نئی دہلی، روس کے صدر ولادیمیر پوتن نے ہفتہ کے روز مغربی ممالک کی طرف اشارہ کرتے ہوئے، “استعماری ذہنیت” والے ممالک پر ٹیرف وار، پابندیوں، دوسرے ممالک کے اندرونی معاملات میں مداخلت اور طاقت کے استعمال کے ذریعے کثیر قطبی دنیا کے ابھار کو متاثر کرنے کا الزام لگایا۔

انہوں نے یہاں منعقدہ 18ویں برکس سربراہ اجلاس سے خطاب کرتے ہوئے کہا کہ عالمی طاقت کا توازن ‘گلوبل ساؤتھ’ اور مشرق میں ترقی کے نئے مراکز کی طرف بڑھ رہا ہے۔ یہ ممالک اپنے قومی مفادات کو ترجیح دے رہے ہیں اور عالمی امور میں بڑے کردار کا مطالبہ کر رہے ہیں۔ ولادیمیر پوتن نے کہا، “بین الاقوامی تعلقات کا یک قطبی نظام، ممالک کے ایک چھوٹے سے گروہ کے مفاد میں تھا اور اب یہ ماضی کی بات ہوتی جا رہی ہے۔”

روسی سربراہ نے کہا کہ برکس کا وقار اور اثر و رسوخ مسلسل بڑھ رہا ہے، اور رکن ممالک سیاست و سکیورٹی، معیشت و مالیات، نیز ثقافتی و انسانی شعبوں میں تعاون بڑھا رہے ہیں۔ انہوں نے کہا، “یہ بالکل فطری ہے کہ دنیا میں برکس کا وقار اور اثر و رسوخ مسلسل بڑھ رہا ہے۔”

انہوں نے کہا کہ زیادہ سے زیادہ ممالک کھل کر اپنے قومی مفادات کا تحفظ کر رہے ہیں اور عالمی چیلنجوں سے نمٹنے کی کوششوں میں حصہ لے رہے ہیں؛ انہوں نے اس رجحان کو کثیر قطبی عالمی نظام کے ابھار کا حصہ بتایا۔ ولادیمیر پوتن نے کہا، “زیادہ سے زیادہ ممالک اپنے قومی مفادات کا تحفظ کرنے اور عالمی مسائل کو حل کرنے میں حصہ لینے کی اپنی تیاری کا زور دار اور واضح طور پر اظہار کر رہے ہیں۔”

تاہم، ولادیمیر پوتن نے خبردار کیا کہ کثیر قطبی دنیا کی طرف بڑھنے کے عمل کو ان ممالک کی جانب سے مزاحمت کا سامنا کرنا پڑ رہا ہے جو طاقت کے بدلتے توازن کو قبول کرنے کے لیے تیار نہیں ہیں۔ انہوں نے ایسے ممالک پر اقتصادی دباؤ، سیاسی مداخلت اور طاقت کے استعمال کے ذریعے حریفوں کی ترقی کو روکنے کی کوشش کرنے کا الزام لگایا۔

ولادیمیر پوتن نے کہا، “وہ بدلتی ہوئی حقیقت کو قبول کرنے کے لیے تیار نہیں ہیں اور ٹیرف وار، غیر قانونی پابندیوں، دوسرے ممالک کے اندرونی معاملات میں مداخلت اور مکمل طور پر طاقت کے استعمال سمیت مختلف طریقوں سے حریفوں کی ترقی کو روکنے کی کوشش کر رہے ہیں۔”

انہوں نے کہا کہ ایسی حرکتیں عدم استحکام کو بڑھا رہی ہیں اور ممالک کے درمیان تصادم اور اختلافات کو ہوا دے کر موجودہ بین الاقوامی نظام کو کمزور کر رہی ہیں۔

ولادیمیر پوتن نے کہا، “کشیدگی کے پرانے پوائنٹس کو بھڑکایا جا رہا ہے، اور زیادہ سے زیادہ نئے تصادم اور اختلافات پیدا کیے جا رہے ہیں۔ نتیجے کے طور پر، بین الاقوامی تعلقات کا پورا نظام ناکام ہو رہا ہے۔”

یواین آئی ایف اے

نئی دہلی، مغربی ایشیا میں مسلسل بڑھتی کشیدگی کے درمیان وزیر اعظم نریندر مودی نے جمعہ کو یہاں ایران کے صدر ڈاکٹر مسعود پیزشکیان کے ساتھ دو طرفہ بات چیت کی۔

برکس چوٹی کانفرنس سے الگ ہوئی بات چیت میں دونوں رہنماؤں نے دو طرفہ تعلقات کے مختلف پہلوؤں کے ساتھ مغربی ایشیا میں حالیہ پیش رفت پر بھی تبادلہ خیال کیا۔

