واشنگٹن، امریکہ نے عالمی منڈیوں تک تیل کی ترسیل جاری رکھنے کے لیے آبنائے ہرمز کے ذریعے ایک خفیہ بحری راہداری قائم کی ہے، جس کے تحت امریکی قیادت میں ہونے والے آپریشن کے دوران ہر رات 15 سے 20 تیل بردار ٹینکر آبنائے سے گزر رہے ہیں۔ ایکسیوس نے اس کوشش سے واقف دو امریکی عہدیداروں کے حوالے سے یہ رپورٹ دی ہے۔

رپورٹ کے مطابق یہ آپریشن کئی ہفتوں سے جاری ہے اور اس میں عمان کے ساحل کے ساتھ واقع جنوبی بحری راستے کو استعمال کیا جارہا ہے۔ امریکی عہدیداروں نے بتایا کہ اس راہداری کے ذریعے اس وقت خلیج سے روزانہ تقریباً ایک کروڑ بیرل تیل باہر بھیجا جارہا ہے، جو جنگ سے قبل آبنائے کے ذریعے ہونے والی ترسیل کے حجم کا تقریباً نصف ہے۔

عہدیداروں کے مطابق اس آپریشن سے جنگ کے باعث عالمی سطح پر تیل کی سپلائی میں پیدا ہونے والی رکاوٹوں کو کم کرنے اور خام تیل کی قیمتوں میں اضافے پر قابو پانے میں مدد مل رہی ہے۔

امریکی فوج صرف تیل سے لدے ٹینکروں کو آبنائے سے باہر نکلنے میں سکیورٹی فراہم نہیں کررہی بلکہ خالی ٹینکروں کو بھی بحیرہ عرب سے خلیج فارس میں داخل ہونے میں مدد دے رہی ہے، تاکہ وہ علاقائی تیل پیدا کرنے والے ممالک سے تیل لے کر اسی آبی راستے سے واپس نکل سکیں۔

امریکی عہدیداروں کے مطابق اس آپریشن کو شمالی کیرولائنا کے فورٹ بریگ سے کام کرنے والی ایک ٹاسک فورس، خلیجی خطے کے شراکت داروں کے تعاون سے مربوط کررہی ہے۔

ہر رات بحری جہازوں کو الگ الگ اندر جانے والے اور باہر نکلنے والے قافلوں میں تقسیم کیا جاتا ہے اور امریکی فوج کی ہدایات کے مطابق انہیں جنوبی بحری راستہ استعمال کرنے کی ہدایت دی جاتی ہے۔

عہدیداروں نے بتایا کہ اس آپریشن میں امریکی فضائیہ کے لڑاکا طیارے بھی معاونت کررہے ہیں، جو ایرانی ڈرونز اور کروز میزائلوں کے ممکنہ حملوں سے جہازوں کو تحفظ فراہم کرتے ہیں۔

عہدیداروں کے مطابق یہ آپریشن امریکی سینٹرل کمانڈ کی دو ہفتوں پر محیط اس مہم کے بعد شروع ہوا جس میں ایرانی ریڈار اور بحری نگرانی کے نظام کو نشانہ بنایا گیا تھا۔ اس کے نتیجے میں جنوبی بحری راستے سے گزرنے والے جہازوں کی نگرانی کرنے کی تہران کی صلاحیت کم ہوگئی۔انہوں نے کہا کہ ایران اب محدود تعداد میں بحال کیے گئے رڈار نظام اور اسلامی پاسداران انقلاب (آئی آر جی سی) کی جانب سے چلائی جانے والی چھوٹی کشتیوں پر موجود نگرانی کرنے والے اہلکاروں پر انحصار کررہا ہے۔

نتیجتاً ایرانی فورسز بڑی حد تک ایسے علاقوں کی جانب ڈرونز اور کروز میزائل داغ رہی ہیں جہاں انہیں شبہ ہوتا ہے کہ بحری جہاز موجود ہوسکتے ہیں۔

امریکی فورسز نے ان میں سے متعدد حملوں کو ناکام بنایا ہے۔ ایک امریکی عہدیدار نے بتایا کہ رواں ہفتے کے آغاز میں امریکی فورسز نے آٹھ ایرانی ڈرونز اور دو کروز میزائل مار گرائے۔

امریکی عہدیداروں کے مطابق آبنائے ہرمز سے تیل کی ترسیل بتدریج بڑھ رہی ہے اور روزانہ برآمدات تقریباً ایک کروڑ بیرل تک پہنچ رہی ہیں۔ بعض دنوں میں حالیہ ہفتوں کے دوران خلیج سے ڈیڑھ کروڑ سے دو کروڑ بیرل تک تیل باہر منتقل کیا گیا۔

امریکی صدر ڈونلڈ ٹرمپ نے بدھ کو ایکسیوس سے گفتگو میں کہا، ’’آبنائے ہرمز سے بہت بڑی مقدار میں تیل باہر جارہا ہے۔‘‘

