کھیل

ون ڈے اور چیمپئنز ٹرافی ہماری پہلی ترجیح ہے :عاقب جاوید

Published

2 years ago

November 20, 2024

اسلام آباد، پاکستان ٹیم کے عبوری ہیڈ کوچ عاقب جاوید نے کہا ہے کہ ابھی ون ڈے اور چیمپئنز ٹرافی اولین ترجیح ہے، ٹی 20 میں کافی تبدیلیاں نظر آئیں گی، میرا کوچنگ میں 20 سال کا تجربہ ہے، ڈبل رول سے کوئی مشکل نہیں ہوگی، فخر زمان میچ ونر ہے، فٹ ہوگا تو ترجیح دی جائے گی۔

ڈان نیوز کے مطابق لاہور میں میڈیا سے گفتگو کرتے ہوئے عاقب جاوید نے کہاکہ فخر زمان کی فٹنس کے مسائل جیسے ہی حل ہوئے، ان کی سلیکشن کو دیکھیں گے، انہوں نے کہا کہ ملتان ٹیسٹ سے اب تک کوچ اور کپتان کی مشاورت کے بعد ہی سلیکش کمیٹی ٹیم کا اعلان کرتی ہے، ملتان ٹیسٹ سے لیکر اب تک ایسا کوئی موقع نہیں آیا کہ کوچ اور کپتان سے مشاورت نہ کی گئی ہو۔

انہوں نے کہا کہ ملتان ٹیسٹ میں جو ٹیم پہلا میچ کھیلی، اسی ٹیم نے راولپنڈی ٹیسٹ کھیلا، اسی طرح ون ڈے بھی میں جس ٹیم نے پہلا میچ کھیلا، تیسرے میچ میں بھی وہی ٹیم تھی، ہمارا مقصد یہ ہے کہ دستیاب کھلاڑیوں میں سے بہترین 11 کھلاڑیوں پر مشتمل ٹیم تشکیل دیکر پاکستان کے لیے میچ جیتنے کی کوشش کی جائے۔

ایک سوال پر انہوں نے کہاکہ کوچ ایک حد تک کردار ادا کرتا ہے، آپ ایک ماحول مہیا کرسکتے ہیں، واضح اور دوٹوک پیغامات دے سکتے ہیں کہ کیسی کرکٹ کھیلنی ہے، تیاری میں کھلاڑیوں کی مدد کرسکتے ہیں لیکن بلآخر نتیجہ تو ٹیم اور کپتان ہی لے کر آتا ہے۔

اس سوال پر کہ مستقبل میں ہیڈ کوچ اور کنوینر سلیکشن کمیٹی میں سے کس عہدے کو ترجیح دیں گے؟ عاقب جاوید نے کہاکہ پچھلے 20 سال سے کوچنگ کررہا ہوں، کوچنگ میرا پیشن اور پیشہ ہے، آگے جو مواقع نظر آئیں گے اس حساب سے فیصلہ کروں گا۔

انہوں نے کہاکہ بحیثیت کنوینر سلیکشن کمیٹی اور ہیڈ کوچ کو وہ ٹیم کے انتخاب کے لیے کپتان سے مشاورت کریں گے اور پھر اپنی اور کپتان کی رائے سلیکشن کمیٹی کے سامنے رکھیں گے جو ٹیم کا انتخاب کرے گی۔

دورہ آسٹریلیا سے متعلق سوال پر انہوں نے کہا کہ دورہ آسٹریلیا کبھی بھی پاکستان کیلئے آسان نہیں رہا، جب ٹیم جارہی تھی تو سب نے جیت کو خارج ازامکان قرار دیا تھا لیکن انہی کھلاڑیوں نے نئے کپتان کی قیادت میں یہ کردکھایا، جو 22 سال بعد بڑی کامیابی ہے، انہوں نے کہا کہ ٹی 20 میں بھی ہمارے پاس جیت کے مواقع آئے تھے،ٹی 20 میں میچ میں واپس آنے کے مواقع کم ہوتے ہیں، اگر انہیں بروقت استعمال نہ کریں تو میچ ہارجاتے ہیں۔

انہوں نے کہاکہ ابھی ون ڈے اور چیمپئنز ٹرافی ہماری پہلی ترجیح ہے، ابھی آپ کو ٹیم میں ایک تسلسل اور ہم آہنگی نظر آئےگی، ٹی 20 ورلڈکپ میں ابھی ایک سال سے زیادہ عرصہ باقی ہے، ٹی 20 میں کافی تبدیلیاں نظر آئیں گی، نئے کھلاڑیوں کو موقع دیا جائے گا۔

انہوں نے کہاکہ دورہ زمبابوے کے لیے بھی دونوں ٹیموں کی سلیکشن میں بڑے کھلاڑیوں کو آرام کرایا گیا ہے اور نئی کھلاڑیوں کو پیغام دیا گیا ہے کہ آپ کو موقع مل رہا ہے تو اس سے فائدہ اٹھائیں، انہوں نے کہاکہ جب تک مواقع مہیا نہیں کریں گے، کھلاڑیوں میں اضافہ نہیں ہوگا۔

