لاہور، پاکستان کے کرکٹرز امام الحق اور محمد رضوان کو فٹنس ٹیسٹ رپورٹس جمع نہ کرانے پر پریزیڈنٹ ٹرافی گریڈ ون کے پہلے راؤنڈ میں کھیلنے سے روک دیا گیا ہے۔

پاکستانی میڈیا رپورٹ کے مطابق کھلاڑیوں کے محکموں کی جانب سے دونوں کرکٹرز کی فٹنس ٹیسٹ رپورٹس پاکستان کرکٹ بورڈ (پی سی بی) کو موصول نہیں ہوئیں۔ پی سی بی کے قواعد کے تحت فرسٹ کلاس کرکٹ میں شرکت کے لیے فٹنس ٹیسٹ رپورٹس جمع کرانا لازمی ہے۔

پریزیڈنٹ ٹرافی کا آغاز 12 ستمبر سے پنڈی، اسلام آباد، ایبٹ آباد اور پشاور میں ہوگا۔ امام الحق کو او جی ڈی سی ایل کی قیادت کرتے ہوئے پی ٹی وی کے خلاف میچ کھیلنا تھا، جبکہ شان مسعود کی عدم موجودگی میں محمد رضوان کو پہلے راؤنڈ میں سوئی گیس کی کپتانی کرنا تھی۔

ذرائع کے مطابق پی سی بی نے تمام کرکٹرز کے لیے ڈومیسٹک کرکٹ میں کم از کم پانچ میچز کھیلنا بھی لازمی قرار دے رکھا ہے۔ اس صورتحال میں دونوں کھلاڑیوں کے لیے اپنے سینٹرل کنٹریکٹ برقرار رکھنا بھی مشکل ہوسکتا ہے۔

امام الحق اور محمد رضوان پہلے ہی این سی سی آئی اے کی جانب سے مبینہ ڈریسنگ روم لیکس کے معاملے میں طلبی کا سامنا کر رہے ہیں۔ ایک طرف جاری تحقیقات اور دوسری جانب ڈومیسٹک کرکٹ سے باہر ہونے کے باعث دونوں کرکٹرز کے مستقبل کے حوالے سے سوالات اٹھ رہے ہیں۔

یو این آئی۔ م س

موکی (چین)، دفاعی چیمپئن ہندوستانی مردوں کی ٹیم نے ایشیائی جونیئر ہاکی ٹورنامنٹ میں شاندار کارکردگی کا مظاہرہ کرتے ہوئے میچ کے آخری لمحات میں تین گول داغے اور جنوبی کوریا کو 7-3 سے شکست دے دی۔

پہلے تین کوارٹرز میں مقابلہ برابر رہا اور دونوں ٹیمیں 3-3 سے برابر تھیں، لیکن چوتھے کوارٹر کے آخری لمحات میں ہندوستان نے صرف تین منٹ کے اندر تین گول کرکے کوریا کی جیت کی امیدیں ختم کردیں۔ اس کامیابی کے ساتھ ہندوستان کے تین میچوں میں سات پوائنٹس ہوگئے ہیں، جن میں دو فتوحات اور ایک ڈرا شامل ہے، اور ٹیم سیمی فائنل میں جگہ بنانے کے قریب پہنچ گئی ہے۔

کپتان اور اسٹار ڈریگ فلکر انمول ایکا نے ایک بار پھر ہندوستان کی کامیابی میں اہم کردار ادا کیا۔ انہوں نے دو گول کیے اور ٹورنامنٹ میں اپنے مجموعی گولوں کی تعداد آٹھ تک پہنچا دی۔

ہندوستان نے بہتر آغاز کیا اور پانچویں منٹ میں انمول نے پنالٹی کارنر کو گول میں تبدیل کرکے ٹیم کو برتری دلائی۔ تاہم، جنوبی کوریا نے اگلے ہی منٹ میں جواب دیتے ہوئے دوہیون چوئی کے پنالٹی کارنر پر کیے گئے گول کی مدد سے اسکور 1-1 کردیا۔ دوسرے کوارٹر میں بھی مقابلہ اسی طرح جاری رہا۔ 18ویں منٹ میں لولی نور سنگھ نے فیلڈ گول کرکے ہندوستان کو دوبارہ برتری دلائی، لیکن اگلے ہی منٹ میں جنوبی کوریا کے ہیوگک یو نے شارٹ کارنر کو گول میں تبدیل کرکے اسکور 2-2 کردیا۔ ہندوستان نے حملے میں برتری برقرار رکھی اور 20ویں منٹ میں اجیت یادو کے گول کی بدولت ہاف ٹائم تک 3-2 سے آگے رہا۔

