ئی دہلی، وزیراعظم نریندر مودی نے جمعہ کو پہلے سیوا تیرتھ میں خلائی شعبے کی 20 اسٹارٹ اپ کمپنیوں کے چیف ایگزیکٹو افسران (سی ای اوز) اور بانیوں کے ساتھ بات چیت کی  انہوں نے خلائی صنعت میں قدم رکھنے کی جرأت کا مظاہرہ کرنے پر انہیں مبارکباد دی اور کہا کہ اس سے خلائی شعبے کو نجی شعبے کے لیے کھولنے کے حکومت کے وژن کو تقویت ملی ہے۔

وزیراعظم کے دفتر کی جانب سے جاری ایک بیان کے مطابق وزیراعظم نے خلائی شعبے کے ان نئے رہنماؤں کو نئے میدان میں جرأت اور پہل کرنے پر مبارکباد دی۔

انہوں نے کہا کہ صنعت کی جانب سے ظاہر کیا گیا اعتماد اس وژن کو مزید مضبوط کرتا ہے، جس کے تحت ہندوستان کے خلائی شعبے کو نجی شراکت داری کے لیے کھولا گیا تھا۔

مسٹر مودی نے کہا کہ کئی ممالک یا تو خلائی شعبے میں سرمایہ کاری کرنے کی پوزیشن میں نہیں ہیں یا وہاں ایسا کرنے کی خواہش موجود نہیں ہے۔ اس صورتحال سے ہندوستان کے پاس عالمی خلائی شعبے میں اپنی پوزیشن تیزی سے مضبوط کرنے کا ایک بڑا موقع ہے۔

اس بات چیت میں راکٹ اور دوبارہ قابلِ استعمال سیمی کریوجینک لانچ وہیکلز، ایویانکس، سیٹلائٹس، جدید پروپلشن سسٹمز، خلائی اور دفاعی انٹیلی جنس، خلاء میں موجود ملبے کو ہٹانے اور مصنوعی ذہانت پر مبنی انتہائی مقامی موسمی اور آب و ہوا سے متعلق معلومات سمیت مختلف شعبوں میں کام کرنے والی اہم کمپنیوں کے نمائندے شامل ہوئے۔

ان اسٹارٹ اپ کمپنیوں کے نمائندوں نے وزیراعظم کی حمایت اور اعتماد کے لیے اظہار تشکر کرتے ہوئے ملک کی خلائی صنعت میں نجی اداروں کی پیش رفت اور اس شعبے کے مستقبل کے بارے میں اپنے خیالات کا اظہار کیا۔ انہوں نے بتایا کہ ملک میں مقامی صلاحیتوں اور ضروری ٹیکنالوجیز کی ترقی کے لیے انہوں نے کافی وقت اور کوشش صرف کی ہے۔ انہوں نے کہا کہ ان کی ٹیمیں خلائی شعبے میں بلند حوصلہ اہداف حاصل کرنے کے لیے پوری لگن اور عزم کے ساتھ کام کر رہی ہیں۔

اسٹارٹ اپ کمپنیوں کے نمائندوں نے کہا کہ خلائی شعبے کو نجی شراکت داری کے لیے کھولنے کے فیصلے سے صنعت میں زبردست جوش پیدا ہوا اور نئے مواقع کے دروازے کھلے ہیں۔

جاری۔یواین آئی۔ ط ا

نئی دہلی، لوک سبھا میں قائد حزب اختلاف راہل گاندھی نے کہا ہے کہ 20 جولائی کو کناٹ پلیس میں طلبہ پر پیلٹ گن کا استعمال ہوا ہے اور اس کے پختہ ثبوت ان کے پاس ہیں اس لیے اس معاملے میں ایف آئی آر درج کر کے قصوروار افراد کے خلاف کارروائی ہونی چاہیے۔

مسٹر راہل گاندھی نے جمعہ کو یہاں پارلیمنٹ اسٹریٹ پولیس اسٹیشن میں طلباء تحریک کے دوران ساحل نامی ایک طالب علم پر پیلٹ گن کے استعمال کا حوالہ دیتے ہوئے اس معاملے میں ایف آئی آر درج کرنے کا مطالبہ کیا اور جب ایف آئی آر درج نہیں ہوئی تو وہ پارلیمنٹ اسٹریٹ پولیس اسٹیشن میں یہ کہتے ہوئے دھرنے پر بیٹھ گئے کہ جب تک ایف آئی آر نہیں لکھی جاتی وہ دھرنے کی جگہ سے نہیں ہٹیں گے۔ میڈیا کو اس کی اطلاع راہل کے پارلیمنٹ اسٹریٹ پولیس اسٹیشن پہنچتے ہی دی گئی تھی۔ خبریں سامنے آنے کے بعد بڑی تعداد میں کانگریس کارکنان بھی پارلیمنٹ اسٹریٹ پہنچ گئے۔ کئی کارکنان تھانے کے اندر پہنچ کر نعرے بازی کرتے بھی سنائی دیے۔ دھرنے کی جگہ پر راہل کے ساتھ پیلٹ گن سے متاثرہ ساحل، اس کے والد دیپک اور والدہ جیوتی کے علاوہ کانگریس رہنما محترمہ پرینکا گاندھی واڈرا، کماری شیلجا، ادھیر رنجن چودھری، سلمان خورشید، رندیپ سنگھ سرجے والا، جے رام رمیش، ہریش راوت سمیت کئی اہم رہنما موجود رہے۔