عبوری ہیڈ کوچ نے ایک سوال پر کہا کہ صائم ایوب اچھی سمت میں جارہا ہے، ٹی 20 میں اس سے اچھے رن نہیں ہوئے لیکن ون ڈے اور ٹیسٹ میں جس طرح اس نے اپنا مزاج اور تکنیک دکھائی ہے، بالآخر وہ اچھا آپشن ہے، زمبابوے میں بھی نئے کھلاڑیوں کو موقع ملے گا۔

انہوں نے کہا کہ کوشش یہی ہے کہ ابھی توجہ ون ڈے پر مرکوز رکھیں اور ٹیم کو حتمی شکل دینے کی طرف جائیں اور ٹی 20 میں گنجائش رکھیں، ٹیم میں گنجائش رکھیں اور کھلاڑیوں کو موقع دیں گے تو نیا ٹیلنٹ ملے گا۔

یواین آئی۔ م س

کھیل

سروچی سنگھ اور کمل جیت سنگھ نے ہندوستان کو ایشیائی کھیلوں میں دوسرا طلائی تمغہ دلایا

Published

2 days ago

September 25, 2026

Online Desk

آئیچی-ناگویا (جاپان)، ہندوستان کی سروچی سنگھ اور کمل جیت سنگھ کی جوڑی نے جمعہ کو ایشیائی کھیلوں کے نشانہ بازی مقابلے میں 10 میٹر ایئر پسٹل مکسڈ مقابلے میں جنوبی کوریا کو پیچھے چھوڑتے ہوئے طلائی تمغہ حاصل کیا۔ یہ ایشیائی کھیلوں میں ہندوستان کا دوسرا تمغہ ہے۔

آج یہاں ہوئے مقابلے میں ہندوستانی جوڑی نے مجموعی طور پر 484.6 اسکور کے ساتھ سرفہرست مقام حاصل کیا۔ کمل جیت اور سروچی نے شروعات سے ہی اچھی برتری بنا لی تھی، لیکن جنوبی کوریا مسلسل ہندوستانی نشانہ بازوں پر دباؤ بنائے ہوئے تھا۔ تاہم ہندوستانی جوڑی نے دباؤ میں کوئی غلطی نہیں کی اور جنوبی کوریا کو 6.6 پوائنٹس کے فرق سے شکست دے کر طلائی تمغہ اپنے نام کرلیا۔ جنوبی کوریا 478 اسکور کے ساتھ دوسرے جبکہ ایران 415.8 اسکور کے ساتھ تیسرے مقام پر رہا۔

یو این آئی۔ ایم جے

کھیل

سلطان واریئرز بارہمولہ نے افتتاحی چنار پریمیئر لیگ کا خطاب جیت لیا

Published

2 weeks ago

September 15, 2026

Online Desk

سری نگر، سلطان واریئرز بارہمولہ نے افتتاحی چنار پریمیئر لیگ (سی پی ایل) کرکٹ ٹورنامنٹ 2026 کا خطاب جیت لیا۔ اس نے بارہمولہ کے جنرل بپن راوت اسٹیڈیم میں کھیلے گئے شاندار فائنل میں رمزی اسپورٹس سری نگر کو شکست دی۔

پہلے بلے بازی کرتے ہوئے سلطان واریئرز نے مقررہ اوورز میں 9 وکٹوں کے نقصان پر 182 رنز بنائے، جس کے جواب میں رمزی اسپورٹس سری نگر کی پوری ٹیم 142 رنز پر آؤٹ ہوگئی۔ اس طرح سلطان واریئرز نے شاندار کامیابی کے ساتھ خطاب اپنے نام کر لیا۔

سلطان واریئرز کے عاقب کھانڈے کو میچ جیتنے والی کارکردگی پر ’مین آف دی میچ‘ قرار دیا گیا، جبکہ ان کے ساتھی کھلاڑی عاصم بشیر کو پورے ٹورنامنٹ میں مسلسل عمدہ کارکردگی پر ’مین آف دی سیریز‘ کا اعزاز دیا گیا۔

فوج کی سری نگر چنار کور کی جانب سے منعقد کیے گئے اس ٹورنامنٹ میں ریکارڈ تعداد میں ٹیموں نے شرکت کی۔ مقابلے کے لیے 130 ٹیموں نے رجسٹریشن کرائی تھی، جن میں سے کشمیر وادی کے مختلف علاقوں سے 79 ٹیموں کا انتخاب کیا گیا۔

تقریب میں جموں و کشمیر کے چیف سیکریٹری اتل ڈلو کے علاوہ بارہمولہ میں تعینات ڈیگر ڈویژن کے جنرل آفیسر کمانڈنگ اور مقامی برادری کی ممتاز شخصیات نے شرکت کی۔

