رضوان سلطان:
ریاست میں بی جے پی کے پی ڈی پی کے ساتھ اتحا د توڑنے کے صرف دس دن بعدہی پی ڈی پی پارٹی میں خلفشار پیدا ہو گیا ۔ اور کہی ممبران پارٹی کے خلاف بغاوت کرنے لگے ہیں ،جس کا سلسلہ اب بھی جاری ہے ۔جس سے صاف ظاہر ہوتا ہے کہ پارٹی کے اندر کچھ بھی ٹھیک نہیں چل رہا ،جو پارٹی صدر محبوبہ مفتی کے لئے بہت بری خبر ہے۔پارٹی کے کہی سینئرلیڈران نے پارٹی صدر محبوبہ مفتی پر الزامات کی بوچھاڑ کرتے ہوئے کہا ہے کہ وہ بڑے بڑے عہددوں پر اپنے رشتہ داروں کو تعینات کرتی ہیں ،جبکہ پارٹی کے دیگر لیڈران کی بات تک نہیں سُنتی۔
اس طرح کے الزامات لگانے والوں میں سب سے پہلے پارٹی سے ایم ایل اے جڈی بل عابد حسین انصاری سامنے آئے ،جنہوں نے محبوبہ مفتی پر پارٹی میں خاندانی راج قائم کرنے کاالزام لگایا ہے۔عابد حسین کے لگائے گئے الزامات کو تب تقویت ملی جب بھاجپا ۔پی ڈی پی سرکار میں منسٹر رہ چکے پارٹی کے سینئر لیڈر عمران رضا انصاری نے اپنے چچا عابد حسین کے لگائے گئے الزامات کو درست ٹھراتے ہوئے کہا کہ محبوبہ مفتی نے پارٹی کو اب ’’فیملی ڈیموکریٹک پارٹی ‘‘بنایا ہے ۔امکان ظاہر کیا جا رہا ہے کہ پارٹی کے کچھ اور لیڈران بھی ایسی ہی سوچ رکھتے ہیں ۔اسی طریقے سے ایک اور پارٹی لیڈر اور ایم ایل اے ٹنگمرگ محمد عباس وانی نے بھی ایسے ہی خیالات کا اظہار کرتے ہوئے کہا ہے کہ پارٹی کو کچھ لوگوں نے ہائی جیک کیا ہوا ہے۔وہیں ان تینوں نے اپنے الگ الگ دئے گئے بیانات میں پارٹی کو خدا حافظ کہہ دیا ہے ۔
محبو بہ مفتی اور اس کی پارٹی پر الزامات کا سلسلہ رکا ہی نہیں تھا کہ کل دو اورممبران نے پارٹی پر تیکھے وار کر کے باغی لیڈروں کی صف میں شامل ہونے کا اشارہ دے دیا ۔کل سویرے پی ڈی پی کے لیڈر اور نو رآباد سے ممبر اسمبلی مجید پڈر الزام لگایا کہ پارٹی میں نہ صرف میں بلکہ ۲۰ سے زائد ممبران گھٹن محسوس کر رہے ہیں ،کیونکہ پارٹی میں لئے جانے والے فیصلوں میں ہمیں کبھی اعتماد میں نہیں لیا جاتا ۔وہیں انہوں نے پارٹی سے الگ ہونے کا اشارہ دیتے ہوئے کہا کہ وہ ابھی پی ڈی پی کا حصہ ہیں ،لیکن اپنے حلقہ انتخاب کے لوگ مجھے اسی پارٹی کے ساتھ دیکھنا چاہتے ہیں ،جو سرکار بنائے گی ۔
کل دوپہر کے بعد ہی پی ڈی پی سے ایم ایل اے بارہ مولہ جاوید حسین بیگ نے کہا ہے انہوں نے پی ڈی پی میں ۲۰ سال ضائع کئے ہیں ،پارٹی میں صرف چاپلوس لوگوں کی جگہ ہے۔اس طریقے سے اب انہوں نے بھی پارٹی کے خلاف باغی تیور دیکھانا شروع کئے ہیں ۔اگر ذرائع پر یقین کیا جائے تو پی ڈی پی سے ۱۲ ایسے ممبران ہیں جو پارٹی سے الگ ہوسکتے ہیں ،جن میں عمران رضا انصاری ،عابد انصاری ،محمد عباس وانی ،عبدلمجید پڈر اور جاوید بیگ کے علاوہ ابھی کھل کر سامنے نہ آنے والوں میں عبدالحق خان ،راجہ منظور ،ایم ایل سی یاسر رشی ،عبدالرحیم راتھر ،حسیب درابو،چودھری قمر کے علاوہ شاہ محمد تانترے شامل ہیں ،جوشاید آنے والے دنوں میں اپنی زبان کھول سکتے ہیں ۔ اسکے علاوہ اور بھی کچھ ایسے نام ہیں جو آنے والے دنوں میں آگے آسکتے ہیں ۔ نیوز ۱۸ کے مطابق پی ڈی پی باغی ممبران بھاجپا کے رابطے میں ہیں اور جلد ہی ایک نیا محا ز کھڑاکرکے نئی حکومت تشکیل دے سکتے ہیں ۔
اگر پارٹی لیڈران کے لگائے گئے الزامات پر یقین کیا جائے تو حساس معاملات پارٹی کے سینئر لیڈر نعیم اختر ہی چلاتے ہیں ۔نعیم اختر کو ایم ایل سی چنے جانے کے بعد پارٹی کے انہیں کابینہ میں شامل کیا ۔اسی طرح محبوبہ مفتی نے اپنے بھائی تصدق مفتی کو (جن کا سیاست کے ساتھ دور دور کا واسطہ بھی نہیں ہے) کابینہ کا وزیر بنا دیا ۔جس سے پارٹی میں اندرونی معاملات میں مزید خرابی آئی ۔ تصدق پر الزام ہے کہ ان کے ٹیم ممبران میں اکثریت ان کے دوستوں اور رشتہ داروں کی ہے ۔محبوبہ مفتی کے ماموں سرتاج مدنی کو پارٹی کا نائب صدر بنانے پر بھی پارٹی لیڈران ناراض ہوگئے ہیں ۔
وہیں ان لئے گئے فیصلوں سے کہیں نہ کہیں محبوبہ مفتی کے پارٹی میں خاندانی راج قائم کرنے کے اشارے ملتے ہیں ، اب آنے والا وقت ہی بتائے گا کہ محبوبہ مفتی ان تمام پیدا شدہ مسائل سے کیسے نمٹتی ہیں ۔اور پی ڈی پی کے باغی لیڈران کی فہرست میں کتنے اور شامل ہوکے نیا محاز کھڑا کرنے میں کامیاب ہوتے ہیں یا نہیں ۔