مسٹر مودی نے دہرایا کہ تمام مسائل کا حل مذاکرات اور سفارت کاری کے ذریعے ہونا چاہیے۔ دونوں رہنماؤں کی دو ہفتے سے بھی کم عرصے میں یہ دوسری ملاقات ہے۔ اس سے پہلے 31 اگست کو بشکیک میں بھی شنگھائی تعاون تنظیم کی چوٹی کانفرنس سے الگ دونوں کی ملاقات ہوئی تھی۔

وزیر اعظم نے مشکل حالات کے باوجود برکس سے متعلق اجلاسوں میں ایران کی باقاعدہ اور اعلیٰ سطحی شرکت کی تعریف کی۔ انہوں نے کہا کہ عالمی جنوب کے ممالک کے درمیان استحکام، اختراع، تعاون اور استحکام کے جذبے کو مضبوط بنانے میں برکس اہل ہے۔ وزیر اعظم نے بزنس فورم کے رہنماؤں کے اجلاس میں صدر پیزشکیان کی شرکت کے لیے بھی ان کا شکریہ ادا کیا۔

مغربی ایشیا میں حالیہ پیش رفت پر دونوں رہنماؤں نے اپنے خیالات کا تبادلہ کیا۔ وزیر اعظم نے خطے میں طویل مدتی امن اور استحکام کو یقینی بنانے کے لیے مسلسل کوششوں کی ضرورت پر زور دیا۔ انہوں نے جہاز رانی اور تجارت کی آزادی برقرار رکھنے کے ساتھ ملاحوں کی سلامتی یقینی بنانے کی ضرورت پر بھی زور دیا۔

وزیر اعظم نے برکس سمیت کثیر فریقی تنظیموں میں مشترکہ مفادات کے امور پر ہندوستان اور ایران کے درمیان تعاون کی بھی تعریف کی۔

یو این آئی۔ این یو۔

نئی دہلی، وزیراعظم نریندر مودی نے دنیا میں تجارت کی توسیع کے لیے سمندری راستوں کو کھلا اور محفوظ رکھنے کی اہمیت پر زور دیتے ہوئے جمعہ کے روز کہا کہ تجارت کی راہ میں بڑھتی ہوئی رکاوٹوں کے درمیان ہندوستان معاشی رابطے کے پل بنانے میں مصروف ہے۔

نریندر مودی نے یہاں برکس سربراہ اجلاس کے آغازسے قبل آج منعقدہ برکس بزنس فورم سے خطاب کیا۔ روس کے صدر ولادیمیر پوتن اور ایران کے صدر مسعود پزشکیان بھی کانفرنس میں موجود تھے۔ انہوں نے کہا کہ برکس ممالک مل کر کام کریں گے تو دنیا بھر کے لیے مسائل اور ضروریات کا حل پیش کرنے کی صلاحیت رکھتے ہیں۔ اس سے پہلے نریندر مودی اور ولادیمیر پوتن نے ہندوستان-روس تجارتی نمائش ‘انوپروم’ کا بھی دورہ کیا۔ وزیراعظم نے کہا، “دنیا میں تجارت آگے تبھی بڑھ سکتی ہے جب سمندری راستے محفوظ ہوں، سپلائی کے راستے کھلے ہوں اور جہاز راں محفوظ ہوں۔ اسی لیے ہندوستان جہاز رانی کی آزادی اور جہاز رانوں کے تحفظ کا پرزور حامی ہے۔”

نریندر مودی نے کہا کہ دنیا میں آج جب تجارت کی راہ میں رکاوٹیں بڑھ رہی ہیں، ہندوستان (مختلف مارکیٹوں کے ساتھ) معاشی رابطے کا پل تعمیر کر رہا ہے۔” انہوں نے یہ باتیں ایسے وقت میں کہی ہیں جب مغربی ایشیا میں آبنائے ہرمز میں جہازوں کی آمد و رفت امریکہ-ایران جنگ کے باعث رک سی گئی ہے۔ اس کے علاوہ امریکہ اور کچھ دیگر ممالک دوسرے ممالک کے خلاف تجارت میں اونچے ٹیرف اور دیگر پابندیوں کے اقدامات کرنے میں لگے ہوئے ہیں۔

بھارت منڈپم میں منعقدہ اس پروگرام میں وزیراعظم نے کہا کہ “عالمی تشویشات کے درمیان بھی ہندوستان آج معاشی نمو اور استحکام کا بھروسہ دے رہا ہے۔” انہوں نے عالمی سرمایہ کار برادری کو ہندوستان میں جدت طرازی اور ایجادات کے لیے آنے اور یہاں سے دنیا کی مارکیٹوں کے لیے بڑے پیمانے پر پیداوار کرنے کی دعوت دی۔ انہوں نے برکس گروپ کی خواہشات کو عملی جامہ پہنانے کا اعادہ کرتے ہوئے کہا کہ برکس ممالک اپنی مشترکہ طاقت سے دنیا کے لیے تمام تر حل پیش کر سکتے ہیں۔

انہوں نے گروپ سے اپیل کی کہ، “برکس آگے بڑھے، اور دنیا کو بھی آگے بڑھائے۔”

یواین آئی ایف اے