جموں و کشمیر

کشمیر میں آبی بحران کا ابتدائی انتباہ، دریائے جہلم میں پانی کی سطح مارچ کے آغاز میں ہی غیر معمولی طورپر کم

Published

7 months ago

March 5, 2026

سری نگر، دریائے جہلم میں پانی کی سطح مارچ کے پہلے ہفتے میں غیر معمولی طور پر کم ریکارڈ کی گئی ہے جسے ماہرین نے خطے کی آبی صورتحال اور مستقبل میں دھان کی کاشت کے لیے ایک تشویشناک اشارہ قرار دیا ہے۔

اعداد و شمار کے مطابق جمعرات کی صبح 9 بجے سنگم کے مقام پر دریائے جہلم میں پانی کی سطح منفی 0.86 فٹ ریکارڈ کی گئی، جو اس بات کی نشاندہی کرتی ہے کہ دریا زیرو گیج سطح سے بھی نیچے بہہ رہا ہے۔ ماہرین کے مطابق سال کے اس حصے میں اتنی کم سطح پر دریا کا بہنا ایک غیر معمولی صورتحال ہے اور ماضی میں اس طرح کے واقعات بہت کم دیکھنے میں آئے ہیں۔

ماہرین کا کہنا ہے کہ اس سال سردیوں کے دوران برفباری اور بارش نہ ہونے کے برابر رہی جس کے باعث پہاڑی علاقوں میں برف کا ذخیرہ انتہائی کم رہا۔ یہی وجہ ہے کہ دریا میں بہنے والے پانی کی مقدار بھی نمایاں طور پر کم ہو گئی ہے۔ عام طور پر وادی میں سردیوں کے اختتام اور ابتدائی بہار کے دوران دریا میں پانی کی سطح بڑھنے لگتی ہے کیونکہ پہاڑوں پر جمی برف پگھل کر دریا میں شامل ہوتی ہے۔ تاہم اس سال صورتحال مختلف نظر آ رہی ہے۔

دلچسپ بات یہ ہے کہ فروری کے مہینے میں وادی کشمیر میں غیر معمولی گرم موسم دیکھنے کو ملا اور کئی مواقع پر درجہ حرارت معمول سے 10 ڈگری سیلسیس تک زیادہ ریکارڈ کیا گیا۔ اس گرم موسم کے ابتدائی دنوں میں دریا کی سطح میں معمولی اضافہ ضرور ہوا اور پانی چند فٹ تک بڑھا، تاہم یہ اضافہ بہت مختصر مدت کے لیے تھا اور جلد ہی سطح دوبارہ کم ہو گئی۔

ماہرین کے مطابق ماضی میں جب سردیوں یا ابتدائی بہار کے دوران اس نوعیت کی گرم لہریں وادی کو متاثر کرتی تھیں تو پہاڑوں پر موجود برف تیزی سے پگھلتی تھی اور اس کے نتیجے میں دریائے جہلم میں پانی کی سطح 5 سے 8 فٹ تک بڑھ جاتی تھی۔ لیکن رواں سال اس طرح کا اضافہ دیکھنے میں نہیں آیا جس سے ظاہر ہوتا ہے کہ پہاڑی علاقوں میں برف کا ذخیرہ معمول سے کہیں کم ہے۔

ماہرین نے اس صورتحال کو مستقبل کے لیے ایک ابتدائی انتباہ قرار دیتے ہوئے کہا ہے کہ اگر آنے والے ہفتوں میں بارش یا برفباری نہیں ہوئی تو وادی کی آبی صورتحال مزید متاثر ہو سکتی ہے۔ انہوں نے خبردار کیا کہ اس کا براہ راست اثر زرعی سرگرمیوں، خاص طور پر دھان کی کاشت پر پڑ سکتا ہے۔

وادی کشمیر میں دھان کی کاشت کا عمل عموماً اپریل اور مئی کے مہینوں میں شروع ہوتا ہے جب کسان نرسری تیار کرتے ہیں۔

اس مرحلے پر کسانوں کو زیادہ مقدار میں پانی کی ضرورت ہوتی ہے جو عموماً دریاؤں، ندی نالوں اور نہروں کے ذریعے فراہم کیا جاتا ہے۔ یہ تمام آبی ذرائع زیادہ تر پہاڑوں سے پگھلنے والی برف کے پانی پر منحصر ہوتے ہیں۔

زرعی ماہرین کے مطابق اگر پانی کی دستیابی محدود رہی تو دھان کی نرسری کی تیاری اور ابتدائی بیج بونے کے مراحل متاثر ہو سکتے ہیں۔ اس کے نتیجے میں نہ صرف فصل کی پیداوار متاثر ہونے کا خدشہ ہے بلکہ وادی کی زرعی معیشت پر بھی اثر پڑ سکتا ہے کیونکہ دھان کشمیر کی اہم فصلوں میں شمار ہوتی ہے۔