دوسرے ہاف کے آغاز کے بعد بھی جنوبی کوریا نے ہمت نہیں ہاری اور ہندوستانی دفاع کو مسلسل آزماتی رہی۔

یو نے ایک بار پھر حملے کی قیادت کی اور تیسرے کوارٹر کے چھٹے منٹ میں اپنا دوسرا گول کرکے کوریا کو تیسری بار 3-3 سے برابری دلادی۔ مقابلہ برابر رہنے کے ساتھ آخری کوارٹر کی جانب بڑھ رہا تھا، لیکن ہندوستان نے شاندار کھیل کا مظاہرہ کیا۔ تیسرے کوارٹر کے اختتام پر پربھ دیپ سنگھ نے 42ویں منٹ میں گول کرکے ہندوستان کو 4-3 کی برتری دلائی اور آخری 15 منٹ کے لیے ٹیم کو برتری کا فائدہ فراہم کیا۔

چوتھے کوارٹر کے آغاز میں دونوں ٹیموں کی جانب سے حملوں کا سلسلہ جاری رہا، لیکن ہندوستان نے مسلسل دباؤ برقرار رکھا اور بالآخر صرف تین منٹ کے اندر تین گول کرکے کوریا کے دفاع کو توڑ دیا۔ گرسیوک سنگھ نے 55ویں منٹ میں ہندوستان کی برتری بڑھائی، جبکہ ایک منٹ بعد انمول نے پنالٹی کارنر پر گول کرکے اسکور 6-3 کردیا۔ اس کے بعد آریان زیس نے 58ویں منٹ میں گول کرکے ہندوستان کی فتح یقینی بنادی۔
اس شکست کے بعد جنوبی کوریا کے چھ پوائنٹس ہیں اور اس کا آخری لیگ میچ جاپان کے خلاف ہوگا۔ جاپان منگل کو بعد میں انڈونیشیا کے خلاف کھیلے گا اور چار پوائنٹس کے ساتھ سیمی فائنل کی دوڑ میں شامل ہے۔

ہندوستان بدھ کو اپنے آخری پول میچ میں چینی تائپے کا سامنا کرے گا اور ٹیم جانتی ہے کہ کامیابی اسے سیمی فائنل میں پہنچا دے گی۔

یو این آئی۔ م س

ممبئی، روہت شرما کی پوزیشن میں کوئی تبدیلی نہیں ہوئی ہے۔ بی سی سی آئی نے اشارہ دیا ہے کہ سابق کپتان کی جگہ پر فوری طور پر کوئی خطرہ نہیں ہے، جبکہ 2027 ورلڈ کپ کے لیے ان کی دستیابی کو لے کر کافی قیاس آرائیاں کی جا رہی تھیں۔

جمعرات کو بی سی سی آئی ہیڈکوارٹر میں ہندوستانی ٹیم کی کارکردگی کا جائزہ لینے کے بعد بی سی سی آئی کے سکریٹری دیوجیت سائکیہ نے کہا، ”آپ نے دیکھا ہو گا کہ وہ شاندار کھیل رہے ہیں۔“

اس میٹنگ میں ہندوستان کے دونوں کپتان – شبھمن گل (ٹیسٹ اور ون ڈے) اور شریاس ایئر (ٹی-20) – شامل ہوئے۔ ہیڈ کوچ گوتم گمبھیر اور سی او ای کے سربراہ وی وی ایس لکشمن بھی موجود تھے۔ سلیکٹرز کے چیئرمین اجیت اگرکر میٹنگ میں نہیں تھے۔ وہ ممبئی سے باہر تھے اور شاید ایسی جگہ پر تھے جہاں انٹرنیٹ نہیں تھا۔

دیوجیت سائکیہ نے جمعرات کو بورڈ کی پرفارمنس ریویو میٹنگ کے بعد روہت کی حمایت کی۔ انہوں نے سابق کپتان کی حالیہ فارم کا حوالہ دیتے ہوئے کہا کہ ان کے مستقبل کو لے کر کوئی قیاس آرائیاں نہیں کی جانی چاہئیں۔ انہوں نے مزید کہا، ”وہ تمام میچوں میں بہترین کھیل رہے ہیں۔ آپ کو اور کیا چاہیے؟ گزشتہ میچ میں انہوں نے 130-140 رن بنائے۔ تو پھر قیاس آرائیاں کیوں؟ میں قیاس آرائیاں کرنے والوں کو کوئی موقع نہیں دینا چاہتا۔“

