نئی دہلی، دہلی کی وزیر اعلیٰ محترمہ ریکھا گپتا نے وزیر اعظم نریندر نریندر مودی کے جن سیوا اور راشٹر سیوا کے 25 سال پورے ہونے پر مرکزی حکومت کے تئیں اظہار تشکر کرتے ہوئے کہا ہے کہ دہلی کی ترقی میں مرکز کا اہم تعاون رہا ہے۔

بدھ کے روز ایک پریس کانفرنس سے خطاب کرتے ہوئے محترمہ گپتا نے کہا کہ دہلی کابینہ نے وزیر اعظم کے 25 سالہ عوامی زندگی اور ملک کی ترقی میں ان کے تعاون کی ستائش کرتے ہوئے متفقہ طور پر ایک تجویز پاس کی ہے۔ وزیر اعلیٰ نے کہا کہ وزیر اعظم نے ہمیشہ دہلی کو اپنی ترجیحات میں رکھا اور ضرورت پڑنے پر راجدھانی کی مدد کے لیے آگے آئے۔

انہوں نے کہا کہ وزیر اعظم کی میعاد کار کے پہلے دن سے لے کر اب تک دہلی کو مرکزی حکومت کی مختلف اسکیموں کا فائدہ ملتا رہا ہے۔ انہوں نے الزام لگایا کہ پچھلی حکومتوں نے سیاسی وجوہات کی بنا پر مرکز کی کچھ اسکیموں کو اپنانے میں دلچسپی نہیں دکھائی۔ فروری 2025 میں دہلی میں ان کی حکومت بننے کے بعد مرکز کی اسکیموں کا فائدہ براہ راست لوگوں تک پہنچانے کی سمت میں کام کیا گیا۔ انہوں نے کہا کہ حکومت کا مقصد دہلی کے باشندوں کو صحت، رہائش اور دیگر بنیادی سہولیات سے جڑی اسکیموں کا فائدہ فراہم کرنا ہے۔

آیوشمان بھارت یوجنا کا ذکر کرتے ہوئے وزیر اعلیٰ نے کہا کہ دہلی میں اس اسکیم کو نافذ کرنے کے ساتھ مرکزی حکومت کی جانب سے ملنے والے پانچ لاکھ روپے کے ہیلتھ کور میں ریاستی حکومت کی جانب سے پانچ لاکھ روپے اضافی جوڑے گئے ہیں۔ وزیر اعلیٰ کے مطابق، اب تک تقریباً نو لاکھ لوگ اس اسکیم کے تحت رجسٹریشن کراچکے ہیں اور تقریباً 65 ہزار دعووں کی ادائیگی کی جا چکی ہے۔ انہوں نے وے وندنا یوجنا اور جن اوشدھی یوجنا کا بھی ذکر کیا اور کہا کہ ان اسکیموں کے توسط سے لوگوں کو طبی سہولیات فراہم کرنے کی کوشش کی جا رہی ہے۔

انہوں نے بتایا کہ دہلی میں اب تک تقریباً 425 آیوشمان آروگیہ مندر قائم کیے جا چکے ہیں اور حکومت کا ہدف ان کی تعداد بڑھا کر تقریباً 1,100 کرنا ہے۔ پی ایم آواس یوجنا کا ذکر کرتے ہوئے انہوں نے کہا کہ ان کی حکومت دہلی کے باشندوں کو رہائش فراہم کرنے کی سمت میں بھی کام کر رہی ہے۔ انہوں نے دعویٰ کیا کہ مرکزی حکومت کی اسکیموں کو دہلی میں موثر طریقے سے نافذ کرنے سے عام لوگوں کو فائدہ مل رہا ہے اور حکومت مختلف شعبوں میں ترقیاتی کاموں کو آگے بڑھا رہی ہے۔

محترمہ گپتا نے انڈیا اتحاد کے احتجاجی مظاہرے اور ووٹر فہرستوں کی خصوصی تفصیلی نظر ثانی (ایس آئی آر) کو لے کر کانگریس اور عام آدمی پارٹی کو نشانہ بنایا۔ انہوں نے کہا کہ ایس آئی آر ملک میں پہلی بار نہیں ہو رہا ہے، بلکہ الیکشن کمیشن وقفے وقفے سے یہ عمل کراتا رہا ہے۔ ریکھا گپتا نے سوال اٹھایا کہ جب پہلے بھی یہ عمل ہوا، تب ان جماعتوں نے اس طرح کی مخالفت کیوں نہیں کی؟ انہوں نے کہا کہ دہلی میں آخری بار ایس آئی آر سال 2002 میں ہوا تھا اور کانگریس کو بعد کے انتخابات میں عوام کا تعاون نہیں ملا۔ وزیر اعلیٰ نے اپوزیشن کی مخالفت کو سیاسی مایوسی سے جوڑتے ہوئے کہا کہ عوام نے کانگریس اور عام آدمی پارٹی کو مسترد کر دیا ہے، جس کی وجہ سے وہ اس معاملے پر مظاہرہ کر رہے ہیں۔

