ہندوستان

بی جے پی پنجاب میں ایم ایل اے کو پیسے دے کر توڑنے کی کررہی ہے کوشش : آپ

Published

3 years ago

March 27, 2024

چنڈی گڑھ، عام آدمی پارٹی (آپ) پنجاب نے الزام لگایا کہ مثالی ضابطہ اخلاق کے نفاذ کے بعد بھی بھارتیہ جنتا پارٹی (بی جے پی) اپوزیشن جماعتوں کو ہراساں کر رہی ہے اور آپ کے ممبران اسمبلی اور لیڈروں کو بیرون ملک سے فون کرکے خرید و فروخت کرنے کی کوشش کررہی ہے۔ بی جے پی انہیں لوک سبھا انتخابات سے قبل اپنی پارٹی میں شامل ہونے کے لئے لالچ دے رہی ہے۔

آپ کے تین ایم ایل اے جگدیپ سنگھ گولڈی کمبوج (جلال آباد)، امندیپ سنگھ مسافر (بلوانہ) اور راجندر پال کور چھینہ (لدھیانہ ساؤتھ) نے ایک پریس کانفرنس سے خطاب کیا اور بتایا کہ کس طرح بی جے پی نے ان سے رابطہ کیا اور انہیں اپنی پارٹی میں شامل ہونے کی پیش کش کی۔ تینوں ایم ایل اے نے کہا کہ وہ عام آدمی پارٹی اور پارٹی کے کنوینر اروند کیجریوال کے سچے سپاہی ہیں اور پارٹی نہیں چھوڑیں گے۔

ایم ایل اے جگدیپ کمبوج نے کہا کہ پہلے بی جے پی نے مسٹر کیجریوال جیسے ایماندار لیڈر کو جیل میں ڈالا۔ مسٹر کیجریوال وہ لیڈر ہیں جنہوں نے سیاست میں بدعنوانی کے خلاف جدوجہد کی اور ہمیشہ کام کی سیاست کی۔ ان کے خلاف جھوٹے مقدمات درج کیے گئے اور انہیں بغیر کسی ثبوت کے جیل بھیج دیا گیا۔ کمبوج نے کہا کہ وہ (بی جے پی) مسٹر کیجریوال اور عام آدمی پارٹی سے خوفزدہ ہیں، اس لیے جہاں وہ عوام کا مینڈیٹ حاصل کرنے میں ناکام رہے، وہیں وہ کسی بھی قیمت پر ایم ایل اے اور ایم پی کو خریدنے کی کوشش کر رہے ہیں۔ انہوں نے کہا کہ کل 12:52 کے قریب مجھے +35796718959 (سائپرس) سے کال آئی۔

فون کرنے والے نے بتایا کہ اس کا نام سیوک سنگھ ہے اور وہ ایم ایل اے سے بات کرنا چاہتا ہے۔

انہوں نے کہا کہ ’’جب انہوں نے اسے بتایا کہ میں ہی ہوں تو اس نے پوچھا کہ کیا آپ بات کرنے میں آرام دہ محسوس کررہے ہیں ، میں نے ہاں کہا۔ اس نے کہا ایک آفر ہے۔

ہم چاہتے ہیں آپ بی جے پی میں شامل ہو جائیں۔ انہوں نے کہا کہ یہ میرے لیے بہت اچھی پیشکش ہے۔ میری کوئی ڈیمانڈ ہو تو بتا سکتا ہوں۔ میں نے ان سے کہا کہ میری کوئی ڈیماند نہیں ہے۔ پھر انہوں نے مجھے بی جے پی میں شامل ہونے کے لیے 20-25 کروڑ روپے کی پیشکش کی لیکن میں نے کہا کہ مجھے اس کی ضرورت نہیں ہے۔

ایم ایل اے راجندر پال کور چھینا نے کہا ’’کل تقریباً 11 بجے مجھے ایک فون آیا کہ میں سیوک سنگھ ہوں۔ یہ ایک غیر ملکی نمبر سے کال تھی، اس نے کہا کہ وہ دہلی سے کال کر رہا ہے۔ انہوں نے کہا کہ میں مجھے اپنی پارٹی بدل کر ان کی پارٹی (بی جے پی) میں شامل ہوجانا چاہیے۔ کیجریوال پر چھاپہ مارا گیا ہے اور انہیں گرفتار کیا گیا لیکن ہم عام آدمی پارٹی کے سپاہی ہیں۔ لوگوں نے ہم پر بھروسہ کیا، اس لیے ہم انہیں مایوس نہیں ہونے دیں گے۔ ہم بھگونت سنگھ مان اور اروند کیجریوال کی سوچ پر چلیں گے۔