گزشتہ سال ہندوستان کی چیمپئنز ٹرافی فتح کے بعد روہت کو ون ڈے کپتانی سے ہٹائے جانے کے بعد سے ہی ان کے مستقبل پر بحث چل رہی ہے۔ ان کی عمر کے باعث 2027 ورلڈ کپ میں ان کی شرکت پر سوال اٹھنے لگے تھے، لیکن جولائی میں انگلینڈ کے خلاف آخری ون ڈے میں سنچری بنا کر انہوں نے ان قیاس آرائیوں کا جواب دیا۔

39 سالہ روہت ہندوستان کے سب سے تجربہ کار ون ڈے بلے بازوں میں سے ایک ہیں، جنہوں نے اس فارمیٹ میں 11,895 رن بنائے ہیں اور 34 سنچریاں اسکور کی ہیں۔ ان کے نام ون ڈے میں سب سے زیادہ انفرادی اسکور (264 رن) کا ریکارڈ بھی ہے اور انہوں نے 2019 ورلڈ کپ میں پانچ سنچریاں لگائی تھیں۔

اس دوران، سائکیہ نے واضح کیا کہ جمعرات کی میٹنگ کوئی سلیکشن میٹنگ نہیں تھی اور ٹیم کی تشکیل کو لے کر کوئی فیصلہ نہیں لیا گیا۔ انہوں نے کہا، ”تو، آج ہماری کوئی سلیکشن میٹنگ نہیں تھی۔ یہ ایک روٹین میٹنگ تھی، جیسی ہم اکثر تین مہینے کے وقفے پر کرتے ہیں۔ آج ہماری میٹنگ ہیڈ کوچ، ہیڈ آف کرکٹ، سی او ای اور دو کپتانوں – ہمارے ٹی-20 کپتان اور ٹیسٹ و ون ڈے کپتان شبھمن – کے ساتھ ہوئی۔“ انہوں نے کہا، ”ہم نے بنیادی طور پر اس بات پر تبادلہ خیال کیا کہ ہماری ٹیم نے انگلینڈ اور آئرلینڈ میں کیسی کارکردگی دکھائی اور اگلے ایک سال میں ہم کیا کرنے والے ہیں۔ اس لیے، ایک روڈ میپ تیار کیا گیا ہے اور ہم کچھ ایسی سرگرمیاں کریں گے جس سے 2027 میں ہماری کارکردگی بہت اچھی ہو۔“

کھلاڑیوں کے ورک لوڈ اور چوٹ کے نظم و نسق پر بھی گفتگو ہوئی، جس میں بی سی سی آئی مصروف بین الاقوامی شیڈول کے دوران بہتر تیاری اور ریکوری یقینی بنانے کے طریقوں پر غور کر رہا ہے۔

”کھلاڑیوں کو چوٹیں اس لیے لگ رہی ہیں کیونکہ انہیں بہت سارے میچ کھیلنے پڑتے ہیں۔ اگر آپ ان کے شیڈول کو دیکھیں، تو انگلینڈ میں ون ڈے کے لیے ہماری 15 کھلاڑیوں کی ٹیم گئی تھی، اور ان میں سے 3 یا 4 کھلاڑی زخمی ہو گئے۔ ہمیں اس بات کا بھی دھیان رکھنا ہو گا کہ اس سے پہلے انہوں نے دو مہینے تک آئی پی ایل کھیلا تھا۔“

”اس لیے ان سب کا کھلاڑیوں کی صحت پر اثر پڑتا ہے۔ موجودہ ایف ٹی پی کے تحت ایسی صورتحال سے بچنے کے لیے ہم کچھ راستے تلاش کرنے کی کوشش کر رہے ہیں۔ ہمارے پاس ایک پروٹوکول ہے کہ چوٹ کے بعد کوئی کھلاڑی بین الاقوامی میچوں میں کیسے واپسی کر سکتا ہے۔ ہم ایسی ناخوشگوار صورتحال سے بچنے کے لیے صحیح حکمتِ عملی بنانے کے لیے کپتانوں اور چیف کوچ سے فیڈ بیک لے رہے ہیں۔ اگلے ایف ٹی پی میں، ہم اے سی این اے ممالک میں کسی بھی بڑی سیریز سے پہلے کھلاڑیوں کے لیے مناسب آرام، ماحول کے مطابق ڈھلنے یا کچھ پریکٹس میچوں کا انتظام یقینی بنائیں گے۔“

سائکیہ نے ان قیاس آرائیوں کو بھی مسترد کر دیا کہ لکشمن کو ہندوستانی کرکٹ سیٹ اپ میں کوئی نئی ذمہ داری دی جا سکتی ہے اور اشارہ دیا کہ اگرکر کی صدارت والی سلیکشن کمیٹی میں تبدیلی کا کوئی فوری منصوبہ نہیں ہے۔

یواین آئی۔الف الف