نیشنل کانفرنس (این سی) نے جمعہ کے روز جموں و کشمیر سے راجیہ سبھا کی چار میں سے تین نشستوں پر کامیابی حاصل کر لی، جبکہ بھارتیہ جنتا پارٹی (بی جے پی) نے ایک سیٹ جیت کر سیاسی منظرنامے کو ہلا کر رکھ دیا۔ یہ پہلا موقع تھا کہ آرٹیکل 370 کی منسوخی کے بعد یونین ٹیریٹری سے راجیہ سبھا کے ارکان منتخب ہو رہے تھے، جس کے باعث یہ انتخاب ریاستی اور قومی سطح پر خاص توجہ کا مرکز بنا رہا۔

سیاسی جوڑ توڑ اور سخت مقابلہ

ووٹنگ سری نگر کے اسمبلی کمپلیکس میں ہوئی، جہاں ارکانِ اسمبلی نے تین مختلف پولنگ بوتھوں پر اپنے ووٹ ڈالے۔ابتدائی گنتی سے ہی نیشنل کانفرنس کے امیدواروں کی پوزیشن مستحکم دکھائی دے رہی تھی۔
چودھری محمد رمضان، سجاد کچلو اور گرووندر سنگھ اوبرائے نے شاندار کامیابی حاصل کی، تاہم چوتھی نشست پر مقابلہ انتہائی سخت رہا۔آخر کار بی جے پی کے امیدوار ست شرما نے کامیابی حاصل کی، لیکن یہی نتیجہ اب سب سے بڑا تنازعہ بن گیا ہے۔

احسان پردیسی کا الزام: “بی جے پی کے پاس نمبر ہی نہیں تھے” نیشنل کانفرنس کے سینئر رہنما احسان پردیسی نے بی جے پی کی کامیابی پر سوال اٹھاتے ہوئے دعویٰ کیا
کہ یہ جیت “کراس ووٹنگ کا نتیجہ” ہے۔
احسان پردیسی نے کہا: “بی جے پی کے پاس اتنے ووٹ تھے ہی نہیں کہ وہ جیت سکیں۔ ان کی کامیابی صرف اور صرف کراس ووٹنگ کا نتیجہ ہے۔” ان کے مطابق، بی جے پی نے صرف اپنی صفوں کی حمایت کے باوجود بتیس ووٹ حاصل کیے —جو خود ایک غیر معمولی امر ہے۔

عمر عبداللہ کا سخت ردعمل: “بی جے پی کے چار اضافی ووٹ کہاں سے آئے؟” نیشنل کانفرنس کے نائب صدر عمر عبداللہ نے اپنے بیان میں کہا کہ پارٹی کے تمام ووٹ برقرار رہے اور کسی ایم ایل اے نے کراس ووٹنگ نہیں کی۔

انہوں نے ایک ٹویٹ میں کہا: “نیشنل کانفرنس کے تمام ووٹ برقرار رہے، کوئی کراس ووٹنگ نہیں ہوئی۔ سوال یہ ہے کہ بی جے پی کے چار اضافی ووٹ کہاں سے آئے؟ کن ایم ایل ایز نے جان بوجھ کر اپنے ووٹ ضائع کیے؟
کیا ان میں اتنی ہمت ہے کہ وہ سامنے آ کر قبول کریں کہ انہوں نے بی جے پی کی مدد کی؟” ان کے اس بیان کے بعد سیاسی گرمی میں مزید اضافہ ہو گیا۔

کانگریس رہنما وکار رسول کا نیا الزام

ادھر کانگریس کے ریاستی صدر وکار رسول وانی نے سوشل میڈیا پر ایک متنازعہ دعویٰ کرتے ہوئے کہ کہ عمر عبداللہ نے بی جے پی کے ساتھ “اندرونی ڈیل” کی ہے۔

انہوں نے لکھا کہ
“عمر عبداللہ نے بی جے پی کے ساتھ خفیہ سمجھوتہ کیا ہے اور وہ آئندہ ضمنی انتخابات میں دو نشستیں بی جے پی کو دینے پر راضی ہو گئے ہیں۔ یہ جیت اسی سمجھوتے کا حصہ ہے۔”

وکار رسول کے اس بیان کے بعد سوشل میڈیا پر سیاسی طوفان برپا ہو گیا، جہاں صارفین مختلف جماعتوں کی نیت پر سوال اٹھا رہے ہیں۔

سازش یا اعتماد؟ سوال برقرار

سیاسی مبصرین کا کہنا ہے کہ اگر پی ڈی پی، کانگریس، سی پی آئی (ایم) اور آزاد ارکان سب نے نیشنل کانفرنس کو ووٹ دیا، تو پھر بی جے پی کو اضافی ووٹ کہاں سے ملے؟ یہ سوال اب جموں و کشمیر کی سیاست میں نئے مباحث کو جنم دے رہا ہے۔ نیشنل کانفرنس اس جیت کو عوامی اعتماد کی فتح قرار دے رہی ہے،
جبکہ بی جے پی کا دعویٰ ہے کہ ان کی جیت اس بات کا ثبوت ہے کہ پارٹی کی جڑیں جموں و کشمیر کی سیاست میں مزید مضبوط ہو چکی ہیں۔ پسِ پردہ کہانی جاری نتائج کے ساتھ ہی نیشنل کانفرنس نے راجیہ سبھا میں اپنی پوزیشن مستحکم کر لی، جبکہ بی جے پی نے ایک سیٹ کے ذریعے اپنی موجودگی درج کرائی
تاہم، پسِ پردہ اٹھنے والے سوالات —کراس ووٹنگ، خفیہ سمجھوتے اور سیاسی سودے بازی —اب اس انتخاب کے اصل موضوع بن گئے ہیں۔
جموں و کشمیر کی سیاست میں ایک بار پھر اعتماد، سازش اور مفاد کی نئی جنگ شروع ہو چکی ہے۔