نئی دہلی، وزارت خارجہ نے کہا ہے کہ روسی فوج میں بھرتی ہونے والے 139 ہندوستانی شہریوں کو اب تک رہا کر دیا گیا ہے اور 59 دیگر کے بارے میں روسی حکام سے بات چیت جاری ہے۔ وزارت خارجہ کے ترجمان رندھیر جیسوال نے بدھ کو ایک باقاعدہ بریفنگ میں سوالات کے جواب میں یہ جانکاری دی۔ انہوں نے کہا کہ روس اور یوکرین کے درمیان تنازع شروع ہونے کے بعد سے 259 ہندوستانی شہریوں کو روسی فوج میں بھرتی کیا گیا ہے۔

انہوں نے کہا کہ ان میں سے 139 کو رہا کر دیا گیا ہے اور 59 دیگر کے بارے میں روسی حکام سے بات چیت جاری ہے۔ انہوں نے کہا کہ ملازمتوں کے لئے روس جانے والے ہندوستانیوں کو انتہائی محتاط رہنے کی ضرورت ہے اور انہیں کسی بھی لالچ میں آکر کسی بھی غیر قانونی پیشکش کو قبول نہیں کرنا چاہئے۔

انہوں نے کہا کہ وزارت خارجہ نے متعدد ایڈوائزری جاری کی ہیں جس میں انتباہ کیا گیا ہے کہ اس طرح کی بھرتی زندگی کے لیے خطرہ ہے اور اس سے گریز کیا جانا چاہیے۔ انہوں نے کہا کہ یہ تشویشناک بات ہے اور حکومت اس سلسلے میں عوام میں شعور اجاگر کرنے کا سلسلہ جاری رکھے ہوئے ہے۔

یو این آئی۔ این یو۔ م الف

نئی دہلی، کانگریس نے کہا ہے کہ خصوصی جامع نظر ثانی (ایس آئی آر) سے کروڑوں ووٹروں کا آئین کے تحت دیا گیا ووٹنگ کا حق متاثر ہوا ہے اور اس کے خلاف ستیہ گرہ کرنے پر لوک سبھا میں قائدِ حزبِ اختلاف راہل گاندھی اور دیگر کے خلاف ایف آئی آر درج کرنا وزیر اعظم نریندر مودی اور وزیر داخلہ امت شاہ کی شدید مایوسی کو ظاہر کرتا ہے۔

کانگریس ے کمیونیکیشن ڈپارٹمنٹ کے انچارج جے رام رمیش نے بدھ کو سوشل میڈیا ‘ایکس’ پر کہا کہ مسٹر گاندھی تقریباً دو سال سے حقائق پر مبنی ثبوتوں کے ذریعے وزیر اعظم اور وزیر داخلہ کی جانب سے چیف الیکشن کمشنر کے ساتھ مل کر رچی گئی مبینہ ‘ووٹ چوری’ کی سازش کو سامنے لا رہے ہیں۔

انہوں نے کہا کہ الیکشن کمیشن کے ایس آئی آر کی وجہ سے کروڑوں ووٹروں نے اپنا آئینی ووٹنگ کا حق کھو دیا ہے۔

کانگریس لیڈر نے کہا کہ جب لوک سبھا میں قائدِ حزبِ اختلاف نے ایس آئی آر سے جڑی زیادتیوں کو سامنے لانے کے لیے ستیہ گرہ کا راستہ اپنایا، تو دہلی پولیس نے ان کے اور دیگر لیدران کے خلاف ایف آئی آر درج کر دی۔ مسٹر رمیش نے کہا کہ مسٹر مودی اور مسٹر شاہ کی جوڑی گھبرائی ہوئی، بے چین اور مایوس ہے۔

انہوں نے مزید کہا کہ صورتحال بالکل واضح ہے اور آگے کی تصویر صاف دکھائی دے رہی ہے۔

یواین آئی۔الف الف

نئی دہلی، وزیر اعظم نریندر مودی نے بدھ کو حکومت کے سربراہ کی حیثیت سے 25 سال مکمل کر لیے۔

قابل ذکر ہے کہ 7 اکتوبر 2001 کو مسٹر مودی گجرات کے وزیر اعلیٰ بنے تھے اور 2014 میں وزیر اعظم بنے۔ اس موقع پر نائب صدر سی پی رادھا کرشنن، اتر پردیش کے وزیر اعلیٰ یوگی آدتیہ ناتھ اور مرکزی وزیر شیو راج سنگھ چوہان سمیت متعدد لوگوں نے انہیں مبارکباد دی اور ان کی قیادت، عوامی خدمت اور ترقی یافتہ ہندوستان کے عزم کی ستائش کی۔

یو این آئی۔ ایم جے