کھیل

شامی کی انٹرنیشنل کرکٹ میں واپسی میں مزید تاخیر ہو سکتی ہے – روہت

Published

2 years ago

October 15, 2024

نئی دہلی، ہندوستانی تیز گیند باز محمد شامی کی حالیہ چوٹ کی وجہ سے ان کی بین الاقوامی کرکٹ میں واپسی میں مزید تاخیر ہو سکتی ہے۔

ٹیم انڈیا کے کپتان روہت شرما نے اس کی تصدیق کرتے ہوئے کہا کہ شامی کی اس سال فروری میں دائیں ٹانگ کی سرجری ہوئی تھی اور اب ان کے گھٹنے میں سوجن آ گئی ہے جس کی وجہ سے ان کی صحت یابی میں تاخیر ہو رہی ہے۔

روہت کے مطابق، ’’ابھی یہ کہنا مشکل ہے کہ وہ اس سیریز کے لیے فٹ ہوں گے یا آسٹریلیا سیریز کے لیے۔

حال ہی میں انہیں ایک اور چوٹ آئی ہے، ان کے گھٹنے میں سوجن آ گئی ہے جو کہ کافی غیر معمولی ہے۔

انہوں نے کہا، “وہ فٹ ہونے کے مراحل میں تھے اور تقریباً فٹ تھے لیکن ان کے گھٹنے میں سوجن آ گئی ہے۔ اس سے اس کی صحت یابی میں تھوڑی تاخیر ہوئی ہے اور اسے دوبارہ شروع کرنا پڑے گا۔

شامی نے آخری بار 2023 ون ڈے ورلڈ کپ میں بین الاقوامی کرکٹ کھیلی تھی جہاں انہوں نے سات میچوں میں 24 وکٹیں لے کر ہندوستان کو فائنل تک پہنچانے میں اہم کردار ادا کیا تھا۔

ورلڈ کپ کے دوران درد کے باوجود کھیلتے ہوئے ان کے ٹخنے کا انجیکشن لگا کر علاج کروایا گیا۔

شامی کی اس سال کے شروع میں لندن میں سرجری ہوئی تھی۔ اس کے بعد ان کی بحالی بھی ٹھیک چل رہی تھی۔ وہ اگلے ماہ شروع ہونے والی پانچ ٹیسٹ میچوں کی آسٹریلیائی سیریز میں انتخاب کے لیے دستیاب ہوتے لیکن ان کی تازہ چوٹ نے ٹیم میں واپسی کے ان کے منصوبوں کو بڑا دھچکا لگا ہے۔

ہندوستانی کپتان نے اس بات کی بھی تصدیق کی کہ شامی فی الحال نیشنل کرکٹ اکیڈمی (این سی اے) میں فزیو تھراپسٹ اور ڈاکٹروں کے ساتھ کام کر رہے ہیں۔ انہوں نے کہا، “ابھی وہ این سی اے میں ہیں۔ وہ فزیوز اور ڈاکٹروں کے ساتھ کام کر رہا ہے۔ ہم چاہتے ہیں کہ وہ سو فیصد فٹ رہے۔ کسی بھی صورت میں ہم انہیں آدھی پکی تیاری کے ساتھ آسٹریلیا نہیں لے جانا چاہتے۔

روہت نے کہا، “شامی نے ایک سال سے زیادہ عرصے سے کوئی کرکٹ نہیں کھیلی ہے۔ ایک فاسٹ باؤلر کے لیے اتنے عرصے تک کرکٹ سے دور رہنا اور پھر اچانک فارم میں واپس آنا بہت مشکل ہے۔ یہ کوئی مثالی صورت حال نہیں ہے۔ ہم اسے پورا وقت دینا چاہیں گے تاکہ وہ سو فیصد فٹ رہے۔ فزیو، ٹرینر اور ڈاکٹروں نے اس کے لیے روڈ میپ تیار کیا ہے۔ انہیں بین الاقوامی کرکٹ کھیلنے سے پہلے چند اور میچز کھیلنے ہوں گے۔ ہم نیوزی لینڈ سیریز کے بعد دیکھیں گے کہ وہ کس حالت میں ہیں اور پھر فیصلہ کریں گے کہ آسٹریلیا میں ان کا کیا کردار ہوگا۔

موجودہ ورلڈ ٹیسٹ چیمپئن شپ (ڈبلیو ٹی سی ) سائیکل میں ہندوستان کے ابھی آٹھ ٹیسٹ باقی ہیں۔ ہندوستان نیوزی لینڈ کے خلاف تین میچوں کی سیریز کے بعد آسٹریلیا کے ساتھ پانچ میچوں کی ٹیسٹ سیریز کھیلے گا۔

