشت گردانہ حملے کے خلاف بدھ کو جموں خطہ کے کئی حصوں نے مکمل بند منایا۔ حکام نے بتایاکہ جموں شہر کے علاوہ ریاسی، ادھم پور، کٹرا، کٹھوعہ اور سانبہ میں بھی بند منایا گیا۔جموں شہر کے کئی حصوں میں احتجاجی مظاہرے کئے گئے، بہت سے مظاہرین نے پاکستان مخالف نعرے لگائے۔جموں شہرمیں تمام اہم بازار بندرہے ،دکانات ،شورومز اوردیگر تجارتی اداروں کو مقفل رکھاگیا تھا جبکہ سڑکوں پر معمول سے کم تعدادمیں گاڑیاں چلتی نظرآرہی تھیں۔اس دوران مختلف سیاسی وغیرسیاسی جماعتوں کے کارکنوںنے ہلاکتوں کیخلاف احتجاج بھی کیا ۔ریاسی میں سینکڑوں لوگوں نے احتجاجی مارچ کیا اور ٹائر جلائے۔معلوم ہواکہ بند کے باعث جموں شہر میں معمولات زندگی ٹھپ ہو کر رہ گئے۔ متعدد سول سوسائٹی گروپوں اور تجارتی اداروں کی طرف سے دی گئی بند کال کے جواب میں دکانیں اور کاروباری ادارے بند رہے اور سڑکوں پر پبلک ٹرانسپورٹ بند رہا۔کئی تعلیمی ادارے بند رہے اور سرکاری دفاتر میں حاضری معمول سے کم رہی۔ جموں بار ایسوسی ایشن نے بھی ہلاکتوں کے خلاف بند منایا۔

جموں چیمبر آف کامرس اینڈ انڈسٹری ، وشو ہندو پریشد ، ٹرانسپورٹرز ایسوسی ایشن، جموں بار ایسوسی ایشن، اور کانگریس سمیت کئی تنظیموں نے جموں میں مکمل بند کی کال دی تھی۔ایک پولیس افسر نے کہا،کہ جموںمیں بند کے دوران صورتحال معمول پر رہی۔ خطے میں کہیں سے بھی کسی ناخوشگوار واقعے کی کوئی اطلاع نہیں ہے۔انتظامیہ ہم آہنگی برقرار رکھنے کے لیے کمیونٹی رہنماو ¿ں کے ساتھ قریبی رابطے میں ہے۔حکام نے بتایا کہ پولیس اور نیم فوجی دستوں کی اضافی تعیناتیاں حساس مقامات پر کی گئیں، جبکہ نقل و حرکت پر نظر رکھنے کے لیے چوکیاں قائم کی گئیں۔