انہوں نے عام آدمی پارٹی پر پنجاب کی امن و قانون کی صورتحال اور منشیات کے کاروبار سے جڑے امور پر توجہ نہ دینے کا الزام بھی عائد کیا۔ انہوں نے کہا کہ پنجاب میں قتل کی وارداتیں ہو رہی ہیں اور منشیات کے ریکٹ سرگرم ہیں، لیکن اپوزیشن دہلی میں مظاہرہ کرنے میں مصروف ہے۔ وزیر اعلیٰ نے الزام لگایا کہ کانگریس اور عام آدمی پارٹی اپنے سیاسی مفادات کے لیے عوام کو گمراہ کر رہی ہیں۔ انہوں نے دعویٰ کیا کہ احتجاجی مظاہروں کی وجہ سے دہلی میں تاجروں اور عام شہریوں کو پریشانی ہوئی ہے اور معاشی نقصان بھی اٹھانا پڑا ہے۔

یو این آئی ایف اے

نئی دہلی، کانگریس صدر ملکارجن کھرگے نے خصوصی تفصیلی نظر ثانی (ایس آئی آر) کے تحت ووٹر فہرست سے باہر کیے گئے 13.3 کروڑ ہندوستانیوں کو گھس پیٹھیا (درانداز) قرار دینے کو بھارتیتا (ہندوستانیت) کی توہین قرار دیا ہے۔

مسٹر کھرگے نے بدھ کو سوشل میڈیا ‘ایکس’ پر کہا کہ سپریم کورٹ کے فیصلے کے باوجود جنتر منتر کو احتجاج کے مقررہ مقام سے ہٹانا احتجاج کرنے کے حق کی چوری ہے۔ انہوں نے کہا کہ پہلے ووٹ کی چوری اور اب احتجاج کرنے کے حق کی چوری بی جے پی کی آمریت کا ثبوت ہے۔

اس سے پہلے کانگریس کے شعبہ مواصلات کے انچارج جے رام رمیش نے وزیر داخلہ امِت شاہ سے کہا کہ انہیں ایس آئی آر کے تحت پکڑے گئے گھس پیٹھیوں کی تعداد، ووٹر فہرست سے ہٹائے گئے گھس پیٹھیوں کی تعداد اور ملک سے نکالے گئے گھس پیٹھیوں کی تعداد بتانی چاہیے۔

انہوں نے کہا کہ ملک کے 100 کروڑ لوگوں کو ایس آئی آر کے عمل سے گزرنا پڑا ہے اور انہیں اس کے نتائج جاننے کا حق ہے۔ ان کا کہنا تھا کہ ایس آئی آر کا دفاع کرنے والے وزیر داخلہ بتائیں کہ کتنے گھس پیٹھیوں کا پتہ لگایا گیا، کتنے لوگوں کے نام ووٹر فہرست سے ہٹائے گئے اور کتنے گھس پیٹھیوں کو ملک سے باہر نکالا گیا۔

مسٹر رمیش نے الزام لگایا کہ ایس آئی آر کے پیچھے کے ماسٹر مائنڈ بار بار گھس پیٹھیوں کا مسئلہ اٹھا کر تقریباً 14 کروڑ ہندوستانیوں کو ان کے آئینی حقِ رائے دہی سے محروم کیے جانے کے معاملے سے توجہ ہٹانے کی کوشش کر رہے ہیں۔

انہوں نے کہا کہ وزیر داخلہ کو بتانا چاہیے کہ کیا ووٹر فہرست سے ہٹائے گئے 14 کروڑ ہندوستانی گھس پیٹھیے ہیں اور کیا ان کے دورِ اقتدار میں گھس پیٹھیوں کی تعداد میں اتنا بڑا اضافہ ہوا ہے۔

یو این آئی ایف اے

نئی دہلی، کانگریس کے سابق صدر اور لوک سبھا میں قائد حزب اختلاف راہل گاندھی نے کہا ہے کہ جنتر منتر پر پرامن مظاہرے کے دوران ترنگا لہرانا کوئی جرم نہیں ہے اور اس کے لیے نوجوانوں کو جیل میں ڈالنا بزدلی ہے۔

مسٹر گاندھی نے بدھ کو سوشل میڈیا ‘ایکس’ پر کہا کہ طلباء، نوجوان، صحافی اور انڈیا اتحاد کے لوگ الگ الگ بینروں کے تحت مظاہرہ کر رہے ہیں اور ان سب کا مقصد ایک ہی ہے۔ یہ تمام مظاہرے ملک کے شہریوں کی جانب سے اپنے آئینی حقوق کے مطالبے کے حق میں کیے جا رہے ہیں۔

انہوں نے کہا کہ جنتر منتر ہندوستان کے عوام کا ہے اور اسے عوام کے حق کے دائرے میں دوبارہ لایا جائے گا۔

یو این آئی ایف اے