دھرنے کی جگہ پر میڈیا سے خطاب کرتے ہوئے راہل گاندھی نے کہا، ” طلبہ پر پیلٹ گن کا استعمال ہوا ہے اس کے ان کے پاس ثبوت ہیں۔” انہوں نے ساحل کے جسم پر لگے چھرے میڈیا اہلکاروں کو دکھاتے ہوئے کہا کہ اسی طرح کے تین چھرے اس نوجوان کی آنکھ میں ہیں۔ لیڈی ہارڈنگ ہسپتال کے ڈاکٹر کی رپورٹ میں بھی اس کے جسم میں چھرے ہونے کی بات صاف طور پر لکھی ہے۔ ان چھروں کی وجہ سے ساحل کی ایک آنکھ کی بینائی چلی گئی ہے اور اس کے دل کے پاس بھی چھرے ہیں، جنہیں چھوا نہیں جا سکتا۔ دہلی پولیس کا کہنا ہے کہ اس نے پیلٹ گن کا استعمال نہیں کیا، “تو سوال ایک ہی ہے کہ آپ نے نہیں چلائے تو کسی اور نے چھرے چلا دیے ہوں گے اور اگر کسی اور نے بھی چھرے چلائے ہیں تو بھی جرم ہوا ہے۔”

راہل نے کہا کہ ان کا مطالبہ صرف ایف آئی آر درج کرنے کا ہے۔ ان کے ساتھ متاثرہ نوجوان ساحل کی والدہ جیوتی اور والد دیپک بھی موجود ہیں۔ انہوں نے کہا کہ انہیں بتایا گیا ہے کہ اوپر سے حکم آیا ہے کہ ایف آئی آر درج نہیں کرنی ہے، لیکن جب تک ایف آئی آر درج نہیں ہوتی، وہ یہاں سے نہیں جائیں گے۔ انہوں نے کہا کہ اس ملک میں ہزاروں لوگوں کے ساتھ اس طرح کے واقعات ہوتے ہیں۔ خواتین کے ساتھ عصمت دری اور غریبوں کے ساتھ جرائم ہوتے ہیں نیز نئی دہلی کے کناٹ پلیس میں پیلٹ گن چلائی گئی ہے۔ انہوں نے کہا کہ وہ خاندان کے لیے انصاف مانگ رہے ہیں اور ایف آئی آر درج ہونے تک یہاں سے نہیں جائیں گے۔ ان کا کہنا تھا کہ صبح وہ خود مندر مارگ تھانے گئے تھے، لیکن وہاں ایف آئی آر درج کرنے سے منع کر دیا گیا اور انہیں یہاں بھیجا گیا اور اب ایف آئی آر درج ہونے کے بعد ہی وہ یہاں سے جائیں گے۔

راہل نے کہا کہ پرامن احتجاج کے خلاف ایسی بربریت سنگین جرم ہے۔ اس واقعے کے لیے نہ وزیر داخلہ امت شاہ نے طلبہ کو کوئی صفائی دی اور نہ وزیراعظم نے ان سے معافی مانگی ہے۔ اب ایف آئی آر ہوگی، عدالتی جانچ ہوگی اور اوپر سے نیچے تک جو بھی اس بربریت کے قصوروار ہیں، ان تمام پر کارروائی ہوگی۔

اس دوران ساحل نے میڈیا سے کہا کہ 20 جولائی کو اس پر پیلٹ گن سے گولی چلائی گئی تھی۔ اسے لیڈی ہارڈنگ ہسپتال میں داخل کرایا گیا، جہاں سے ایمس ریفر کیا گیا۔ ایمس میں اس کی سرجری ہوئی لیکن اس کی آنکھ کی بینائی ابھی بھی واضح نہیں ہے۔ اس نے 14 اگست کو سات صفحات پر مشتمل شکایت اپنے وکیل کے ذریعے دی تھی لیکن ابھی تک ایف آئی آر درج نہیں ہوئی ہے۔ کانگریس ایم پی کشوری لال شرما نے کہا، “ایف آئی آر درج کروانا ہمارا جمہوری حق ہے۔ پیلٹ گن کی گولی سے متاثرہ نوجوان اتنے دنوں سے بھٹک رہا ہے اور اس کی ایف آئی آر درج نہیں ہو رہی ہے۔ اس لیے راہل اس کی ایف آئی آر درج کروانے کے لیے یہاں آئے۔ آپ دیکھیے کہ جمہوریت کا کتنا قتل ہو رہا ہے کہ ایک عام شہری کے حقوق کے لیے بھی قائد حزب اختلاف کو اس کی ایف آئی آر درج کروانے آنا پڑ رہا ہے۔”

