کشمیر کے پوری دنیا سے زمینی وفضائی رابطے منقطع
پیر پنچال کے آر پار معمو لات زندگی کی رفتار تھم گئی،بورڈ امتحانات ملتوی،مزید برفباری کی پیشن گوئی

سرینگر:وادی کشمیر میں اتوار کو سال ِ نو کی پہلی،چلہ کلان کی دوسری اور سیزن کی بھاری برفباری سے معمولات زندگی کی رفتار مکمل طور پر تھم گئی۔

برفباری کے نتیجے میں سرینگر۔جموں شاہراہ پر ٹریفک کی نقل وحرکت رُک گئی جبکہ سرینگر کے بین الا قوامی ائر پورٹ پر پروازوں کی آوا جاہی بھی منجمد ہوئی۔اس دوران بورڈ امتحانات کو بھی برفباری کی وجہ سے ملتوی کیا گیا۔

کشمیر نیوز سروس کے مطابق وادی کشمیر نے چلہ کلان میں دوسری مرتبہ سفید چادر اوڑھ لی۔سنیچر اور اتوار کی درمیانی رات کو برفباری کا تازہ سلسلہ شروع ہوا،جو اتوار کو دارالحکومت سرینگر سمیت وادی بھر میں وقفے وقفے سے جاری رہا۔اس سلسلے میں ملی تفصیلات کے مطابق وادی کشمیر اتوار کی علی الصبح میدانی و بالائی علاقوں میں برف باری ہونے سے ایک بار پھر سفید لباس میں ملبوس ہوگئی۔

محکمہ موسمیات کے عہدیدار کے مطابق زوجیلا کے مقام پر درمیانہ درجے کی برفباری ہوئی۔انہوں نے کہا کہ جنوبی کشمیر کے کولگام میں صبح 10بجے تک 12انچ یعنی 30سینٹی میٹر برفباری ہوئی گئی۔انہوں نے کہا کہ قاضی گنڈ میں 21سینٹی میٹر،کوکرناگ میں 18.5سینٹی میٹر اور پہلگام میں 11.5سینٹی میٹر جبکہ دارالحکومت سرینگر میں 6سینٹی میٹر برفباری ہوئی۔محکمہ موسمیات کے ایک عہدیدار نے بتایا کہ وادی کے بعض علاقوں میں دوران شب ہی جبکہ بعض میں اتوار کی علی الصبح برف باری شروع ہوئی۔

انہوں نے بتایا کہ شمالی کشمیر میں ہلکے درجے کی جبکہ وسطی و جنوبی کشمیر میں درمیانی درجے کی برف باری ہوئی۔انہوں نے مزید کہا کہ وادی کشمیر میں اتوار کی دوپہر سے اتوار کی شام تک موسم بہتر ہوسکتا ہے تاہم بعد میں برف باری کا سلسلہ دوباہ شروع ہوسکتا ہے۔سری نگر میں 3 سے 4 انچ تازہ برف جمع ہوئی ہے جبکہ جنوبی کشمیر میں کم و بیش 9 انچ تازہ برف جمع ہوئی ہے۔اس کے علاوہ شمالی کشمیر میں ایک فٹ سے زیادہ برفباری ہوئی۔وادی کشمیر کے شہرہ آفاق سیاحتی مقام گلمرگ میں کم سے کم4 انچ تازہ برف جمع ہوئی ہے جبکہ دوسرے مشہور سیاحتی مقام پہلگام میں 5 سے 6 انچ تازہ برف جمع ہوئی ہے۔

ادھر تازہ برف باری سے وادی کشمیر کو ملک کے باقی حصوں کے ساتھ جوڑنے والی سری نگر۔ جموں قومی شاہراہ پر اتوار کی صبح ٹرانسپورٹ کی نقل و حمل بند کر دی گئی۔متعلقہ حکام نے بتایا کہ قومی شاہراہ پر جواہر ٹنل کے آر پار قریب10 انچ تازہ برف جمع ہوئی ہے جس کی وجہ سے ٹریفک بند کر دیا گیا ہے۔انہوں نے بتایا کہ برف کو ہٹانے کے لئے متعلقہ ایجنسیوں نے مشینری اور نفری کو کام پر لگا دیا ہے۔

