سری نگر، قومی تحقیقاتی ایجنسی (این آئی اے) نے ہفتہ کو کشمیر کے کئی مقامات پر تازہ تلاشی لی۔

سرکاری ذرائع نے بتایا کہ یہ کارروائی پاکستان میں موجود ہینڈلرز اور مقامی بالائی سطح کے کارکنوں کے ایک نیٹ ورک سے جڑی سرحد پار دہشت گردی کی سازش کی جاری تحقیقات کے تحت کی گئی۔

ذرائع نے بتایا کہ کُلگام، بانڈی پورہ، کپواڑہ اور بارہمولہ اضلاع کے کئی مقامات پر تلاشی کی کارروائی جاری تھی۔ 2 مشتبہ خواتین بالائی سطح کے کارکنوں کے گھروں کی بھی تلاشی لی جا رہی تھی۔

کارروائی کے دوران این آئی اے کی ٹیموں کو مقامی پولیس اور سلامتی اہلکاروں کی مدد حاصل رہی۔

یہ معاملہ مبینہ دہشت گردی کی حمایت کرنے والے ایک ایسے نیٹ ورک سے متعلق ہے، جو جموں و کشمیر میں دراندازی کرنے والے دہشت گردوں کو رسد اور دیگر مدد فراہم کر رہا تھا اور جس کے روابط پاکستان میں موجود ہینڈلرز سے تھے۔ تحقیقات میں دہشت گرد تنظیم لشکر طیبہ (ایل ای ٹی) سے وابستہ مقامی بالائی سطح کے کارکنوں کے مبینہ کردار کی بھی جانچ کی جا رہی ہے۔

تازہ تلاشی 22 اگست کو این آئی اے کی اس سے قبل کی کارروائی کے بعد کی گئی ہے، جب ایجنسی نے اسی تحقیقات کے سلسلے میں سری نگر، کپواڑہ، اننت ناگ، پلوامہ اور بڈگام میں 10 مقامات پر تلاشی لی تھی۔

ہفتہ کی تلاشی کی کارروائی کے بارے میں مزید تفصیلات کا انتظار تھا۔

یو این آئی، ایم جے

سری نگر، جموں و کشمیر میں انسداد بدعنوانی بیورو (اے سی بی) نے جمعہ کو بڈگام ضلع میں ایک پٹواری کو محصولاتی ریکارڈ کی تفصیل ’فرد‘ جاری کرنے کے بدلے شکایت کنندہ سے 10 ہزار روپے کی رشوت لیتے ہوئے رنگے ہاتھوں گرفتار کرلیا۔

ملزم کی شناخت بشیر احمد ڈار کے طور پر ہوئی ہے، جو تحصیل خانصاحب کے واٹر ہیل علاقے میں حلقہ گنڈ علی نائک کا پٹواری ہے۔

اے سی بی ذرائع کے مطابق ایک تحریری شکایت موصول ہوئی تھی، جس میں الزام لگایا گیا تھا کہ پٹواری نے ’فرد‘ جاری کرنے کے لیے شکایت کنندہ سے رشوت طلب کی تھی۔ شکایت کنندہ نے اپنے دادا کی جانب سے 21 جولائی، 2026 کو محصولاتی دستاویز کے لیے آن لائن درخواست دی تھی۔ اس کے بعد درخواست کی صورتحال جاننے کے لیے پٹواری سے رابطہ کیا۔

الزام ہے کہ ملزم نے محکمہ محصولات کے آن لائن پورٹل میں تکنیکی خرابی کا حوالہ دیا اور بعد میں مختلف بہانے بنا کر معاملے میں تاخیر کرتا رہا۔ ذرائع نے بتایا کہ پٹواری نے ابتدا میں 12000 روپے کا مطالبہ کیا تھا، جس پر بات چیت کے بعد معاملہ 10000 روپے میں طے ہوا۔

انہوں نے بتایا کہ جانچ میں الزام پہلی نظر میں درست پایا گیا۔ اس کے بعد بیورو نے اے سی بی پولیس اسٹیشن سری نگر میں بدعنوانی کی روک تھام کے قانون، 1988 کی دفعہ 7 کے تحت ایف آئی آر درج کی اور جانچ شروع کی۔ ایک جال بچھانے والی ٹیم تشکیل دی گئی، جس کے بعد ملزم کو شکایت کنندہ سے 10 ہزار روپے کی رشوت مانگتے اور لیتے ہوئے رنگے ہاتھوں پکڑ لیا گیا۔

آزاد گواہوں کی موجودگی میں اس کے پاس سے رشوت کی رقم برآمد کی گئی اور ملزم کو حراست میں لے لیا گیا۔ ذرائع نے کہا کہ معاملے کی جانچ کی جا رہی ہے۔

یو این آئی۔ این یو۔

سری نگر، جموں و کشمیر کے کولگام ضلع میں پولیس نے جمعہ کو ایک ایسے مفرور شخص کو گرفتار کرلیا جو گزشتہ پانچ برس سے گرفتاری سے بچ رہا تھا۔

پولیس نے بتایا کہ کولگام کے اوکے علاقے کے رہنے والے محمد اسحاق شیخ کو پولیس اسٹیشن کولگام میں درج کیس ایف آئی آر نمبر 152/2021، این ڈی پی ایس ایکٹ کی دفعات 8/15 اور 29 کے تحت مطلوب تھا۔

پولیس کے مطابق مخصوص اطلاع ملنے کے بعد مفرور شخص کو گرفتار کیا گیا۔

پولیس نے کہاکہ ’’مخصوص اطلاع پر کارروائی کرتے ہوئے پولیس اسٹیشن کولگام کی ایک ٹیم نے سخت کوششوں کے بعد مذکورہ مفرور کو کولگام سے گرفتار کرلیا۔ تمام قانونی کارروائیاں مکمل کرنے کے بعد ملزم کو سیشن کورٹ کولگام میں پیش کیا گیا، جہاں سے اسے سینٹرل جیل کوٹ بلوال، جموں بھیج دیا گیا ہے۔‘‘

پولیس نے کہا کہ وہ تمام مفرور افراد اور جرائم میں ملوث لوگوں کو انصاف کے کٹہرے میں لانے اور اس بات کو یقینی بنانے کے لیے پرعزم ہے کہ کوئی بھی قانون سے بچ نہ سکے۔

یواین آئی۔ طا