اروند کیجریوال ایک خیال ہے۔ اسے گرفتار کیا جا سکتا ہے لیکن اس سے وابستہ لاکھوں رضاکاروں کی سوچ نہیں بدلی جا سکتی۔ ہم ان کے ساتھ کھڑے ہیں۔ ہمیں کوئی خرید نہیں سکتا۔ ”

یو این آئی۔ این یو۔

ہندوستان

مودی-شاہ انتخابی میچ فکسنگ کے لیے گیانیش کمار کا استعمال کرتے ہیں: راہل

Published

1 day ago

September 26, 2026

Online Desk

نئی دہلی، کانگریس کے سابق صدر اور لوک سبھا میں اپوزیشن لیڈر راہل گاندھی نے ہفتہ کے روز چیف الیکشن کمشنر گیانیش کمار کے حوالے سے وزیر اعظم نریندر مودی اور وزیر داخلہ امت شاہ پر نشانہ لگایا اور الزام لگایا کہ وہ مسٹر کمار کا استعمال انتخابات کی ‘میچ فکسنگ’ کے لیے کرتے ہیں۔

مسٹر گاندھی نے ہفتہ کی دیر شام سوشل میڈیا ایکس پر کہا کہ مسٹر مودی اور مسٹر شاہ نے پہلے مسٹر کمار کو بی جے پی کے لیے بھرتی کرنے میں استعمال کیا اور بعد میں انہیں انتخابات میں ‘میچ فکسنگ’ کی ذمہ داری سونپ دی۔

انہوں نے لکھا، “پہلے گیانیش کمار— پھرحاضر سروس آئی اے ایس افسر —کا استعمال بی جے پی کے لیے بھرتی کرنے میں کیا گیا۔ پھر مودی اور شاہ نے انہیں (گیانیش کمار) امپائر بنا دیا اور ہندستان کے انتخابات کی میچ فکسنگ کی ذمہ داری سونپ دی۔”

مسٹر گاندھی کا یہ بیان کیرالہ کانگریس کے ایک بیان کے بعد آیا ہے جس میں پارٹی سوشل میڈیا ایکس پر دعویٰ کرتے ہوئے کہتی ہے، “گیانیش کمار کو لے کر بڑا انکشاف۔ کیرالہ کے سابق چیف سکریٹری جی جی تھامسن نے کہا ہے کہ مسٹر کمار نے ان سے رابطہ کر کے بی جے پی کے ٹکٹ پر الیکشن لڑنے کے لیے کہا تھا اور انہیں وزیر کے عہدے کی پیشکش بھی کی تھی۔”

کیرالہ کانگریس نے سوال کرتے ہوئے کہا، “گیانیش کمار یہ تجویز کس حیثیت سے دے رہے تھے۔ وہ کس کے اختیار سے بول رہے تھے اور 2016 میں بی جے پی کے لیے سیاسی بھرتی میں ایک الیکشن کمشنر مبینہ طور پر کیوں شامل تھے؟”

اس کے ساتھ ہی کیرالہ کانگریس نے مسٹر تھامسن کا ایک ویڈیو بھی شیئر کیا ہے جس میں وہ ملیالم میں مسٹر گیانیش کمار کے بارے میں دعویٰ کرتے ہوئے دکھائی دے رہے ہیں۔

یواین آئی۔الف الف

ہندوستان

سونیا-راہل نے منموہن سنگھ کو خراجِ عقیدت پیش کیا

Published

1 day ago

September 26, 2026

Online Desk

نئی دہلی، کانگریس پارلیمانی پارٹی کی لیڈر محترمہ سونیا گاندھی اور لوک سبھا میں اپوزیشن کے لیڈر راہل گاندھی نے سابق وزیر اعظم ڈاکٹر منموہن سنگھ کے یومِ پیدائش پر انہیں گلہائے عقیدت نذر کر کے خراجِ عقیدت پیش کیا۔

