سری نگر، حکام نے منگل کو جموں و کشمیر کے بارہمولہ قصبے میں پارلیمنٹ حملہ کیس کے مجرم محمد افضل گورو کے رشتہ داروں کی جانب سے مبینہ طور پر سرکاری زمین پر تعمیر کیے گئے ڈیری فارم کے شیڈ کو منہدم کر دیا۔

حکام نے بتایا کہ بارہمولہ قصبے کے گلنار پارک کے قریب سیلابی بیسن میں واقع اس ڈھانچے کو محکمہ مال کی جانب سے تجاوزات کے خلاف چلائی گئی مہم کے دوران منہدم کیا گیا۔ کارروائی کے وقت موقع پر پولیس اور مرکزی مسلح پولیس فورسز کی بڑی تعداد تعینات کی گئی تھی۔

حکام کے مطابق یہ ڈھانچہ سرکاری زمین پر تعمیر کرکے اس پر قبضہ کیا گیا تھا۔

تاہم، خاندان کا دعویٰ ہے کہ انہدام سے قبل انہیں کوئی نوٹس نہیں دیا گیا تھا۔

خاندان کے ایک رکن نے کہاکہ ’’حکام آئے اور دو مرلہ زمین پر پھیلے اس ڈھانچے کو منہدم کر دیا۔ انہدام کی کارروائی دوپہر کے قریب کی گئی۔‘‘

حکام نے بتایا کہ یہ شیڈ مبینہ طور پر گورو کی اہلیہ سے وابستہ تھا اور تقریباً ایک دہائی سے گائے کے باڑے کے طور پر استعمال کیا جا رہا تھا۔

گورو کو 2001 کے پارلیمنٹ حملہ کیس میں قصوروار قرار دیا گیا تھا اور فروری 2013 میں اسے پھانسی دی گئی تھی۔

بارہمولہ کے ایک افسر نے بتایا کہ منگل کو ضلع بارہمولہ میں غیر قانونی قبضے میں موجود کئی کنال قیمتی سرکاری زمین کو واگزار کرایا گیا۔

کروڑوں روپے مالیت کی اس زمین کو حکام کی جانب سے وہاں موجود ڈھانچوں اور غیر قانونی قبضے کو ہٹانے کے بعد دوبارہ حکومت کے کنٹرول میں دے دیا گیا۔

حکام نے مبینہ تجاوزات کرنے والوں میں سے ایک کی شناخت پارلیمنٹ حملہ کیس کے مجرم محمد افضل گورو کی اہلیہ تبسم گورو کے طور پر کی ہے۔ انتظامیہ نے کہا کہ ضلع بھر میں تجاوزات کے خلاف مزید کارروائیاں کی جائیں گی اور سرکاری زمین پر غیر قانونی قبضہ کرنے والوں کے خلاف کارروائی کی جائے گی۔

دریں اثنا، پی ڈی پی لیڈر زہیب یوسف میر نے تجاوزات کے خلاف مہم پر حکام کو تنقید کا نشانہ بنایا اور الزام عائد کیا کہ یہ کارروائی کشمیر سے متعلق ایک ’’بیانیہ‘‘ درآمد کرنے کی کوشش کا حصہ ہے۔

یواین آئی۔ ظ ا

جموں، چیف پرنسپل مردم شماری افسر (سی پی سی او) اور جموں و کشمیر و لداخ کے ڈائریکٹر مردم شماری آپریشنز (ڈی سی او) امیت شرما نے منگل کو کہا کہ دونوں مرکز کے زیر انتظام علاقوں کے مقررہ برف پوش علاقوں میں آبادی کی گنتی کا عمل کامیابی سے مکمل ہونا مردم شماری 2027 کے لیے ایک اہم عملی سنگ میل ہے۔

انہوں نے بتایا کہ اس مہم کے تحت مجموعی طور پر 5,292 مردم شماری بلاکس (ای بی) کا احاطہ کیا گیا، جن میں 4,597 جموں و کشمیر اور 695 لداخ میں ہیں۔ اس کے لیے وسیع پیمانے پر تیاری، خصوصی میدانی انتظامات اور ضلعی انتظامیہ و خصوصی چارجز کے ساتھ قریبی تال میل ضروری تھا۔

برف پوش علاقوں میں آبادی کی گنتی سے قبل 17 سے 31 اگست 2026 تک سیلف اینیومریشن (خود شماری) کا مرحلہ مکمل کیا گیا، جس کے بعد یکم سے 30 ستمبر 2026 تک میدانی کارروائی انجام دی گئی۔