یو این آئی۔ ع ا۔

کھیل

سروچی سنگھ اور کمل جیت سنگھ نے ہندوستان کو ایشیائی کھیلوں میں دوسرا طلائی تمغہ دلایا

Published

3 days ago

September 25, 2026

Online Desk

آئیچی-ناگویا (جاپان)، ہندوستان کی سروچی سنگھ اور کمل جیت سنگھ کی جوڑی نے جمعہ کو ایشیائی کھیلوں کے نشانہ بازی مقابلے میں 10 میٹر ایئر پسٹل مکسڈ مقابلے میں جنوبی کوریا کو پیچھے چھوڑتے ہوئے طلائی تمغہ حاصل کیا۔ یہ ایشیائی کھیلوں میں ہندوستان کا دوسرا تمغہ ہے۔

آج یہاں ہوئے مقابلے میں ہندوستانی جوڑی نے مجموعی طور پر 484.6 اسکور کے ساتھ سرفہرست مقام حاصل کیا۔ کمل جیت اور سروچی نے شروعات سے ہی اچھی برتری بنا لی تھی، لیکن جنوبی کوریا مسلسل ہندوستانی نشانہ بازوں پر دباؤ بنائے ہوئے تھا۔ تاہم ہندوستانی جوڑی نے دباؤ میں کوئی غلطی نہیں کی اور جنوبی کوریا کو 6.6 پوائنٹس کے فرق سے شکست دے کر طلائی تمغہ اپنے نام کرلیا۔ جنوبی کوریا 478 اسکور کے ساتھ دوسرے جبکہ ایران 415.8 اسکور کے ساتھ تیسرے مقام پر رہا۔

یو این آئی۔ ایم جے

کھیل

سلطان واریئرز بارہمولہ نے افتتاحی چنار پریمیئر لیگ کا خطاب جیت لیا

Published

2 weeks ago

September 15, 2026

Online Desk

سری نگر، سلطان واریئرز بارہمولہ نے افتتاحی چنار پریمیئر لیگ (سی پی ایل) کرکٹ ٹورنامنٹ 2026 کا خطاب جیت لیا۔ اس نے بارہمولہ کے جنرل بپن راوت اسٹیڈیم میں کھیلے گئے شاندار فائنل میں رمزی اسپورٹس سری نگر کو شکست دی۔

پہلے بلے بازی کرتے ہوئے سلطان واریئرز نے مقررہ اوورز میں 9 وکٹوں کے نقصان پر 182 رنز بنائے، جس کے جواب میں رمزی اسپورٹس سری نگر کی پوری ٹیم 142 رنز پر آؤٹ ہوگئی۔ اس طرح سلطان واریئرز نے شاندار کامیابی کے ساتھ خطاب اپنے نام کر لیا۔

سلطان واریئرز کے عاقب کھانڈے کو میچ جیتنے والی کارکردگی پر ’مین آف دی میچ‘ قرار دیا گیا، جبکہ ان کے ساتھی کھلاڑی عاصم بشیر کو پورے ٹورنامنٹ میں مسلسل عمدہ کارکردگی پر ’مین آف دی سیریز‘ کا اعزاز دیا گیا۔

فوج کی سری نگر چنار کور کی جانب سے منعقد کیے گئے اس ٹورنامنٹ میں ریکارڈ تعداد میں ٹیموں نے شرکت کی۔ مقابلے کے لیے 130 ٹیموں نے رجسٹریشن کرائی تھی، جن میں سے کشمیر وادی کے مختلف علاقوں سے 79 ٹیموں کا انتخاب کیا گیا۔

تقریب میں جموں و کشمیر کے چیف سیکریٹری اتل ڈلو کے علاوہ بارہمولہ میں تعینات ڈیگر ڈویژن کے جنرل آفیسر کمانڈنگ اور مقامی برادری کی ممتاز شخصیات نے شرکت کی۔

منتظمین نے کہا کہ سی پی ایل 2026 نے پوری کشمیر وادی کے کرکٹ ٹیلنٹ کو اپنی صلاحیتوں کے اظہار کا موقع فراہم کیا اور خاص طور پر نوجوانوں کے درمیان ہندوستانی فوج اور مقامی برادری کے تعلقات کو مضبوط بنانے کے لیے ایک پلیٹ فارم کے طور پر کام کیا۔