منتظمین نے کہا کہ سی پی ایل 2026 نے پوری کشمیر وادی کے کرکٹ ٹیلنٹ کو اپنی صلاحیتوں کے اظہار کا موقع فراہم کیا اور خاص طور پر نوجوانوں کے درمیان ہندوستانی فوج اور مقامی برادری کے تعلقات کو مضبوط بنانے کے لیے ایک پلیٹ فارم کے طور پر کام کیا۔

دفاعی ترجمان نے کہا کہ سی پی ایل 2026 کا کامیاب انعقاد خطے کے کھیلوں کے کیلنڈر میں ایک اہم سنگِ میل ہے۔ اس کے ذریعے وادی کے مختلف علاقوں سے تعلق رکھنے والے باصلاحیت نوجوان کرکٹرز کو اپنی صلاحیتیں دکھانے کا موقع ملا۔

یواین آئی۔ ظ ا

کھیل

بابر اعظم کی سات سال بعد ڈومیسٹک فرسٹ کلاس کرکٹ میں واپسی

Published

2 weeks ago

September 15, 2026

Online Desk

اسلام آباد، پاکستان کے ٹیسٹ کپتان بابر اعظم موجودہ پریذیڈنٹس ٹرافی گریڈ ون فرسٹ کلاس ٹورنامنٹ میں آئل اینڈ گیس ڈیولپمنٹ کمپنی لمیٹڈ (او جی ڈی سی ایل) کی نمائندگی کریں گے۔ انہیں ٹیم نے بطور گیسٹ کھلاڑی شامل کیا ہے۔

ذرائع کے مطابق بابر نے پاکستان کرکٹ بورڈ (پی سی بی) سے درخواست کی تھی کہ انہیں کسی ٹیم میں شامل کیا جائے تاکہ وہ طویل فارمیٹ میں اپنی فارم بہتر کرسکیں۔ اس کے بعد بورڈ نے انہیں او جی ڈی سی ایل کے ساتھ جوڑ دیا۔ بابر نے دسمبر 2022 کے بعد سے ٹیسٹ کرکٹ میں کوئی سنچری نہیں بنائی۔ اس کے بعد سے 39 اننگز میں وہ صرف آٹھ نصف سنچریاں بناسکے ہیں، جبکہ 2023 کے آغاز سے ٹیسٹ میں ان کی اوسط 30.43 رہی ہے۔

ان کی خراب فارم پاکستان کرکٹ میں مسلسل بحث کا موضوع بنی ہوئی ہے۔ حالیہ انگلینڈ دورے میں پاکستان کو تین ٹیسٹ کی سیریز میں 0-3 سے شکست ہوئی، جبکہ لارڈز اور ایجبسٹن ٹیسٹ میں انگلینڈ کے تیز گیندبازوں نے شارٹ گیند کے خلاف بابر کی کمزوری کا فائدہ اٹھایا۔ تاہم گزشتہ پانچ ٹیسٹ میں وہ چار نصف سنچریاں بناچکے ہیں اور گزشتہ ماہ ویسٹ انڈیز کے خلاف دوسرے ٹیسٹ میں ان کا اسکور 88 رنز رہا، جس سے پاکستان نے جولائی 2023 کے بعد پہلی بار بیرون ملک ٹیسٹ جیتا۔

بابر نے آخری بار 2019 میں ڈومیسٹک فرسٹ کلاس ٹورنامنٹ کھیلا تھا، جب انہوں نے سینٹرل پنجاب کی کپتانی کرتے ہوئے فائنل میں ناردرن کو شکست دے کر قائداعظم ٹرافی جیتی تھی۔ حالیہ برسوں میں ٹیسٹ اور آئی سی سی ٹورنامنٹس میں پاکستان کی خراب کارکردگی کے بعد پاکستانی کھلاڑیوں کے ڈومیسٹک فرسٹ کلاس کرکٹ میں زیادہ حصہ لینے کا مطالبہ کیا جاتا رہا ہے۔ اس سیزن میں شاہین شاہ آفریدی اور سلمان آغا سمیت کئی دیگر بین الاقوامی کھلاڑی بھی پریذیڈنٹس ٹرافی میں حصہ لے رہے ہیں۔

پی سی بی کے سینٹرل کنٹریکٹ کے تحت اے کیٹیگری کے ٹیسٹ ماہر کھلاڑیوں کے لیے سالانہ کم از کم چھ، اے بی کیٹیگری کے ٹیسٹ اور ون ڈے ماہر کھلاڑیوں کے لیے چار، جبکہ بی سی کیٹیگری کے وائٹ بال ماہر کھلاڑیوں کے لیے کم از کم دو فرسٹ کلاس میچ کھیلنا ضروری ہے۔ پاکستان اس وقت آئی سی سی ٹیسٹ رینکنگ میں نویں نمبر پر ہے اور ورلڈ ٹیسٹ چیمپئن شپ کی نو ٹیموں کی جدول میں آخری مقام پر ہے۔ وہ گزشتہ چار آئی سی سی ٹورنامنٹس میں ناک آؤٹ مرحلے تک بھی نہیں پہنچ سکا ہے۔

یو این آئی۔ م س