وادی کشمیر کو لداخ یونین ٹریٹری کے ساتھ جوڑنے والی سری نگر۔ لیہہ شاہراہ پر31 دسمبر سے ٹریفک کی نقل و حمل بند کر دی گئی ہے جبکہ جنوبی کشمیر کے ضلع شوپیاں کو صوبہ جموں کے ضلع پونچھ کے ساتھ جوڑنے والے تاریخی مغل روڈ پر قریب تین ہفتوں سے ٹریفک مسلسل بند ہے۔

نامساعد موسمی حالات کے پیش نظر سری نگر ہوائی اڈے پر اتوار کی صبح پروازیں معطل اور بعد میں منسوخ کی گئیں۔متعلقہ حکام نے بتایا کہ موسمی حالات کے پیش نظر ہی دن میں پروازوں کی بحالی کا فیصلہ لیا جائے گا۔دریں اثنا وادی کشمیر میں مطلع ابر آلو رہنے سے شبانہ درجہ حرارت میں بہتری واقع ہوئی ہے۔متعلقہ محکمہ کے مطابق گرمائی دارالحکومت سری نگر میں کم سے کم درجہ حرارت منفی1.5 ڈگری سیلشیس ریکارڈ کیا گیا جہاں گذشتہ شب کا کم سے کم درجہ حرارت منفی5.9 ڈگری سیلشیس ریکارڈ ہوا تھا۔سیاحتی مقام گلمرگ میں کم سے کم درجہ حرارت منفی 5.0 ڈگری سیلشیس ریکارڈ کیا گیا جہاں گذشتہ شب کا کم سے کم درجہ حرارت منفی 7.5 ڈگری سیلشیس ریکارڈ ہوا تھا۔

پہلگام میں کم سے کم درجہ حرارت منفی1.5 ڈگری سیلشیس ریکارڈ کیا گیا جہاں گذشتہ شب کا کم سے کم درجہ حرارت منفی 8.4 ڈگری سیلشیس ریکارڈ ہوا تھا۔سرحدی ضلع کپوارہ میں کم سے کم درجہ حرارت منفی 3.3 ڈگری سیلشیس جبکہ گیٹ وے آف کشمیر قاضی گنڈ میں کم سے کم درجہ حرارت منفی 0.2 ڈگری سیلشیس اور جنوبی کشمیر کے سیاحتی مقام ککر ناگ میں کم سے کم درجہ حرارت منفی 1.4 ڈگری سیلشیس ریکارڈ ہوا ہے۔اس دوران جنوبی کشمیر کے بعض بالائی علاقوں میں بھاری برفباری ہونے کی اطلاعات ہیں۔شمالی کشمیر کے گلمرگ میں بھاری برفباری ہونے کی اطلاعات ہیں۔پیر پنچال پہاڑی سلسلے نے بھی سفید چادر اوڑھ لی ہے۔

طلاعات کے مطابق بانہال۔رام بن،پونچھ۔راجوری،کشتواڑ،زنسکار دراس اور لداخ کے دیگر بالائی علاقوں میں بھی درمیانہ درجے سے لیکر بھاری برفباری ہوئی ہے۔محکمہ موسمیات کے ترجمان کے مطابق پیش گوئی کرتے ہوئے کہا ہے کہ برفباری کا سلسلہ 6جنوری تک وقفے وقفے سے جاری رہنے کا امکان ہے۔برفباری کے نتیجے میں جہاں زمینی اور فضائی رابطے منقطع ہوگئے،وہیں بجلی کی آنکھ مچولی کا کھیل بھی شروع ہوگیا ہے۔

دریں اثناء برفباری کے سبب جموں وکشمیر بورڈ آف اسکول ایجوکیشن نے طے شدہ 11ویں جماعت کے سالانہ امتحانات کو ملتوی کردیا۔حکام کا کہنا ہے کہ امتحانات کی اگلی تاریخ کا اعلان بہت جلد کیا جائیگا۔یاد رہے کہ21دسمبر کو وادی کشمیر میں زمستان کے شہنشاہ ”چلہ کلان“ کی 40روزہ مدت شروع ہوگئی،جس دوران رات کا درجہ حرارت نقطہ انجماد سے7ڈگری نیچے تک چلا گیا۔اب برفباری سے رات کے درجے میں بہتری ریکارڈ کی جارہی ہے۔چلہ کلان کی مدت31جنوری2021کو اختتام پذیر ہوجائیگی۔(کے این ایس)