ٹرمپ نے یہ بھی کہا کہ واشنگٹن اس وقت ایران کے ساتھ مذاکرات نہیں کررہا اور تہران پر مذاکرات میں ’’وقت ضائع کرنے‘‘ کا الزام عائد کیا۔

ٹرمپ نے کہا، ’’ایرانیوں میں اب بھی کچھ مزاحمت باقی ہے، لیکن مجموعی طور پر وہ اپنی سابقہ حالت کا محض ایک سایہ رہ گئے ہیں۔‘‘

یو این آئی۔ ع ا۔

تل ابیب، اسرائیلی وزیر اعظم بینجمن نیتن یاہو نے شام میں ایک فوجی اڈے پر اسرائیلی حملے کا دفاع کرتے ہوئے کہا ہے کہ اسرائیل نے اپنی سرحد کے قریب ترکی کی جانب سے فوجی موجودگی بڑھانے کو روکنے کے لیے کارروائی کی۔ یہ بیان دونوں ممالک کے درمیان بڑھتی ہوئی کشیدگی کے دوران سامنے آیا ہے۔

نیتن یاہو نے کہا کہ ترکی حلب کے قریب اپنی موجودہ پوزیشن کے جنوب میں واقع ایک فوجی اڈے پر اپنی افواج تعینات کرنے پر غور کر رہا تھا، جسے اسرائیل نے ممکنہ سکیورٹی خطرہ قرار دیا۔

نیتن یاہو نے اپنی جماعت لِکوڈ کی جانب سے جاری کردہ ایک ویڈیو میں کہا، ’’ہم ترکی کی ایسی فوجی تیاریوں کو برداشت نہیں کریں گے جو جنوب کی جانب بڑھتے ہوئے ہمارے لیے خطرہ پیدا کریں۔‘‘

انہوں نے کہا کہ اسرائیل نے ابتدائی طور پر ترکی کو حلب کے قریب ایک فوجی اڈے پر ممکنہ ترک فوجی موجودگی کے حوالے سے اپنے خدشات سے آگاہ کیا تھا۔

ان کے مطابق ترکی نے اس مشورے پر توجہ نہیں دی، جس کے باعث کارروائی ضروری ہوگئی۔

نیتن یاہو نے کہا، ’’بظاہر انہوں نے بات نہیں سنی، اس لیے ہم نے یقینی بنایا کہ وہ اسے زیادہ واضح طور پر سمجھ جائیں۔‘‘ یہ بیان اسرائیلی حملے میں اسرائیل کے ملوث ہونے کا بظاہر اعتراف ہے۔

نیتن یاہو کے دفتر نے منگل کو ہونے والے حملے کی براہ راست ذمہ داری قبول کرنے سے گریز کیا تھا، تاہم دفتر نے کہا تھا کہ ترک افواج نے حال ہی میں مذکورہ فوجی اڈے کا معائنہ کیا تھا اور خبردار کیا تھا کہ اسرائیل شام میں ترک فوجی موجودگی سے پیدا ہونے والے کسی بھی ممکنہ خطرے کو برداشت نہیں کرے گا۔

ترکی میں امریکی سفیر ٹام بارک، جو ٹرمپ انتظامیہ کے شام کے لیے خصوصی ایلچی بھی ہیں، نے حملے کی ذمہ داری اسرائیل پر عائد کرتے ہوئے اسے غیر ضروری کشیدگی میں اضافہ قرار دیا۔

یہ حملہ ایسے وقت میں ہوا ہے جب اسرائیل اور ترکی کے تعلقات میں تیزی سے خرابی آئی ہے اور انقرہ اسرائیل کے سب سے نمایاں علاقائی ناقدین میں شامل ہوگیا ہے۔

اسرائیلی فوج کے چیف آف اسٹاف لیفٹیننٹ جنرل ایال زامیر نے بھی شام میں اسرائیلی فوجیوں سے ملاقات کے دوران ترکی کو بالواسطہ طور پر خبردار کیا۔

زامیر نے کہا، ’’ہمیں دہشت گردی کے خطرات کو پیدا ہونے سے روکنا ہوگا، اور ساتھ ہی اپنی سرحدوں پر کسی بڑے فوجی خطرے کے قیام کو بھی روکنا ہوگا۔‘‘

انہوں نے ترکی کا نام لیے بغیر کہا کہ اسرائیل اپنی ’’آپریشنل صلاحیتوں‘‘ کو ضرورت کے مطابق، درست مقام اور درست وقت پر استعمال کرنے کا طریقہ بخوبی جانتا ہے۔

بارک نے کہا کہ ٹرمپ انتظامیہ اسرائیلی کارروائی کو کشیدگی میں اضافہ سمجھتی ہے۔

دوسری جانب ترکی نے نیتن یاہو کے دعووں کو ’’ناقابل قبول‘‘ قرار دیتے ہوئے مسترد کردیا اور ان پر خطے میں توسیع پسندانہ اور عدم استحکام پیدا کرنے والی پالیسیاں اختیار کرنے کا الزام عائد کیا۔