ماہرین نے کہا کہ موجودہ صورتحال کو ابھی حتمی بحران نہیں کہا جا سکتا، تاہم اسے ایک ابتدائی انتباہ ضرور سمجھا جانا چاہیے۔ اگر آنے والے ہفتوں میں موسم میں تبدیلی آتی ہے اور بارش یا برفباری میں اضافہ ہوتا ہے تو دریا میں پانی کی سطح بہتر ہو سکتی ہے اور صورتحال کسی حد تک معمول پر آ سکتی ہے۔

ماہرین کا کہنا ہے کہ حکومت اور متعلقہ اداروں کو اس صورتحال پر قریبی نظر رکھنے کی ضرورت ہے تاکہ اگر پانی کی قلت کا خطرہ بڑھتا ہے تو بروقت اقدامات کیے جا سکیں۔ انہوں نے کسانوں کو بھی مشورہ دیا کہ وہ موسمی صورتحال اور آبی وسائل کی دستیابی کو مدنظر رکھتے ہوئے اپنی زرعی حکمت عملی ترتیب دیں۔

ان کا کہنا تھا کہ دریائے جہلم کی غیر معمولی کم سطح اس بات کی واضح علامت ہے کہ رواں سال وادی کی آبی صورتحال توقع کے مطابق نہیں رہی اور اگر آنے والے دنوں میں موسمی حالات بہتر نہ ہوئے تو اس کے اثرات زراعت سمیت مختلف شعبوں پر مرتب ہو سکتے ہیں۔

یو این آئی، ارشید بٹ۔ایف اے

جموں و کشمیر

کشمیر سے تقریباً 150 بنگلہ دیشی شہری ملک بدر

Published

9 hours ago

October 5, 2026

Online Desk

سری نگر، جموں و کشمیر کے حکام نے پیر کو مبینہ طور پر مرکز کے زیر انتظام علاقے میں غیر قانونی طور پر مقیم تقریباً 150 بنگلہ دیشی شہریوں کو ملک بدر کردیا۔ انہیں ہندوستانی فضائیہ کے خصوصی طیارے کے ذریعے کشمیر سے مغربی بنگال کے باگ ڈوگرا لے جایا گیا۔

حکام نے بتایا کہ ملک بدر کیے گئے افراد کو باگ ڈوگرا لے جایا گیا، جہاں انہیں مزید بنگلہ دیش واپس بھیجنے کے لیے بارڈر سکیورٹی فورس (بی ایس ایف) کے حوالے کردیا گیا۔

حکام نے ان افراد کو مختلف واقعات میں حراست میں لیا تھا۔ پولیس ذرائع نے بتایا کہ ان میں سے کئی افراد کو کشمیر کے مختلف علاقوں میں کی گئی چھاپہ مار کارروائیوں کے دوران گرفتار کیا گیا تھا۔

ملک بدر کیے گئے بہت سے افراد غیر رسمی شعبے میں کام کر رہے تھے، جن میں تعمیراتی مزدور بھی شامل ہیں۔

ایک عہدیدار نے کہاکہ’’یہ کارروائی مرکزی ایجنسیوں کے ساتھ تال میل کرکے انجام دی جا رہی ہے۔‘‘

معلوم ہوا ہے کہ بنگلہ دیشی شہریوں کے ایک اور گروپ کو بھی آنے والے دنوں میں ملک بدر کیے جانے کا امکان ہے۔

بنگلہ دیشی شہریوں کے خلاف تازہ کارروائی سرحدی ریاستوں میں آبادیاتی تبدیلیوں کا جائزہ لینے کی وسیع تر مشق کے تحت کی گئی ہے۔

مرکز کی جانب سے تشکیل دی گئی چار رکنی کمیٹی نے، جس کی سربراہی ریٹائرڈ جسٹس پربھاکر ناولیکر کر رہے ہیں، اگست میں جموں کا دورہ کیا تھا تاکہ مبینہ غیر قانونی امیگریشن سمیت آبادیاتی تبدیلیوں کا جائزہ لیا جا سکے۔

ذرائع کے مطابق، کمیٹی کے سامنے پیش کیے گئے اعداد و شمار سے معلوم ہوا کہ جموں و کشمیر میں اس وقت 6,000 سے زیادہ روہنگیا اور صرف 500 بنگلہ دیشی شہری مقیم ہیں۔

یواین آئی۔ ظ ا

جموں و کشمیر

جموں بار ایسوسی ایشن نے موٹر وہیکل کے نئے ای-چالان نظام پر تشویش ظاہر کی

Published

12 hours ago

October 5, 2026

Online Desk

جموں، جموں و کشمیر ہائی کورٹ بار ایسوسی ایشن، جموں (رجسٹرڈ) نے پیر کو موٹر وہیکل قانون کے تحت الیکٹرانک ٹریفک چالان نظام سے متعلق حالیہ ترامیم اور پالیسی تبدیلیوں پر تشویش ظاہر کی۔

ایسوسی ایشن کے ارکان نے یہاں ایک پریس کانفرنس سے خطاب کرتے ہوئے مؤثر ٹریفک نظام، سڑکوں کی حفاظت اور ٹریفک قوانین کے ذمہ دارانہ نفاذ کی اہمیت کو تسلیم کیا اور اس بات پر تشویش ظاہر کی کہ نئے ای-چالان نظام کو جس طریقے سے نافذ کیا جا رہا ہے، اس کا عام شہریوں، گاڑی مالکان اور ڈرائیوروں پر ممکنہ اثر پڑ سکتا ہے۔