محترمہ گاندھی نے ڈاکٹر سنگھ کو خراجِ عقیدت پیش کرتے ہوئے کہا کہ انہیں ان کی دانشمندی، عاجزی اور قوم کے لیے غیر متزلزل عزم کے لیے ہمیشہ یاد رکھا جائے گا۔ انہوں نے کہا کہ ہندوستان کی معاشی تبدیلی میں ان کا تعاون اور ملک کے لیے ان کی خدمات تاریخ کا ایک دائمی حصہ ہیں۔

مسٹر گاندھی نے ڈاکٹر سنگھ کو خراجِ عقیدت پیش کرتے ہوئے انہیں معاشی اصلاحات کا معمار قرار دیا اور کہا کہ انہوں نے دانشمندی، ایمانداری اور عاجزی کے ساتھ ملک کی خدمت کی نیز ان کے پرسکون عزم اور مدبرانہ بصیرت نے چیلنجنگ اوقات میں ملک کی رہنمائی کی۔ انہوں نے کہا کہ ہمہ گیر ترقی اور عوامی خدمت کے لیے ڈاکٹر سنگھ کا عزم لوگوں کو تحریک دیتا رہے گا۔

یواین آئی ایف اے

ہندوستان

ہندوستان- خلیجی کونسل تجارتی بات چیت آگے بڑھی، تجارت اور توانائی کے تعاون کو مضبوط کرنے پر زور

Published

1 day ago

September 26, 2026

Online Desk

نئی دہلی، ہندوستان اور خلیجی تعاون کونسل (جی سی سی) کے درمیان وزرا کی سطح کی میٹنگ میں تجارت، سرمایہ کاری، توانائی، سکیورٹی اور عوامی رابطوں کو مضبوط کرنے پر تبادلہ خیال ہوا۔

دونوں فریقوں نے ہندوستان-جی سی سی آزادانہ تجارتی معاہدے (ایف ٹی اے) کی بات چیت کو آگے بڑھانے اور 2024-28 کے مشترکہ عمل کے منصوبے پر تعاون جاری رکھنے پر اتفاق کیا۔

وزارت خارجہ نے ہفتے کے روز بتایا کہ وزیر خارجہ ڈاکٹر ایس جے شنکر کی قیادت میں جمعہ کے روز نیویارک میں اقوام متحدہ کی جنرل اسمبلی کے 81 ویں اجلاس کے حاشیے پر منعقدہ میٹنگ میں رکن ممالک کے نمائندوں نے شرکت کی۔ دونوں فریقوں نے بتایا کہ مالیاتی سال 2025-26 میں ہندوستان اور جی سی سی کے درمیان کل تجارت 178.66 ارب ڈالر رہی۔

میٹنگ میں ہندوستان-جی سی سی مشترکہ عمل کا منصوبہ 2024-28 کی پیش رفت کا جائزہ لیا گیا۔ اس میں تجارت اور سرمایہ کاری، غذائی تحفظ، نقل و حمل، توانائی، صحت، ثقافت اور تعلیم جیسے شعبے شامل ہیں۔

ہندوستان اور جی سی سی نے اس سال فروری میں آزادانہ تجارتی معاہدے کے لیے شرائط و ضوابط اور دائرہ کار طے ہونے کے بعد شروع ہونے والی بات چیت کا خیرمقدم کیا۔ دونوں فریقوں نے کہا کہ معاہدے سے تجارت بڑھانے اور برآمدات میں تنوع لانے میں مدد مل سکتی ہے۔

ڈاکٹر جے شنکر نے مغربی ایشیا میں حالیہ کشیدگی کے دوران توانائی اور کھاد کی سپلائی جاری رکھنے کے لیے خلیجی ممالک کا شکریہ ادا کیا۔ قابلِ تجدید توانائی، بایو فیول اور گرین ٹیکنالوجی میں تعاون بڑھانے پر بھی زور دیا گیا۔

میٹنگ میں مغربی ایشیا کی صورت حال، بین الاقوامی آبی گزرگاہوں میں تجارتی جہازوں کی سکیورٹی، کثیر ملکی اداروں میں اصلاحات، استحکام اور دہشت گردی جیسے مسائل پر بھی خیالات کا تبادلہ کیا گیا۔ دونوں فریقوں نے اگلی ہندوستان-جی سی سی اسٹریٹجک ڈائیلاگ میٹنگ جلد منعقد کرنے پر اتفاق کیا۔

یواین آئی ایف اے