دفاعی ترجمان نے کہا کہ سی پی ایل 2026 کا کامیاب انعقاد خطے کے کھیلوں کے کیلنڈر میں ایک اہم سنگِ میل ہے۔ اس کے ذریعے وادی کے مختلف علاقوں سے تعلق رکھنے والے باصلاحیت نوجوان کرکٹرز کو اپنی صلاحیتیں دکھانے کا موقع ملا۔

یواین آئی۔ ظ ا

کھیل

بابر اعظم کی سات سال بعد ڈومیسٹک فرسٹ کلاس کرکٹ میں واپسی

Published

2 weeks ago

September 15, 2026

Online Desk

اسلام آباد، پاکستان کے ٹیسٹ کپتان بابر اعظم موجودہ پریذیڈنٹس ٹرافی گریڈ ون فرسٹ کلاس ٹورنامنٹ میں آئل اینڈ گیس ڈیولپمنٹ کمپنی لمیٹڈ (او جی ڈی سی ایل) کی نمائندگی کریں گے۔ انہیں ٹیم نے بطور گیسٹ کھلاڑی شامل کیا ہے۔

ذرائع کے مطابق بابر نے پاکستان کرکٹ بورڈ (پی سی بی) سے درخواست کی تھی کہ انہیں کسی ٹیم میں شامل کیا جائے تاکہ وہ طویل فارمیٹ میں اپنی فارم بہتر کرسکیں۔ اس کے بعد بورڈ نے انہیں او جی ڈی سی ایل کے ساتھ جوڑ دیا۔ بابر نے دسمبر 2022 کے بعد سے ٹیسٹ کرکٹ میں کوئی سنچری نہیں بنائی۔ اس کے بعد سے 39 اننگز میں وہ صرف آٹھ نصف سنچریاں بناسکے ہیں، جبکہ 2023 کے آغاز سے ٹیسٹ میں ان کی اوسط 30.43 رہی ہے۔

ان کی خراب فارم پاکستان کرکٹ میں مسلسل بحث کا موضوع بنی ہوئی ہے۔ حالیہ انگلینڈ دورے میں پاکستان کو تین ٹیسٹ کی سیریز میں 0-3 سے شکست ہوئی، جبکہ لارڈز اور ایجبسٹن ٹیسٹ میں انگلینڈ کے تیز گیندبازوں نے شارٹ گیند کے خلاف بابر کی کمزوری کا فائدہ اٹھایا۔ تاہم گزشتہ پانچ ٹیسٹ میں وہ چار نصف سنچریاں بناچکے ہیں اور گزشتہ ماہ ویسٹ انڈیز کے خلاف دوسرے ٹیسٹ میں ان کا اسکور 88 رنز رہا، جس سے پاکستان نے جولائی 2023 کے بعد پہلی بار بیرون ملک ٹیسٹ جیتا۔

بابر نے آخری بار 2019 میں ڈومیسٹک فرسٹ کلاس ٹورنامنٹ کھیلا تھا، جب انہوں نے سینٹرل پنجاب کی کپتانی کرتے ہوئے فائنل میں ناردرن کو شکست دے کر قائداعظم ٹرافی جیتی تھی۔ حالیہ برسوں میں ٹیسٹ اور آئی سی سی ٹورنامنٹس میں پاکستان کی خراب کارکردگی کے بعد پاکستانی کھلاڑیوں کے ڈومیسٹک فرسٹ کلاس کرکٹ میں زیادہ حصہ لینے کا مطالبہ کیا جاتا رہا ہے۔ اس سیزن میں شاہین شاہ آفریدی اور سلمان آغا سمیت کئی دیگر بین الاقوامی کھلاڑی بھی پریذیڈنٹس ٹرافی میں حصہ لے رہے ہیں۔

پی سی بی کے سینٹرل کنٹریکٹ کے تحت اے کیٹیگری کے ٹیسٹ ماہر کھلاڑیوں کے لیے سالانہ کم از کم چھ، اے بی کیٹیگری کے ٹیسٹ اور ون ڈے ماہر کھلاڑیوں کے لیے چار، جبکہ بی سی کیٹیگری کے وائٹ بال ماہر کھلاڑیوں کے لیے کم از کم دو فرسٹ کلاس میچ کھیلنا ضروری ہے۔ پاکستان اس وقت آئی سی سی ٹیسٹ رینکنگ میں نویں نمبر پر ہے اور ورلڈ ٹیسٹ چیمپئن شپ کی نو ٹیموں کی جدول میں آخری مقام پر ہے۔ وہ گزشتہ چار آئی سی سی ٹورنامنٹس میں ناک آؤٹ مرحلے تک بھی نہیں پہنچ سکا ہے۔

یو این آئی۔ م س