جے کے بی اے جے کے صدر کے نرمل کوتوال نے نائب صدر بلدیو سنگھ، جنرل سکریٹری پردیپ مجوترا، جوائنٹ سکریٹری انشو مہاجن اور خزانچی راہل اگروال کے ہمراہ کہا کہ ٹریفک قوانین کے نفاذ میں تکنیکی ترقی کے ساتھ شفافیت، جواب دہی، طریقہ کار میں انصاف اور شہریوں کے حقوق کے تحفظ کے لیے مناسب انتظامات بھی ضروری ہیں۔

ایسوسی ایشن نے ای-چالان خودکار طور پر جاری کرنے اور ان کی وصولی سے پیدا ہونے والی عملی مشکلات کی جانب توجہ دلائی، خاص طور پر ان حالات میں جب کوئی شہری مبینہ خلاف ورزی، ڈرائیور کی شناخت، الیکٹرانک ریکارڈ کی درستگی یا چالان جاری کیے جانے کے حالات پر اعتراض کرے۔

انہوں نے مزید زور دیا کہ ٹیکنالوجی کے اعتبار سے کتنا ہی جدید نفاذ کا نظام کیوں نہ ہو، وہ قدرتی انصاف کے بنیادی اصولوں اور قانونی طریقہ کار سے الگ ہو کر کام نہیں کرسکتا۔

انہوں نے کہاکہ ’’شہریوں کو مبینہ خلاف ورزی کی بنیاد جاننے، غلط چالان پر اعتراض کرنے، مناسب اصلاح یا نظرثانی کی درخواست کرنے اور جہاں کوئی غلطی ہوئی ہو وہاں مؤثر تدارک حاصل کرنے کا بامعنی اور آسان موقع ملنا چاہیے۔‘‘

ایسوسی ایشن نے ان عوامی افراد کو پیش آنے والی مشکلات پر بھی تشویش ظاہر کی جو تکنیکی سہولیات سے پوری طرح لیس نہیں ہیں یا جنہیں الیکٹرانک چالان تک رسائی حاصل کرنے، اسے سمجھنے یا اس پر اعتراض کرنے میں دشواری کا سامنا ہوسکتا ہے۔

انہوں نے مزید زور دیا کہ ڈیجیٹل نظام انصاف اور عوامی خدمات تک رسائی کو آسان بنانے کا ذریعہ ہونا چاہیے، نہ کہ شہریوں کے لیے مزید رکاوٹیں پیدا کرنے کا۔

یو این آئی۔ این یو۔

جموں و کشمیر

جموں و کشمیر پولیس نے مبینہ طور پر غیر قانونی منشیات رکھنے پر بلیوار میں میڈیکل شاپ سیل کردی

Published

12 hours ago

October 5, 2026

Online Desk

جموں، جموں و کشمیر پولیس نے محکمہ ڈرگ کنٹرول کے تعاون سے کٹھوعہ ضلع کے بلیوار علاقے میں ایک میڈیکل شاپ کو مبینہ طور پر عادت بنانے والی منشیات کی کھیپ برآمد ہونے کے بعد سیل کردیا۔ حکام نے اتوار کو یہ اطلاع دی۔

کٹھوعہ ضلع کے بلیوار میں سب ڈسٹرکٹ اسپتال کے قریب غیر قانونی منشیات برآمد ہونے کے بعد پولیس نے فوری کارروائی کرتے ہوئے دکان کو مبینہ طور پر ڈرگس اینڈ کاسمیٹکس ایکٹ کی خلاف ورزی کرتے ہوئے پایا۔

ایک سرکاری بیان کے مطابق پولیس کو بلیوار کے سب ڈسٹرکٹ اسپتال کے قریب غیر قانونی منشیات کی مشتبہ کھیپ موجود ہونے کی ٹیلی فون پر اطلاع ملی۔ اطلاع ملتے ہی پولیس کی ایک ٹیم نے ڈرگ انسپکٹر کے ساتھ کھیپ کو روکا اور اس کی جانچ کی۔

حکام نے بتایا کہ جانچ کے دوران ٹیم نے مہاجن میڈیکل ایجنسی سے پریگابلن 300 ملی گرام کے 320 کیپسول برآمد کیے۔

حکام کے مطابق برآمد کی گئی ادویات کے ساتھ متعلقہ بل یا واؤچر موجود نہیں تھے، جو قابل اطلاق ڈرگ کنٹرول ضوابط کی خلاف ورزی ہے۔

برآمدگی کے بعد لٹ لگانے والی منشیات کو غیر مجاز طور پر رکھنے اور فروخت کرنے کے الزام میں ڈرگس اینڈ کاسمیٹکس ایکٹ، 1940 کی متعلقہ دفعات کے تحت میڈیکل شاپ کو سیل کردیا گیا۔

یو این آئی۔ این یو۔