یو این آئی ایف اے

نئی دہلی، ہندستان اور سنگاپور کے درمیان چوتھی وزارتی گول میز میٹنگ جمعرات کو سنگاپور میں ہوئی جس میں دونوں فریقین کے وزراء نے اعلی درجے کی مینوفیکچرنگ، کنیکٹیویٹی، ڈیجیٹلائزیشن، صحت و طب، ہنرمندی کے فروغ اور پائیداری جیسے شعبوں میں جامع اسٹریٹجک شراکت داری کی پیش رفت کا جائزہ لیاوزارت خارجہ نے جمعہ کو بتایا کہ وزراء نے سبز معیشت، صنعتی پارک، غذائی تحفظ، ڈیجیٹل کنیکٹیویٹی اور فن ٹیک، سیمی کنڈکٹر نیز گرین شپنگ میں تعاون بڑھانے پر تبادلہ خیال کیا۔ انہوں نے یو پی آئی – پے ناؤ لین دین میں اضافے، سنگاپور میں ہندستانی جینرک ادویات کے رجسٹریشن کے پائلٹ پروجیکٹ، ہندستانی لیچی، آم، چیری اور بیر کی برآمد، پراسیس شدہ پولٹری پروڈکٹس کی برآمد کے لیے منظوری، چنئی میں قومی ہنرمندی کے بہترین مرکز کی ترقی، چوتھے سنگاپور-ہندستان ہیکاتھون، سیمی کنڈکٹر کے لیے آنے والی گرین لین پہل ، گرین ہائیڈروجن سپلائی چین اور بنگلورو میں سنگاپور بزنس فیڈریشن کے دفتر کے کھلنے سمیت مختلف شعبوں میں ہوئی پیش رفت کا ذکر کیا۔ دونوں فریقین نے غذائی تحفظ کے تعاون، سمندری ورثے کے تعاون نیز ٹیلی کام اور براڈکاسٹنگ کے شعبے میں ریگولیٹری معلومات کے تبادلے سے متعلق دو مفاہمت ناموں اور ایک لیٹر آف انٹینٹ کا تبادلہ کیا۔ دونوں فریقین نے ہندستانی ریاستوں اور سنگاپور کے درمیان تعلقات کو مزید مضبوط کرنے پر بھی اتفاق کیا، جس میں ہندستان کے وزرائے اعلیٰ کے سنگاپور کے باقاعدہ دورے شامل ہیں۔

ہندستانی وزراء نے سنگاپور کے وزیراعظم لارنس وونگ سے ملاقات کی۔ وزیر خزانہ نرملاسیتا رمن نے وزیر ٹرانسپورٹ اور وزیر مملکت برائے مالیات جیفری سیو سے ملاقات کی۔ وزیر خارجہ ایس جے شنکر نے سنگاپور کے وزراء کے شنمگم اور ویوین بالاکرشنن کے ساتھ میٹنگیں کی اور مسٹر بالاکرشنن کے ساتھ سنگاپور میں ہندستانی ہائی کمیشن کے نئی چانسری مع رہائشی عمارت کے احاطے کا سنگ بنیاد رکھا۔ وزیر تجارت و صنعت پیوش گوئل نے ہند-سنگاپور بزنس فورم سے خطاب کیا اور ممکنہ سرمایہ کاروں نیز صنعتی شراکت داروں کے ساتھ میٹنگیں کیں، جبکہ وزیر مملکت جتن پرساد نے سیمی کنڈکٹر شعبے کے حصہ داروں کے ساتھ بات چیت کی۔ اس موقع پر سیمی کنڈکٹر انڈسٹری گول میز میٹنگ بھی منعقد کی گئی۔ وزراء نے چوتھی ہند-سنگاپور بزنس گول میز کی رپورٹ بھی شیئر کی۔

گول میز میٹنگ کا نظام ہندستن -سنگاپور تعلقات کی ہمہ جہت اور مستقبل پر مبنی نوعیت کی عکاسی کرتا ہے۔ ستمبر 2024 میں وزیراعظم نریندر مودی کے دورہ سنگاپور کے دوران دونوں ممالک کے تعلقات کو جامع اسٹریٹجک شراکت داری تک بڑھایا گیا تھا اور ستمبر 2025 میں وزیراعظم وونگ کے دورہ ہند کے دوران اس کے روڈ میپ کو اپنایا گیا تھا۔

یو این آئی ایف اے