جنیوا/نئی دہلی، لوک سبھا کے اسپیکر اوم برلا کی قیادت میں ہندوستانی پارلیمانی وفد نے بین پارلیمانی یونین (آئی پی یو) کی 149ویں اسمبلی کی کارروائی کے دوران دیگر ممالک کے ساتھ باہمی تعلقات کو مضبوط بنانے اور پارلیمانوں کے درمیان تعاون کو فروغ دینے کے مقصد سے اسمبلی کے ساتھ ساتھ آئی پی یو کی قائمہ کمیٹیوں اور دیگر تقریبات میں سرگرمی سے حصہ لیا۔ آئی پی یو اسمبلی کی یہ کارروائی 13 اکتوبر 2024 کو جنیوا میں شروع ہوئی، جو آج بھی جاری رہی۔

مسٹر برلا نے اسمبلی کارروائی کے اختتامی دن آئی پی یو کی گورننگ کونسل میٹنگ میں شرکت کی۔ اس موقع پر لوک سبھا اسپیکر نے کہا کہ ہندوستانی وفد نے اسمبلی کے مرکزی موضوع سے متعلق اہم عالمی مسائل کی طرف توجہ مبذول کرائی جس پر ہندوستان نے اہم پیش رفت کی ہے اور بہترین طریقوں کا اشتراک کیا ہے۔ اس کے ساتھ ہی ہندوستان کے عالمی وعدوں کا اعادہ کرتے ہوئے انہوں نے باہمی تعاون پر پالیسی پر مبنی بحث اور مذاکرات میں حصہ لے کر تعاون مزید تعاون کی یقین دہانی کرائی ۔

لوک سبھا اسپیکر نے مزید کہا کہ آئی پی یو پارلیمانی تعاون کے ذریعے جامع ترقی اور امن کے لیے عالمی عزم کو آگے بڑھانے کے لیے ایک مفید پلیٹ فارم ہے۔

ریکارڈ کو برقرار رکھنے، پارلیمنٹ میں مباحثے اور تقریر کرنے کے ساتھ ساتھ دیگر معلومات کو لوگوں تک پہنچانے اور پارلیمنٹ کو لوگوں کے قریب لانے میں ٹیکنالوجی اور اے آئی کے استعمال پر روشنی ڈالتے ہوئے مسٹر برلا نے کہا کہ ٹیکنالوجی کے ذریعے اپنی پسند کی زبان میں ممبران پارلیمنٹ کے خیالات کا اظہار ممکن ہو گیا ہے، جس کی وجہ سے پارلیمنٹ کے بارے میں معلومات عوام تک پہنچنے میں آسانی ہوگئی ہے۔ انہوں نے یہ بھی کہا کہ عالمی برادری نے ہندوستان کی سبز، ٹیکنالوجی سے چلنے والی اور پیپر لیس پارلیمنٹ کی تعریف کی ہے۔

اراکین پارلیمنٹ اور عہدیداروں کی استعداد کار میں اضافے کے بارے میں بات کرتے ہوئے مسٹر برلا نے کہا کہ 100 سے زیادہ ممالک کے اسپیکروں اور اراکین پارلیمنٹ نے پرائڈ کو پارلیمانی تربیت کے ایک اعلیٰ عالمی ادارے کے طور پر تسلیم کیا ہے اور اس کی تعریف کی ہے۔ انہوں نے مزید کہا کہ پرائیڈ نے منتخب اراکین اور پارلیمنٹ سیکریٹریٹ کے عہدیداروں کو مختلف پارلیمانی موضوعات پر تربیت دی ہے۔

آئی پی یو اسمبلی کے دوران ہندوستانی پارلیمانی وفد نے دوسرے ممالک کے ساتھ تعلقات کو مضبوط بنانے اور پارلیمانی تعلقات کو فروغ دینے کے لیے بڑے پیمانے پر بات چیت اور مذاکرات کئے ۔

اسمبلی کے دوران مسٹر برلا نے نیپال، مالدیپ، آرمینیا، تھائی لینڈ، عمان، سوئٹزرلینڈ، آسٹریلیا، سیشلز، آئی پی یو کے صدر، الجیریا، زمبابوے، بھوٹان، یو اے ای کی پارلیمانوں کے پریذائیڈنگ افسران اور نمائندوں سے ملاقات کی۔ ان ملاقاتوں کے دوران لوک سبھا اسپیکر نے ڈیجیٹل انڈیا، اسٹارٹ اپ انڈیا، ڈی بی ٹی اسکیم وغیرہ جیسے اقدامات کا ذکر کرتے ہوئے ٹیکنالوجی کے استعمال کے ذریعے ہندوستان میں جامع اور پائیدار ترقی کی کامیابیوں کے بارے میں بتایا۔

مسٹر برلا نے قرارداد کا مسودہ تیار کرنے میں ہندوستانی پارلیمانی وفد کے اراکین کے فعال کردار اور ہندوستان کے جامع اور ٹیکنالوجی پر مبنی ترقی کے سفر کو آگے بڑھانے کے لیے قائمہ کمیٹی کے اجلاسوں میں ان کی شرکت کی تعریف کی۔ اسپیکر نے یقین ظاہر کیا کہ ہندوستانی پارلیمانی وفد کا یہ دورہ ہندوستان کی پارلیمنٹ کا موقف عالمی سطح پر پیش کرنے کے حوالے سے ایک یادگار دورہ ہوگا۔

لوک سبھا کے اسپیکر اوم برلا نے کل الجزائر کی قومی عوامی اسمبلی کے صدر ابراہیم بوغالی سے ملاقات کی۔ صدر جمہوریہ ہند کے حالیہ دورہ الجزائر کا حوالہ دیتے ہوئے لوک سبھا اسپیکر نے کہا کہ دونوں ممالک کے درمیان تجارتی، ثقافتی اور عوام کے درمیان تعلقات ہندوستان کے لیے بہت اہمیت کے حامل ہیں۔ استعمار کے خلاف جنگ میں ہندوستان اور الجزائر دونوں کے تاریخی سفر کا ذکر کرتے ہوئے انہوں نے خوشی کا اظہار کیا کہ دونوں ممالک نے امن، جمہوریت اور عوامی بہبود کو فروغ دینے کے لیے کامیابی سے کام کیا ہے۔

ہندوستان اور الجزائر کی پارلیمانوں کے درمیان باقاعدہ بات چیت کی ضرورت پر زور دیتے ہوئے لوک سبھا کے اسپیکر نے کہا کہ پارلیمانی تعاون باہمی تعلقات کا ایک لازمی پہلو ہے۔ انہوں نے کہا کہ حالیہ برسوں میں ہندوستان میں اہم تبدیلیاں رونما ہوئی ہیں۔ انہوں نے الجزائر کے باشندوں پر زور دیا کہ وہ ہندوستان میں مزید سرمایہ کاری کریں تاکہ وہ ہندوستان میں کاروبار کرنے میں آسانی کا فائدہ اٹھا سکیں۔ مسٹر برلا نے الجزائر کے اراکین پارلیمنٹ اور پارلیمنٹ کے افسروں کو پرائڈ لوک سبھا سکریٹریٹ میں منعقدہ صلاحیت سازی کے پروگرام میں شرکت کی دعوت دی۔

یو این آئی ۔ ع خ