یہاں ایک پریس کانفرنس سے خطاب کرتے ہوئے شرما نے کہا کہ لداخ میں ستمبر کی مہم کے دوران پورے مرکز کے زیر انتظام علاقے کا احاطہ کیا گیا اور مجموعی طور پر 695 مردم شماری بلاکس مکمل کیے گئے، جن میں 367 لیہ اور 328 کرگل میں تھے۔ لداخ میں آبادی کی گنتی مکمل ہونے کے ساتھ ہی یہ مردم شماری 2027 کے لیے آبادی کی گنتی مکمل کرنے والا ملک کا پہلا مرکز کے زیر انتظام علاقہ بن گیا ہے۔

انہوں نے کہا کہ جموں و کشمیر میں برف پوش علاقوں کے لیے چلائی گئی مہم کے تحت 16 اضلاع اور 95 چارجز کا احاطہ کیا گیا۔ ڈوڈہ میں سب سے زیادہ 798 مردم شماری بلاکس مکمل کیے گئے، اس کے بعد کشتواڑ میں 602، رام بن میں 418، اننت ناگ میں 377 اور بارہمولہ میں 359 بلاکس مکمل ہوئے۔

شرما نے بتایا کہ ریاسی میں 345 اور ادھم پور میں 313 مردم شماری بلاکس مکمل کیے گئے، جبکہ کشتواڑ ضلع کو مکمل طور پر برف پوش قرار دیا گیا ہے۔ اس طرح کشتواڑ مردم شماری 2027 کے لیے آبادی کی گنتی مکمل کرنے والا ملک کا پہلا ضلع بھی بن گیا ہے۔

سی پی سی او شرما نے ضلعی انتظامیہ، مردم شماری عملے، خصوصی چارجز، شمار کنندگان اور سپروائزرز کی مشترکہ کوششوں اور مقامی باشندوں کی جانب سے فراہم کیے گئے تعاون کی ستائش کی۔

یواین آئی۔ ط ا

سری نگر، جموں و کشمیر کے وزیر اعلیٰ عمر عبداللہ نے منگل کو کہا کہ انتخابی فہرستوں سے مبینہ طور پر نام حذف کیے جانے کے معاملے پر الیکشن کمیشن کے خلاف اپوزیشن کے انڈیا بلاک کی مہم جاری رہے گی۔

عمر عبداللہ نے کہا کہ انڈیا بلاک کے رہنماؤں نے اکتوبر کے لیے پروگراموں کا کیلنڈر طے کیا ہے، جس کے تحت اپوزیشن اتحاد کے ارکان پارلیمنٹ نے منگل کو الیکشن کمیشن کے دفتر تک مارچ کرنا تھا۔

یہ مارچ انتخابی فہرستوں کی جاری نظرثانی اور ووٹروں کے نام مبینہ طور پر حذف کیے جانے کے معاملے پر تشویش ظاہر کرنے کے لیے منعقد کیا گیا۔

عمر عبداللہ نے سری نگر میں نامہ نگاروں سے کہاکہ ’’چند روز قبل دہلی میں انڈیا بلاک کے رہنماؤں کی میٹنگ ہوئی تھی۔ اس ماہ کے لیے ایک کیلنڈر طے کیا گیا تھا۔ اس کے تحت انڈیا بلاک کے ارکان پارلیمنٹ کو الیکشن کمیشن کے سامنے احتجاج کرنا تھا۔ یہ عمل جاری رہے گا، جیسا کہ میڈیا نے بھی ثابت کیا ہے۔ ہم بار بار یہ بات کہتے رہے ہیں، لیکن کچھ لوگوں نے اس پر توجہ نہیں دی۔ اب میڈیا نے بھی اس بارے میں کہنا شروع کر دیا ہے۔‘‘

ووٹرفہرستوں کی نظرثانی سے متعلق قانونی کارروائی کا حوالہ دیتے ہوئے عمر نے کہا کہ سپریم کورٹ بھی سوالات اٹھا رہی ہے۔

وزیر اعلیٰ نے کہاکہ ’’سپریم کورٹ بھی سوالات اٹھا رہی ہے۔ سپریم کورٹ نے ووٹروں کے نام حذف کیے جانے کے معاملے پر الیکشن کمیشن اور حکومت ہند سے جواب بھی طلب کیا ہے۔ ہم عدالت کے فیصلے کا انتظار کریں گے۔‘‘

سپریم کورٹ نے پیر کو خصوصی جامع نظرثانی (ایس آئی آر) کی مشق اور ووٹر رجسٹریشن سے متعلق تبدیلیوں کو چیلنج کرنے والی عرضیوں پر الیکشن کمیشن اور اس کے عہدیداروں سے جواب طلب کیا تھا۔

یواین آئی۔ط ا