تازہ تنازع پہلے ہی انتہائی غیر مستحکم مشرق وسطیٰ میں کشیدگی کی ایک اور پرت کا اضافہ کرتا ہے، جہاں اسرائیل ایران اور اس کے اتحادیوں کے ساتھ وسیع تر علاقائی محاذ آرائی میں بھی شامل ہے۔

نیتن یاہو کے بیانات سے ظاہر ہوتا ہے کہ اسرائیل اپنی شمالی سرحدوں کے قریب ابھرتے ہوئے خطرات، بشمول شام میں کسی بھی اہم غیر ملکی فوجی موجودگی، کو خطرہ سمجھنے کی صورت میں فوجی کارروائی کرنے کے لیے تیار ہے۔

یو این آئی۔ ع ا۔

واشنگٹن، امریکی صدر ڈونلڈ ٹرمپ نے ایران پر پہلے سے عائد سخت پابندیوں کے علاوہ مزید معاشی دباؤ ڈالنے کا اعلان کیا ہے۔ انہوں نے اسے ایران کے خلاف تاریخ کی “سب سے زبردست اقتصادی مہم” قرار دیا ہے، کیونکہ ایران نے امریکہ کے ساتھ معاہدہ کرنے سے انکار کر دیا ہے۔

ٹرمپ نے ‘ٹروتھ سوشل’ پر لکھا، “اسلامک ریپبلک آف ایران کو معاہدہ کرنے کا اتنا بڑا موقع میں نے دیا جتنا کسی اور نے نہیں دیا۔ افسوس کی بات ہے کہ وہ اس سے فائدہ نہیں اٹھا سکے۔ اس لیے، آج میں کسی بھی ملک کے خلاف اب تک کی سب سے زبردست اقتصادی مہم شروع کرنے کا اعلان کر رہا ہوں!”

امریکی صدر نے کہا کہ جو بھی ملک ایران کو اپنے کاروبار اور سرکاری اداروں کے ذریعے مدد فراہم کرے گا، اسے شدید معاشی نتائج کا سامنا کرنا پڑے گا۔

مسٹر ٹرمپ نے مزید لکھا، “آج میں یہ بھی اعلان کر رہا ہوں کہ جو بھی ملک اپنے مالیاتی اداروں، کاروباروں، ہوائی اڈوں یا سرکاری اداروں کو ایران کو کسی بھی قسم کی مدد (لائف لائن) دینے کی اجازت دے گا، اسے خود بھاری معاشی نتائج بھگتنے ہوں گے۔ تیل کی اسمگلنگ، سوئیپ لائنز، کیش ٹرانسفر، ایکسچینج ہاؤسز، جہازوں کی رجسٹریشن، فرنٹ کمپنیاں — یہ سب ابھی بند ہونا چاہیے!”

انہوں نے ایران کے خلاف اپنی معاشی مہم کو بے مثال سطح پر الگ تھلگ کرنے والا قدم بتایا اور امریکی اتحادیوں سے ان اقدامات میں شامل ہونے کی اپیل کی۔ انہوں نے کہا، “یہ بے مثال سطح پر اقتصادی جنگ اور الگ تھلگ کرنے والا قدم ہوگا۔”

اس سے قبل، ٹرمپ نے میڈیا سے بات کرتے ہوئے کہا تھا کہ امریکہ پہلے سے نافذ سخت پابندیوں کے علاوہ ایران پر مزید معاشی دباؤ ڈال سکتا ہے۔ مسٹر ٹرمپ نے صحافیوں کو بتایا، “ہمارے پاس ایسی چیزیں ہیں جن پر ہم پابندیاں عائد کر سکتے ہیں۔ ہمارے پاس بہت سخت پابندیاں ہیں اور دیکھتے ہیں کیا ہوتا ہے۔”

سی این این نے امریکی حکام کے حوالے سے بتایا کہ امریکی حکام نے اپنے سیاسی اتحادیوں کو مطلع کیا ہے کہ وہ ایران کے خلاف فوجی کارروائی کے بجائے آہستہ آہستہ معاشی طور پر اس کا “دم گھوٹنے” کی حکمت عملی اپنا رہے ہیں۔ حکام کے مطابق اس ہفتے ایران کے خلاف پابندیوں کا ایک نیا پیکیج پیش کیے جانے کی توقع ہے، جبکہ ایرانی بندرگاہوں کی ناکہ بندی جاری رہے گی۔

منگل کے روز مسٹر ٹرمپ نے کہا کہ واشنگٹن تہران کے ساتھ کوئی بات چیت نہیں کر رہا ہے اور نہ ہی ایسا کوئی منصوبہ ہے۔

یواین آئی/اسپوتنک۔الف الف